| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៤. បញ្ចបុព្ពនិមិត្តសុត្តំ
4. Pañcapubbanimittasuttaṃ
៨៣. វុត្តញ្ហេតំ ភគវតា, វុត្តមរហតាតិ មេ សុតំ –
83. Vuttañhetaṃ bhagavatā, vuttamarahatāti me sutaṃ –
‘‘យទា, ភិក្ខវេ, ទេវោ ទេវកាយា ចវនធម្មោ ហោតិ, បញ្ចស្ស បុព្ពនិមិត្តានិ បាតុភវន្តិ – មាលា មិលាយន្តិ, វត្ថានិ កិលិស្សន្តិ, កច្ឆេហិ សេទា មុច្ចន្តិ, កាយេ ទុព្ពណ្ណិយំ ឱក្កមតិ, សកេ ទេវោ ទេវាសនេ នាភិរមតីតិ។ តមេនំ, ភិក្ខវេ, ទេវា ‘ចវនធម្មោ អយំ ទេវបុត្តោ’តិ ឥតិ វិទិត្វា តីហិ វាចាហិ អនុមោទេន្តិ 1 – ‘ឥតោ, ភោ, សុគតិំ គច្ឆ, សុគតិំ គន្ត្វា សុលទ្ធលាភំ លភ, សុលទ្ធលាភំ លភិត្វា សុប្បតិដ្ឋិតោ ភវាហី’’’តិ។
‘‘Yadā, bhikkhave, devo devakāyā cavanadhammo hoti, pañcassa pubbanimittāni pātubhavanti – mālā milāyanti, vatthāni kilissanti, kacchehi sedā muccanti, kāye dubbaṇṇiyaṃ okkamati, sake devo devāsane nābhiramatīti. Tamenaṃ, bhikkhave, devā ‘cavanadhammo ayaṃ devaputto’ti iti viditvā tīhi vācāhi anumodenti 2 – ‘ito, bho, sugatiṃ gaccha, sugatiṃ gantvā suladdhalābhaṃ labha, suladdhalābhaṃ labhitvā suppatiṭṭhito bhavāhī’’’ti.
ឯវំ វុត្តេ, អញ្ញតរោ ភិក្ខុ ភគវន្តំ ឯតទវោច – ‘‘កិន្នុ ខោ, ភន្តេ, ទេវានំ សុគតិគមនសង្ខាតំ; កិញ្ច, ភន្តេ, ទេវានំ សុលទ្ធលាភសង្ខាតំ ; កិំ បន, ភន្តេ, ទេវានំ សុប្បតិដ្ឋិតសង្ខាត’’ន្តិ?
Evaṃ vutte, aññataro bhikkhu bhagavantaṃ etadavoca – ‘‘kinnu kho, bhante, devānaṃ sugatigamanasaṅkhātaṃ; kiñca, bhante, devānaṃ suladdhalābhasaṅkhātaṃ ; kiṃ pana, bhante, devānaṃ suppatiṭṭhitasaṅkhāta’’nti?
‘‘មនុស្សត្តំ ខោ, ភិក្ខុ 3, ទេវានំ សុគតិគមនសង្ខាតំ; យំ មនុស្សភូតោ សមានោ តថាគតប្បវេទិតេ ធម្មវិនយេ សទ្ធំ បដិលភតិ។ ឥទំ ខោ, ភិក្ខុ 4, ទេវានំ សុលទ្ធលាភសង្ខាតំ; សា ខោ បនស្ស សទ្ធា និវិដ្ឋា ហោតិ មូលជាតា បតិដ្ឋិតា ទឡ្ហា អសំហារិយា សមណេន វា ព្រាហ្មណេន វា ទេវេន វា មារេន វា ព្រហ្មុនា វា កេនចិ វា លោកស្មិំ។ ឥទំ ខោ, ភិក្ខុ 5, ទេវានំ សុប្បតិដ្ឋិតសង្ខាត’’ន្តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Manussattaṃ kho, bhikkhu 6, devānaṃ sugatigamanasaṅkhātaṃ; yaṃ manussabhūto samāno tathāgatappavedite dhammavinaye saddhaṃ paṭilabhati. Idaṃ kho, bhikkhu 7, devānaṃ suladdhalābhasaṅkhātaṃ; sā kho panassa saddhā niviṭṭhā hoti mūlajātā patiṭṭhitā daḷhā asaṃhāriyā samaṇena vā brāhmaṇena vā devena vā mārena vā brahmunā vā kenaci vā lokasmiṃ. Idaṃ kho, bhikkhu 8, devānaṃ suppatiṭṭhitasaṅkhāta’’nti. Etamatthaṃ bhagavā avoca. Tatthetaṃ iti vuccati –
‘‘យទា ទេវោ ទេវកាយា, ចវតិ អាយុសង្ខយា;
‘‘Yadā devo devakāyā, cavati āyusaṅkhayā;
តយោ សទ្ទា និច្ឆរន្តិ, ទេវានំ អនុមោទតំ។
Tayo saddā niccharanti, devānaṃ anumodataṃ.
‘‘‘ឥតោ ភោ សុគតិំ គច្ឆ, មនុស្សានំ សហព្យតំ;
‘‘‘Ito bho sugatiṃ gaccha, manussānaṃ sahabyataṃ;
មនុស្សភូតោ សទ្ធម្មេ, លភ សទ្ធំ អនុត្តរំ។
Manussabhūto saddhamme, labha saddhaṃ anuttaraṃ.
‘‘‘សា តេ សទ្ធា និវិដ្ឋស្ស, មូលជាតា បតិដ្ឋិតា;
‘‘‘Sā te saddhā niviṭṭhassa, mūlajātā patiṭṭhitā;
យាវជីវំ អសំហីរា, សទ្ធម្មេ សុប្បវេទិតេ។
Yāvajīvaṃ asaṃhīrā, saddhamme suppavedite.
‘‘‘កាយទុច្ចរិតំ ហិត្វា, វចីទុច្ចរិតានិ ច;
‘‘‘Kāyaduccaritaṃ hitvā, vacīduccaritāni ca;
មនោទុច្ចរិតំ ហិត្វា, យញ្ចញ្ញំ ទោសសញ្ហិតំ។
Manoduccaritaṃ hitvā, yañcaññaṃ dosasañhitaṃ.
‘‘‘កាយេន កុសលំ កត្វា, វាចាយ កុសលំ ពហុំ;
‘‘‘Kāyena kusalaṃ katvā, vācāya kusalaṃ bahuṃ;
មនសា កុសលំ កត្វា, អប្បមាណំ និរូបធិំ។
Manasā kusalaṃ katvā, appamāṇaṃ nirūpadhiṃ.
‘‘‘តតោ ឱបធិកំ បុញ្ញំ, កត្វា ទានេន តំ ពហុំ;
‘‘‘Tato opadhikaṃ puññaṃ, katvā dānena taṃ bahuṃ;
‘‘ឥមាយ អនុកម្បាយ, ទេវា ទេវំ យទា វិទូ;
‘‘Imāya anukampāya, devā devaṃ yadā vidū;
ចវន្តំ អនុមោទេន្តិ, ឯហិ ទេវ បុនប្បុន’’ន្តិ។
Cavantaṃ anumodenti, ehi deva punappuna’’nti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ ចតុត្ថំ។
Ayampi attho vutto bhagavatā, iti me sutanti. Catutthaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៤. បញ្ចបុព្ពនិមិត្តសុត្តវណ្ណនា • 4. Pañcapubbanimittasuttavaṇṇanā
