| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༥. པཉྩམསིཀྑཱཔདཾ
5. Pañcamasikkhāpadaṃ
༧༥༣. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཐུལླནནྡཱ བྷིཀྑུནཱི གིལཱནཱ ཧོཏི། ཨཐ ཁོ ཨཉྙཏརོ ཨུཔཱསཀོ ཡེན ཐུལླནནྡཱ བྷིཀྑུནཱི ཏེནུཔསངྐམི; ཨུཔསངྐམིཏྭཱ ཐུལླནནྡཾ བྷིཀྑུནིཾ ཨེཏདཝོཙ – ‘‘ཀཙྩི, ཨཡྻེ, ཁམནཱིཡཾ ཀཙྩི ཡཱཔནཱིཡ’’ནྟི? ‘‘ན མེ, ཨཱཝུསོ, ཁམནཱིཡཾ, ན ཡཱཔནཱིཡ’’ནྟི། ‘‘ཨམུཀསྶ, ཨཡྻེ, ཨཱཔཎིཀསྶ གྷརེ ཀཧཱཔཎཾ ནིཀྑིཔིསྶཱམི, ཏཏོ ཡཾ ཨིཙྪེཡྻཱསི ཏཾ ཨཱཧརཱཔེཡྻཱསཱི’’ཏི། ཐུལླནནྡཱ བྷིཀྑུནཱི ཨཉྙཏརཾ སིཀྑམཱནཾ ཨཱཎཱཔེསི – ‘‘གཙྪ, སིཀྑམཱནེ, ཨམུཀསྶ ཨཱཔཎིཀསྶ གྷརཱ ཀཧཱཔཎསྶ ཏེལཾ ཨཱཧརཱ’’ཏི། ཨཐ ཁོ སཱ སིཀྑམཱནཱ ཏསྶ ཨཱཔཎིཀསྶ གྷརཱ ཀཧཱཔཎསྶ ཏེལཾ ཨཱཧརིཏྭཱ ཐུལླནནྡཱཡ བྷིཀྑུནིཡཱ ཨདཱསི། ཐུལླནནྡཱ བྷིཀྑུནཱི ཨེཝམཱཧ – ‘‘ན མེ, སིཀྑམཱནེ, ཏེལེན ཨཏྠོ, སཔྤིནཱ མེ ཨཏྠོ’’ཏི། ཨཐ ཁོ སཱ སིཀྑམཱནཱ ཡེན སོ ཨཱཔཎིཀོ ཏེནུཔསངྐམི; ཨུཔསངྐམིཏྭཱ ཏཾ ཨཱཔཎིཀཾ ཨེཏདཝོཙ – ‘‘ན ཀིར, ཨཱཝུསོ, ཨཡྻཱཡ ཏེལེན ཨཏྠོ, སཔྤིནཱ ཨཏྠོ, ཧནྡ ཏེ ཏེལཾ, སཔྤིཾ མེ དེཧཱི’’ཏི། ‘‘སཙེ མཡཾ, ཨཡྻེ, ཝིཀྐཱིཏཾ བྷཎྜཾ པུན ཨཱདིཡིསྶཱམ, ཀདཱ ཨམྷཱཀཾ བྷཎྜཾ ཝིཀྐཱཡིསྶཏི! ཏེལསྶ ཀཡེན ཏེལཾ ཧཊཾ, སཔྤིསྶ ཀཡཾ ཨཱཧར, སཔྤིཾ ཧརིསྶསཱི’’ཏི། ཨཐ ཁོ སཱ སིཀྑམཱནཱ རོདནྟཱི ཨཊྛཱསི། བྷིཀྑུནིཡོ ཏཾ སིཀྑམཱནཾ ཨེཏདཝོཙུཾ – ‘‘ཀིསྶ ཏྭཾ, སིཀྑམཱནེ, རོདསཱི’’ཏི? ཨཐ ཁོ སཱ སིཀྑམཱནཱ བྷིཀྑུནཱིནཾ ཨེཏམཏྠཾ ཨཱརོཙེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ ཨཉྙཾ ཙེཏཱཔེཏྭཱ ཨཉྙཾ ཙེཏཱཔེསྶཏཱི’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི ཨཉྙཾ ཙེཏཱཔེཏྭཱ ཨཉྙཾ ཙེཏཱཔེཏཱིཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི ཨཉྙཾ ཙེཏཱཔེཏྭཱ ཨཉྙཾ ཙེཏཱཔེསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
753. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī gilānā hoti. Atha kho aññataro upāsako yena thullanandā bhikkhunī tenupasaṅkami; upasaṅkamitvā thullanandaṃ bhikkhuniṃ etadavoca – ‘‘kacci, ayye, khamanīyaṃ kacci yāpanīya’’nti? ‘‘Na me, āvuso, khamanīyaṃ, na yāpanīya’’nti. ‘‘Amukassa, ayye, āpaṇikassa ghare kahāpaṇaṃ nikkhipissāmi, tato yaṃ iccheyyāsi taṃ āharāpeyyāsī’’ti. Thullanandā bhikkhunī aññataraṃ sikkhamānaṃ āṇāpesi – ‘‘gaccha, sikkhamāne, amukassa āpaṇikassa gharā kahāpaṇassa telaṃ āharā’’ti. Atha kho sā sikkhamānā tassa āpaṇikassa gharā kahāpaṇassa telaṃ āharitvā thullanandāya bhikkhuniyā adāsi. Thullanandā bhikkhunī evamāha – ‘‘na me, sikkhamāne, telena attho, sappinā me attho’’ti. Atha kho sā sikkhamānā yena so āpaṇiko tenupasaṅkami; upasaṅkamitvā taṃ āpaṇikaṃ etadavoca – ‘‘na kira, āvuso, ayyāya telena attho, sappinā attho, handa te telaṃ, sappiṃ me dehī’’ti. ‘‘Sace mayaṃ, ayye, vikkītaṃ bhaṇḍaṃ puna ādiyissāma, kadā amhākaṃ bhaṇḍaṃ vikkāyissati! Telassa kayena telaṃ haṭaṃ, sappissa kayaṃ āhara, sappiṃ harissasī’’ti. Atha kho sā sikkhamānā rodantī aṭṭhāsi. Bhikkhuniyo taṃ sikkhamānaṃ etadavocuṃ – ‘‘kissa tvaṃ, sikkhamāne, rodasī’’ti? Atha kho sā sikkhamānā bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā aññaṃ cetāpetvā aññaṃ cetāpessatī’’ti…pe… saccaṃ kira, bhikkhave, thullanandā bhikkhunī aññaṃ cetāpetvā aññaṃ cetāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī aññaṃ cetāpetvā aññaṃ cetāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༧༥༤. ‘‘ཡཱ པན བྷིཀྑུནཱི ཨཉྙཾ ཙེཏཱཔེཏྭཱ ཨཉྙཾ ཙེཏཱཔེཡྻ, ནིསྶགྒིཡཾ པཱཙིཏྟིཡ’’ནྟི།
754.‘‘Yā pana bhikkhunī aññaṃ cetāpetvā aññaṃ cetāpeyya, nissaggiyaṃ pācittiya’’nti.
༧༥༥. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
755.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཨཉྙཾ ཙེཏཱཔེཏྭཱཏི ཡཾ ཀིཉྩི ཙེཏཱཔེཏྭཱ།
Aññaṃcetāpetvāti yaṃ kiñci cetāpetvā.
