| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၅. ပဉ္စမသိက္ခာပဒံ
5. Pañcamasikkhāpadaṃ
၈၁၀. တေန သမယေန ဗုဒ္ဓော ဘဂဝာ သက္ကေသု ဝိဟရတိ ကပိလဝတ္ထုသ္မိံ နိဂ္ရောဓာရာမေ။ အထ ခော မဟာပဇာပတိ ဂောတမီ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ အဓောဝာတေ အဋ္ဌာသိ – ‘‘ဒုဂ္ဂန္ဓော, ဘဂဝာ, မာတုဂာမော’’တိ။ အထ ခော ဘဂဝာ – ‘‘အာဒိယန္တု ခော ဘိက္ခုနိယော ဥဒကသုဒ္ဓိက’’န္တိ, မဟာပဇာပတိံ ဂောတမိံ ဓမ္မိယာ ကထာယ သန္ဒသ္သေသိ သမာဒပေသိ သမုတ္တေဇေသိ သမ္ပဟံသေသိ။ အထ ခော မဟာပဇာပတိ ဂောတမီ ဘဂဝတာ ဓမ္မိယာ ကထာယ သန္ဒသ္သိတာ သမာဒပိတာ သမုတ္တေဇိတာ သမ္ပဟံသိတာ ဘဂဝန္တံ အဘိဝာဒေတ္ဝာ ပဒက္ခိဏံ ကတ္ဝာ ပက္ကာမိ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဘိက္ခုနီနံ ဥဒကသုဒ္ဓိက’’န္တိ။ တေန ခော ပန သမယေန အညတရာ ဘိက္ခုနီ – ‘‘ဘဂဝတာ ဥဒကသုဒ္ဓိကာ အနုညာတာ’’တိ အတိဂမ္ဘီရံ ဥဒကသုဒ္ဓိကံ အာဒိယန္တီ မုတ္တကရဏေ ဝဏံ အကာသိ။ အထ ခော သာ ဘိက္ခုနီ ဘိက္ခုနီနံ ဧတမတ္ထံ အာရောစေတိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ကထဉ္ဟိ နာမ ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယိသ္သတီတိ။ပေ.။ သစ္စံ ကိရ, ဘိက္ခဝေ, ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယတီ’’တိ 1? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယိသ္သတိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
810. Tena samayena buddho bhagavā sakkesu viharati kapilavatthusmiṃ nigrodhārāme. Atha kho mahāpajāpati gotamī yena bhagavā tenupasaṅkami; upasaṅkamitvā bhagavantaṃ abhivādetvā adhovāte aṭṭhāsi – ‘‘duggandho, bhagavā, mātugāmo’’ti. Atha kho bhagavā – ‘‘ādiyantu kho bhikkhuniyo udakasuddhika’’nti, mahāpajāpatiṃ gotamiṃ dhammiyā kathāya sandassesi samādapesi samuttejesi sampahaṃsesi. Atha kho mahāpajāpati gotamī bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, bhikkhunīnaṃ udakasuddhika’’nti. Tena kho pana samayena aññatarā bhikkhunī – ‘‘bhagavatā udakasuddhikā anuññātā’’ti atigambhīraṃ udakasuddhikaṃ ādiyantī muttakaraṇe vaṇaṃ akāsi. Atha kho sā bhikkhunī bhikkhunīnaṃ etamatthaṃ āroceti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhunī atigambhīraṃ udakasuddhikaṃ ādiyissatīti…pe… saccaṃ kira, bhikkhave, bhikkhunī atigambhīraṃ udakasuddhikaṃ ādiyatī’’ti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī atigambhīraṃ udakasuddhikaṃ ādiyissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
၈၁၁. ‘‘ဥဒကသုဒ္ဓိကံ ပန ဘိက္ခုနိယာ အာဒိယမာနာယ ဒ္ဝင္ဂုလပဗ္ဗပရမံ အာဒာတဗ္ဗံ။ တံ အတိက္ကာမေန္တိယာ ပာစိတ္တိယ’’န္တိ။
811.‘‘Udakasuddhikaṃ pana bhikkhuniyā ādiyamānāya dvaṅgulapabbaparamaṃ ādātabbaṃ. Taṃ atikkāmentiyā pācittiya’’nti.
