| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8-9. பஞ்சங்கி³கஸுத்தாதி³வண்ணனா
8-9. Pañcaṅgikasuttādivaṇṇanā
28-29. அட்ட²மே கரோ வுச்சதி புப்ப²ஸம்ப⁴வங் ‘‘க³ப்³பா⁴ஸயே கிரீயதீ’’தி கத்வா. கரதோ ஜாதோ காயோ கரஜகாயோ, தது³பனிஸ்ஸயோ சதுஸந்ததிரூபஸமுதா³யோ. காமங் நாமகாயோபி விவேகஜேன பீதிஸுகே²ன ததா²லத்³தூ⁴பகாரோ, ‘‘அபி⁴ஸந்தே³தீ’’திஆதி³வசனதோ பன ரூபகாயோ இத⁴ அதி⁴ப்பேதோதி ஆஹ ‘‘இமங் கரஜகாய’’ந்தி. அபி⁴ஸந்தே³தீதி அபி⁴ஸந்த³னங் கரோதி. தங் பன அபி⁴ஸந்த³னங் ஜா²னமயேன பீதிஸுகே²ன கரஜகாயஸ்ஸ திந்தபா⁴வாபாத³னங் ஸப்³ப³த்த²கமேவ லூக²பா⁴வாபனயனந்தி ஆஹ ‘‘தேமேதீ’’திஆதி³. தயித³ங் அபி⁴ஸந்த³னங் அத்த²தோ யதா²வுத்தபீதிஸுக²ஸமுட்டா²னேஹி பணீதரூபேஹி காயஸ்ஸ பரிப்ப²ரணங் த³ட்ட²ப்³ப³ங். பரிஸந்தே³தீதிஆதீ³ஸுபி ஏஸேவ நயோ. ஸப்³ப³ங் ஏதஸ்ஸ அத்தீ²தி ஸப்³பா³வா, தஸ்ஸ ஸப்³பா³வதோ. அவயவாவயவிஸம்ப³ந்தே⁴ அவயவினி ஸாமிவசனந்தி அவயவவிஸயோ ஸப்³ப³-ஸத்³தோ³, தஸ்மா வுத்தங் ‘‘ஸப்³ப³கொட்டா²ஸவதோ’’தி. அபு²டங் நாம ந ஹோதி யத்த² யத்த² கம்மஜரூபங், தத்த² தத்த² சித்தஜரூபஸ்ஸ அபி⁴ப்³யாபனதோ. தேனாஹ ‘‘உபாதி³ன்னகஸந்ததீ’’திஆதி³.
28-29. Aṭṭhame karo vuccati pupphasambhavaṃ ‘‘gabbhāsaye kirīyatī’’ti katvā. Karato jāto kāyo karajakāyo, tadupanissayo catusantatirūpasamudāyo. Kāmaṃ nāmakāyopi vivekajena pītisukhena tathāladdhūpakāro, ‘‘abhisandetī’’tiādivacanato pana rūpakāyo idha adhippetoti āha ‘‘imaṃ karajakāya’’nti. Abhisandetīti abhisandanaṃ karoti. Taṃ pana abhisandanaṃ jhānamayena pītisukhena karajakāyassa tintabhāvāpādanaṃ sabbatthakameva lūkhabhāvāpanayananti āha ‘‘temetī’’tiādi. Tayidaṃ abhisandanaṃ atthato yathāvuttapītisukhasamuṭṭhānehi paṇītarūpehi kāyassa parippharaṇaṃ daṭṭhabbaṃ. Parisandetītiādīsupi eseva nayo. Sabbaṃ etassa atthīti sabbāvā, tassa sabbāvato. Avayavāvayavisambandhe avayavini sāmivacananti avayavavisayo sabba-saddo, tasmā vuttaṃ ‘‘sabbakoṭṭhāsavato’’ti. Aphuṭaṃ nāma na hoti yattha yattha kammajarūpaṃ, tattha tattha cittajarūpassa abhibyāpanato. Tenāha ‘‘upādinnakasantatī’’tiādi.
