| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
8. பஞ்சங்கி³கஸுத்தவண்ணனா
8. Pañcaṅgikasuttavaṇṇanā
28. அட்ட²மே அரியஸ்ஸாதி விக்க²ம்ப⁴னவஸேன பஹீனகிலேஸேஹி ஆரகா டி²தஸ்ஸ. பா⁴வனங் தே³ஸெஸ்ஸாமீதி ப்³ரூஹனங் வட்³ட⁴னங் பகாஸயிஸ்ஸாமி. இமமேவ காயந்தி இமங் கரஜகாயங். அபி⁴ஸந்தே³தீதி தேமேதி ஸ்னேஹேதி, ஸப்³ப³த்த² பவத்தபீதிஸுக²ங் கரோதி. பரிஸந்தே³தீதி ஸமந்ததோ ஸந்தே³தி. பரிபூரேதீதி வாயுனா ப⁴ஸ்தங் விய பூரேதி. பரிப்ப²ரதீதி ஸமந்ததோ பு²ஸதி. ஸப்³பா³வதோ காயஸ்ஸாதி அஸ்ஸ பி⁴க்கு²னோ ஸப்³ப³கொட்டா²ஸவதோ காயஸ்ஸ கிஞ்சி உபாதி³ன்னகஸந்ததிபவத்திட்டா²னே ச²விமங்ஸலோஹிதானுக³தங் அணுமத்தம்பி டா²னங் பட²மஜ்ஜா²னஸுகே²ன அபு²டங் நாம ந ஹோதி.
28. Aṭṭhame ariyassāti vikkhambhanavasena pahīnakilesehi ārakā ṭhitassa. Bhāvanaṃ desessāmīti brūhanaṃ vaḍḍhanaṃ pakāsayissāmi. Imameva kāyanti imaṃ karajakāyaṃ. Abhisandetīti temeti sneheti, sabbattha pavattapītisukhaṃ karoti. Parisandetīti samantato sandeti. Paripūretīti vāyunā bhastaṃ viya pūreti. Parippharatīti samantato phusati. Sabbāvato kāyassāti assa bhikkhuno sabbakoṭṭhāsavato kāyassa kiñci upādinnakasantatipavattiṭṭhāne chavimaṃsalohitānugataṃ aṇumattampi ṭhānaṃ paṭhamajjhānasukhena aphuṭaṃ nāma na hoti.
த³க்கோ²தி சே²கோ படிப³லோ ந்ஹானீயசுண்ணானி காதுஞ்சேவ யோஜேதுஞ்ச ஸன்னேதுஞ்ச. கங்ஸதா²லேதி யேன கேனசி லோஹேன கதபா⁴ஜனே. மத்திகாபா⁴ஜனங் பன தி²ரங் ந ஹோதி, ஸன்னெந்தஸ்ஸ பி⁴ஜ்ஜதி. தஸ்மா தங் ந த³ஸ்ஸேஸி. பரிப்போ²ஸகங் பரிப்போ²ஸகந்தி ஸிஞ்சித்வா ஸிஞ்சித்வா. ஸன்னெய்யாதி வாமஹத்தே²ன கங்ஸதா²லங் க³ஹெத்வா த³க்கி²ணஹத்தே²ன பமாணயுத்தங் உத³கங் ஸிஞ்சித்வா ஸிஞ்சித்வா பரிமத்³த³ந்தோ பிண்ட³ங் கரெய்ய. ஸ்னேஹானுக³தாதி உத³கஸினேஹேன அனுக³தா. ஸ்னேஹபரேதாதி உத³கஸினேஹேன பரிக்³க³ஹிதா. ஸந்தரபா³ஹிராதி ஸத்³தி⁴ங் அந்தோபதே³ஸேன சேவ ப³ஹிபதே³ஸேன ச, ஸப்³ப³த்த²கமேவ உத³கஸினேஹேன பு²டாதி அத்தோ². ந ச பக்³க⁴ரிணீதி ந பி³ந்து³ பி³ந்து³ உத³கங் பக்³க⁴ரதி, ஸக்கா ஹோதி ஹத்தே²னபி த்³வீஹிபி அங்கு³லீஹி க³ஹேதுங் ஓவட்டிகாயபி காதுந்தி அத்தோ².
