| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. পঞ্চরাজসুত্তং
2. Pañcarājasuttaṃ
১২৩. সাৰত্থিনিদানং । তেন খো পন সমযেন পঞ্চন্নং রাজূনং পসেনদিপমুখানং পঞ্চহি কামগুণেহি সমপ্পিতানং সমঙ্গীভূতানং পরিচারযমানানং অযমন্তরাকথা উদপাদি – ‘‘কিং নু খো কামানং অগ্গ’’ন্তি? তত্রেকচ্চে 1 এৰমাহংসু – ‘‘রূপা কামানং অগ্গ’’ন্তি। একচ্চে এৰমাহংসু – ‘‘সদ্দা কামানং অগ্গ’’ন্তি। একচ্চে এৰমাহংসু – ‘‘গন্ধা কামানং অগ্গ’’ন্তি। একচ্চে এৰমাহংসু – ‘‘রসা কামানং অগ্গ’’ন্তি। একচ্চে এৰমাহংসু – ‘‘ফোট্ঠব্বা কামানং অগ্গ’’ন্তি। যতো খো তে রাজানো নাসক্খিংসু অঞ্ঞমঞ্ঞং সঞ্ঞাপেতুং।
123. Sāvatthinidānaṃ . Tena kho pana samayena pañcannaṃ rājūnaṃ pasenadipamukhānaṃ pañcahi kāmaguṇehi samappitānaṃ samaṅgībhūtānaṃ paricārayamānānaṃ ayamantarākathā udapādi – ‘‘kiṃ nu kho kāmānaṃ agga’’nti? Tatrekacce 2 evamāhaṃsu – ‘‘rūpā kāmānaṃ agga’’nti. Ekacce evamāhaṃsu – ‘‘saddā kāmānaṃ agga’’nti. Ekacce evamāhaṃsu – ‘‘gandhā kāmānaṃ agga’’nti. Ekacce evamāhaṃsu – ‘‘rasā kāmānaṃ agga’’nti. Ekacce evamāhaṃsu – ‘‘phoṭṭhabbā kāmānaṃ agga’’nti. Yato kho te rājāno nāsakkhiṃsu aññamaññaṃ saññāpetuṃ.
অথ খো রাজা পসেনদি কোসলো তে রাজানো এতদৰোচ – ‘‘আযাম, মারিসা, যেন ভগৰা তেনুপসঙ্কমিস্সাম; উপসঙ্কমিত্ৰা ভগৰন্তং এতমত্থং পটিপুচ্ছিস্সাম। যথা নো ভগৰা ব্যাকরিস্সতি তথা নং ধারেস্সামা’’তি 3। ‘‘এৰং, মারিসা’’তি খো তে রাজানো রঞ্ঞো পসেনদিস্স কোসলস্স পচ্চস্সোসুং।
Atha kho rājā pasenadi kosalo te rājāno etadavoca – ‘‘āyāma, mārisā, yena bhagavā tenupasaṅkamissāma; upasaṅkamitvā bhagavantaṃ etamatthaṃ paṭipucchissāma. Yathā no bhagavā byākarissati tathā naṃ dhāressāmā’’ti 4. ‘‘Evaṃ, mārisā’’ti kho te rājāno rañño pasenadissa kosalassa paccassosuṃ.
অথ খো তে পঞ্চ রাজানো পসেনদিপমুখা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধ, ভন্তে, অম্হাকং পঞ্চন্নং রাজূনং পঞ্চহি কামগুণেহি সমপ্পিতানং সমঙ্গীভূতানং পরিচারযমানানং অযমন্তরাকথা উদপাদি – ‘কিং নু খো কামানং অগ্গ’ন্তি? একচ্চে এৰমাহংসু – ‘রূপা কামানং অগ্গ’ন্তি। একচ্চে এৰমাহংসু – ‘সদ্দা কামানং অগ্গ’ন্তি। একচ্চে এৰমাহংসু – ‘গন্ধা কামানং অগ্গ’ন্তি। একচ্চে এৰমাহংসু – ‘রসা কামানং অগ্গ’ন্তি। একচ্চে এৰমাহংসু – ‘ফোট্ঠব্বা কামানং অগ্গ’ন্তি। কিং নু খো, ভন্তে, কামানং অগ্গ’’ন্তি?
