| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༥. པཉྩམསིཀྑཱཔདཾ
5. Pañcamasikkhāpadaṃ
༩༩༤. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཉྙཏརཱ བྷིཀྑུནཱི ཐུལླནནྡཾ བྷིཀྑུནིཾ ཨུཔསངྐམིཏྭཱ ཨེཏདཝོཙ – ‘‘ཨེཧཱཡྻེ, ཨིམཾ ཨདྷིཀརཎཾ ཝཱུཔསམེཧཱི’’ཏི། ཐུལླནནྡཱ བྷིཀྑུནཱི ‘སཱདྷཱུ’ཏི པཊིསྶུཎིཏྭཱ ནེཝ ཝཱུཔསམེཏི ན ཝཱུཔསམཱཡ ཨུསྶུཀྐཾ ཀརོཏི། ཨཐ ཁོ སཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ བྷིཀྑུནིཡཱ – ‘ཨེཧཱཡྻེ’, ཨིམཾ ཨདྷིཀརཎཾ ཝཱུཔསམེཧཱི’ཏི ཝུཙྩམཱནཱ – ‘སཱདྷཱུ’ཏི པཊིསྶུཎིཏྭཱ, ནེཝ ཝཱུཔསམེསྶཏི ན ཝཱུཔསམཱཡ ཨུསྶུཀྐཾ ཀརིསྶཏཱི’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི བྷིཀྑུནིཡཱ – ‘‘ཨེཧཱཡྻེ, ཨིམཾ ཨདྷིཀརཎཾ ཝཱུཔསམེཧཱི’’ཏི ཝུཙྩམཱནཱ – ‘‘སཱདྷཱུ’’ཏི པཊིསྶུཎིཏྭཱ, ནེཝ ཝཱུཔསམེཏི ན ཝཱུཔསམཱཡ ཨུསྶུཀྐཾ ཀརོཏཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི བྷིཀྑུནིཡཱ – ‘‘ཨེཧཱཡྻེ, ཨིམཾ ཨདྷིཀརཎཾ ཝཱུཔསམེཧཱི’’ཏི ཝུཙྩམཱནཱ – ‘‘སཱདྷཱུ’’ཏི པཊིསྶུཎིཏྭཱ, ནེཝ ཝཱུཔསམེསྶཏི ན ཝཱུཔསམཱཡ ཨུསྶུཀྐཾ ཀརིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
994. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā bhikkhunī thullanandaṃ bhikkhuniṃ upasaṅkamitvā etadavoca – ‘‘ehāyye, imaṃ adhikaraṇaṃ vūpasamehī’’ti. Thullanandā bhikkhunī ‘sādhū’ti paṭissuṇitvā neva vūpasameti na vūpasamāya ussukkaṃ karoti. Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhuniyā – ‘ehāyye’, imaṃ adhikaraṇaṃ vūpasamehī’ti vuccamānā – ‘sādhū’ti paṭissuṇitvā, neva vūpasamessati na vūpasamāya ussukkaṃ karissatī’’ti…pe… saccaṃ kira, bhikkhave, thullanandā bhikkhunī bhikkhuniyā – ‘‘ehāyye, imaṃ adhikaraṇaṃ vūpasamehī’’ti vuccamānā – ‘‘sādhū’’ti paṭissuṇitvā, neva vūpasameti na vūpasamāya ussukkaṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhikkhuniyā – ‘‘ehāyye, imaṃ adhikaraṇaṃ vūpasamehī’’ti vuccamānā – ‘‘sādhū’’ti paṭissuṇitvā, neva vūpasamessati na vūpasamāya ussukkaṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༩༩༥. ‘‘ཡཱ པན བྷིཀྑུནཱི བྷིཀྑུནིཡཱ – ‘ཨེཧཱཡྻེ, ཨིམཾ ཨདྷིཀརཎཾ ཝཱུཔསམེཧཱི’ཏི ཝུཙྩམཱནཱ – ‘སཱདྷཱུ’ཏི པཊིསྶུཎིཏྭཱ སཱ པཙྪཱ ཨནནྟརཱཡིཀིནཱི ནེཝ ཝཱུཔསམེཡྻ ན ཝཱུཔསམཱཡ ཨུསྶུཀྐཾ ཀརེཡྻ, པཱཙིཏྟིཡ’’ནྟི།
995.‘‘Yā pana bhikkhunī bhikkhuniyā – ‘ehāyye, imaṃ adhikaraṇaṃ vūpasamehī’ti vuccamānā – ‘sādhū’ti paṭissuṇitvā sā pacchā anantarāyikinī neva vūpasameyya na vūpasamāya ussukkaṃ kareyya, pācittiya’’nti.
༩༩༦. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
996.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
བྷིཀྑུནིཡཱཏི ཨཉྙཱཡ བྷིཀྑུནིཡཱ།
Bhikkhuniyāti aññāya bhikkhuniyā.
ཨདྷིཀརཎཾ ནཱམ ཙཏྟཱརི ཨདྷིཀརཎཱནི – ཝིཝཱདཱདྷིཀརཎཾ, ཨནུཝཱདཱདྷིཀརཎཾ, ཨཱཔཏྟཱདྷིཀརཎཾ, ཀིཙྩཱདྷིཀརཎཾ།
Adhikaraṇaṃ nāma cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ.