சே²கோதி குஸலோ. தங் பனஸ்ஸ கோஸல்லங் நஹானீயசுண்ணானங் கரணே பிண்டி³கரணே ச ஸமத்த²தாவஸேன வேதி³தப்³ப³ந்தி ஆஹ ‘‘படிப³லோ’’திஆதி³. கங்ஸ-ஸத்³தோ³ ‘‘மஹதியா கங்ஸபாதியா’’திஆதீ³ஸு (ம॰ நி॰ 1.61) ஸுவண்ணே ஆக³தோ.‘‘கங்ஸோ உபஹதோ யதா²’’திஆதீ³ஸு (த⁴॰ ப॰ 134) கித்திமலோஹே. கத்த²சி பண்ணத்திமத்தே ‘‘உபகங்ஸோ நாம ராஜாஸி, மஹாகங்ஸஸ்ஸ அத்ரஜோ’’திஆதி³ (ஜா॰ அட்ட²॰ 4.10.164 க⁴டபண்டி³தஜாதகவண்ணனா). இத⁴ பன யத்த² கத்த²சி லோஹேதி ஆஹ ‘‘யேன கேனசி லோஹேன கதபா⁴ஜனே’’தி. ஸ்னேஹானுக³தாதி உத³கஸினேஹேன அனுப்பவிஸனவஸேன க³தா உபக³தா. ஸ்னேஹபரேதாதி உத³கஸினேஹேன பரிதோ க³தா ஸமந்ததோ பு²டா. ததோ ஏவ ஸந்தரபா³ஹிரா பு²டா ஸ்னேஹேன. ஏதேன ஸப்³ப³ஸோ உத³கேன தேமிதபா⁴வமாஹ. ந ச பக்³க⁴ரிணீதி ஏதேன திந்தஸ்ஸபி தஸ்ஸ க⁴னத²த்³த⁴பா⁴வங் வத³தி. தேனாஹ ‘‘ந பி³ந்து³பி³ந்தூ³’’திஆதி³.
Chekoti kusalo. Taṃ panassa kosallaṃ nahānīyacuṇṇānaṃ karaṇe piṇḍikaraṇe ca samatthatāvasena veditabbanti āha ‘‘paṭibalo’’tiādi. Kaṃsa-saddo ‘‘mahatiyā kaṃsapātiyā’’tiādīsu (ma. ni. 1.61) suvaṇṇe āgato.‘‘Kaṃso upahato yathā’’tiādīsu (dha. pa. 134) kittimalohe. Katthaci paṇṇattimatte ‘‘upakaṃso nāma rājāsi, mahākaṃsassa atrajo’’tiādi (jā. aṭṭha. 4.10.164 ghaṭapaṇḍitajātakavaṇṇanā). Idha pana yattha katthaci loheti āha ‘‘yena kenaci lohena katabhājane’’ti. Snehānugatāti udakasinehena anuppavisanavasena gatā upagatā. Snehaparetāti udakasinehena parito gatā samantato phuṭā. Tato eva santarabāhirā phuṭā snehena. Etena sabbaso udakena temitabhāvamāha. Na ca pagghariṇīti etena tintassapi tassa ghanathaddhabhāvaṃ vadati. Tenāha ‘‘na bindubindū’’tiādi.
தாஹி தாஹி உத³கஸிராஹி உப்³பி⁴ஜ்ஜதீதி உப்³பி⁴த³ங், உப்³பி⁴த³ங் உத³கங் ஏதஸ்ஸாதி உப்³பி⁴தோ³த³கோ. உப்³பி⁴ன்னஉத³கோதி நதீ³தீரே க²தகூபகோ விய உப்³பி⁴ஜ்ஜனகஉத³கோ. உக்³க³ச்ச²னஉத³கோதி தா⁴ராவஸேன உட்ட²ஹனஉத³கோ. கஸ்மா பனெத்த² உப்³பி⁴தோ³த³கோவ ரஹதோ³ க³ஹிதோ, ந இதரோதி ஆஹ ‘‘ஹெட்டா² உக்³க³ச்ச²னஉத³கஞ்ஹீ’’திஆதி³. தா⁴ரானிபாதபு³ப்³பு³ளகேஹீதி தா⁴ரானிபாதேஹி ச உத³கபு³ப்³பு³ளேஹி ச. ‘‘பே²ணபடலேஹி சா’’தி வத்தப்³ப³ங், ஸன்னிஸின்னமேவ அபரிக்கோ²ப⁴தாய நிச்சலமேவ, ஸுப்பஸன்னமேவாதி அதி⁴ப்பாயோ. ஸேஸந்தி ‘‘அபி⁴ஸந்தே³தீ’’திஆதி³கங்.
Tāhi tāhi udakasirāhi ubbhijjatīti ubbhidaṃ, ubbhidaṃ udakaṃ etassāti ubbhidodako. Ubbhinnaudakoti nadītīre khatakūpako viya ubbhijjanakaudako. Uggacchanaudakoti dhārāvasena uṭṭhahanaudako. Kasmā panettha ubbhidodakova rahado gahito, na itaroti āha ‘‘heṭṭhā uggacchanaudakañhī’’tiādi. Dhārānipātabubbuḷakehīti dhārānipātehi ca udakabubbuḷehi ca. ‘‘Pheṇapaṭalehi cā’’ti vattabbaṃ, sannisinnameva aparikkhobhatāya niccalameva, suppasannamevāti adhippāyo. Sesanti ‘‘abhisandetī’’tiādikaṃ.
