| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৫. পঞ্চমসিক্খাপদং
5. Pañcamasikkhāpadaṃ
৭৫৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী গিলানা হোতি। অথ খো অঞ্ঞতরো উপাসকো যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৰা থুল্লনন্দং ভিক্খুনিং এতদৰোচ – ‘‘কচ্চি, অয্যে, খমনীযং কচ্চি যাপনীয’’ন্তি? ‘‘ন মে, আৰুসো, খমনীযং, ন যাপনীয’’ন্তি। ‘‘অমুকস্স, অয্যে, আপণিকস্স ঘরে কহাপণং নিক্খিপিস্সামি, ততো যং ইচ্ছেয্যাসি তং আহরাপেয্যাসী’’তি। থুল্লনন্দা ভিক্খুনী অঞ্ঞতরং সিক্খমানং আণাপেসি – ‘‘গচ্ছ, সিক্খমানে, অমুকস্স আপণিকস্স ঘরা কহাপণস্স তেলং আহরা’’তি। অথ খো সা সিক্খমানা তস্স আপণিকস্স ঘরা কহাপণস্স তেলং আহরিত্ৰা থুল্লনন্দায ভিক্খুনিযা অদাসি। থুল্লনন্দা ভিক্খুনী এৰমাহ – ‘‘ন মে, সিক্খমানে, তেলেন অত্থো, সপ্পিনা মে অত্থো’’তি। অথ খো সা সিক্খমানা যেন সো আপণিকো তেনুপসঙ্কমি; উপসঙ্কমিত্ৰা তং আপণিকং এতদৰোচ – ‘‘ন কির, আৰুসো, অয্যায তেলেন অত্থো, সপ্পিনা অত্থো, হন্দ তে তেলং, সপ্পিং মে দেহী’’তি। ‘‘সচে মযং, অয্যে, ৰিক্কীতং ভণ্ডং পুন আদিযিস্সাম, কদা অম্হাকং ভণ্ডং ৰিক্কাযিস্সতি! তেলস্স কযেন তেলং হটং, সপ্পিস্স কযং আহর, সপ্পিং হরিস্সসী’’তি। অথ খো সা সিক্খমানা রোদন্তী অট্ঠাসি। ভিক্খুনিযো তং সিক্খমানং এতদৰোচুং – ‘‘কিস্স ত্ৰং, সিক্খমানে, রোদসী’’তি? অথ খো সা সিক্খমানা ভিক্খুনীনং এতমত্থং আরোচেসি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা অঞ্ঞং চেতাপেত্ৰা অঞ্ঞং চেতাপেস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী অঞ্ঞং চেতাপেত্ৰা অঞ্ঞং চেতাপেতীতি 1? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী অঞ্ঞং চেতাপেত্ৰা অঞ্ঞং চেতাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
753. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī gilānā hoti. Atha kho aññataro upāsako yena thullanandā bhikkhunī tenupasaṅkami; upasaṅkamitvā thullanandaṃ bhikkhuniṃ etadavoca – ‘‘kacci, ayye, khamanīyaṃ kacci yāpanīya’’nti? ‘‘Na me, āvuso, khamanīyaṃ, na yāpanīya’’nti. ‘‘Amukassa, ayye, āpaṇikassa ghare kahāpaṇaṃ nikkhipissāmi, tato yaṃ iccheyyāsi taṃ āharāpeyyāsī’’ti. Thullanandā bhikkhunī aññataraṃ sikkhamānaṃ āṇāpesi – ‘‘gaccha, sikkhamāne, amukassa āpaṇikassa gharā kahāpaṇassa telaṃ āharā’’ti. Atha kho sā sikkhamānā tassa āpaṇikassa gharā kahāpaṇassa telaṃ āharitvā thullanandāya bhikkhuniyā adāsi. Thullanandā bhikkhunī evamāha – ‘‘na me, sikkhamāne, telena attho, sappinā me attho’’ti. Atha kho sā sikkhamānā yena so āpaṇiko tenupasaṅkami; upasaṅkamitvā taṃ āpaṇikaṃ etadavoca – ‘‘na kira, āvuso, ayyāya telena attho, sappinā attho, handa te telaṃ, sappiṃ me dehī’’ti. ‘‘Sace mayaṃ, ayye, vikkītaṃ bhaṇḍaṃ puna ādiyissāma, kadā amhākaṃ bhaṇḍaṃ vikkāyissati! Telassa kayena telaṃ haṭaṃ, sappissa kayaṃ āhara, sappiṃ harissasī’’ti. Atha kho sā sikkhamānā rodantī aṭṭhāsi. Bhikkhuniyo taṃ sikkhamānaṃ etadavocuṃ – ‘‘kissa tvaṃ, sikkhamāne, rodasī’’ti? Atha kho sā sikkhamānā bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā aññaṃ cetāpetvā aññaṃ cetāpessatī’’ti…pe… saccaṃ kira, bhikkhave, thullanandā bhikkhunī aññaṃ cetāpetvā aññaṃ cetāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī aññaṃ cetāpetvā aññaṃ cetāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৭৫৪. ‘‘যা পন ভিক্খুনী অঞ্ঞং চেতাপেত্ৰা অঞ্ঞং চেতাপেয্য, নিস্সগ্গিযং পাচিত্তিয’’ন্তি।
754.‘‘Yā pana bhikkhunī aññaṃ cetāpetvā aññaṃ cetāpeyya, nissaggiyaṃ pācittiya’’nti.