Dakkhoti cheko paṭibalo nhānīyacuṇṇāni kātuñceva yojetuñca sannetuñca. Kaṃsathāleti yena kenaci lohena katabhājane. Mattikābhājanaṃ pana thiraṃ na hoti, sannentassa bhijjati. Tasmā taṃ na dassesi. Paripphosakaṃparipphosakanti siñcitvā siñcitvā. Sanneyyāti vāmahatthena kaṃsathālaṃ gahetvā dakkhiṇahatthena pamāṇayuttaṃ udakaṃ siñcitvā siñcitvā parimaddanto piṇḍaṃ kareyya. Snehānugatāti udakasinehena anugatā. Snehaparetāti udakasinehena pariggahitā. Santarabāhirāti saddhiṃ antopadesena ceva bahipadesena ca, sabbatthakameva udakasinehena phuṭāti attho. Na ca pagghariṇīti na bindu bindu udakaṃ paggharati, sakkā hoti hatthenapi dvīhipi aṅgulīhi gahetuṃ ovaṭṭikāyapi kātunti attho.
து³தியஜ்ஜா²னஸுக²உபமாயங் உப்³பி⁴தோ³த³கோதி உப்³பி⁴ன்னஉத³கோ, ந ஹெட்டா² உப்³பி⁴ஜ்ஜித்வா உக்³க³ச்ச²னஉத³கோ, அந்தோயேவ பன உப்பஜ்ஜனஉத³கோதி அத்தோ². ஆயமுக²ந்தி ஆக³மனமக்³கோ³. தே³வோதி மேகோ⁴. காலேன காலந்தி காலே காலே, அன்வட்³ட⁴மாஸங் வா அனுத³ஸாஹங் வாதி அத்தோ². தா⁴ரந்தி வுட்டி²ங். நானுப்பவெச்செ²ய்யாதி நப்பவேஸெய்ய, ந வஸ்ஸெய்யாதி அத்தோ². ஸீதா வாரிதா⁴ரா உப்³பி⁴ஜ்ஜித்வாதி ஸீதா வாரிதா⁴ரா தங் ரஹத³ங் பூரயமானா உப்³பி⁴ஜ்ஜித்வா. ஹெட்டா² உக்³க³ச்ச²னஉத³கஞ்ஹி உக்³க³ந்த்வா பி⁴ஜ்ஜந்தங் உத³கங் கோ²பே⁴தி, சதூஹி தி³ஸாஹி பவிஸனஉத³கங் புராணபண்ணதிணகட்ட²த³ண்ட³காதீ³ஹி உத³கங் கோ²பே⁴தி. வுட்டி²உத³கங் தா⁴ரானிபாதபு³ப்³பு³ளகேஹி உத³கங் கோ²பே⁴தி, ஸன்னிஸின்னமேவ பன ஹுத்வா இத்³தி⁴னிம்மிதமிவ உப்பஜ்ஜமானங் உத³கங் இமங் பதே³ஸங் ப²ரதி, இமங் ந ப²ரதீதி நத்தி². தேன அபு²டோகாஸோ நாம ந ஹோதி. தத்த² ரஹதோ³ விய கரஜகாயோ, உத³கங் விய து³தியஜ்ஜா²னஸுக²ங், ஸேஸங் புரிமனயேனேவ வேதி³தப்³ப³ங்.
