| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੮-੯. ਪਞ੍ਚਙ੍ਗਿਕਸੁਤ੍ਤਾਦਿવਣ੍ਣਨਾ
8-9. Pañcaṅgikasuttādivaṇṇanā
੨੮-੨੯. ਅਟ੍ਠਮੇ ਕਰੋ વੁਚ੍ਚਤਿ ਪੁਪ੍ਫਸਮ੍ਭવਂ ‘‘ਗਬ੍ਭਾਸਯੇ ਕਿਰੀਯਤੀ’’ਤਿ ਕਤ੍વਾ। ਕਰਤੋ ਜਾਤੋ ਕਾਯੋ ਕਰਜਕਾਯੋ, ਤਦੁਪਨਿਸ੍ਸਯੋ ਚਤੁਸਨ੍ਤਤਿਰੂਪਸਮੁਦਾਯੋ। ਕਾਮਂ ਨਾਮਕਾਯੋਪਿ વਿવੇਕਜੇਨ ਪੀਤਿਸੁਖੇਨ ਤਥਾਲਦ੍ਧੂਪਕਾਰੋ, ‘‘ਅਭਿਸਨ੍ਦੇਤੀ’’ਤਿਆਦਿવਚਨਤੋ ਪਨ ਰੂਪਕਾਯੋ ਇਧ ਅਧਿਪ੍ਪੇਤੋਤਿ ਆਹ ‘‘ਇਮਂ ਕਰਜਕਾਯ’’ਨ੍ਤਿ। ਅਭਿਸਨ੍ਦੇਤੀਤਿ ਅਭਿਸਨ੍ਦਨਂ ਕਰੋਤਿ। ਤਂ ਪਨ ਅਭਿਸਨ੍ਦਨਂ ਝਾਨਮਯੇਨ ਪੀਤਿਸੁਖੇਨ ਕਰਜਕਾਯਸ੍ਸ ਤਿਨ੍ਤਭਾવਾਪਾਦਨਂ ਸਬ੍ਬਤ੍ਥਕਮੇવ ਲੂਖਭਾવਾਪਨਯਨਨ੍ਤਿ ਆਹ ‘‘ਤੇਮੇਤੀ’’ਤਿਆਦਿ। ਤਯਿਦਂ ਅਭਿਸਨ੍ਦਨਂ ਅਤ੍ਥਤੋ ਯਥਾવੁਤ੍ਤਪੀਤਿਸੁਖਸਮੁਟ੍ਠਾਨੇਹਿ ਪਣੀਤਰੂਪੇਹਿ ਕਾਯਸ੍ਸ ਪਰਿਪ੍ਫਰਣਂ ਦਟ੍ਠਬ੍ਬਂ। ਪਰਿਸਨ੍ਦੇਤੀਤਿਆਦੀਸੁਪਿ ਏਸੇવ ਨਯੋ। ਸਬ੍ਬਂ ਏਤਸ੍ਸ ਅਤ੍ਥੀਤਿ ਸਬ੍ਬਾવਾ, ਤਸ੍ਸ ਸਬ੍ਬਾવਤੋ। ਅવਯવਾવਯવਿਸਮ੍ਬਨ੍ਧੇ ਅવਯવਿਨਿ ਸਾਮਿવਚਨਨ੍ਤਿ ਅવਯવવਿਸਯੋ ਸਬ੍ਬ-ਸਦ੍ਦੋ, ਤਸ੍ਮਾ વੁਤ੍ਤਂ ‘‘ਸਬ੍ਬਕੋਟ੍ਠਾਸવਤੋ’’ਤਿ। ਅਫੁਟਂ ਨਾਮ ਨ ਹੋਤਿ ਯਤ੍ਥ ਯਤ੍ਥ ਕਮ੍ਮਜਰੂਪਂ, ਤਤ੍ਥ ਤਤ੍ਥ ਚਿਤ੍ਤਜਰੂਪਸ੍ਸ ਅਭਿਬ੍ਯਾਪਨਤੋ। ਤੇਨਾਹ ‘‘ਉਪਾਦਿਨ੍ਨਕਸਨ੍ਤਤੀ’’ਤਿਆਦਿ।
28-29. Aṭṭhame karo vuccati pupphasambhavaṃ ‘‘gabbhāsaye kirīyatī’’ti katvā. Karato jāto kāyo karajakāyo, tadupanissayo catusantatirūpasamudāyo. Kāmaṃ nāmakāyopi vivekajena pītisukhena tathāladdhūpakāro, ‘‘abhisandetī’’tiādivacanato pana rūpakāyo idha adhippetoti āha ‘‘imaṃ karajakāya’’nti. Abhisandetīti abhisandanaṃ karoti. Taṃ pana abhisandanaṃ jhānamayena pītisukhena karajakāyassa tintabhāvāpādanaṃ sabbatthakameva lūkhabhāvāpanayananti āha ‘‘temetī’’tiādi. Tayidaṃ abhisandanaṃ atthato yathāvuttapītisukhasamuṭṭhānehi paṇītarūpehi kāyassa parippharaṇaṃ daṭṭhabbaṃ. Parisandetītiādīsupi eseva nayo. Sabbaṃ etassa atthīti sabbāvā, tassa sabbāvato. Avayavāvayavisambandhe avayavini sāmivacananti avayavavisayo sabba-saddo, tasmā vuttaṃ ‘‘sabbakoṭṭhāsavato’’ti. Aphuṭaṃ nāma na hoti yattha yattha kammajarūpaṃ, tattha tattha cittajarūpassa abhibyāpanato. Tenāha ‘‘upādinnakasantatī’’tiādi.
