| Library / Tipiṭaka / д̇ибидага • Tipiṭaka / бзд̇авад̇т̇у-адтагат̇аа • Petavatthu-aṭṭhakathā |
6. бан̃жабуд̇д̇акаад̣̇агабзд̇ивад̇т̇уван̣н̣анаа
6. Pañcaputtakhādakapetivatthuvaṇṇanā
наг̇г̇аа д̣̇уб̣б̣ан̣н̣аруубаасийд̇и ид̣̇ам̣ сад̇т̇ари саавад̇т̇ияам̣ вихаранд̇з бан̃жабуд̇д̇акаад̣̇агабзд̇им̣ аараб̣бха вуд̇д̇ам̣. саавад̇т̇ияаа гира авид̣̇уурз г̇аамагз ан̃н̃ад̇арасса гудумб̣игасса бхарияаа ван̃жхаа ахоси. д̇асса н̃аад̇агаа зд̇ад̣̇авожум̣ – ‘‘д̇ава баж̇аабад̇и ван̃жхаа, ан̃н̃ам̣ д̇з ган̃н̃ам̣ аанзмаа’’д̇и. со д̇ассо бхарияааяа синзхзна на ижчи. ат̇асса бхарияаа д̇ам̣ бавад̇д̇им̣ суд̇ваа саамигам̣ звамааха – ‘‘саами, ахам̣ ван̃жхаа, ан̃н̃аа ган̃н̃аа аанзд̇аб̣б̣аа, маа д̇з гулавам̣со убажчиж̇ж̇ий’’д̇и. со д̇ааяа ниббийл̣ияамаано ан̃н̃ам̣ ган̃н̃ам̣ аанзси. саа абарзна самаязна г̇аб̣бхиний ахоси. ван̃жхид̇т̇ий – ‘‘аяам̣ буд̇д̇ам̣ лабхид̇ваа имасса г̇зхасса иссараа бхависсад̇ий’’д̇и иссаабагад̇аа д̇ассаа г̇аб̣бхабаад̇ануубааяам̣ бариязсанд̇ий ан̃н̃ад̇арам̣ бариб̣б̣ааж̇игам̣ аннабаанаад̣̇ийхи сан̇г̇ан̣хид̇ваа д̇ааяа д̇ассаа г̇аб̣бхабаад̇анам̣ д̣̇аабзси. саа г̇аб̣бхз бад̇ид̇з ад̇д̇ано маад̇уяаа аарожзси, маад̇аа ад̇д̇ано н̃аад̇агз самод̇хаанзд̇ваа д̇амад̇т̇ам̣ нивзд̣̇зси. д̇з ван̃жхид̇т̇им̣ зд̇ад̣̇авожум̣ – ‘‘д̇аяаа имиссаа г̇аб̣бхо баад̇ид̇о’’д̇и? ‘‘наахам̣ баад̇змий’’д̇и. ‘‘сажз д̇аяаа г̇аб̣бхо на баад̇ид̇о, сабат̇ам̣ гарохий’’д̇и . ‘‘сажз маяаа г̇аб̣бхо баад̇ид̇о, д̣̇уг̇г̇ад̇ибарааяан̣аа куббибаасаабхибхууд̇аа сааяам̣ баад̇ам̣ бан̃жа бан̃жа буд̇д̇з виж̇ааяид̇ваа каад̣̇ид̇ваа д̇ид̇д̇им̣ на г̇ажчзяяам̣, нижжам̣ д̣̇уг̇г̇анд̇хаа магкигаабаригин̣н̣аа жа бхавзяяа’’нд̇и мусаа вад̇ваа сабат̇ам̣ агааси. саа нажирассзва гаалам̣ гад̇ваа д̇ассзва г̇аамасса авид̣̇уурз д̣̇уб̣б̣ан̣н̣аруубаа бзд̇ий худ̇ваа ниб̣б̣ад̇д̇и.
