| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၁၀. ပဉ္စင္ဂုလိယတ္ထေရအပဒာနဝဏ္ဏနာ
10. Pañcaṅguliyattheraapadānavaṇṇanā
တိသ္သော နာမာသိ ဘဂဝာတိအာဒိကံ အာယသ္မတော ပဉ္စင္ဂုလိယတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရေ တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော တိသ္သသ္သ ဘဂဝတော ကာလေ ဧကသ္မိံ ကုလေ နိဗ္ဗတ္တော ဝုဒ္ဓိမန္ဝာယ ဃရာဝာသံ သဏ္ဌပေတ္ဝာ ဝိဘဝသမ္ပန္နော သဒ္ဓော ပသန္နော ဝီထိတော ဝိဟာရံ ပဋိပန္နံ ဘဂဝန္တံ ဒိသ္ဝာ ဇာတိသုမနာဒိအနေကာနိ သုဂန္ဓပုပ္ဖာနိ စန္ဒနာဒီနိ စ ဝိလေပနာနိ ဂာဟာပေတ္ဝာ ဝိဟာရံ ဂတော ပုပ္ဖေဟိ ဘဂဝန္တံ ပူဇေတ္ဝာ ဝိလေပနေဟိ ဘဂဝတော သရီရေ ပဉ္စင္ဂုလိကံ ကတ္ဝာ ဝန္ဒိတ္ဝာ ပက္ကာမိ။
Tissonāmāsi bhagavātiādikaṃ āyasmato pañcaṅguliyattherassa apadānaṃ. Ayampi purimabuddhesu katādhikāre tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kule nibbatto vuddhimanvāya gharāvāsaṃ saṇṭhapetvā vibhavasampanno saddho pasanno vīthito vihāraṃ paṭipannaṃ bhagavantaṃ disvā jātisumanādianekāni sugandhapupphāni candanādīni ca vilepanāni gāhāpetvā vihāraṃ gato pupphehi bhagavantaṃ pūjetvā vilepanehi bhagavato sarīre pañcaṅgulikaṃ katvā vanditvā pakkāmi.
၅၀. သော တေန ပုညေန ဒေဝမနုသ္သေသု ဥဘယသမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဝိဘဝသမ္ပန္နေ ဧကသ္မိံ ကုလေ နိဗ္ဗတ္တိတ္ဝာ ဝုဒ္ဓိမန္ဝာယ သတ္ထု ဓမ္မဒေသနံ သုတ္ဝာ ပသန္နမာနသော ပဗ္ဗဇိတ္ဝာ ဝိပသ္သနံ ဝဍ္ဎေတ္ဝာ နစိရသ္သေဝ အရဟာ ဟုတ္ဝာ ပုဗ္ဗကမ္မံ သရန္တော ပစ္စက္ခတော ဉတ္ဝာ ‘‘ဣမံ နာမ ကုသလကမ္မံ ကတ္ဝာ ဤဒိသံ လောကုတ္တရသမ္ပတ္တိံ ပတ္တောမ္ဟီ’’တိ ပုဗ္ဗစရိတာပဒာနံ ပကာသေန္တော တိသ္သော နာမာသိ ဘဂဝာတိအာဒိမာဟ။ တံ သဗ္ဗံ ဥတ္တာနတ္ထမေဝာတိ။
50. So tena puññena devamanussesu ubhayasampattiyo anubhavitvā imasmiṃ buddhuppāde vibhavasampanne ekasmiṃ kule nibbattitvā vuddhimanvāya satthu dhammadesanaṃ sutvā pasannamānaso pabbajitvā vipassanaṃ vaḍḍhetvā nacirasseva arahā hutvā pubbakammaṃ saranto paccakkhato ñatvā ‘‘imaṃ nāma kusalakammaṃ katvā īdisaṃ lokuttarasampattiṃ pattomhī’’ti pubbacaritāpadānaṃ pakāsento tisso nāmāsi bhagavātiādimāha. Taṃ sabbaṃ uttānatthamevāti.
ပဉ္စင္ဂုလိယတ္ထေရအပဒာနဝဏ္ဏနာ သမတ္တာ။
Pañcaṅguliyattheraapadānavaṇṇanā samattā.
သတ္တရသမဝဂ္ဂဝဏ္ဏနာ သမတ္တာ။
Sattarasamavaggavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၁၀. ပဉ္စင္ဂုလိယတ္ထေရအပဒာနံ • 10. Pañcaṅguliyattheraapadānaṃ