Dutiyajjhānasukhaupamāyaṃ ubbhidodakoti ubbhinnaudako, na heṭṭhā ubbhijjitvā uggacchanaudako, antoyeva pana uppajjanaudakoti attho. Āyamukhanti āgamanamaggo. Devoti megho. Kālena kālanti kāle kāle, anvaḍḍhamāsaṃ vā anudasāhaṃ vāti attho. Dhāranti vuṭṭhiṃ. Nānuppaveccheyyāti nappaveseyya, na vasseyyāti attho. Sītā vāridhārā ubbhijjitvāti sītā vāridhārā taṃ rahadaṃ pūrayamānā ubbhijjitvā. Heṭṭhā uggacchanaudakañhi uggantvā bhijjantaṃ udakaṃ khobheti, catūhi disāhi pavisanaudakaṃ purāṇapaṇṇatiṇakaṭṭhadaṇḍakādīhi udakaṃ khobheti. Vuṭṭhiudakaṃ dhārānipātabubbuḷakehi udakaṃ khobheti, sannisinnameva pana hutvā iddhinimmitamiva uppajjamānaṃ udakaṃ imaṃ padesaṃ pharati, imaṃ na pharatīti natthi. Tena aphuṭokāso nāma na hoti. Tattha rahado viya karajakāyo, udakaṃ viya dutiyajjhānasukhaṃ, sesaṃ purimanayeneva veditabbaṃ.
ததியஜ்ஜா²னஸுக²உபமாயங் உப்பலானி எத்த² ஸந்தீதி உப்பலினீ. ஸேஸபத³த்³வயேபி ஏஸேவ நயோ. எத்த² ச ஸேதரத்தனீலேஸு யங்கிஞ்சி உப்பலமேவ, ஊனகஸதபத்தங் புண்ட³ரீகங், ஸதபத்தங் பது³மங். பத்தனியமங் வா வினாபி ஸேதங் பது³மங், ரத்தங் புண்ட³ரீகந்தி அயமெத்த² வினிச்ச²யோ. உத³கானுக்³க³தானீதி உத³கதோ ந உக்³க³தானி. அந்தோனிமுக்³க³போஸீனீதி உத³கதலஸ்ஸ அந்தோ நிமுக்³கா³னியேவ ஹுத்வா போஸந்தி வட்³ட⁴ந்தீதி அத்தோ². ஸேஸங் புரிமனயேனேவ வேதி³தப்³ப³ங்.
Tatiyajjhānasukhaupamāyaṃ uppalāni ettha santīti uppalinī. Sesapadadvayepi eseva nayo. Ettha ca setarattanīlesu yaṃkiñci uppalameva, ūnakasatapattaṃ puṇḍarīkaṃ, satapattaṃ padumaṃ. Pattaniyamaṃ vā vināpi setaṃ padumaṃ, rattaṃ puṇḍarīkanti ayamettha vinicchayo. Udakānuggatānīti udakato na uggatāni. Antonimuggaposīnīti udakatalassa anto nimuggāniyeva hutvā posanti vaḍḍhantīti attho. Sesaṃ purimanayeneva veditabbaṃ.
சதுத்த²ஜ்ஜா²னஉபமாயங் பரிஸுத்³தே⁴ன சேதஸா பரியோதா³தேனாதி எத்த² நிருபக்கிலேஸட்டே²ன பரிஸுத்³த⁴ங், பப⁴ஸ்ஸரட்டே²ன பரியோதா³தங் வேதி³தப்³ப³ங். ஓதா³தேன வத்தே²னாதி இத³ங் உதுப²ரணத்த²ங் வுத்தங். கிலிட்ட²வத்தே²ன ஹி உதுப²ரணங் ந ஹோதி, தங்க²ணதோ⁴தபரிஸுத்³தே⁴ன உதுப²ரணங் ப³லவங் ஹோதி. இமிஸ்ஸா ஹி உபமாய வத்த²ங் விய கரஜகாயோ, உதுப²ரணங் விய சதுத்த²ஜ்ஜா²னஸுக²ங். தஸ்மா யதா² ஸுன்ஹாதஸ்ஸ புரிஸஸ்ஸ பரிஸுத்³த⁴ங் வத்த²ங் ஸஸீஸங் பாருபித்வா நிஸின்னஸ்ஸ ஸரீரதோ உது ஸப்³ப³மேவ வத்த²ங் ப²ரதி, ந கோசி வத்த²ஸ்ஸ அபு²டோகாஸோ ஹோதி, ஏவங் சதுத்த²ஜ்ஜா²னஸுகே²ன பி⁴க்கு²னோ கரஜகாயஸ்ஸ ந கோசி ஓகாஸோ அபு²டோ ஹோதீதி ஏவமெத்த² அத்தோ² த³ட்ட²ப்³போ³. சதுத்த²ஜ்ஜா²னசித்தமேவ வா வத்த²ங் விய, தங்ஸமுட்டா²னரூபங் உதுப²ரணங் விய. யதா² ஹி கத்த²சி கத்த²சி ஓதா³தவத்தே² காயங் அபு²ஸந்தேபி தங்ஸமுட்டா²னேன உதுனா ஸப்³ப³த்த²கமேவ காயோ பு²டோ ஹோதி, ஏவங் சதுத்த²ஜ்ஜா²னஸமுட்டா²பிதேன ஸுகு²மரூபேன ஸப்³ப³த்த²கமேவ பி⁴க்கு²னோ காயோ பு²டோ ஹோதீதி ஏவமெத்த² அத்தோ² த³ட்ட²ப்³போ³.
