| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༥. པཉྩམསིཀྑཱཔདཾ
5. Pañcamasikkhāpadaṃ
༨༥༤. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཉྙཏརཱ བྷིཀྑུནཱི ཨཉྙཏརསྶ ཀུལསྶ ཀུལཱུཔིཀཱ ཧོཏི ནིཙྩབྷཏྟིཀཱ། ཨཐ ཁོ སཱ བྷིཀྑུནཱི པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཡེན ཏཾ ཀུལཾ ཏེནུཔསངྐམི; ཨུཔསངྐམིཏྭཱ ཨཱསནེ ནིསཱིདིཏྭཱ སཱམིཀེ ཨནཱཔུཙྪཱ པཀྐཱམི། ཏསྶ ཀུལསྶ དཱསཱི གྷརཾ སམྨཛྫནྟཱི ཏཾ ཨཱསནཾ བྷཱཛནནྟརིཀཱཡ པཀྑིཔི། མནུསྶཱ ཏཾ ཨཱསནཾ ཨཔསྶནྟཱ ཏཾ བྷིཀྑུནིཾ ཨེཏདཝོཙུཾ – ‘‘ཀཧཾ ཏཾ, ཨཡྻེ, ཨཱསན’’ནྟི? ‘‘ནཱཧཾ ཏཾ, ཨཱཝུསོ, ཨཱསནཾ པསྶཱམཱི’’ཏི། ‘‘དེཐཱཡྻེ, ཏཾ ཨཱསན’’ནྟི པརིབྷཱསིཏྭཱ ནིཙྩབྷཏྟཾ པཙྪིནྡིཾསུ། ཨཐ ཁོ ཏེ མནུསྶཱ གྷརཾ སོདྷེནྟཱ ཏཾ ཨཱསནཾ བྷཱཛནནྟརིཀཱཡ པསྶིཏྭཱ ཏཾ བྷིཀྑུནིཾ ཁམཱཔེཏྭཱ ནིཙྩབྷཏྟཾ པཊྛཔེསུཾ། ཨཐ ཁོ སཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནཱི པུརེབྷཏྟཾ ཀུལཱནི ཨུཔསངྐམིཏྭཱ ཨཱསནེ ནིསཱིདིཏྭཱ སཱམིཀེ ཨནཱཔུཙྪཱ པཀྐམིསྶཏཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནཱི པུརེབྷཏྟཾ ཀུལཱནི ཨུཔསངྐམིཏྭཱ ཨཱསནེ ནིསཱིདིཏྭཱ སཱམིཀེ ཨནཱཔུཙྪཱ པཀྐམཏཱིཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ བྷིཀྑུནཱི པུརེབྷཏྟཾ ཀུལཱནི ཨུཔསངྐམིཏྭཱ ཨཱསནེ ནིསཱིདིཏྭཱ སཱམིཀེ ཨནཱཔུཙྪཱ པཀྐམིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
854. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā bhikkhunī aññatarassa kulassa kulūpikā hoti niccabhattikā. Atha kho sā bhikkhunī pubbaṇhasamayaṃ nivāsetvā pattacīvaramādāya yena taṃ kulaṃ tenupasaṅkami; upasaṅkamitvā āsane nisīditvā sāmike anāpucchā pakkāmi. Tassa kulassa dāsī gharaṃ sammajjantī taṃ āsanaṃ bhājanantarikāya pakkhipi. Manussā taṃ āsanaṃ apassantā taṃ bhikkhuniṃ etadavocuṃ – ‘‘kahaṃ taṃ, ayye, āsana’’nti? ‘‘Nāhaṃ taṃ, āvuso, āsanaṃ passāmī’’ti. ‘‘Dethāyye, taṃ āsana’’nti paribhāsitvā niccabhattaṃ pacchindiṃsu. Atha kho te manussā gharaṃ sodhentā taṃ āsanaṃ bhājanantarikāya passitvā taṃ bhikkhuniṃ khamāpetvā niccabhattaṃ paṭṭhapesuṃ. Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkamissatī’’ti…pe… saccaṃ kira, bhikkhave, bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkamatīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkamissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༨༥༥. ‘‘ཡཱ པན བྷིཀྑུནཱི པུརེབྷཏྟཾ ཀུལཱནི ཨུཔསངྐམིཏྭཱ ཨཱསནེ ནིསཱིདིཏྭཱ སཱམིཀེ ཨནཱཔུཙྪཱ པཀྐམེཡྻ, པཱཙིཏྟིཡ’’ནྟི།
855.‘‘Yā pana bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkameyya, pācittiya’’nti.