உப்பலானீதி உப்பலக³ச்சா²னி. ஸேதரத்தனீலேஸூதி உப்பலேஸு, ஸேதுப்பலரத்துப்பலனீலுப்பலேஸூதி அத்தோ². யங் கிஞ்சி உப்பலங் உப்பலமேவ ஸாமஞ்ஞக்³க³ஹணதோ. ஸதபத்தந்தி எத்த² ஸத-ஸத்³தோ³ ப³ஹுபரியாயோ ‘‘ஸதக்³கீ⁴’’திஆதீ³ஸு விய. தேன அனேகஸதபத்தஸ்ஸபி ஸங்க³ஹோ ஸித்³தோ⁴ ஹோதி. லோகே பன ரத்தங் பது³மங், ஸேதங் புண்ட³ரீகந்தி வுச்சதி. யாவ அக்³கா³ யாவ ச மூலா உத³கேன அபி⁴ஸந்த³னாதி³ஸம்ப⁴வத³ஸ்ஸனத்த²ங் உத³கானுக்³க³தக்³க³ஹணங். இத⁴ உப்பலாதீ³னி விய கரஜகாயோ, உத³கங் விய ததியஜ்ஜா²னஸுக²ங்.
Uppalānīti uppalagacchāni. Setarattanīlesūti uppalesu, setuppalarattuppalanīluppalesūti attho. Yaṃ kiñci uppalaṃ uppalameva sāmaññaggahaṇato. Satapattanti ettha sata-saddo bahupariyāyo ‘‘satagghī’’tiādīsu viya. Tena anekasatapattassapi saṅgaho siddho hoti. Loke pana rattaṃ padumaṃ, setaṃ puṇḍarīkanti vuccati. Yāva aggā yāva ca mūlā udakena abhisandanādisambhavadassanatthaṃ udakānuggataggahaṇaṃ. Idha uppalādīni viya karajakāyo, udakaṃ viya tatiyajjhānasukhaṃ.
யஸ்மா பரிஸுத்³தே⁴ன சேதஸாதி சதுத்த²ஜ்ஜா²னசித்தமாஹ, தஞ்ச ராகா³தி³உபக்கிலேஸமலாபக³மதோ நிருபக்கிலேஸங் நிம்மலங், தஸ்மா ஆஹ ‘‘நிருபக்கிலேஸட்டே²ன பரிஸுத்³த⁴’’ந்தி. யஸ்மா பன பாரிஸுத்³தி⁴யா ஏவ பச்சயவிஸேஸேன பவத்திவிஸேஸோ பரியோதா³ததா ஸுத⁴ந்தஸுவண்ணஸ்ஸ நிக⁴ங்ஸனேன பப⁴ஸ்ஸரதா விய, தஸ்மா ஆஹ ‘‘பப⁴ஸ்ஸரட்டே²ன பரியோதா³தங் வேதி³தப்³ப³’’ந்தி. இத³ந்தி ஓதா³தவசனங். உதுப²ரணத்த²ந்தி உதுனோ ப²ரணத³ஸ்ஸனத்த²ங். உதுப²ரணங் ந ஹோதி ஸேஸந்தி அதி⁴ப்பாயோ. தேனாஹ ‘‘தங்க²ண …பே॰… ப³லவங் ஹோதீ’’தி. வத்த²ங் விய கரஜகாயோதி யோகி³னோ கரஜகாயோ வத்த²ங் விய த³ட்ட²ப்³போ³ உதுப²ரணஸதி³ஸேன சதுத்த²ஜ்ஜா²னஸுகே²ன ப²ரிதப்³ப³த்தா. புரிஸஸ்ஸ ஸரீரங் விய சதுத்த²ஜ்ஜா²னங் த³ட்ட²ப்³ப³ங் உதுப²ரணட்டா²னியஸ்ஸ ஸுக²ஸ்ஸ நிஸ்ஸயபா⁴வதோ. தேனாஹ ‘‘தஸ்மா’’திஆதி³. தத்த² ச ‘‘பரிஸுத்³தே⁴ன சேதஸா’’தி சேதோக³ஹணேன ஜா²னஸுக²ங் வுத்தந்தி த³ட்ட²ப்³ப³ங். தேனாஹ ‘‘உதுப²ரணங் விய சதுத்த²ஜ்ஜா²னஸுக²’’ந்தி. நனு ச சதுத்த²ஜ்ஜா²னே ஸுக²மேவ நத்தீ²தி? ஸச்சங் நத்தி², ஸாதலக்க²ணஸந்தஸபா⁴வத்தா பனெத்த² உபெக்கா² ‘‘ஸுக²’’ந்தி அதி⁴ப்பேதா. தேன வுத்தங் ஸம்மோஹவினோத³னியங் (விப⁴॰ அட்ட²॰ 232) ‘‘உபெக்கா² பன ஸந்தத்தா, ஸுக²மிச்சேவ பா⁴ஸிதா’’தி.