ਛੇਕੋਤਿ ਕੁਸਲੋ। ਤਂ ਪਨਸ੍ਸ ਕੋਸਲ੍ਲਂ ਨਹਾਨੀਯਚੁਣ੍ਣਾਨਂ ਕਰਣੇ ਪਿਣ੍ਡਿਕਰਣੇ ਚ ਸਮਤ੍ਥਤਾવਸੇਨ વੇਦਿਤਬ੍ਬਨ੍ਤਿ ਆਹ ‘‘ਪਟਿਬਲੋ’’ਤਿਆਦਿ। ਕਂਸ-ਸਦ੍ਦੋ ‘‘ਮਹਤਿਯਾ ਕਂਸਪਾਤਿਯਾ’’ਤਿਆਦੀਸੁ (ਮ॰ ਨਿ॰ ੧.੬੧) ਸੁવਣ੍ਣੇ ਆਗਤੋ।‘‘ਕਂਸੋ ਉਪਹਤੋ ਯਥਾ’’ਤਿਆਦੀਸੁ (ਧ॰ ਪ॰ ੧੩੪) ਕਿਤ੍ਤਿਮਲੋਹੇ। ਕਤ੍ਥਚਿ ਪਣ੍ਣਤ੍ਤਿਮਤ੍ਤੇ ‘‘ਉਪਕਂਸੋ ਨਾਮ ਰਾਜਾਸਿ, ਮਹਾਕਂਸਸ੍ਸ ਅਤ੍ਰਜੋ’’ਤਿਆਦਿ (ਜਾ॰ ਅਟ੍ਠ॰ ੪.੧੦.੧੬੪ ਘਟਪਣ੍ਡਿਤਜਾਤਕવਣ੍ਣਨਾ)। ਇਧ ਪਨ ਯਤ੍ਥ ਕਤ੍ਥਚਿ ਲੋਹੇਤਿ ਆਹ ‘‘ਯੇਨ ਕੇਨਚਿ ਲੋਹੇਨ ਕਤਭਾਜਨੇ’’ਤਿ। ਸ੍ਨੇਹਾਨੁਗਤਾਤਿ ਉਦਕਸਿਨੇਹੇਨ ਅਨੁਪ੍ਪવਿਸਨવਸੇਨ ਗਤਾ ਉਪਗਤਾ। ਸ੍ਨੇਹਪਰੇਤਾਤਿ ਉਦਕਸਿਨੇਹੇਨ ਪਰਿਤੋ ਗਤਾ ਸਮਨ੍ਤਤੋ ਫੁਟਾ। ਤਤੋ ਏવ ਸਨ੍ਤਰਬਾਹਿਰਾ ਫੁਟਾ ਸ੍ਨੇਹੇਨ। ਏਤੇਨ ਸਬ੍ਬਸੋ ਉਦਕੇਨ ਤੇਮਿਤਭਾવਮਾਹ। ਨ ਚ ਪਗ੍ਘਰਿਣੀਤਿ ਏਤੇਨ ਤਿਨ੍ਤਸ੍ਸਪਿ ਤਸ੍ਸ ਘਨਥਦ੍ਧਭਾવਂ વਦਤਿ। ਤੇਨਾਹ ‘‘ਨ ਬਿਨ੍ਦੁਬਿਨ੍ਦੂ’’ਤਿਆਦਿ।
Chekoti kusalo. Taṃ panassa kosallaṃ nahānīyacuṇṇānaṃ karaṇe piṇḍikaraṇe ca samatthatāvasena veditabbanti āha ‘‘paṭibalo’’tiādi. Kaṃsa-saddo ‘‘mahatiyā kaṃsapātiyā’’tiādīsu (ma. ni. 1.61) suvaṇṇe āgato.‘‘Kaṃso upahato yathā’’tiādīsu (dha. pa. 134) kittimalohe. Katthaci paṇṇattimatte ‘‘upakaṃso nāma rājāsi, mahākaṃsassa atrajo’’tiādi (jā. aṭṭha. 4.10.164 ghaṭapaṇḍitajātakavaṇṇanā). Idha pana yattha katthaci loheti āha ‘‘yena kenaci lohena katabhājane’’ti. Snehānugatāti udakasinehena anuppavisanavasena gatā upagatā. Snehaparetāti udakasinehena parito gatā samantato phuṭā. Tato eva santarabāhirā phuṭā snehena. Etena sabbaso udakena temitabhāvamāha. Na ca pagghariṇīti etena tintassapi tassa ghanathaddhabhāvaṃ vadati. Tenāha ‘‘na bindubindū’’tiādi.