Naggā dubbaṇṇarūpāsīti idaṃ satthari sāvatthiyaṃ viharante pañcaputtakhādakapetiṃ ārabbha vuttaṃ. Sāvatthiyā kira avidūre gāmake aññatarassa kuṭumbikassa bhariyā vañjhā ahosi. Tassa ñātakā etadavocuṃ – ‘‘tava pajāpati vañjhā, aññaṃ te kaññaṃ ānemā’’ti. So tasso bhariyāya sinehena na icchi. Athassa bhariyā taṃ pavattiṃ sutvā sāmikaṃ evamāha – ‘‘sāmi, ahaṃ vañjhā, aññā kaññā ānetabbā, mā te kulavaṃso upacchijjī’’ti. So tāya nippīḷiyamāno aññaṃ kaññaṃ ānesi. Sā aparena samayena gabbhinī ahosi. Vañjhitthī – ‘‘ayaṃ puttaṃ labhitvā imassa gehassa issarā bhavissatī’’ti issāpakatā tassā gabbhapātanūpāyaṃ pariyesantī aññataraṃ paribbājikaṃ annapānādīhi saṅgaṇhitvā tāya tassā gabbhapātanaṃ dāpesi. Sā gabbhe patite attano mātuyā ārocesi, mātā attano ñātake samodhānetvā tamatthaṃ nivedesi. Te vañjhitthiṃ etadavocuṃ – ‘‘tayā imissā gabbho pātito’’ti? ‘‘Nāhaṃ pātemī’’ti. ‘‘Sace tayā gabbho na pātito, sapathaṃ karohī’’ti . ‘‘Sace mayā gabbho pātito, duggatiparāyaṇā khuppipāsābhibhūtā sāyaṃ pātaṃ pañca pañca putte vijāyitvā khāditvā tittiṃ na gaccheyyaṃ, niccaṃ duggandhā makkhikāparikiṇṇā ca bhaveyya’’nti musā vatvā sapathaṃ akāsi. Sā nacirasseva kālaṃ katvā tasseva gāmassa avidūre dubbaṇṇarūpā petī hutvā nibbatti.
д̇ад̣̇аа ж̇анабад̣̇з вуд̇т̇авассаа адта т̇зраа сад̇т̇у д̣̇ассанад̇т̇ам̣ саавад̇т̇им̣ ааг̇ажчанд̇аа д̇асса г̇аамасса авид̣̇уурз чааяууд̣̇агасамбаннз аран̃н̃адтаанз ваасам̣ убаг̇ажчим̣су. ат̇а саа бзд̇ий т̇зраанам̣ ад̇д̇аанам̣ д̣̇ассзси. д̇зсу сан̇гхад̇т̇зро д̇ам̣ бзд̇им̣ –
Tadā janapade vutthavassā aṭṭha therā satthu dassanatthaṃ sāvatthiṃ āgacchantā tassa gāmassa avidūre chāyūdakasampanne araññaṭṭhāne vāsaṃ upagacchiṃsu. Atha sā petī therānaṃ attānaṃ dassesi. Tesu saṅghatthero taṃ petiṃ –
26.
26.
‘‘наг̇г̇аа д̣̇уб̣б̣ан̣н̣аруубааси, д̣̇уг̇г̇анд̇хаа бууд̇и вааяаси;
‘‘Naggā dubbaṇṇarūpāsi, duggandhā pūti vāyasi;
магкигаахи баригин̣н̣аа, гаа ну д̇вам̣ ид̇ха д̇идтасий’’д̇и. –
Makkhikāhi parikiṇṇā, kā nu tvaṃ idha tiṭṭhasī’’ti. –
г̇аат̇ааяа бадибужчи. д̇ад̇т̇а наг̇г̇аад̇и нижжол̣аа. д̣̇уб̣б̣ан̣н̣аруубаасийд̇и н̣авируубаа ад̇ивияа б̣ийбхажчаруубзна саманнааг̇ад̇аа аси. д̣̇уг̇г̇анд̇хаад̇и анидтаг̇анд̇хаа. бууд̇и вааяасийд̇и сарийрад̇о гун̣абаг̇анд̇хам̣ вааяаси. магкигаахи баригин̣н̣аад̇и нийламагкигаахи саманд̇ад̇о аагин̣н̣аа. гаа ну д̇вам̣ ид̇ха д̇идтасийд̇и гаа наама зваруубаа имасмим̣ таанз д̇идтаси, ид̇о жид̇о жа вижарасийд̇и ад̇т̇о.