Atha kho te pañca rājāno pasenadipamukhā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho rājā pasenadi kosalo bhagavantaṃ etadavoca – ‘‘idha, bhante, amhākaṃ pañcannaṃ rājūnaṃ pañcahi kāmaguṇehi samappitānaṃ samaṅgībhūtānaṃ paricārayamānānaṃ ayamantarākathā udapādi – ‘kiṃ nu kho kāmānaṃ agga’nti? Ekacce evamāhaṃsu – ‘rūpā kāmānaṃ agga’nti. Ekacce evamāhaṃsu – ‘saddā kāmānaṃ agga’nti. Ekacce evamāhaṃsu – ‘gandhā kāmānaṃ agga’nti. Ekacce evamāhaṃsu – ‘rasā kāmānaṃ agga’nti. Ekacce evamāhaṃsu – ‘phoṭṭhabbā kāmānaṃ agga’nti. Kiṃ nu kho, bhante, kāmānaṃ agga’’nti?
‘‘মনাপপরিযন্তং খ্ৰাহং, মহারাজ, পঞ্চসু কামগুণেসু অগ্গন্তি ৰদামি। তেৰ 5, মহারাজ, রূপা একচ্চস্স মনাপা হোন্তি, তেৰ 6 রূপা একচ্চস্স অমনাপা হোন্তি। যেহি চ যো রূপেহি অত্তমনো হোতি পরিপুণ্ণসঙ্কপ্পো, সো তেহি রূপেহি অঞ্ঞং রূপং উত্তরিতরং ৰা পণীততরং ৰা ন পত্থেতি। তে তস্স রূপা পরমা হোন্তি। তে তস্স রূপা অনুত্তরা হোন্তি।
‘‘Manāpapariyantaṃ khvāhaṃ, mahārāja, pañcasu kāmaguṇesu agganti vadāmi. Teva 7, mahārāja, rūpā ekaccassa manāpā honti, teva 8 rūpā ekaccassa amanāpā honti. Yehi ca yo rūpehi attamano hoti paripuṇṇasaṅkappo, so tehi rūpehi aññaṃ rūpaṃ uttaritaraṃ vā paṇītataraṃ vā na pattheti. Te tassa rūpā paramā honti. Te tassa rūpā anuttarā honti.
‘‘তেৰ , মহারাজ, সদ্দা একচ্চস্স মনাপা হোন্তি, তেৰ সদ্দা একচ্চস্স অমনাপা হোন্তি। যেহি চ যো সদ্দেহি অত্তমনো হোতি পরিপুণ্ণসঙ্কপ্পো, সো তেহি সদ্দেহি অঞ্ঞং সদ্দং উত্তরিতরং ৰা পণীততরং ৰা ন পত্থেতি। তে তস্স সদ্দা পরমা হোন্তি। তে তস্স সদ্দা অনুত্তরা হোন্তি।
‘‘Teva , mahārāja, saddā ekaccassa manāpā honti, teva saddā ekaccassa amanāpā honti. Yehi ca yo saddehi attamano hoti paripuṇṇasaṅkappo, so tehi saddehi aññaṃ saddaṃ uttaritaraṃ vā paṇītataraṃ vā na pattheti. Te tassa saddā paramā honti. Te tassa saddā anuttarā honti.
‘‘তেৰ, মহারাজ, গন্ধা একচ্চস্স মনাপা হোন্তি, তেৰ গন্ধা একচ্চস্স অমনাপা হোন্তি। যেহি চ যো গন্ধেহি অত্তমনো হোতি পরিপুণ্ণসঙ্কপ্পো, সো তেহি গন্ধেহি অঞ্ঞং গন্ধং উত্তরিতরং ৰা পণীততরং ৰা ন পত্থেতি। তে তস্স গন্ধা পরমা হোন্তি। তে তস্স গন্ধা অনুত্তরা হোন্তি।
‘‘Teva, mahārāja, gandhā ekaccassa manāpā honti, teva gandhā ekaccassa amanāpā honti. Yehi ca yo gandhehi attamano hoti paripuṇṇasaṅkappo, so tehi gandhehi aññaṃ gandhaṃ uttaritaraṃ vā paṇītataraṃ vā na pattheti. Te tassa gandhā paramā honti. Te tassa gandhā anuttarā honti.
