| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၁၁၀. ပဉ္စန္နံ အပ္ပဟိတေပိ အနုဇာနနကထာ
110. Pañcannaṃ appahitepi anujānanakathā
၁၉၃. ပဂေဝ ပဟိတေတိ ဣမိနာ ‘‘အပဟိတေပိ ဂန္တဗ္ဗ’’န္တိ ဧတ္ထ ပိသဒ္ဒသ္သ သမ္ဘာဝနတ္ထံ ဒသ္သေတိ။ ပဉ္စန္နံ သဟဓမ္မိကာနံ သန္တိကံ ဂန္တဗ္ဗဘာဝသ္သ ကာရဏံ ဝိဘဇိတ္ဝာ ဒသ္သေန္တော အာဟ ‘‘ဘိက္ခု ဂိလာနော ဟောတီ’’တိအာဒိ။ ဒသဟီတိ ‘‘သင္ဃော ကမ္မံ ကတ္တုကာမော ဟောတိ, ကတံ ဝာ သင္ဃေန ကမ္မံ ဟောတီ’’တိ ဣဒံ အင္ဂံ ဧကံ ကတ္ဝာ ဒသဟိ။ နဝဟီတိ ပရိဝာသာရဟံ အပနေတ္ဝာ နဝဟိ။ စတူဟီတိ ဂိလာနအနဘိရတိကုက္ကုစ္စဒိဋ္ဌိဂတဥပ္ပန္နသင္ခာတေဟိ စတူဟိ။ ဣတိ ဣမေဟိ ဆဟီတိ ယောဇနာ။ သာမဏေရသ္သပိ ဆဟီတိ ဧတ္ထ ဆန္နံ သရူပံ ဝိတ္ထာရေတ္ဝာ ဒသ္သေန္တော အာဟ ‘‘အာဒိတော’’တိအာဒိ။ တံ သုဝိညေယ္ယမေဝ။ သာမဏေရိယာ သန္တိကံ ပဉ္စဟိ ဂန္တဗ္ဗန္တိ ယောဇနာ။ ပရတောတိ ပရသ္မာ, ပရသ္မိံ ဝာ။ အန္ဓကဋ္ဌကထာယံ ဝုတ္တန္တိ သမ္ဗန္ဓော။ ယေ ဉာတကာ ဝာ ယေ အညာတကာ ဝာ အတ္ထိ, တေသမ္ပီတိ ယောဇနာ။ တန္တိ ဝစနံ။
193.Pageva pahiteti iminā ‘‘apahitepi gantabba’’nti ettha pisaddassa sambhāvanatthaṃ dasseti. Pañcannaṃ sahadhammikānaṃ santikaṃ gantabbabhāvassa kāraṇaṃ vibhajitvā dassento āha ‘‘bhikkhu gilāno hotī’’tiādi. Dasahīti ‘‘saṅgho kammaṃ kattukāmo hoti, kataṃ vā saṅghena kammaṃ hotī’’ti idaṃ aṅgaṃ ekaṃ katvā dasahi. Navahīti parivāsārahaṃ apanetvā navahi. Catūhīti gilānaanabhiratikukkuccadiṭṭhigatauppannasaṅkhātehi catūhi. Iti imehi chahīti yojanā. Sāmaṇerassapi chahīti ettha channaṃ sarūpaṃ vitthāretvā dassento āha ‘‘ādito’’tiādi. Taṃ suviññeyyameva. Sāmaṇeriyā santikaṃ pañcahi gantabbanti yojanā. Paratoti parasmā, parasmiṃ vā. Andhakaṭṭhakathāyaṃ vuttanti sambandho. Ye ñātakā vā ye aññātakā vā atthi, tesampīti yojanā. Tanti vacanaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၁၁၀. ပဉ္စန္နံ အပ္ပဟိတေပိ အနုဇာနနာ • 110. Pañcannaṃ appahitepi anujānanā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ပဉ္စန္နံအပ္ပဟိတေပိအနုဇာနနကထာ • Pañcannaṃappahitepianujānanakathā