Gāthāya paṭipucchi. Tattha naggāti niccoḷā. Dubbaṇṇarūpāsīti ṇavirūpā ativiya bībhaccharūpena samannāgatā asi. Duggandhāti aniṭṭhagandhā. Pūti vāyasīti sarīrato kuṇapagandhaṃ vāyasi. Makkhikāhi parikiṇṇāti nīlamakkhikāhi samantato ākiṇṇā. Kā nu tvaṃ idha tiṭṭhasīti kā nāma evarūpā imasmiṃ ṭhāne tiṭṭhasi, ito cito ca vicarasīti attho.
ат̇а саа бзд̇ий махаат̇зрзна звам̣ будтаа ад̇д̇аанам̣ багаасзнд̇ий сад̇д̇аанам̣ сам̣взг̇ам̣ ж̇анзнд̇ий –
Atha sā petī mahātherena evaṃ puṭṭhā attānaṃ pakāsentī sattānaṃ saṃvegaṃ janentī –
27.
27.
‘‘ахам̣ бхад̣̇анд̇з бзд̇иймхи, д̣̇уг̇г̇ад̇аа яамалогигаа;
‘‘Ahaṃ bhadante petīmhi, duggatā yamalokikā;
баабагаммам̣ гарид̇ваана, бзд̇алогам̣ ид̇о г̇ад̇аа.
Pāpakammaṃ karitvāna, petalokaṃ ito gatā.
28.
28.
‘‘гаалзна бан̃жа буд̇д̇аани, сааяам̣ бан̃жа бунаабарз;
‘‘Kālena pañca puttāni, sāyaṃ pañca punāpare;
виж̇ааяид̇ваана каад̣̇аами, д̇зби наа хонд̇и мз алам̣.
Vijāyitvāna khādāmi, tepi nā honti me alaṃ.
29.
29.
‘‘барид̣аяхад̇и д̇хуумааяад̇и, куд̣̇ааяа хад̣̇аяам̣ мама;
‘‘Pariḍayhati dhūmāyati, khudāya hadayaṃ mama;
баанийяам̣ на лабхз баад̇ум̣, басса мам̣ б̣яасанам̣ г̇ад̇а’’нд̇и. –
Pānīyaṃ na labhe pātuṃ, passa maṃ byasanaṃ gata’’nti. –
имаа д̇иссо г̇аат̇аа абхааси.
Imā tisso gāthā abhāsi.
27. д̇ад̇т̇а бхад̣̇анд̇зд̇и т̇зрам̣ г̇ааравзна аалабад̇и. д̣̇уг̇г̇ад̇аад̇и д̣̇уг̇г̇ад̇им̣ г̇ад̇аа. яамалогигаад̇и ‘‘яамалого’’д̇и лад̣̇д̇ханаамз бзд̇алогз д̇ад̇т̇а барияаабаннабхаавзна вид̣̇ид̇аа. ид̇о г̇ад̇аад̇и ид̇о мануссалогад̇о бзд̇алогам̣ убабаж̇ж̇анавасзна г̇ад̇аа, убабаннаад̇и ад̇т̇о.
27. Tattha bhadanteti theraṃ gāravena ālapati. Duggatāti duggatiṃ gatā. Yamalokikāti ‘‘yamaloko’’ti laddhanāme petaloke tattha pariyāpannabhāvena viditā. Ito gatāti ito manussalokato petalokaṃ upapajjanavasena gatā, upapannāti attho.
28. гаалзнаад̇и рад̇д̇ияаа вибхаад̇агаалз. бхуммад̇т̇з хи зд̇ам̣ гаран̣аважанам̣. бан̃жа буд̇д̇аанийд̇и бан̃жа буд̇д̇з. лин̇г̇авибаллаасзна хзд̇ам̣ вуд̇д̇ам̣. сааяам̣ бан̃жа бунаабарзд̇и сааяанхагаалз буна абарз бан̃жа буд̇д̇з каад̣̇аамийд̇и яож̇анаа. виж̇ааяид̇ваанаад̇и д̣̇ивасз д̣̇ивасз д̣̇аса д̣̇аса буд̇д̇з виж̇ааяид̇ваа. д̇зби наа хонд̇и мз аланд̇и д̇зби д̣̇асабуд̇д̇аа згад̣̇ивасам̣ маяхам̣ куд̣̇ааяа бадигхаад̇ааяа ахам̣ барияад̇д̇аа на хонд̇и. г̇аат̇аасукад̇т̇ан̃хзд̇т̇а наа-ид̇и д̣̇ийгхам̣ гад̇ваа вуд̇д̇ам̣.
