| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੩-੫. ਪਞ੍ਚਸਿਕ੍ਖਾਪਦਸੁਤ੍ਤਾਦਿવਣ੍ਣਨਾ
3-5. Pañcasikkhāpadasuttādivaṇṇanā
੧੦੯-੧੧੧. ਸੁਰਾਮੇਰਯਸਙ੍ਖਾਤਨ੍ਤਿ ਪਿਟ੍ਠਸੁਰਾਦਿਸੁਰਾਸਙ੍ਖਾਤਂ ਪੁਪ੍ਫਾਸવਾਦਿਮੇਰਯਸਙ੍ਖਾਤਞ੍ਚ। ਮਜ੍ਜਨਟ੍ਠੇਨ ਮਜ੍ਜਂ। ਸੁਰਾਮੇਰਯਮਜ੍ਜਪ੍ਪਮਾਦੋਤਿ વੁਚ੍ਚਤਿ ‘‘ਮਜ੍ਜਤਿ ਤੇਨਾ’’ਤਿ ਕਤ੍વਾ। ਤਸ੍ਮਿਂ ਤਿਟ੍ਠਨ੍ਤੀਤਿ ਤਸ੍ਮਿਂ ਪਮਾਦੇ ਪਮਜ੍ਜਨવਸੇਨ ਤਿਟ੍ਠਨ੍ਤੀਤਿ ਅਤ੍ਥੋ। ਸੇਸਂ ਤਤਿਯਚਤੁਤ੍ਥੇਸੁ ਸੁવਿਞ੍ਞੇਯ੍ਯਮੇવਾਤਿ।
109-111.Surāmerayasaṅkhātanti piṭṭhasurādisurāsaṅkhātaṃ pupphāsavādimerayasaṅkhātañca. Majjanaṭṭhena majjaṃ. Surāmerayamajjappamādoti vuccati ‘‘majjati tenā’’ti katvā. Tasmiṃ tiṭṭhantīti tasmiṃ pamāde pamajjanavasena tiṭṭhantīti attho. Sesaṃ tatiyacatutthesu suviññeyyamevāti.
ਪਞ੍ਚਮੇ ਤਾਨਿ ਪਦਾਨਿ ਸਂવਣ੍ਣੇਤੁਂ ‘‘ਪਞ੍ਚਮੇ’’ਤਿਆਦਿ ਆਰਦ੍ਧਂ। ਤਤ੍ਥ ਪਾਣੋ ਨਾਮ વੋਹਾਰਤੋ ਸਤ੍ਤੋ, ਪਰਮਤ੍ਥਤੋ ਜੀવਿਤਿਨ੍ਦ੍ਰਿਯਂ, ਤਂ ਪਾਣਂ ਅਤਿਪਾਤੇਨ੍ਤਿ ਅਤਿਚ੍ਚ ਅਨ੍ਤਰੇਯੇવ, ਅਤਿਕ੍ਕਮ੍ਮ વਾ ਸਤ੍ਥਾਦੀਹਿ ਅਭਿਭવਿਤ੍વਾ ਪਾਤੇਨ੍ਤਿ ਸਣਿਕਂ ਪਤਿਤੁਂ ਅਦਤ੍વਾ ਸੀਘਂ ਪਾਤੇਨ੍ਤੀਤਿ ਅਤ੍ਥੋ। ਕਾਯੇਨ વਾਚਾਯ વਾ ਅਦਿਨ੍ਨਂ ਪਰਸਨ੍ਤਕਂ। ਆਦਿਯਨ੍ਤੀਤਿ ਗਣ੍ਹਨ੍ਤਿ। ਮਿਚ੍ਛਾਤਿ ਨ ਸਮ੍ਮਾ, ਗਾਰਯ੍ਹવਸੇਨ। ਮੁਸਾਤਿ ਅਤਥਂ વਤ੍ਥੁ। વਦਨ੍ਤੀਤਿ વਿਸਂવਾਦਨવਸੇਨ વਦਨ੍ਤਿ। ਪਿਯਸੁਞ੍ਞਕਰਣਤੋ ਪਿਸੁਣਾ, ਪਿਸਤਿ વਾ ਪਰੇ ਸਤ੍ਤੇ, ਹਿਂਸਤੀਤਿ ਅਤ੍ਥੋ। ਮਮ੍ਮਚ੍ਛੇਦਿਕਾਤਿ ਏਤੇਨ ਪਰਸ੍ਸ ਮਮ੍ਮਚ੍ਛੇਦવਸੇਨ ਏਕਨ੍ਤਫਰੁਸਸਞ੍ਚੇਤਨਾ ਫਰੁਸવਾਚਾ ਨਾਮਾਤਿ ਦਸ੍ਸੇਤਿ। ਅਭਿਜ੍ਝਾਸਦ੍ਦੋ ਲੁਬ੍ਭਨੇ ਨਿਰੁਲ਼੍ਹੋਤਿ ਆਹ ‘‘ਪਰਭਣ੍ਡੇ ਲੁਬ੍ਭਨਸੀਲਾਤਿ ਅਤ੍ਥੋ’’ਤਿ। ਬ੍ਯਾਪਨ੍ਨਨ੍ਤਿ ਦੋਸવਸੇਨ વਿਪਨ੍ਨਂ। ਪਕਤਿવਿਜਹਨੇਨ ਪੂਤਿਭੂਤਂ। ਸਾਧੂਹਿ ਗਰਹਿਤਬ੍ਬਤਂ ਪਤ੍ਤਾ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਯਪ੍ਪવਤ੍ਤਾ ਨਤ੍ਥਿਕਾਹੇਤੁਕਅਕਿਰਿਯਦਿਟ੍ਠਿ ਕਮ੍ਮਪਥਪਰਿਯਾਪਨ੍ਨਾ ਨਾਮ। ਮਿਚ੍ਛਤ੍ਤਪਰਿਯਾਪਨ੍ਨਾ ਸਬ੍ਬਾਪਿ ਲੋਕੁਤ੍ਤਰਮਗ੍ਗਪਟਿਪਕ੍ਖਾ વਿਪਰੀਤਦਿਟ੍ਠਿ।