ਤਾਹਿ ਤਾਹਿ ਉਦਕਸਿਰਾਹਿ ਉਬ੍ਭਿਜ੍ਜਤੀਤਿ ਉਬ੍ਭਿਦਂ, ਉਬ੍ਭਿਦਂ ਉਦਕਂ ਏਤਸ੍ਸਾਤਿ ਉਬ੍ਭਿਦੋਦਕੋ। ਉਬ੍ਭਿਨ੍ਨਉਦਕੋਤਿ ਨਦੀਤੀਰੇ ਖਤਕੂਪਕੋ વਿਯ ਉਬ੍ਭਿਜ੍ਜਨਕਉਦਕੋ। ਉਗ੍ਗਚ੍ਛਨਉਦਕੋਤਿ ਧਾਰਾવਸੇਨ ਉਟ੍ਠਹਨਉਦਕੋ। ਕਸ੍ਮਾ ਪਨੇਤ੍ਥ ਉਬ੍ਭਿਦੋਦਕੋવ ਰਹਦੋ ਗਹਿਤੋ, ਨ ਇਤਰੋਤਿ ਆਹ ‘‘ਹੇਟ੍ਠਾ ਉਗ੍ਗਚ੍ਛਨਉਦਕਞ੍ਹੀ’’ਤਿਆਦਿ। ਧਾਰਾਨਿਪਾਤਬੁਬ੍ਬੁਲ਼ਕੇਹੀਤਿ ਧਾਰਾਨਿਪਾਤੇਹਿ ਚ ਉਦਕਬੁਬ੍ਬੁਲ਼ੇਹਿ ਚ। ‘‘ਫੇਣਪਟਲੇਹਿ ਚਾ’’ਤਿ વਤ੍ਤਬ੍ਬਂ, ਸਨ੍ਨਿਸਿਨ੍ਨਮੇવ ਅਪਰਿਕ੍ਖੋਭਤਾਯ ਨਿਚ੍ਚਲਮੇવ, ਸੁਪ੍ਪਸਨ੍ਨਮੇવਾਤਿ ਅਧਿਪ੍ਪਾਯੋ। ਸੇਸਨ੍ਤਿ ‘‘ਅਭਿਸਨ੍ਦੇਤੀ’’ਤਿਆਦਿਕਂ।
Tāhi tāhi udakasirāhi ubbhijjatīti ubbhidaṃ, ubbhidaṃ udakaṃ etassāti ubbhidodako. Ubbhinnaudakoti nadītīre khatakūpako viya ubbhijjanakaudako. Uggacchanaudakoti dhārāvasena uṭṭhahanaudako. Kasmā panettha ubbhidodakova rahado gahito, na itaroti āha ‘‘heṭṭhā uggacchanaudakañhī’’tiādi. Dhārānipātabubbuḷakehīti dhārānipātehi ca udakabubbuḷehi ca. ‘‘Pheṇapaṭalehi cā’’ti vattabbaṃ, sannisinnameva aparikkhobhatāya niccalameva, suppasannamevāti adhippāyo. Sesanti ‘‘abhisandetī’’tiādikaṃ.