Catutthajjhānaupamāyaṃ parisuddhena cetasā pariyodātenāti ettha nirupakkilesaṭṭhena parisuddhaṃ, pabhassaraṭṭhena pariyodātaṃ veditabbaṃ. Odātena vatthenāti idaṃ utupharaṇatthaṃ vuttaṃ. Kiliṭṭhavatthena hi utupharaṇaṃ na hoti, taṅkhaṇadhotaparisuddhena utupharaṇaṃ balavaṃ hoti. Imissā hi upamāya vatthaṃ viya karajakāyo, utupharaṇaṃ viya catutthajjhānasukhaṃ. Tasmā yathā sunhātassa purisassa parisuddhaṃ vatthaṃ sasīsaṃ pārupitvā nisinnassa sarīrato utu sabbameva vatthaṃ pharati, na koci vatthassa aphuṭokāso hoti, evaṃ catutthajjhānasukhena bhikkhuno karajakāyassa na koci okāso aphuṭo hotīti evamettha attho daṭṭhabbo. Catutthajjhānacittameva vā vatthaṃ viya, taṃsamuṭṭhānarūpaṃ utupharaṇaṃ viya. Yathā hi katthaci katthaci odātavatthe kāyaṃ aphusantepi taṃsamuṭṭhānena utunā sabbatthakameva kāyo phuṭo hoti, evaṃ catutthajjhānasamuṭṭhāpitena sukhumarūpena sabbatthakameva bhikkhuno kāyo phuṭo hotīti evamettha attho daṭṭhabbo.
பச்சவெக்க²ணனிமித்தந்தி பச்சவெக்க²ணஞாணமேவ. ஸுக்³க³ஹிதங் ஹோதீதி யதா² தேன ஜா²னவிபஸ்ஸனாமக்³கா³ ஸுட்டு² க³ஹிதா ஹொந்தி, ஏவங் பச்சவெக்க²ணனிமித்தங் அபராபரேன பச்சவெக்க²ணனிமித்தேன ஸுட்டு² க³ஹிதங் ஹோதி. அஞ்ஞோ வா அஞ்ஞந்தி அஞ்ஞோ ஏகோ அஞ்ஞங் ஏகங், அத்தனோயேவ ஹி அத்தா ந பாகடோ ஹோதி. டி²தோ வா நிஸின்னந்தி டி²தகஸ்ஸாபி நிஸின்னோ பாகடோ ஹோதி, தேனேவங் வுத்தங். ஸேஸேஸுபி ஏஸேவ நயோ. உத³கமணிகோதி ஸமேக²லா உத³கசாடி. ஸமதித்திகோதி ஸமப⁴ரிதோ. காகபெய்யாதி முக²வட்டியங் நிஸீதி³த்வா காகேன கீ³வங் அனாமெத்வாவ பாதப்³போ³.
Paccavekkhaṇanimittanti paccavekkhaṇañāṇameva. Suggahitaṃ hotīti yathā tena jhānavipassanāmaggā suṭṭhu gahitā honti, evaṃ paccavekkhaṇanimittaṃ aparāparena paccavekkhaṇanimittena suṭṭhu gahitaṃ hoti. Añño vā aññanti añño eko aññaṃ ekaṃ, attanoyeva hi attā na pākaṭo hoti. Ṭhito vā nisinnanti ṭhitakassāpi nisinno pākaṭo hoti, tenevaṃ vuttaṃ. Sesesupi eseva nayo. Udakamaṇikoti samekhalā udakacāṭi. Samatittikoti samabharito. Kākapeyyāti mukhavaṭṭiyaṃ nisīditvā kākena gīvaṃ anāmetvāva pātabbo.
