| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
পঞ্চন্নংঅপ্পহিতেপিঅনুজাননকথা
Pañcannaṃappahitepianujānanakathā
১৯৩. পঞ্চন্নং সত্তাহকরণীযেনাতি এতেসং ভিক্খুআদীনং সহধম্মিকানং ‘‘গিলানভত্তং ৰা গিলানুপট্ঠাকভত্তং ৰা ভেসজ্জং ৰা পরিযেসিস্সামি , পুচ্ছিস্সামি ৰা, উপট্ঠহিস্সামি ৰা’’তি এৰমাদিনা পরতো ৰিত্থারেত্ৰা দস্সিতেন কারণেন অপ্পহিতেপি গন্তব্বং, পগেৰ পহিতে। ভিক্খু গিলানো হোতি, অনভিরতি উপ্পন্না হোতি, কুক্কুচ্চং উপ্পন্নং হোতি, দিট্ঠিগতং উপ্পন্নং হোতি, গরুধম্মং অজ্ঝাপন্নো হোতি পরিৰাসারহো, মূলায পটিকস্সনারহো হোতি, মানত্তারহো, অব্ভানারহো, সঙ্ঘো কম্মং কত্তুকামো হোতি, কতং ৰা সঙ্ঘেন কম্মং হোতীতি এতেহি দসহি কারণেহি ভিক্খুস্স সন্তিকং গন্তব্বং। ভিক্খুনিযা সন্তিকং নৰহি কারণেহি গন্তব্বং, সিক্খমানায সন্তিকং ছহি – আদিতো চতূহি, সিক্খা কুপ্পিতা হোতি, উপসম্পজ্জিতুকামা হোতীতি। সামণেরস্সাপি ছহি – আদিতো চতূহি, ৰস্সং পুচ্ছিতুকামো উপসম্পজ্জিতুকামো হোতীতি। সামণেরিযা উপসম্পদং অপনেত্ৰা সিক্খাপদং দাতুকামো হোতীতি ইমিনা সদ্ধিং পঞ্চহি। পরতো মাতাপিতূনং অনুঞ্ঞাতট্ঠানেপি এসেৰ নযো। অন্ধকট্ঠকথাযং পন ‘‘যে মাতাপিতূনং উপট্ঠাকা ঞাতকা ৰা অঞ্ঞাতকা ৰা তেসম্পি অপ্পহিতে গন্তুং ৰট্টতী’’তি ৰুত্তং, তং নেৰ অট্ঠকথাযং, ন পাল়িযা ৰুত্তং, তস্মা ন গহেতব্বং।
193.Pañcannaṃsattāhakaraṇīyenāti etesaṃ bhikkhuādīnaṃ sahadhammikānaṃ ‘‘gilānabhattaṃ vā gilānupaṭṭhākabhattaṃ vā bhesajjaṃ vā pariyesissāmi , pucchissāmi vā, upaṭṭhahissāmi vā’’ti evamādinā parato vitthāretvā dassitena kāraṇena appahitepi gantabbaṃ, pageva pahite. Bhikkhu gilāno hoti, anabhirati uppannā hoti, kukkuccaṃ uppannaṃ hoti, diṭṭhigataṃ uppannaṃ hoti, garudhammaṃ ajjhāpanno hoti parivāsāraho, mūlāya paṭikassanāraho hoti, mānattāraho, abbhānāraho, saṅgho kammaṃ kattukāmo hoti, kataṃ vā saṅghena kammaṃ hotīti etehi dasahi kāraṇehi bhikkhussa santikaṃ gantabbaṃ. Bhikkhuniyā santikaṃ navahi kāraṇehi gantabbaṃ, sikkhamānāya santikaṃ chahi – ādito catūhi, sikkhā kuppitā hoti, upasampajjitukāmā hotīti. Sāmaṇerassāpi chahi – ādito catūhi, vassaṃ pucchitukāmo upasampajjitukāmo hotīti. Sāmaṇeriyā upasampadaṃ apanetvā sikkhāpadaṃ dātukāmo hotīti iminā saddhiṃ pañcahi. Parato mātāpitūnaṃ anuññātaṭṭhānepi eseva nayo. Andhakaṭṭhakathāyaṃ pana ‘‘ye mātāpitūnaṃ upaṭṭhākā ñātakā vā aññātakā vā tesampi appahite gantuṃ vaṭṭatī’’ti vuttaṃ, taṃ neva aṭṭhakathāyaṃ, na pāḷiyā vuttaṃ, tasmā na gahetabbaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১১০. পঞ্চন্নং অপ্পহিতেপি অনুজাননা • 110. Pañcannaṃ appahitepi anujānanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১১০. পঞ্চন্নং অপ্পহিতেপি অনুজাননকথা • 110. Pañcannaṃ appahitepi anujānanakathā
