| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༥. པཉྩམསིཀྑཱཔདཾ
5. Pañcamasikkhāpadaṃ
༩༠༢. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཉྙཏརཱ བྷིཀྑུནཱི པིཎྜཱཡ ཙརིཏྭཱ ཨལླཙཱིཝརཾ པཏྠརིཏྭཱ ཝིཧཱརཾ པཱཝིསི། ཨཉྙཏརཱ བྷིཀྑུནཱི ཏཾ ཙཱིཝརཾ པཱརུཔིཏྭཱ གཱམཾ པིཎྜཱཡ པཱཝིསི། སཱ ནིཀྑམིཏྭཱ བྷིཀྑུནིཡོ པུཙྪི – ‘‘ཨཔཱཡྻེ, མཡ྄ཧཾ ཙཱིཝརཾ པསྶེཡྻཱཐཱ’’ཏི? བྷིཀྑུནིཡོ ཏསྶཱ བྷིཀྑུནིཡཱ ཨེཏམཏྠཾ ཨཱརོཙེསུཾ། ཨཐ ཁོ སཱ བྷིཀྑུནཱི ཨུཛ྄ཛྷཱཡཏི ཁིཡྻཏི ཝིཔཱཙེཏི – ‘‘ཀཐཉྷི ནཱམ བྷིཀྑུནཱི མཡ྄ཧཾ ཙཱིཝརཾ ཨནཱཔུཙྪཱ པཱརུཔིསྶཏཱི’’ཏི! ཨཐ ཁོ སཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནཱི བྷིཀྑུནིཡཱ ཙཱིཝརཾ ཨནཱཔུཙྪཱ པཱརུཔིསྶཏཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནཱི བྷིཀྑུནིཡཱ ཙཱིཝརཾ ཨནཱཔུཙྪཱ པཱརུཔཏཱིཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནཱི བྷིཀྑུནིཡཱ ཙཱིཝརཾ ཨནཱཔུཙྪཱ པཱརུཔིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
902. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā bhikkhunī piṇḍāya caritvā allacīvaraṃ pattharitvā vihāraṃ pāvisi. Aññatarā bhikkhunī taṃ cīvaraṃ pārupitvā gāmaṃ piṇḍāya pāvisi. Sā nikkhamitvā bhikkhuniyo pucchi – ‘‘apāyye, mayhaṃ cīvaraṃ passeyyāthā’’ti? Bhikkhuniyo tassā bhikkhuniyā etamatthaṃ ārocesuṃ. Atha kho sā bhikkhunī ujjhāyati khiyyati vipāceti – ‘‘kathañhi nāma bhikkhunī mayhaṃ cīvaraṃ anāpucchā pārupissatī’’ti! Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī bhikkhuniyā cīvaraṃ anāpucchā pārupissatī’’ti…pe… saccaṃ kira, bhikkhave, bhikkhunī bhikkhuniyā cīvaraṃ anāpucchā pārupatīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī bhikkhuniyā cīvaraṃ anāpucchā pārupissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༩༠༣. ‘‘ཡཱ པན བྷིཀྑུནཱི ཙཱིཝརསངྐམནཱིཡཾ དྷཱརེཡྻ, པཱཙིཏྟིཡ’’ནྟི།
903.‘‘Yā pana bhikkhunī cīvarasaṅkamanīyaṃ dhāreyya, pācittiya’’nti.
༩༠༤. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
904.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཙཱིཝརསངྐམནཱིཡཾ ནཱམ ཨུཔསམྤནྣཱཡ པཉྩནྣཾ ཙཱིཝརཱནཾ ཨཉྙཏརཾ ཙཱིཝརཾ ཏསྶཱ ཝཱ ཨདིནྣཾ ཏཾ ཝཱ ཨནཱཔུཙྪཱ ནིཝཱསེཏི ཝཱ པཱརུཔཏི ཝཱ, ཨཱཔཏྟི པཱཙིཏྟིཡསྶ།
Cīvarasaṅkamanīyaṃ nāma upasampannāya pañcannaṃ cīvarānaṃ aññataraṃ cīvaraṃ tassā vā adinnaṃ taṃ vā anāpucchā nivāseti vā pārupati vā, āpatti pācittiyassa.
༩༠༥. ཨུཔསམྤནྣཱཡ ཨུཔསམྤནྣསཉྙཱ ཙཱིཝརསངྐམནཱིཡཾ དྷཱརེཏི, ཨཱཔཏྟི པཱཙིཏྟིཡསྶ། ཨུཔསམྤནྣཱཡ ཝེམཏིཀཱ ཙཱིཝརསངྐམནཱིཡཾ དྷཱརེཏི , ཨཱཔཏྟི པཱཙིཏྟིཡསྶ། ཨུཔསམྤནྣཱཡ ཨནུཔསམྤནྣསཉྙཱ ཙཱིཝརསངྐམནཱིཡཾ དྷཱརེཏི, ཨཱཔཏྟི པཱཙིཏྟིཡསྶ །
905. Upasampannāya upasampannasaññā cīvarasaṅkamanīyaṃ dhāreti, āpatti pācittiyassa. Upasampannāya vematikā cīvarasaṅkamanīyaṃ dhāreti , āpatti pācittiyassa. Upasampannāya anupasampannasaññā cīvarasaṅkamanīyaṃ dhāreti, āpatti pācittiyassa .
ཨནུཔསམྤནྣཱཡ ཙཱིཝརསངྐམནཱིཡཾ དྷཱརེཏི, ཨཱཔཏྟི དུཀྐཊསྶ། ཨནུཔསམྤནྣཱཡ ཨུཔསམྤནྣསཉྙཱ , ཨཱཔཏྟི དུཀྐཊསྶ། ཨནུཔསམྤནྣཱཡ ཝེམཏིཀཱ, ཨཱཔཏྟི དུཀྐཊསྶ། ཨནུཔསམྤནྣཱཡ ཨནུཔསམྤནྣསཉྙཱ, ཨཱཔཏྟི དུཀྐཊསྶ།
Anupasampannāya cīvarasaṅkamanīyaṃ dhāreti, āpatti dukkaṭassa. Anupasampannāya upasampannasaññā , āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
༩༠༦. ཨནཱཔཏྟི སཱ ཝཱ དེཏི, ཏཾ ཝཱ ཨཱཔུཙྪཱ ནིཝཱསེཏི ཝཱ པཱརུཔཏི ཝཱ, ཨཙྪིནྣཙཱིཝརིཀཱཡ, ནཊྛཙཱིཝརིཀཱཡ, ཨཱཔདཱསུ, ཨུམྨཏྟིཀཱཡ, ཨཱདིཀམྨིཀཱཡཱཏི།
906. Anāpatti sā vā deti, taṃ vā āpucchā nivāseti vā pārupati vā, acchinnacīvarikāya, naṭṭhacīvarikāya, āpadāsu, ummattikāya, ādikammikāyāti.
པཉྩམསིཀྑཱཔདཾ ནིཊྛིཏཾ།
Pañcamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༥. པཉྩམསིཀྑཱཔདཝཎྞནཱ • 5. Pañcamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༣. ནགྒཝགྒཝཎྞནཱ • 3. Naggavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. པཉྩམསིཀྑཱཔདཝཎྞནཱ • 5. Pañcamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༥. པཉྩམསིཀྑཱཔདཾ • 5. Pañcamasikkhāpadaṃ
