| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৫. পঞ্চমসিক্খাপদং
5. Pañcamasikkhāpadaṃ
৮১০. তেন সমযেন বুদ্ধো ভগৰা সক্কেসু ৰিহরতি কপিলৰত্থুস্মিং নিগ্রোধারামে। অথ খো মহাপজাপতি গোতমী যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা অধোৰাতে অট্ঠাসি – ‘‘দুগ্গন্ধো, ভগৰা, মাতুগামো’’তি। অথ খো ভগৰা – ‘‘আদিযন্তু খো ভিক্খুনিযো উদকসুদ্ধিক’’ন্তি, মহাপজাপতিং গোতমিং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো মহাপজাপতি গোতমী ভগৰতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা ভগৰন্তং অভিৰাদেত্ৰা পদক্খিণং কত্ৰা পক্কামি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, ভিক্খুনীনং উদকসুদ্ধিক’’ন্তি। তেন খো পন সমযেন অঞ্ঞতরা ভিক্খুনী – ‘‘ভগৰতা উদকসুদ্ধিকা অনুঞ্ঞাতা’’তি অতিগম্ভীরং উদকসুদ্ধিকং আদিযন্তী মুত্তকরণে ৰণং অকাসি। অথ খো সা ভিক্খুনী ভিক্খুনীনং এতমত্থং আরোচেতি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – কথঞ্হি নাম ভিক্খুনী অতিগম্ভীরং উদকসুদ্ধিকং আদিযিস্সতীতি…পে॰… সচ্চং কির, ভিক্খৰে, ভিক্খুনী অতিগম্ভীরং উদকসুদ্ধিকং আদিযতী’’তি 1? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ভিক্খুনী অতিগম্ভীরং উদকসুদ্ধিকং আদিযিস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
810. Tena samayena buddho bhagavā sakkesu viharati kapilavatthusmiṃ nigrodhārāme. Atha kho mahāpajāpati gotamī yena bhagavā tenupasaṅkami; upasaṅkamitvā bhagavantaṃ abhivādetvā adhovāte aṭṭhāsi – ‘‘duggandho, bhagavā, mātugāmo’’ti. Atha kho bhagavā – ‘‘ādiyantu kho bhikkhuniyo udakasuddhika’’nti, mahāpajāpatiṃ gotamiṃ dhammiyā kathāya sandassesi samādapesi samuttejesi sampahaṃsesi. Atha kho mahāpajāpati gotamī bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, bhikkhunīnaṃ udakasuddhika’’nti. Tena kho pana samayena aññatarā bhikkhunī – ‘‘bhagavatā udakasuddhikā anuññātā’’ti atigambhīraṃ udakasuddhikaṃ ādiyantī muttakaraṇe vaṇaṃ akāsi. Atha kho sā bhikkhunī bhikkhunīnaṃ etamatthaṃ āroceti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhunī atigambhīraṃ udakasuddhikaṃ ādiyissatīti…pe… saccaṃ kira, bhikkhave, bhikkhunī atigambhīraṃ udakasuddhikaṃ ādiyatī’’ti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī atigambhīraṃ udakasuddhikaṃ ādiyissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৮১১. ‘‘উদকসুদ্ধিকং পন ভিক্খুনিযা আদিযমানায দ্ৰঙ্গুলপব্বপরমং আদাতব্বং। তং অতিক্কামেন্তিযা পাচিত্তিয’’ন্তি।
811.‘‘Udakasuddhikaṃ pana bhikkhuniyā ādiyamānāya dvaṅgulapabbaparamaṃ ādātabbaṃ. Taṃ atikkāmentiyā pācittiya’’nti.
৮১২. উদকসুদ্ধিকং নাম মুত্তকরণস্স ধোৰনা ৰুচ্চতি।
812.Udakasuddhikaṃ nāma muttakaraṇassa dhovanā vuccati.
আদিযমানাযাতি ধোৰন্তিযা।
Ādiyamānāyāti dhovantiyā.
দ্ৰঙ্গুলপব্বপরমং আদাতব্বন্তি দ্ৰীসু অঙ্গুলেসু দ্ৰে পব্বপরমা আদাতব্বা।
Dvaṅgulapabbaparamaṃ ādātabbanti dvīsu aṅgulesu dve pabbaparamā ādātabbā.
তং অতিক্কামেন্তিযাতি সম্ফস্সং সাদিযন্তী অন্তমসো কেসগ্গমত্তম্পি অতিক্কামেতি, আপত্তি পাচিত্তিযস্স।
Taṃ atikkāmentiyāti samphassaṃ sādiyantī antamaso kesaggamattampi atikkāmeti, āpatti pācittiyassa.
৮১৩. অতিরেকদ্ৰঙ্গুলপব্বে অতিরেকসঞ্ঞা আদিযতি, আপত্তি পাচিত্তিযস্স। অতিরেকদ্ৰঙ্গুলপব্বে ৰেমতিকা আদিযতি, আপত্তি পাচিত্তিযস্স । অতিরেকদ্ৰঙ্গুলপব্বে ঊনকসঞ্ঞা আদিযতি, আপত্তি পাচিত্তিযস্স ।
813. Atirekadvaṅgulapabbe atirekasaññā ādiyati, āpatti pācittiyassa. Atirekadvaṅgulapabbe vematikā ādiyati, āpatti pācittiyassa . Atirekadvaṅgulapabbe ūnakasaññā ādiyati, āpatti pācittiyassa .
ঊনকদ্ৰঙ্গুলপব্বে অতিরেকসঞ্ঞা, আপত্তি দুক্কটস্স। ঊনকদ্ৰঙ্গুলপব্বে ৰেমতিকা, আপত্তি দুক্কটস্স। ঊনকদ্ৰঙ্গুলপব্বে ঊনকসঞ্ঞা, অনাপত্তি।
Ūnakadvaṅgulapabbe atirekasaññā, āpatti dukkaṭassa. Ūnakadvaṅgulapabbe vematikā, āpatti dukkaṭassa. Ūnakadvaṅgulapabbe ūnakasaññā, anāpatti.
৮১৪. অনাপত্তি দ্ৰঙ্গুলপব্বপরমং আদিযতি, ঊনকদ্ৰঙ্গুলপব্বপরমং আদিযতি, আবাধপচ্চযা, উম্মত্তিকায, আদিকম্মিকাযাতি।
814. Anāpatti dvaṅgulapabbaparamaṃ ādiyati, ūnakadvaṅgulapabbaparamaṃ ādiyati, ābādhapaccayā, ummattikāya, ādikammikāyāti.
পঞ্চমসিক্খাপদং নিট্ঠিতং।
Pañcamasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ৫. পঞ্চমসিক্খাপদৰণ্ণনা • 5. Pañcamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. লসুণৰগ্গৰণ্ণনা • 1. Lasuṇavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৫. পঞ্চমসিক্খাপদৰণ্ণনা • 5. Pañcamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমলসুণাদিসিক্খাপদৰণ্ণনা • 1. Paṭhamalasuṇādisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. পঞ্চমসিক্খাপদং • 5. Pañcamasikkhāpadaṃ
