| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৪. পঞ্চপুব্বনিমিত্তসুত্তং
4. Pañcapubbanimittasuttaṃ
৮৩. ৰুত্তঞ্হেতং ভগৰতা, ৰুত্তমরহতাতি মে সুতং –
83. Vuttañhetaṃ bhagavatā, vuttamarahatāti me sutaṃ –
‘‘যদা, ভিক্খৰে, দেৰো দেৰকাযা চৰনধম্মো হোতি, পঞ্চস্স পুব্বনিমিত্তানি পাতুভৰন্তি – মালা মিলাযন্তি, ৰত্থানি কিলিস্সন্তি, কচ্ছেহি সেদা মুচ্চন্তি, কাযে দুব্বণ্ণিযং ওক্কমতি, সকে দেৰো দেৰাসনে নাভিরমতীতি। তমেনং, ভিক্খৰে, দেৰা ‘চৰনধম্মো অযং দেৰপুত্তো’তি ইতি ৰিদিত্ৰা তীহি ৰাচাহি অনুমোদেন্তি 1 – ‘ইতো, ভো, সুগতিং গচ্ছ, সুগতিং গন্ত্ৰা সুলদ্ধলাভং লভ, সুলদ্ধলাভং লভিত্ৰা সুপ্পতিট্ঠিতো ভৰাহী’’’তি।
‘‘Yadā, bhikkhave, devo devakāyā cavanadhammo hoti, pañcassa pubbanimittāni pātubhavanti – mālā milāyanti, vatthāni kilissanti, kacchehi sedā muccanti, kāye dubbaṇṇiyaṃ okkamati, sake devo devāsane nābhiramatīti. Tamenaṃ, bhikkhave, devā ‘cavanadhammo ayaṃ devaputto’ti iti viditvā tīhi vācāhi anumodenti 2 – ‘ito, bho, sugatiṃ gaccha, sugatiṃ gantvā suladdhalābhaṃ labha, suladdhalābhaṃ labhitvā suppatiṭṭhito bhavāhī’’’ti.
এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘কিন্নু খো, ভন্তে, দেৰানং সুগতিগমনসঙ্খাতং; কিঞ্চ, ভন্তে, দেৰানং সুলদ্ধলাভসঙ্খাতং ; কিং পন, ভন্তে, দেৰানং সুপ্পতিট্ঠিতসঙ্খাত’’ন্তি?
Evaṃ vutte, aññataro bhikkhu bhagavantaṃ etadavoca – ‘‘kinnu kho, bhante, devānaṃ sugatigamanasaṅkhātaṃ; kiñca, bhante, devānaṃ suladdhalābhasaṅkhātaṃ ; kiṃ pana, bhante, devānaṃ suppatiṭṭhitasaṅkhāta’’nti?
‘‘মনুস্সত্তং খো, ভিক্খু 3, দেৰানং সুগতিগমনসঙ্খাতং; যং মনুস্সভূতো সমানো তথাগতপ্পৰেদিতে ধম্মৰিনযে সদ্ধং পটিলভতি। ইদং খো, ভিক্খু 4, দেৰানং সুলদ্ধলাভসঙ্খাতং; সা খো পনস্স সদ্ধা নিৰিট্ঠা হোতি মূলজাতা পতিট্ঠিতা দল়্হা অসংহারিযা সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং। ইদং খো, ভিক্খু 5, দেৰানং সুপ্পতিট্ঠিতসঙ্খাত’’ন্তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Manussattaṃ kho, bhikkhu 6, devānaṃ sugatigamanasaṅkhātaṃ; yaṃ manussabhūto samāno tathāgatappavedite dhammavinaye saddhaṃ paṭilabhati. Idaṃ kho, bhikkhu 7, devānaṃ suladdhalābhasaṅkhātaṃ; sā kho panassa saddhā niviṭṭhā hoti mūlajātā patiṭṭhitā daḷhā asaṃhāriyā samaṇena vā brāhmaṇena vā devena vā mārena vā brahmunā vā kenaci vā lokasmiṃ. Idaṃ kho, bhikkhu 8, devānaṃ suppatiṭṭhitasaṅkhāta’’nti. Etamatthaṃ bhagavā avoca. Tatthetaṃ iti vuccati –
‘‘যদা দেৰো দেৰকাযা, চৰতি আযুসঙ্খযা।
‘‘Yadā devo devakāyā, cavati āyusaṅkhayā;
তযো সদ্দা নিচ্ছরন্তি, দেৰানং অনুমোদতং॥
Tayo saddā niccharanti, devānaṃ anumodataṃ.
‘‘‘ইতো ভো সুগতিং গচ্ছ, মনুস্সানং সহব্যতং।
‘‘‘Ito bho sugatiṃ gaccha, manussānaṃ sahabyataṃ;
মনুস্সভূতো সদ্ধম্মে, লভ সদ্ধং অনুত্তরং॥
Manussabhūto saddhamme, labha saddhaṃ anuttaraṃ.
‘‘‘সা তে সদ্ধা নিৰিট্ঠস্স, মূলজাতা পতিট্ঠিতা।
‘‘‘Sā te saddhā niviṭṭhassa, mūlajātā patiṭṭhitā;
যাৰজীৰং অসংহীরা, সদ্ধম্মে সুপ্পৰেদিতে॥
Yāvajīvaṃ asaṃhīrā, saddhamme suppavedite.
‘‘‘কাযদুচ্চরিতং হিত্ৰা, ৰচীদুচ্চরিতানি চ।
‘‘‘Kāyaduccaritaṃ hitvā, vacīduccaritāni ca;
মনোদুচ্চরিতং হিত্ৰা, যঞ্চঞ্ঞং দোসসঞ্হিতং॥
Manoduccaritaṃ hitvā, yañcaññaṃ dosasañhitaṃ.
‘‘‘কাযেন কুসলং কত্ৰা, ৰাচায কুসলং বহুং।
‘‘‘Kāyena kusalaṃ katvā, vācāya kusalaṃ bahuṃ;
মনসা কুসলং কত্ৰা, অপ্পমাণং নিরূপধিং॥
Manasā kusalaṃ katvā, appamāṇaṃ nirūpadhiṃ.
‘‘‘ততো ওপধিকং পুঞ্ঞং, কত্ৰা দানেন তং বহুং।
‘‘‘Tato opadhikaṃ puññaṃ, katvā dānena taṃ bahuṃ;
‘‘ইমায অনুকম্পায, দেৰা দেৰং যদা ৰিদূ।
‘‘Imāya anukampāya, devā devaṃ yadā vidū;
চৰন্তং অনুমোদেন্তি, এহি দেৰ পুনপ্পুন’’ন্তি॥
Cavantaṃ anumodenti, ehi deva punappuna’’nti.
অযম্পি অত্থো ৰুত্তো ভগৰতা, ইতি মে সুতন্তি। চতুত্থং।
Ayampi attho vutto bhagavatā, iti me sutanti. Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৪. পঞ্চপুব্বনিমিত্তসুত্তৰণ্ণনা • 4. Pañcapubbanimittasuttavaṇṇanā