၈၁၂. ဥဒကသုဒ္ဓိကံ နာမ မုတ္တကရဏသ္သ ဓောဝနာ ဝုစ္စတိ။
812.Udakasuddhikaṃ nāma muttakaraṇassa dhovanā vuccati.
အာဒိယမာနာယာတိ ဓောဝန္တိယာ။
Ādiyamānāyāti dhovantiyā.
ဒ္ဝင္ဂုလပဗ္ဗပရမံ အာဒာတဗ္ဗန္တိ ဒ္ဝီသု အင္ဂုလေသု ဒ္ဝေ ပဗ္ဗပရမာ အာဒာတဗ္ဗာ။
Dvaṅgulapabbaparamaṃ ādātabbanti dvīsu aṅgulesu dve pabbaparamā ādātabbā.
တံ အတိက္ကာမေန္တိယာတိ သမ္ဖသ္သံ သာဒိယန္တီ အန္တမသော ကေသဂ္ဂမတ္တမ္ပိ အတိက္ကာမေတိ, အာပတ္တိ ပာစိတ္တိယသ္သ။
Taṃ atikkāmentiyāti samphassaṃ sādiyantī antamaso kesaggamattampi atikkāmeti, āpatti pācittiyassa.
၈၁၃. အတိရေကဒ္ဝင္ဂုလပဗ္ဗေ အတိရေကသညာ အာဒိယတိ, အာပတ္တိ ပာစိတ္တိယသ္သ။ အတိရေကဒ္ဝင္ဂုလပဗ္ဗေ ဝေမတိကာ အာဒိယတိ, အာပတ္တိ ပာစိတ္တိယသ္သ ။ အတိရေကဒ္ဝင္ဂုလပဗ္ဗေ ဦနကသညာ အာဒိယတိ, အာပတ္တိ ပာစိတ္တိယသ္သ ။
813. Atirekadvaṅgulapabbe atirekasaññā ādiyati, āpatti pācittiyassa. Atirekadvaṅgulapabbe vematikā ādiyati, āpatti pācittiyassa . Atirekadvaṅgulapabbe ūnakasaññā ādiyati, āpatti pācittiyassa .
ဦနကဒ္ဝင္ဂုလပဗ္ဗေ အတိရေကသညာ, အာပတ္တိ ဒုက္ကဋသ္သ။ ဦနကဒ္ဝင္ဂုလပဗ္ဗေ ဝေမတိကာ, အာပတ္တိ ဒုက္ကဋသ္သ။ ဦနကဒ္ဝင္ဂုလပဗ္ဗေ ဦနကသညာ, အနာပတ္တိ။
Ūnakadvaṅgulapabbe atirekasaññā, āpatti dukkaṭassa. Ūnakadvaṅgulapabbe vematikā, āpatti dukkaṭassa. Ūnakadvaṅgulapabbe ūnakasaññā, anāpatti.
၈၁၄. အနာပတ္တိ ဒ္ဝင္ဂုလပဗ္ဗပရမံ အာဒိယတိ, ဦနကဒ္ဝင္ဂုလပဗ္ဗပရမံ အာဒိယတိ, အာဗာဓပစ္စယာ, ဥမ္မတ္တိကာယ, အာဒိကမ္မိကာယာတိ။
814. Anāpatti dvaṅgulapabbaparamaṃ ādiyati, ūnakadvaṅgulapabbaparamaṃ ādiyati, ābādhapaccayā, ummattikāya, ādikammikāyāti.
ပဉ္စမသိက္ခာပဒံ နိဋ္ဌိတံ။
Pañcamasikkhāpadaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၅. ပဉ္စမသိက္ခာပဒဝဏ္ဏနာ • 5. Pañcamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၁. လသုဏဝဂ္ဂဝဏ္ဏနာ • 1. Lasuṇavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၅. ပဉ္စမသိက္ခာပဒဝဏ္ဏနာ • 5. Pañcamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမလသုဏာဒိသိက္ခာပဒဝဏ္ဏနာ • 1. Paṭhamalasuṇādisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၅. ပဉ္စမသိက္ခာပဒံ • 5. Pañcamasikkhāpadaṃ