ஸுபூ⁴மியந்தி ஸமபூ⁴மியங். ‘‘ஸுபூ⁴மே ஸுகெ²த்தே விஹதகா²ணுகே பீ³ஜானி பதிட்டா²பெய்யா’’தி (தீ³॰ நி॰ 2.438) எத்த² பன மண்ட³பூ⁴மி ஸுபூ⁴மீதி ஆக³தா. சதுமஹாபதே²தி த்³வின்னங் மஹாமக்³கா³னங் வினிவிஜ்ஜி²த்வா க³தட்டா²னே. ஆஜஞ்ஞரதோ²தி வினீதஅஸ்ஸரதோ². ஓத⁴ஸ்தபதோதோ³தி யதா² ரத²ங் அபி⁴ருஹித்வா டி²தேன ஸக்கா ஹோதி க³ண்ஹிதுங், ஏவங் ஆலம்ப³னங் நிஸ்ஸாய திரியதோ ட²பிதபதோதோ³. யொக்³கா³சரியோதி அஸ்ஸாசரியோ. ஸ்வேவ அஸ்ஸத³ம்மே ஸாரேதீதி அஸ்ஸத³ம்மஸாரதி². யேனிச்ச²கந்தி யேன யேன மக்³கே³ன இச்ச²தி. யதி³ச்ச²கந்தி யங் யங் க³திங் இச்ச²தி. ஸாரெய்யாதி உஜுகங் புரதோ பேஸெய்ய. பச்சாஸாரெய்யாதி படினிவத்தெய்ய.
Subhūmiyanti samabhūmiyaṃ. ‘‘Subhūme sukhette vihatakhāṇuke bījāni patiṭṭhāpeyyā’’ti (dī. ni. 2.438) ettha pana maṇḍabhūmi subhūmīti āgatā. Catumahāpatheti dvinnaṃ mahāmaggānaṃ vinivijjhitvā gataṭṭhāne. Ājaññarathoti vinītaassaratho. Odhastapatodoti yathā rathaṃ abhiruhitvā ṭhitena sakkā hoti gaṇhituṃ, evaṃ ālambanaṃ nissāya tiriyato ṭhapitapatodo. Yoggācariyoti assācariyo. Sveva assadamme sāretīti assadammasārathi. Yenicchakanti yena yena maggena icchati. Yadicchakanti yaṃ yaṃ gatiṃ icchati. Sāreyyāti ujukaṃ purato peseyya. Paccāsāreyyāti paṭinivatteyya.
ஏவங் ஹெட்டா² பஞ்சஹி அங்கே³ஹி ஸமாபத்திபரிகம்மங் கதெ²த்வா இமாஹி தீஹி உபமாஹி பகு³ணஸமாபத்தியா ஆனிஸங்ஸங் த³ஸ்ஸெத்வா இதா³னி கீ²ணாஸவஸ்ஸ அபி⁴ஞ்ஞாபடிபாடிங் த³ஸ்ஸேதுங் ஸோ ஸசே ஆகங்க²தீதிஆதி³மாஹ. தங் உத்தானத்த²மேவாதி.
Evaṃ heṭṭhā pañcahi aṅgehi samāpattiparikammaṃ kathetvā imāhi tīhi upamāhi paguṇasamāpattiyā ānisaṃsaṃ dassetvā idāni khīṇāsavassa abhiññāpaṭipāṭiṃ dassetuṃ so sace ākaṅkhatītiādimāha. Taṃ uttānatthamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. பஞ்சங்கி³கஸுத்தங் • 8. Pañcaṅgikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-9. பஞ்சங்கி³கஸுத்தாதி³வண்ணனா • 8-9. Pañcaṅgikasuttādivaṇṇanā
