| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. පඤ්‌චරථසතසුත්‌තං
6. Pañcarathasatasuttaṃ
185. රාජගහෙ විහරති වෙළුවනෙ කලන්‌දකනිවාපෙ. තෙන ඛො පන සමයෙන දෙවදත්‌තස්‌ස අජාතසත්‌තුකුමාරො පඤ්‌චහි රථසතෙහි සායං පාතං උපට්‌ඨානං ගච්‌ඡති, පඤ්‌ච ච ථාලිපාකසතානි භත්‌තාභිහාරො අභිහරීයති. අථ ඛො සම්‌බහුලා භික්‌ඛූ යෙන භගවා තෙනුපසඞ්‌කමිංසු; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදිංසු. එකමන්‌තං නිසින්‌නා ඛො තෙ භික්‌ඛූ භගවන්‌තං එතදවොචුං – ‘‘දෙවදත්‌තස්‌ස, භන්‌තෙ, අජාතසත්‌තුකුමාරො පඤ්‌චහි රථසතෙහි සායං පාතං උපට්‌ඨානං ගච්‌ඡති, පඤ්‌ච ච ථාලිපාකසතානි භත්‌තාභිහාරො අභිහරීයතී’’ති. ‘‘මා, භික්‌ඛවෙ, දෙවදත්‌තස්‌ස ලාභසක්‌කාරසිලොකං පිහයිත්‌ථ. යාවකීවඤ්‌ච, භික්‌ඛවෙ, දෙවදත්‌තස්‌ස අජාතසත්‌තුකුමාරො පඤ්‌චහි රථසතෙහි සායං පාතං උපට්‌ඨානං ගමිස්‌සති, පඤ්‌ච ච ථාලිපාකසතානි භත්‌තාභිහාරො ආහරීයිස්‌සති, හානියෙව, භික්‌ඛවෙ, දෙවදත්‌තස්‌ස පාටිකඞ්‌ඛා කුසලෙසු ධම්‌මෙසු, නො වුද්‌ධි’’.
185. Rājagahe viharati veḷuvane kalandakanivāpe. Tena kho pana samayena devadattassa ajātasattukumāro pañcahi rathasatehi sāyaṃ pātaṃ upaṭṭhānaṃ gacchati, pañca ca thālipākasatāni bhattābhihāro abhiharīyati. Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘devadattassa, bhante, ajātasattukumāro pañcahi rathasatehi sāyaṃ pātaṃ upaṭṭhānaṃ gacchati, pañca ca thālipākasatāni bhattābhihāro abhiharīyatī’’ti. ‘‘Mā, bhikkhave, devadattassa lābhasakkārasilokaṃ pihayittha. Yāvakīvañca, bhikkhave, devadattassa ajātasattukumāro pañcahi rathasatehi sāyaṃ pātaṃ upaṭṭhānaṃ gamissati, pañca ca thālipākasatāni bhattābhihāro āharīyissati, hāniyeva, bhikkhave, devadattassa pāṭikaṅkhā kusalesu dhammesu, no vuddhi’’.
‘‘සෙය්‍යථාපි, භික්‌ඛවෙ, චණ්‌ඩස්‌ස කුක්‌කුරස්‌ස නාසාය පිත්‌තං භින්‌දෙය්‍යුං , එවඤ්‌හි සො, භික්‌ඛවෙ , කුක්‌කුරො භිය්‍යොසොමත්‌තාය චණ්‌ඩතරො අස්‌ස; එවමෙව, භික්‌ඛවෙ, යාවකීවඤ්‌ච දෙවදත්‌තස්‌ස අජාතසත්‌තුකුමාරො පඤ්‌චහි රථසතෙහි සායං පාතං උපට්‌ඨානං ගමිස්‌සති, පඤ්‌ච ච ථාලිපාකසතානි භත්‌තාභිහාරො ආහරීයිස්‌සති, හානියෙව, භික්‌ඛවෙ, දෙවදත්‌තස්‌ස පාටිකඞ්‌ඛා කුසලෙසු ධම්‌මෙසු, නො වුද්‌ධි. එවං දාරුණො ඛො, භික්‌ඛවෙ, ලාභසක්‌කාරසිලොකො…පෙ.… එවඤ්‌හි වො, භික්‌ඛවෙ, සික්‌ඛිතබ්‌බ’’න්‌ති. ඡට්‌ඨං.
‘‘Seyyathāpi, bhikkhave, caṇḍassa kukkurassa nāsāya pittaṃ bhindeyyuṃ , evañhi so, bhikkhave , kukkuro bhiyyosomattāya caṇḍataro assa; evameva, bhikkhave, yāvakīvañca devadattassa ajātasattukumāro pañcahi rathasatehi sāyaṃ pātaṃ upaṭṭhānaṃ gamissati, pañca ca thālipākasatāni bhattābhihāro āharīyissati, hāniyeva, bhikkhave, devadattassa pāṭikaṅkhā kusalesu dhammesu, no vuddhi. Evaṃ dāruṇo kho, bhikkhave, lābhasakkārasiloko…pe… evañhi vo, bhikkhave, sikkhitabba’’nti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. පඤ්‌චරථසතසුත්‌තවණ්‌ණනා • 6. Pañcarathasatasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. පඤ්‌චරථසතසුත්‌තවණ්‌ණනා • 6. Pañcarathasatasuttavaṇṇanā