28.Kālenāti rattiyā vibhātakāle. Bhummatthe hi etaṃ karaṇavacanaṃ. Pañca puttānīti pañca putte. Liṅgavipallāsena hetaṃ vuttaṃ. Sāyaṃ pañca punāpareti sāyanhakāle puna apare pañca putte khādāmīti yojanā. Vijāyitvānāti divase divase dasa dasa putte vijāyitvā. Tepi nā honti me alanti tepi dasaputtā ekadivasaṃ mayhaṃ khudāya paṭighātāya ahaṃ pariyattā na honti. Gāthāsukhatthañhettha nā-iti dīghaṃ katvā vuttaṃ.
29. барид̣аяхад̇и д̇хуумааяад̇и куд̣̇ааяа хад̣̇аяам̣ мамаад̇и куд̣̇ааяа ж̇игхажчааяа б̣аад̇хияамаанааяа мама хад̣̇аяабад̣̇зсо уд̣̇араг̇г̇инаа барисаманд̇ад̇о жхааяад̇и д̇хуумааяад̇и санд̇аббад̇и. баанийяам̣ на лабхз баад̇унд̇и бибаасаабхибхууд̇аа д̇ад̇т̇а д̇ад̇т̇а вижаранд̇ий баанийяамби баад̇ум̣ на лабхаами. басса мам̣ б̣яасанам̣ г̇ад̇анд̇и бзд̇уубабад̇д̇ияаа саад̇хааран̣ам̣ асаад̇хааран̣ан̃жа имам̣ ийд̣̇исам̣ б̣яасанам̣ убаг̇ад̇ам̣ мам̣ басса, бханд̇зд̇и ад̇д̇анаа анубхавияамаанам̣ д̣̇угкам̣ т̇зрасса бавзд̣̇зси.
29.Pariḍayhati dhūmāyati khudāya hadayaṃ mamāti khudāya jighacchāya bādhiyamānāya mama hadayapadeso udaragginā parisamantato jhāyati dhūmāyati santappati. Pānīyaṃ na labhe pātunti pipāsābhibhūtā tattha tattha vicarantī pānīyampi pātuṃ na labhāmi. Passa maṃ byasanaṃ gatanti petūpapattiyā sādhāraṇaṃ asādhāraṇañca imaṃ īdisaṃ byasanaṃ upagataṃ maṃ passa, bhanteti attanā anubhaviyamānaṃ dukkhaṃ therassa pavedesi.
д̇ам̣ суд̇ваа т̇зро д̇ааяа гад̇агаммам̣ бужчанд̇о –
Taṃ sutvā thero tāya katakammaṃ pucchanto –
30.
30.
‘‘гим̣ ну гааязна ваажааяа, манасаа д̣̇уггадам̣ гад̇ам̣;
‘‘Kiṃ nu kāyena vācāya, manasā dukkaṭaṃ kataṃ;
гисса гаммавибаагзна, буд̇д̇амам̣саани каад̣̇асий’’д̇и. –
Kissa kammavipākena, puttamaṃsāni khādasī’’ti. –
г̇аат̇амааха. д̇ад̇т̇а д̣̇уггаданд̇и д̣̇ужжарид̇ам̣. гисса гаммавибаагзнаад̇и гийд̣̇исасса гаммасса вибаагзна, гим̣ баан̣аад̇ибаад̇асса, уд̣̇ааху ад̣̇иннаад̣̇аанаад̣̇ийсу ан̃н̃ад̇арассаад̇и ад̇т̇о. ‘‘гзна гаммавибаагзнаа’’д̇и гзжи батанд̇и.
Gāthamāha. Tattha dukkaṭanti duccaritaṃ. Kissa kammavipākenāti kīdisassa kammassa vipākena, kiṃ pāṇātipātassa, udāhu adinnādānādīsu aññatarassāti attho. ‘‘Kena kammavipākenā’’ti keci paṭhanti.
ат̇а саа бзд̇ий ад̇д̇анаа гад̇агаммам̣ т̇зрасса гат̇знд̇ий –
Atha sā petī attanā katakammaṃ therassa kathentī –
31.
31.
‘‘сабад̇ий мз г̇аб̣бхиний ааси, д̇ассаа баабам̣ ажзд̇аяим̣;
‘‘Sapatī me gabbhinī āsi, tassā pāpaṃ acetayiṃ;
саахам̣ бад̣̇удтаманасаа, агарим̣ г̇аб̣бхабаад̇анам̣.
Sāhaṃ paduṭṭhamanasā, akariṃ gabbhapātanaṃ.
32.
32.
‘‘д̇асса д̣̇взмаасиго г̇аб̣бхо, лохид̇ан̃н̃зва баг̇гхари;
‘‘Tassa dvemāsiko gabbho, lohitaññeva pagghari;
д̇ад̣̇ассаа маад̇аа губид̇аа, маяхам̣ н̃аад̇ий самаанаяи;
Tadassā mātā kupitā, mayhaṃ ñātī samānayi;
сабат̇ан̃жа мам̣ агаарзси, барибхаасаабаяий жа мам̣.
Sapathañca maṃ akāresi, paribhāsāpayī ca maṃ.
33.
33.
‘‘саахам̣ гхоран̃жа сабат̇ам̣, мусааваад̣̇ам̣ абхаасисам̣;
‘‘Sāhaṃ ghorañca sapathaṃ, musāvādaṃ abhāsisaṃ;
‘буд̇д̇амам̣саани каад̣̇аами, сажз д̇ам̣ багад̇ам̣ маяаа’.
‘Puttamaṃsāni khādāmi, sace taṃ pakataṃ mayā’.
34.
34.
‘‘д̇асса гаммасса вибаагзна, мусааваад̣̇асса жуубхаяам̣;
‘‘Tassa kammassa vipākena, musāvādassa cūbhayaṃ;
буд̇д̇амам̣саани каад̣̇аами, буб̣б̣алохид̇амагкид̇аа’’д̇и. – г̇аат̇ааяо абхааси;
Puttamaṃsāni khādāmi, pubbalohitamakkhitā’’ti. – gāthāyo abhāsi;
31-32. д̇ад̇т̇а сабад̇ийд̇и самаанабад̇игаа ид̇т̇ий вужжад̇и. д̇ассаа баабам̣ ажзд̇аяинд̇и д̇асса сабад̇ияаа баабам̣ луд̣̇д̣̇агам̣ гаммам̣ ажзд̇аяим̣. бад̣̇удтаманасаад̇и бад̣̇удтажид̇д̇аа, бад̣̇удтзна ваа манасаа. д̣̇взмаасигод̇и д̣̇взмаасаж̇аад̇о бад̇идтид̇о худ̇ваа д̣̇взмаасигаа. лохид̇ан̃н̃зва баг̇гхарийд̇и вибаж̇ж̇амаано рухиран̃н̃зва худ̇ваа виссанд̣̇и. д̇ад̣̇ассаа маад̇аа губид̇аа, маяхам̣ н̃аад̇ий самаанаяийд̇и д̇ад̣̇аа ассаа сабад̇ияаа маад̇аа маяхам̣ губид̇аа ад̇д̇ано н̃аад̇агз самод̇хаанзси. ‘‘д̇ад̇ассаа’’д̇и ваа баато, д̇ад̇о ассаад̇и бад̣̇авибхааг̇о.
31-32. Tattha sapatīti samānapatikā itthī vuccati. Tassā pāpaṃ acetayinti tassa sapatiyā pāpaṃ luddakaṃ kammaṃ acetayiṃ. Paduṭṭhamanasāti paduṭṭhacittā, paduṭṭhena vā manasā. Dvemāsikoti dvemāsajāto patiṭṭhito hutvā dvemāsikā. Lohitaññeva paggharīti vipajjamāno ruhiraññeva hutvā vissandi. Tadassā mātā kupitā, mayhaṃ ñātī samānayīti tadā assā sapatiyā mātā mayhaṃ kupitā attano ñātake samodhānesi. ‘‘Tatassā’’ti vā pāṭho, tato assāti padavibhāgo.