ཨཉྙཾ ཙེཏཱཔེཡྻཱཏི ཏཾ ཋཔེཏྭཱ ཨཉྙཾ ཙེཏཱཔེཏི, པཡོགེ དུཀྐཊཾ། པཊིལཱབྷེན ནིསྶགྒིཡཾ ཧོཏི། ནིསྶཛྫིཏབྦཾ སངྒྷསྶ ཝཱ གཎསྶ ཝཱ ཨེཀབྷིཀྑུནིཡཱ ཝཱ། ཨེཝཉྩ པན, བྷིཀྑཝེ, ནིསྶཛྫིཏབྦཾ…པེ॰… ‘‘ཨིདཾ མེ, ཨཡྻེ, ཨཉྙཾ ཙེཏཱཔེཏྭཱ ཨཉྙཾ ཙེཏཱཔིཏཾ ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱི’’ཏི…པེ॰… དདེཡྻཱཏི…པེ॰… དདེཡྻུནྟི…པེ॰… ཨཡྻཱཡ དམྨཱིཏི།
Aññaṃ cetāpeyyāti taṃ ṭhapetvā aññaṃ cetāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me, ayye, aññaṃ cetāpetvā aññaṃ cetāpitaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
༧༥༦. ཨཉྙེ ཨཉྙསཉྙཱ ཨཉྙཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨཉྙེ ཝེམཏིཀཱ ཨཉྙཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨཉྙེ ཨནཉྙསཉྙཱ ཨཉྙཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
756. Aññe aññasaññā aññaṃ cetāpeti, nissaggiyaṃ pācittiyaṃ. Aññe vematikā aññaṃ cetāpeti, nissaggiyaṃ pācittiyaṃ. Aññe anaññasaññā aññaṃ cetāpeti, nissaggiyaṃ pācittiyaṃ.
ཨནཉྙེ ཨཉྙསཉྙཱ ཨནཉྙཾ ཙེཏཱཔེཏི, ཨཱཔཏྟི དུཀྐཊསྶ། ཨནཉྙེ ཝེམཏིཀཱ ཨནཉྙཾ ཙེཏཱཔེཏི, ཨཱཔཏྟི དུཀྐཊསྶ། ཨནཉྙེ ཨནཉྙསཉྙཱ ཨནཱཔཏྟི།
Anaññe aññasaññā anaññaṃ cetāpeti, āpatti dukkaṭassa. Anaññe vematikā anaññaṃ cetāpeti, āpatti dukkaṭassa. Anaññe anaññasaññā anāpatti.
༧༥༧. ཨནཱཔཏྟི ཏཉྙེཝ 3 ཙེཏཱཔེཏི, ཨཉྙཉྩ ཙེཏཱཔེཏི, ཨཱནིསཾསཾ དསྶེཏྭཱ ཙེཏཱཔེཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
757. Anāpatti taññeva 4 cetāpeti, aññañca cetāpeti, ānisaṃsaṃ dassetvā cetāpeti, ummattikāya, ādikammikāyāti.
པཉྩམསིཀྑཱཔདཾ ནིཊྛིཏཾ།
Pañcamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / པཉྩམནིསྶགྒིཡཔཱཙིཏྟིཡསིཀྑཱཔདཝཎྞནཱ • Pañcamanissaggiyapācittiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༣. ནིསྶགྒིཡཀཎྜཾ (བྷིཀྑུནཱིཝིབྷངྒཝཎྞནཱ) • 3. Nissaggiyakaṇḍaṃ (bhikkhunīvibhaṅgavaṇṇanā)
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. པཉྩམནིསྶགྒིཡཔཱཙིཏྟིཡསིཀྑཱཔདཝཎྞནཱ • 5. Pañcamanissaggiyapācittiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༢. དུཏིཡནིསྶགྒིཡཱདིཔཱཙིཏྟིཡསིཀྑཱཔདཝཎྞནཱ • 2. Dutiyanissaggiyādipācittiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༥. པཉྩམནིསྶགྒིཡཔཱཙིཏྟིཡསིཀྑཱཔདཾ • 5. Pañcamanissaggiyapācittiyasikkhāpadaṃ