ཨེཧཱཡྻེ ཨིམཾ ཨདྷིཀརཎཾ ཝཱུཔསམེཧཱིཏི ཨེཧཱཡྻེ ཨིམཾ ཨདྷིཀརཎཾ ཝིནིཙྪེཧི།
Ehāyye imaṃ adhikaraṇaṃ vūpasamehīti ehāyye imaṃ adhikaraṇaṃ vinicchehi.
སཱ པཙྪཱ ཨནནྟརཱཡིཀིནཱིཏི ཨསཏི ཨནྟརཱཡེ།
Sāpacchā anantarāyikinīti asati antarāye.
ནེཝ ཝཱུཔསམེཡྻཱཏི ན སཡཾ ཝཱུཔསམེཡྻ།
Neva vūpasameyyāti na sayaṃ vūpasameyya.
ན ཝཱུཔསམཱཡ ཨུསྶུཀྐཾ ཀརེཡྻཱཏི ན ཨཉྙཾ ཨཱཎཱཔེཡྻ། ‘‘ནེཝ ཝཱུཔསམེསྶཱམི ན ཝཱུཔསམཱཡ ཨུསྶུཀྐཾ ཀརིསྶཱམཱི’’ཏི དྷུརཾ ནིཀྑིཏྟམཏྟེ, ཨཱཔཏྟི པཱཙིཏྟིཡསྶ།
Na vūpasamāya ussukkaṃ kareyyāti na aññaṃ āṇāpeyya. ‘‘Neva vūpasamessāmi na vūpasamāya ussukkaṃ karissāmī’’ti dhuraṃ nikkhittamatte, āpatti pācittiyassa.
༩༩༧. ཨུཔསམྤནྣཱཡ ཨུཔསམྤནྣསཉྙཱ ཨདྷིཀརཎཾ ནེཝ ཝཱུཔསམེཏི ན ཝཱུཔསམཱཡ ཨུསྶུཀྐཾ ཀརོཏི, ཨཱཔཏྟི པཱཙིཏྟིཡསྶ། ཨུཔསམྤནྣཱཡ ཝེམཏིཀཱ ཨདྷིཀརཎཾ ནེཝ ཝཱུཔསམེཏི, ན ཝཱུཔསམཱཡ ཨུསྶུཀྐཾ ཀརོཏི, ཨཱཔཏྟི པཱཙིཏྟིཡསྶ། ཨུཔསམྤནྣཱཡ ཨནུཔསམྤནྣསཉྙཱ ཨདྷིཀརཎཾ ནེཝ ཝཱུཔསམེཏི, ན ཝཱུཔསམཱཡ ཨུསྶུཀྐཾ ཀརོཏི, ཨཱཔཏྟི པཱཙིཏྟིཡསྶ།
997. Upasampannāya upasampannasaññā adhikaraṇaṃ neva vūpasameti na vūpasamāya ussukkaṃ karoti, āpatti pācittiyassa. Upasampannāya vematikā adhikaraṇaṃ neva vūpasameti, na vūpasamāya ussukkaṃ karoti, āpatti pācittiyassa. Upasampannāya anupasampannasaññā adhikaraṇaṃ neva vūpasameti, na vūpasamāya ussukkaṃ karoti, āpatti pācittiyassa.
ཨནུཔསམྤནྣཱཡ ཨདྷིཀརཎཾ ནེཝ ཝཱུཔསམེཏི, ན ཝཱུཔསམཱཡ ཨུསྶུཀྐཾ ཀརོཏི, ཨཱཔཏྟི དུཀྐཊསྶ། ཨནུཔསམྤནྣཱཡ ཨུཔསམྤནྣསཉྙཱ, ཨཱཔཏྟི དུཀྐཊསྶ། ཨནུཔསམྤནྣཱཡ ཝེམཏིཀཱ, ཨཱཔཏྟི དུཀྐཊསྶ། ཨནུཔསམྤནྣཱཡ ཨནུཔསམྤནྣསཉྙཱ, ཨཱཔཏྟི དུཀྐཊསྶ།
Anupasampannāya adhikaraṇaṃ neva vūpasameti, na vūpasamāya ussukkaṃ karoti, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
༩༩༨. ཨནཱཔཏྟི སཏི ཨནྟརཱཡེ, པརིཡེསིཏྭཱ ན ལབྷཏི, གིལཱནཱཡ, ཨཱཔདཱསུ, ཨུམྨཏྟིཀཱཡ, ཨཱདིཀམྨིཀཱཡཱཏི།
998. Anāpatti sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
པཉྩམསིཀྑཱཔདཾ ནིཊྛིཏཾ།
Pañcamasikkhāpadaṃ niṭṭhitaṃ.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༥. པཉྩམསིཀྑཱཔདཝཎྞནཱ • 5. Pañcamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༤. ཙཏུཏྠསིཀྑཱཔདཝཎྞནཱ • 4. Catutthasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༥. པཉྩམསིཀྑཱཔདཾ • 5. Pañcamasikkhāpadaṃ