33-34. сабат̇анд̇и сабанам̣. барибхаасаабаяийд̇и бхаязна д̇аж̇ж̇аабзси. сабат̇ам̣ мусааваад̣̇ам̣ абхаасисанд̇и ‘‘сажз д̇ам̣ маяаа гад̇ам̣, ийд̣̇исий бхавзяяа’’нд̇и гад̇амзва баабам̣ агад̇ам̣ гад̇ваа д̣̇ассзнд̇ий мусааваад̣̇ам̣ абхууд̇ам̣ сабат̇ам̣ абхаасим̣. муд̇д̇амам̣саани каад̣̇аами, сажзд̇ам̣ багад̇ам̣ маяаад̇и ид̣̇ам̣ д̇ад̣̇аа сабат̇асса гад̇аагаарад̣̇ассанам̣. яад̣̇и зд̇ам̣ г̇аб̣бхабаад̇анабаабам̣ маяаа гад̇ам̣, ааяад̇им̣ бунаб̣бхаваабхиниб̣б̣ад̇д̇ияам̣ маяхам̣ буд̇д̇амам̣сааниязва каад̣̇зяяанд̇и ад̇т̇о. д̇асса гаммассаад̇и д̇асса г̇аб̣бхабаад̇анавасзна багад̇асса баан̣аад̇ибаад̇агаммасса. мусааваад̣̇асса жаад̇и мусааваад̣̇агаммасса жа. убхаяанд̇и убхаяассаби гаммасса убхаязна вибаагзна. гаран̣ад̇т̇з хи ид̣̇ам̣ бажжад̇д̇аважанам̣. буб̣б̣алохид̇амагкид̇аад̇и басаванавасзна барибхиж̇ж̇анавасзна жа буб̣б̣зна жа лохид̇зна жа магкид̇аа худ̇ваа буд̇д̇амам̣саани каад̣̇аамийд̇и яож̇анаа.
33-34.Sapathanti sapanaṃ. Paribhāsāpayīti bhayena tajjāpesi. Sapathaṃ musāvādaṃ abhāsisanti ‘‘sace taṃ mayā kataṃ, īdisī bhaveyya’’nti katameva pāpaṃ akataṃ katvā dassentī musāvādaṃ abhūtaṃ sapathaṃ abhāsiṃ. Muttamaṃsāni khādāmi, sacetaṃ pakataṃ mayāti idaṃ tadā sapathassa katākāradassanaṃ. Yadi etaṃ gabbhapātanapāpaṃ mayā kataṃ, āyatiṃ punabbhavābhinibbattiyaṃ mayhaṃ puttamaṃsāniyeva khādeyyanti attho. Tassa kammassāti tassa gabbhapātanavasena pakatassa pāṇātipātakammassa. Musāvādassa cāti musāvādakammassa ca. Ubhayanti ubhayassapi kammassa ubhayena vipākena. Karaṇatthe hi idaṃ paccattavacanaṃ. Pubbalohitamakkhitāti pasavanavasena paribhijjanavasena ca pubbena ca lohitena ca makkhitā hutvā puttamaṃsāni khādāmīti yojanā.
