| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
११०. पञ्चन्नं अप्पहितेपि अनुजाननकथा
110. Pañcannaṃ appahitepi anujānanakathā
१९३. पगेव पहितेति इमिना ‘‘अपहितेपि गन्तब्ब’’न्ति एत्थ पिसद्दस्स सम्भावनत्थं दस्सेति। पञ्चन्नं सहधम्मिकानं सन्तिकं गन्तब्बभावस्स कारणं विभजित्वा दस्सेन्तो आह ‘‘भिक्खु गिलानो होती’’तिआदि। दसहीति ‘‘सङ्घो कम्मं कत्तुकामो होति, कतं वा सङ्घेन कम्मं होती’’ति इदं अङ्गं एकं कत्वा दसहि। नवहीति परिवासारहं अपनेत्वा नवहि। चतूहीति गिलानअनभिरतिकुक्कुच्चदिट्ठिगतउप्पन्नसङ्खातेहि चतूहि। इति इमेहि छहीति योजना। सामणेरस्सपि छहीति एत्थ छन्नं सरूपं वित्थारेत्वा दस्सेन्तो आह ‘‘आदितो’’तिआदि। तं सुविञ्ञेय्यमेव। सामणेरिया सन्तिकं पञ्चहि गन्तब्बन्ति योजना। परतोति परस्मा, परस्मिं वा। अन्धकट्ठकथायं वुत्तन्ति सम्बन्धो। ये ञातका वा ये अञ्ञातका वा अत्थि, तेसम्पीति योजना। तन्ति वचनं।
193.Pageva pahiteti iminā ‘‘apahitepi gantabba’’nti ettha pisaddassa sambhāvanatthaṃ dasseti. Pañcannaṃ sahadhammikānaṃ santikaṃ gantabbabhāvassa kāraṇaṃ vibhajitvā dassento āha ‘‘bhikkhu gilāno hotī’’tiādi. Dasahīti ‘‘saṅgho kammaṃ kattukāmo hoti, kataṃ vā saṅghena kammaṃ hotī’’ti idaṃ aṅgaṃ ekaṃ katvā dasahi. Navahīti parivāsārahaṃ apanetvā navahi. Catūhīti gilānaanabhiratikukkuccadiṭṭhigatauppannasaṅkhātehi catūhi. Iti imehi chahīti yojanā. Sāmaṇerassapi chahīti ettha channaṃ sarūpaṃ vitthāretvā dassento āha ‘‘ādito’’tiādi. Taṃ suviññeyyameva. Sāmaṇeriyā santikaṃ pañcahi gantabbanti yojanā. Paratoti parasmā, parasmiṃ vā. Andhakaṭṭhakathāyaṃ vuttanti sambandho. Ye ñātakā vā ye aññātakā vā atthi, tesampīti yojanā. Tanti vacanaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / ११०. पञ्चन्नं अप्पहितेपि अनुजानना • 110. Pañcannaṃ appahitepi anujānanā
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / पञ्चन्नंअप्पहितेपिअनुजाननकथा • Pañcannaṃappahitepianujānanakathā