‘‘তেৰ, মহারাজ, রসা একচ্চস্স মনাপা হোন্তি, তেৰ রসা একচ্চস্স অমনাপা হোন্তি। যেহি চ যো রসেহি অত্তমনো হোতি পরিপুণ্ণসঙ্কপ্পো, সো তেহি রসেহি অঞ্ঞং রসং উত্তরিতরং ৰা পণীততরং ৰা ন পত্থেতি। তে তস্স রসা পরমা হোন্তি। তে তস্স রসা অনুত্তরা হোন্তি।
‘‘Teva, mahārāja, rasā ekaccassa manāpā honti, teva rasā ekaccassa amanāpā honti. Yehi ca yo rasehi attamano hoti paripuṇṇasaṅkappo, so tehi rasehi aññaṃ rasaṃ uttaritaraṃ vā paṇītataraṃ vā na pattheti. Te tassa rasā paramā honti. Te tassa rasā anuttarā honti.
‘‘তেৰ, মহারাজ, ফোট্ঠব্বা একচ্চস্স মনাপা হোন্তি, তেৰ ফোট্ঠব্বা একচ্চস্স অমনাপা হোন্তি। যেহি চ যো ফোট্ঠব্বেহি অত্তমনো হোতি পরিপুণ্ণসঙ্কপ্পো, সো তেহি ফোট্ঠব্বেহি অঞ্ঞং ফোট্ঠব্বং উত্তরিতরং ৰা পণীততরং ৰা ন পত্থেতি। তে তস্স ফোট্ঠব্বা পরমা হোন্তি। তে তস্স ফোট্ঠব্বা অনুত্তরা হোন্তী’’তি।
‘‘Teva, mahārāja, phoṭṭhabbā ekaccassa manāpā honti, teva phoṭṭhabbā ekaccassa amanāpā honti. Yehi ca yo phoṭṭhabbehi attamano hoti paripuṇṇasaṅkappo, so tehi phoṭṭhabbehi aññaṃ phoṭṭhabbaṃ uttaritaraṃ vā paṇītataraṃ vā na pattheti. Te tassa phoṭṭhabbā paramā honti. Te tassa phoṭṭhabbā anuttarā hontī’’ti.
তেন খো পন সমযেন চন্দনঙ্গলিকো উপাসকো তস্সং পরিসাযং নিসিন্নো হোতি। অথ খো চন্দনঙ্গলিকো উপাসকো উট্ঠাযাসনা একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – ‘‘পটিভাতি মং ভগৰা, পটিভাতি মং সুগতা’’তি। ‘‘পটিভাতু তং চন্দনঙ্গলিকা’’তি ভগৰা অৰোচ।
Tena kho pana samayena candanaṅgaliko upāsako tassaṃ parisāyaṃ nisinno hoti. Atha kho candanaṅgaliko upāsako uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘paṭibhāti maṃ bhagavā, paṭibhāti maṃ sugatā’’ti. ‘‘Paṭibhātu taṃ candanaṅgalikā’’ti bhagavā avoca.
অথ খো চন্দনঙ্গলিকো উপাসকো ভগৰতো সম্মুখা তদনুরূপায গাথায অভিত্থৰি –
Atha kho candanaṅgaliko upāsako bhagavato sammukhā tadanurūpāya gāthāya abhitthavi –
‘‘পদুমং যথা কোকনদং সুগন্ধং,
‘‘Padumaṃ yathā kokanadaṃ sugandhaṃ,
পাতো সিযা ফুল্লমৰীতগন্ধং।
Pāto siyā phullamavītagandhaṃ;
অঙ্গীরসং পস্স ৰিরোচমানং,
Aṅgīrasaṃ passa virocamānaṃ,
তপন্তমাদিচ্চমিৰন্তলিক্খে’’তি॥
Tapantamādiccamivantalikkhe’’ti.
অথ খো তে পঞ্চ রাজানো চন্দনঙ্গলিকং উপাসকং পঞ্চহি উত্তরাসঙ্গেহি অচ্ছাদেসুং। অথ খো চন্দনঙ্গলিকো উপাসকো তেহি পঞ্চহি উত্তরাসঙ্গেহি ভগৰন্তং অচ্ছাদেসীতি।
Atha kho te pañca rājāno candanaṅgalikaṃ upāsakaṃ pañcahi uttarāsaṅgehi acchādesuṃ. Atha kho candanaṅgaliko upāsako tehi pañcahi uttarāsaṅgehi bhagavantaṃ acchādesīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. পঞ্চরাজসুত্তৰণ্ণনা • 2. Pañcarājasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. পঞ্চরাজসুত্তৰণ্ণনা • 2. Pañcarājasuttavaṇṇanā