Yasmā parisuddhena cetasāti catutthajjhānacittamāha, tañca rāgādiupakkilesamalāpagamato nirupakkilesaṃ nimmalaṃ, tasmā āha ‘‘nirupakkilesaṭṭhena parisuddha’’nti. Yasmā pana pārisuddhiyā eva paccayavisesena pavattiviseso pariyodātatā sudhantasuvaṇṇassa nighaṃsanena pabhassaratā viya, tasmā āha ‘‘pabhassaraṭṭhena pariyodātaṃ veditabba’’nti. Idanti odātavacanaṃ. Utupharaṇatthanti utuno pharaṇadassanatthaṃ. Utupharaṇaṃ na hoti sesanti adhippāyo. Tenāha ‘‘taṅkhaṇa…pe… balavaṃ hotī’’ti. Vatthaṃ viya karajakāyoti yogino karajakāyo vatthaṃ viya daṭṭhabbo utupharaṇasadisena catutthajjhānasukhena pharitabbattā. Purisassa sarīraṃ viya catutthajjhānaṃ daṭṭhabbaṃ utupharaṇaṭṭhāniyassa sukhassa nissayabhāvato. Tenāha ‘‘tasmā’’tiādi. Tattha ca ‘‘parisuddhena cetasā’’ti cetogahaṇena jhānasukhaṃ vuttanti daṭṭhabbaṃ. Tenāha ‘‘utupharaṇaṃ viya catutthajjhānasukha’’nti. Nanu ca catutthajjhāne sukhameva natthīti? Saccaṃ natthi, sātalakkhaṇasantasabhāvattā panettha upekkhā ‘‘sukha’’nti adhippetā. Tena vuttaṃ sammohavinodaniyaṃ (vibha. aṭṭha. 232) ‘‘upekkhā pana santattā, sukhamicceva bhāsitā’’ti.
தஸ்ஸ தஸ்ஸ ஸமாதி⁴ஸ்ஸ ஸரூபத³ஸ்ஸனஸ்ஸ பச்சயத்தா பச்சவெக்க²ணஞாணங் பச்சவெக்க²ணனிமித்தங். ஸமப⁴ரிதோதி ஸமபுண்ணோ.
Tassa tassa samādhissa sarūpadassanassa paccayattā paccavekkhaṇañāṇaṃ paccavekkhaṇanimittaṃ. Samabharitoti samapuṇṇo.
மண்ட³பூ⁴மீதி பபாவண்ணபூ⁴மி. யத்த² ஸலிலஸிஞ்சனேன வினாவ ஸஸ்ஸானி டி²தானி ஸம்பஜ்ஜந்தி. யுகே³ யோஜேதப்³பா³னி யொக்³கா³னி, தேஸங் ஆசரியோ யொக்³கா³சரியோ. தேஸங் ஸிக்கா²பனதோ ஹத்தி²ஆத³யோபி ‘‘யொக்³கா³’’தி வுச்சந்தீதி ஆஹ பாளியங் ‘‘அஸ்ஸத³ம்மஸாரதீ²’’தி. யேன யேனாதி சதூஸு மக்³கே³ஸு யேன யேன மக்³கே³ன. யங் யங் க³திந்தி ஜவஸமஜவாதி³பே⁴தா³ஸு க³தீஸு யங் யங் க³திங். நவமே நத்தி² வத்தப்³ப³ங்.
Maṇḍabhūmīti papāvaṇṇabhūmi. Yattha salilasiñcanena vināva sassāni ṭhitāni sampajjanti. Yuge yojetabbāni yoggāni, tesaṃ ācariyo yoggācariyo. Tesaṃ sikkhāpanato hatthiādayopi ‘‘yoggā’’ti vuccantīti āha pāḷiyaṃ ‘‘assadammasārathī’’ti. Yena yenāti catūsu maggesu yena yena maggena. Yaṃ yaṃ gatinti javasamajavādibhedāsu gatīsu yaṃ yaṃ gatiṃ. Navame natthi vattabbaṃ.
பஞ்சங்கி³கஸுத்தாதி³வண்ணனா நிட்டி²தா.
Pañcaṅgikasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
8. பஞ்சங்கி³கஸுத்தங் • 8. Pañcaṅgikasuttaṃ
9. சங்கமஸுத்தங் • 9. Caṅkamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
8. பஞ்சங்கி³கஸுத்தவண்ணனா • 8. Pañcaṅgikasuttavaṇṇanā
9. சங்கமஸுத்தவண்ணனா • 9. Caṅkamasuttavaṇṇanā