༨༥༦. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
856.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
པུརེབྷཏྟཾ ནཱམ ཨརུཎུགྒམནཾ ཨུཔཱདཱཡ ཡཱཝ མཛ྄ཛྷནྷིཀཱ།
Purebhattaṃ nāma aruṇuggamanaṃ upādāya yāva majjhanhikā.
ཀུལཾ ནཱམ ཙཏྟཱརི ཀུལཱནི – ཁཏྟིཡཀུལཾ, བྲཱཧྨཎཀུལཾ, ཝེསྶཀུལཾ, སུདྡཀུལཾ། ཨུཔསངྐམིཏྭཱཏི ཏཏྠ གནྟྭཱ།
Kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ, suddakulaṃ. Upasaṅkamitvāti tattha gantvā.
ཨཱསནཾ ནཱམ པལླངྐསྶ ཨོཀཱསོ ཝུཙྩཏི། ནིསཱིདིཏྭཱཏི ཏསྨིཾ ནིསཱིདིཏྭཱ།
Āsanaṃ nāma pallaṅkassa okāso vuccati. Nisīditvāti tasmiṃ nisīditvā.
སཱམིཀེ ཨནཱཔུཙྪཱ པཀྐམེཡྻཱཏི ཡོ ཏསྨིཾ ཀུལེ མནུསྶོ ཝིཉྙཱུ ཏཾ ཨནཱཔུཙྪཱ ཨནོཝསྶཀཾ ཨཏིཀྐཱམེནྟིཡཱ ཨཱཔཏྟི པཱཙིཏྟིཡསྶ། ཨཛ྄ཛྷོཀཱསེ ཨུཔཙཱརཾ ཨཏིཀྐཱམེནྟིཡཱ ཨཱཔཏྟི པཱཙིཏྟིཡསྶ།
Sāmike anāpucchā pakkameyyāti yo tasmiṃ kule manusso viññū taṃ anāpucchā anovassakaṃ atikkāmentiyā āpatti pācittiyassa. Ajjhokāse upacāraṃ atikkāmentiyā āpatti pācittiyassa.
༨༥༧. ཨནཱཔུཙྪིཏེ ཨནཱཔུཙྪིཏསཉྙཱ པཀྐམཏི, ཨཱཔཏྟི པཱཙིཏྟིཡསྶ། ཨནཱཔུཙྪིཏེ ཝེམཏིཀཱ པཀྐམཏི, ཨཱཔཏྟི པཱཙིཏྟིཡསྶ། ཨནཱཔུཙྪིཏེ ཨཱཔུཙྪིཏསཉྙཱ པཀྐམཏི, ཨཱཔཏྟི པཱཙིཏྟིཡསྶ།
857. Anāpucchite anāpucchitasaññā pakkamati, āpatti pācittiyassa. Anāpucchite vematikā pakkamati, āpatti pācittiyassa. Anāpucchite āpucchitasaññā pakkamati, āpatti pācittiyassa.
པལླངྐསྶ ཨནོཀཱསེ ཨཱཔཏྟི དུཀྐཊསྶ། ཨཱཔུཙྪིཏེ ཨནཱཔུཙྪིཏསཉྙཱ, ཨཱཔཏྟི དུཀྐཊསྶ། ཨཱཔུཙྪིཏེ ཝེམཏིཀཱ, ཨཱཔཏྟི དུཀྐཊསྶ། ཨཱཔུཙྪིཏེ ཨཱཔུཙྪིཏསཉྙཱ, ཨནཱཔཏྟི།
Pallaṅkassa anokāse āpatti dukkaṭassa. Āpucchite anāpucchitasaññā, āpatti dukkaṭassa. Āpucchite vematikā, āpatti dukkaṭassa. Āpucchite āpucchitasaññā, anāpatti.
༨༥༨. ཨནཱཔཏྟི ཨཱཔུཙྪཱ གཙྪཏི, ཨསཾཧཱརིམེ, གིལཱནཱཡ, ཨཱཔདཱསུ, ཨུམྨཏྟིཀཱཡ, ཨཱདིཀམྨིཀཱཡཱཏི།
858. Anāpatti āpucchā gacchati, asaṃhārime, gilānāya, āpadāsu, ummattikāya, ādikammikāyāti.
པཉྩམསིཀྑཱཔདཾ ནིཊྛིཏཾ།
Pañcamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༥. པཉྩམསིཀྑཱཔདཝཎྞནཱ • 5. Pañcamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༢. ཨནྡྷཀཱརཝགྒཝཎྞནཱ • 2. Andhakāravaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. པཉྩམསིཀྑཱཔདཝཎྞནཱ • 5. Pañcamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༤. ཙཏུཏྠསིཀྑཱཔདཾ • 4. Catutthasikkhāpadaṃ