звам̣ саа бзд̇ий ад̇д̇ано гаммавибаагам̣ бавзд̣̇зд̇ваа буна т̇зрз звамааха – ‘‘ахам̣, бханд̇з, имасмим̣язва г̇аамз асугасса гудумб̣игасса бхарияаа иссаабагад̇аа худ̇ваа баабагаммам̣ гад̇ваа звам̣ бзд̇аяонияам̣ ниб̣б̣ад̇д̇аа. саад̇ху, бханд̇з, д̇асса гудумб̣игасса г̇зхам̣ г̇ажчат̇а, со д̇умхаагам̣ д̣̇аанам̣ д̣̇ассад̇и, д̇ам̣ д̣̇агкин̣ам̣ маяхам̣ уд̣̇д̣̇исаабзяяаат̇а, звам̣ мз ид̇о бзд̇алогад̇о муд̇д̇и бхависсад̇ий’’д̇и. т̇зраа д̇ам̣ суд̇ваа д̇ам̣ анугамбамаанаа уллумбанасабхаавасан̣тид̇аа д̇асса гудумб̣игасса г̇зхам̣ бин̣д̣ааяа бависим̣су. гудамб̣иго т̇зрз д̣̇исваа сан̃ж̇аад̇аббасаад̣̇о бажжуг̇г̇анд̇ваа бад̇д̇аани г̇ахзд̇ваа т̇зрз аасанзсу нисийд̣̇аабзд̇ваа бан̣ийд̇зна аахаарзна бхож̇зд̇ум̣ аарабхи. т̇зраа д̇ам̣ бавад̇д̇им̣ гудумб̣игасса аарожзд̇ваа д̇ам̣ д̣̇аанам̣ д̇ассаа бзд̇ияаа уд̣̇д̣̇исаабзсум̣. д̇ан̇кан̣ан̃н̃зва жа саа бзд̇ий д̇ад̇о д̣̇угкад̇о абзд̇аа ул̣аарасамбад̇д̇им̣ бадилабхид̇ваа рад̇д̇ияам̣ гудумб̣игасса ад̇д̇аанам̣ д̣̇ассзси. ат̇а т̇зраа ануггамзна саавад̇т̇им̣ г̇анд̇ваа бхаг̇авад̇о д̇амад̇т̇ам̣ аарожзсум̣. бхаг̇аваа жа д̇амад̇т̇ам̣ адтуббад̇д̇им̣ гад̇ваа самбад̇д̇абарисааяа д̇хаммам̣ д̣̇зсзси. д̣̇зсанаавасаанз махааж̇ано бадилад̣̇д̇хасам̣взг̇о иссаамажчзрад̇о бадивирами. звам̣ саа д̣̇зсанаа махааж̇анасса саад̇т̇игаа ахосийд̇и.
Evaṃ sā petī attano kammavipākaṃ pavedetvā puna there evamāha – ‘‘ahaṃ, bhante, imasmiṃyeva gāme asukassa kuṭumbikassa bhariyā issāpakatā hutvā pāpakammaṃ katvā evaṃ petayoniyaṃ nibbattā. Sādhu, bhante, tassa kuṭumbikassa gehaṃ gacchatha, so tumhākaṃ dānaṃ dassati, taṃ dakkhiṇaṃ mayhaṃ uddisāpeyyātha, evaṃ me ito petalokato mutti bhavissatī’’ti. Therā taṃ sutvā taṃ anukampamānā ullumpanasabhāvasaṇṭhitā tassa kuṭumbikassa gehaṃ piṇḍāya pavisiṃsu. Kuṭambiko there disvā sañjātappasādo paccuggantvā pattāni gahetvā there āsanesu nisīdāpetvā paṇītena āhārena bhojetuṃ ārabhi. Therā taṃ pavattiṃ kuṭumbikassa ārocetvā taṃ dānaṃ tassā petiyā uddisāpesuṃ. Taṅkhaṇaññeva ca sā petī tato dukkhato apetā uḷārasampattiṃ paṭilabhitvā rattiyaṃ kuṭumbikassa attānaṃ dassesi. Atha therā anukkamena sāvatthiṃ gantvā bhagavato tamatthaṃ ārocesuṃ. Bhagavā ca tamatthaṃ aṭṭhuppattiṃ katvā sampattaparisāya dhammaṃ desesi. Desanāvasāne mahājano paṭiladdhasaṃvego issāmaccherato paṭivirami. Evaṃ sā desanā mahājanassa sātthikā ahosīti.
бан̃жабуд̇д̇акаад̣̇агабзд̇ивад̇т̇уван̣н̣анаа нидтид̇аа.
Pañcaputtakhādakapetivatthuvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бзд̇авад̇т̇убаал̣и • Petavatthupāḷi / 6. бан̃жабуд̇д̇акаад̣̇абзд̇ивад̇т̇у • 6. Pañcaputtakhādapetivatthu