ਉਪ੍ਪਲਾਨੀਤਿ ਉਪ੍ਪਲਗਚ੍ਛਾਨਿ। ਸੇਤਰਤ੍ਤਨੀਲੇਸੂਤਿ ਉਪ੍ਪਲੇਸੁ, ਸੇਤੁਪ੍ਪਲਰਤ੍ਤੁਪ੍ਪਲਨੀਲੁਪ੍ਪਲੇਸੂਤਿ ਅਤ੍ਥੋ। ਯਂ ਕਿਞ੍ਚਿ ਉਪ੍ਪਲਂ ਉਪ੍ਪਲਮੇવ ਸਾਮਞ੍ਞਗ੍ਗਹਣਤੋ। ਸਤਪਤ੍ਤਨ੍ਤਿ ਏਤ੍ਥ ਸਤ-ਸਦ੍ਦੋ ਬਹੁਪਰਿਯਾਯੋ ‘‘ਸਤਗ੍ਘੀ’’ਤਿਆਦੀਸੁ વਿਯ। ਤੇਨ ਅਨੇਕਸਤਪਤ੍ਤਸ੍ਸਪਿ ਸਙ੍ਗਹੋ ਸਿਦ੍ਧੋ ਹੋਤਿ। ਲੋਕੇ ਪਨ ਰਤ੍ਤਂ ਪਦੁਮਂ, ਸੇਤਂ ਪੁਣ੍ਡਰੀਕਨ੍ਤਿ વੁਚ੍ਚਤਿ। ਯਾવ ਅਗ੍ਗਾ ਯਾવ ਚ ਮੂਲਾ ਉਦਕੇਨ ਅਭਿਸਨ੍ਦਨਾਦਿਸਮ੍ਭવਦਸ੍ਸਨਤ੍ਥਂ ਉਦਕਾਨੁਗ੍ਗਤਗ੍ਗਹਣਂ। ਇਧ ਉਪ੍ਪਲਾਦੀਨਿ વਿਯ ਕਰਜਕਾਯੋ, ਉਦਕਂ વਿਯ ਤਤਿਯਜ੍ਝਾਨਸੁਖਂ।
Uppalānīti uppalagacchāni. Setarattanīlesūti uppalesu, setuppalarattuppalanīluppalesūti attho. Yaṃ kiñci uppalaṃ uppalameva sāmaññaggahaṇato. Satapattanti ettha sata-saddo bahupariyāyo ‘‘satagghī’’tiādīsu viya. Tena anekasatapattassapi saṅgaho siddho hoti. Loke pana rattaṃ padumaṃ, setaṃ puṇḍarīkanti vuccati. Yāva aggā yāva ca mūlā udakena abhisandanādisambhavadassanatthaṃ udakānuggataggahaṇaṃ. Idha uppalādīni viya karajakāyo, udakaṃ viya tatiyajjhānasukhaṃ.
ਯਸ੍ਮਾ ਪਰਿਸੁਦ੍ਧੇਨ ਚੇਤਸਾਤਿ ਚਤੁਤ੍ਥਜ੍ਝਾਨਚਿਤ੍ਤਮਾਹ, ਤਞ੍ਚ ਰਾਗਾਦਿਉਪਕ੍ਕਿਲੇਸਮਲਾਪਗਮਤੋ ਨਿਰੁਪਕ੍ਕਿਲੇਸਂ ਨਿਮ੍ਮਲਂ, ਤਸ੍ਮਾ ਆਹ ‘‘ਨਿਰੁਪਕ੍ਕਿਲੇਸਟ੍ਠੇਨ ਪਰਿਸੁਦ੍ਧ’’ਨ੍ਤਿ। ਯਸ੍ਮਾ ਪਨ ਪਾਰਿਸੁਦ੍ਧਿਯਾ ਏવ ਪਚ੍ਚਯવਿਸੇਸੇਨ ਪવਤ੍ਤਿવਿਸੇਸੋ ਪਰਿਯੋਦਾਤਤਾ ਸੁਧਨ੍ਤਸੁવਣ੍ਣਸ੍ਸ ਨਿਘਂਸਨੇਨ ਪਭਸ੍ਸਰਤਾ વਿਯ, ਤਸ੍ਮਾ ਆਹ ‘‘ਪਭਸ੍ਸਰਟ੍ਠੇਨ ਪਰਿਯੋਦਾਤਂ વੇਦਿਤਬ੍ਬ’’ਨ੍ਤਿ। ਇਦਨ੍ਤਿ ਓਦਾਤવਚਨਂ। ਉਤੁਫਰਣਤ੍ਥਨ੍ਤਿ ਉਤੁਨੋ ਫਰਣਦਸ੍ਸਨਤ੍ਥਂ। ਉਤੁਫਰਣਂ ਨ ਹੋਤਿ ਸੇਸਨ੍ਤਿ ਅਧਿਪ੍ਪਾਯੋ। ਤੇਨਾਹ ‘‘ਤਙ੍ਖਣ …ਪੇ॰… ਬਲવਂ ਹੋਤੀ’’ਤਿ। વਤ੍ਥਂ વਿਯ ਕਰਜਕਾਯੋਤਿ ਯੋਗਿਨੋ ਕਰਜਕਾਯੋ વਤ੍ਥਂ વਿਯ ਦਟ੍ਠਬ੍ਬੋ ਉਤੁਫਰਣਸਦਿਸੇਨ ਚਤੁਤ੍ਥਜ੍ਝਾਨਸੁਖੇਨ ਫਰਿਤਬ੍ਬਤ੍ਤਾ। ਪੁਰਿਸਸ੍ਸ ਸਰੀਰਂ વਿਯ ਚਤੁਤ੍ਥਜ੍ਝਾਨਂ ਦਟ੍ਠਬ੍ਬਂ ਉਤੁਫਰਣਟ੍ਠਾਨਿਯਸ੍ਸ ਸੁਖਸ੍ਸ ਨਿਸ੍ਸਯਭਾવਤੋ। ਤੇਨਾਹ ‘‘ਤਸ੍ਮਾ’’ਤਿਆਦਿ। ਤਤ੍ਥ ਚ ‘‘ਪਰਿਸੁਦ੍ਧੇਨ ਚੇਤਸਾ’’ਤਿ ਚੇਤੋਗਹਣੇਨ ਝਾਨਸੁਖਂ વੁਤ੍ਤਨ੍ਤਿ ਦਟ੍ਠਬ੍ਬਂ। ਤੇਨਾਹ ‘‘ਉਤੁਫਰਣਂ વਿਯ ਚਤੁਤ੍ਥਜ੍ਝਾਨਸੁਖ’’ਨ੍ਤਿ। ਨਨੁ ਚ ਚਤੁਤ੍ਥਜ੍ਝਾਨੇ ਸੁਖਮੇવ ਨਤ੍ਥੀਤਿ? ਸਚ੍ਚਂ ਨਤ੍ਥਿ, ਸਾਤਲਕ੍ਖਣਸਨ੍ਤਸਭਾવਤ੍ਤਾ ਪਨੇਤ੍ਥ ਉਪੇਕ੍ਖਾ ‘‘ਸੁਖ’’ਨ੍ਤਿ ਅਧਿਪ੍ਪੇਤਾ। ਤੇਨ વੁਤ੍ਤਂ ਸਮ੍ਮੋਹવਿਨੋਦਨਿਯਂ (વਿਭ॰ ਅਟ੍ਠ॰ ੨੩੨) ‘‘ਉਪੇਕ੍ਖਾ ਪਨ ਸਨ੍ਤਤ੍ਤਾ, ਸੁਖਮਿਚ੍ਚੇવ ਭਾਸਿਤਾ’’ਤਿ।
Yasmā parisuddhena cetasāti catutthajjhānacittamāha, tañca rāgādiupakkilesamalāpagamato nirupakkilesaṃ nimmalaṃ, tasmā āha ‘‘nirupakkilesaṭṭhena parisuddha’’nti. Yasmā pana pārisuddhiyā eva paccayavisesena pavattiviseso pariyodātatā sudhantasuvaṇṇassa nighaṃsanena pabhassaratā viya, tasmā āha ‘‘pabhassaraṭṭhena pariyodātaṃ veditabba’’nti. Idanti odātavacanaṃ. Utupharaṇatthanti utuno pharaṇadassanatthaṃ. Utupharaṇaṃ na hoti sesanti adhippāyo. Tenāha ‘‘taṅkhaṇa…pe… balavaṃ hotī’’ti. Vatthaṃ viya karajakāyoti yogino karajakāyo vatthaṃ viya daṭṭhabbo utupharaṇasadisena catutthajjhānasukhena pharitabbattā. Purisassa sarīraṃ viya catutthajjhānaṃ daṭṭhabbaṃ utupharaṇaṭṭhāniyassa sukhassa nissayabhāvato. Tenāha ‘‘tasmā’’tiādi. Tattha ca ‘‘parisuddhena cetasā’’ti cetogahaṇena jhānasukhaṃ vuttanti daṭṭhabbaṃ. Tenāha ‘‘utupharaṇaṃ viya catutthajjhānasukha’’nti. Nanu ca catutthajjhāne sukhameva natthīti? Saccaṃ natthi, sātalakkhaṇasantasabhāvattā panettha upekkhā ‘‘sukha’’nti adhippetā. Tena vuttaṃ sammohavinodaniyaṃ (vibha. aṭṭha. 232) ‘‘upekkhā pana santattā, sukhamicceva bhāsitā’’ti.