৭৫৫. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
755.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
অঞ্ঞং চেতাপেত্ৰাতি যং কিঞ্চি চেতাপেত্ৰা।
Aññaṃcetāpetvāti yaṃ kiñci cetāpetvā.
অঞ্ঞং চেতাপেয্যাতি তং ঠপেত্ৰা অঞ্ঞং চেতাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, অঞ্ঞং চেতাপেত্ৰা অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি।
Aññaṃ cetāpeyyāti taṃ ṭhapetvā aññaṃ cetāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me, ayye, aññaṃ cetāpetvā aññaṃ cetāpitaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
৭৫৬. অঞ্ঞে অঞ্ঞসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞে ৰেমতিকা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞে অনঞ্ঞসঞ্ঞা অঞ্ঞং চেতাপেতি, নিস্সগ্গিযং পাচিত্তিযং।
756. Aññe aññasaññā aññaṃ cetāpeti, nissaggiyaṃ pācittiyaṃ. Aññe vematikā aññaṃ cetāpeti, nissaggiyaṃ pācittiyaṃ. Aññe anaññasaññā aññaṃ cetāpeti, nissaggiyaṃ pācittiyaṃ.
অনঞ্ঞে অঞ্ঞসঞ্ঞা অনঞ্ঞং চেতাপেতি, আপত্তি দুক্কটস্স। অনঞ্ঞে ৰেমতিকা অনঞ্ঞং চেতাপেতি, আপত্তি দুক্কটস্স। অনঞ্ঞে অনঞ্ঞসঞ্ঞা অনাপত্তি।
Anaññe aññasaññā anaññaṃ cetāpeti, āpatti dukkaṭassa. Anaññe vematikā anaññaṃ cetāpeti, āpatti dukkaṭassa. Anaññe anaññasaññā anāpatti.
৭৫৭. অনাপত্তি তঞ্ঞেৰ 3 চেতাপেতি, অঞ্ঞঞ্চ চেতাপেতি, আনিসংসং দস্সেত্ৰা চেতাপেতি, উম্মত্তিকায, আদিকম্মিকাযাতি।
757. Anāpatti taññeva 4 cetāpeti, aññañca cetāpeti, ānisaṃsaṃ dassetvā cetāpeti, ummattikāya, ādikammikāyāti.
পঞ্চমসিক্খাপদং নিট্ঠিতং।
Pañcamasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / পঞ্চমনিস্সগ্গিযপাচিত্তিযসিক্খাপদৰণ্ণনা • Pañcamanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. নিস্সগ্গিযকণ্ডং (ভিক্খুনীৰিভঙ্গৰণ্ণনা) • 3. Nissaggiyakaṇḍaṃ (bhikkhunīvibhaṅgavaṇṇanā)
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৫. পঞ্চমনিস্সগ্গিযপাচিত্তিযসিক্খাপদৰণ্ণনা • 5. Pañcamanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. দুতিযনিস্সগ্গিযাদিপাচিত্তিযসিক্খাপদৰণ্ণনা • 2. Dutiyanissaggiyādipācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. পঞ্চমনিস্সগ্গিযপাচিত্তিযসিক্খাপদং • 5. Pañcamanissaggiyapācittiyasikkhāpadaṃ