ਤਸ੍ਸ ਤਸ੍ਸ ਸਮਾਧਿਸ੍ਸ ਸਰੂਪਦਸ੍ਸਨਸ੍ਸ ਪਚ੍ਚਯਤ੍ਤਾ ਪਚ੍ਚવੇਕ੍ਖਣਞਾਣਂ ਪਚ੍ਚવੇਕ੍ਖਣਨਿਮਿਤ੍ਤਂ। ਸਮਭਰਿਤੋਤਿ ਸਮਪੁਣ੍ਣੋ।
Tassa tassa samādhissa sarūpadassanassa paccayattā paccavekkhaṇañāṇaṃ paccavekkhaṇanimittaṃ. Samabharitoti samapuṇṇo.
ਮਣ੍ਡਭੂਮੀਤਿ ਪਪਾવਣ੍ਣਭੂਮਿ। ਯਤ੍ਥ ਸਲਿਲਸਿਞ੍ਚਨੇਨ વਿਨਾવ ਸਸ੍ਸਾਨਿ ਠਿਤਾਨਿ ਸਮ੍ਪਜ੍ਜਨ੍ਤਿ। ਯੁਗੇ ਯੋਜੇਤਬ੍ਬਾਨਿ ਯੋਗ੍ਗਾਨਿ, ਤੇਸਂ ਆਚਰਿਯੋ ਯੋਗ੍ਗਾਚਰਿਯੋ। ਤੇਸਂ ਸਿਕ੍ਖਾਪਨਤੋ ਹਤ੍ਥਿਆਦਯੋਪਿ ‘‘ਯੋਗ੍ਗਾ’’ਤਿ વੁਚ੍ਚਨ੍ਤੀਤਿ ਆਹ ਪਾਲ਼ਿਯਂ ‘‘ਅਸ੍ਸਦਮ੍ਮਸਾਰਥੀ’’ਤਿ। ਯੇਨ ਯੇਨਾਤਿ ਚਤੂਸੁ ਮਗ੍ਗੇਸੁ ਯੇਨ ਯੇਨ ਮਗ੍ਗੇਨ। ਯਂ ਯਂ ਗਤਿਨ੍ਤਿ ਜવਸਮਜવਾਦਿਭੇਦਾਸੁ ਗਤੀਸੁ ਯਂ ਯਂ ਗਤਿਂ। ਨવਮੇ ਨਤ੍ਥਿ વਤ੍ਤਬ੍ਬਂ।
Maṇḍabhūmīti papāvaṇṇabhūmi. Yattha salilasiñcanena vināva sassāni ṭhitāni sampajjanti. Yuge yojetabbāni yoggāni, tesaṃ ācariyo yoggācariyo. Tesaṃ sikkhāpanato hatthiādayopi ‘‘yoggā’’ti vuccantīti āha pāḷiyaṃ ‘‘assadammasārathī’’ti. Yena yenāti catūsu maggesu yena yena maggena. Yaṃ yaṃ gatinti javasamajavādibhedāsu gatīsu yaṃ yaṃ gatiṃ. Navame natthi vattabbaṃ.
ਪਞ੍ਚਙ੍ਗਿਕਸੁਤ੍ਤਾਦਿવਣ੍ਣਨਾ ਨਿਟ੍ਠਿਤਾ।
Pañcaṅgikasuttādivaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya
੮. ਪਞ੍ਚਙ੍ਗਿਕਸੁਤ੍ਤਂ • 8. Pañcaṅgikasuttaṃ
੯. ਚਙ੍ਕਮਸੁਤ੍ਤਂ • 9. Caṅkamasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā)
੮. ਪਞ੍ਚਙ੍ਗਿਕਸੁਤ੍ਤવਣ੍ਣਨਾ • 8. Pañcaṅgikasuttavaṇṇanā
੯. ਚਙ੍ਕਮਸੁਤ੍ਤવਣ੍ਣਨਾ • 9. Caṅkamasuttavaṇṇanā