Pañcame tāni padāni saṃvaṇṇetuṃ ‘‘pañcame’’tiādi āraddhaṃ. Tattha pāṇo nāma vohārato satto, paramatthato jīvitindriyaṃ, taṃ pāṇaṃ atipātenti aticca antareyeva, atikkamma vā satthādīhi abhibhavitvā pātenti saṇikaṃ patituṃ adatvā sīghaṃ pātentīti attho. Kāyena vācāya vā adinnaṃ parasantakaṃ. Ādiyantīti gaṇhanti. Micchāti na sammā, gārayhavasena. Musāti atathaṃ vatthu. Vadantīti visaṃvādanavasena vadanti. Piyasuññakaraṇato pisuṇā, pisati vā pare satte, hiṃsatīti attho. Mammacchedikāti etena parassa mammacchedavasena ekantapharusasañcetanā pharusavācā nāmāti dasseti. Abhijjhāsaddo lubbhane niruḷhoti āha ‘‘parabhaṇḍe lubbhanasīlāti attho’’ti. Byāpannanti dosavasena vipannaṃ. Pakativijahanena pūtibhūtaṃ. Sādhūhi garahitabbataṃ pattā ‘‘natthi dinna’’ntiādinayappavattā natthikāhetukaakiriyadiṭṭhi kammapathapariyāpannā nāma. Micchattapariyāpannā sabbāpi lokuttaramaggapaṭipakkhā viparītadiṭṭhi.
ਤੇਸਨ੍ਤਿ ਕਮ੍ਮਪਥਾਨਂ। વੋਹਾਰਤੋਤਿ ਇਨ੍ਦ੍ਰਿਯਬਦ੍ਧਂ ਉਪਾਦਾਯ ਪਞ੍ਞਤ੍ਤਿਮਤ੍ਤਤੋ। ਤਿਰਚ੍ਛਾਨਗਤਾਦੀਸੂਤਿ ਆਦਿ-ਸਦ੍ਦੇਨ ਪੇਤਾਨਂ ਸਙ੍ਗਹੋ। ਪਯੋਗવਤ੍ਥੁਮਹਨ੍ਤਤਾਦੀਹਿ ਮਹਾਸਾવਜ੍ਜਤਾ ਤੇਹਿ ਪਚ੍ਚਯੇਹਿ ਉਪ੍ਪਜ੍ਜਮਾਨਾਯ ਚੇਤਨਾਯ ਬਲવਭਾવਤੋ। ਯਥਾવੁਤ੍ਤਪਚ੍ਚਯવਿਪਰਿਯਾਯੇਪਿ ਤਂਤਂਪਚ੍ਚਯੇਹਿ ਚੇਤਨਾਯ ਬਲવਭਾવવਸੇਨ ਅਪ੍ਪਸਾવਜ੍ਜਮਹਾਸਾવਜ੍ਜਤਾ વਾ વੇਦਿਤਬ੍ਬਾ। ਇਦ੍ਧਿਮਯੋਤਿ ਕਮ੍ਮવਿਪਾਕਿਦ੍ਧਿਮਯੋ ਦਾਠਾਕੋਟਨਾਦੀਨਂ વਿਯ।
Tesanti kammapathānaṃ. Vohāratoti indriyabaddhaṃ upādāya paññattimattato. Tiracchānagatādīsūti ādi-saddena petānaṃ saṅgaho. Payogavatthumahantatādīhi mahāsāvajjatā tehi paccayehi uppajjamānāya cetanāya balavabhāvato. Yathāvuttapaccayavipariyāyepi taṃtaṃpaccayehi cetanāya balavabhāvavasena appasāvajjamahāsāvajjatā vā veditabbā. Iddhimayoti kammavipākiddhimayo dāṭhākoṭanādīnaṃ viya.
ਮੇਥੁਨਸਮਾਚਾਰੇਸੂਤਿ ਸਦਾਰਪਰਦਾਰਗਮਨવਸੇਨ ਦੁવਿਧੇਸੁ ਮੇਥੁਨਸਮਾਚਾਰੇਸੁ। ਤੇਪਿ ਹੀਨਾਧਿਮੁਤ੍ਤਿਕੇਹਿ ਕਤ੍ਤਬ੍ਬਤੋ ਕਾਮਾ ਨਾਮ। ਮਿਚ੍ਛਾਚਾਰੋਤਿ ਗਾਰਯ੍ਹਾਚਾਰੋ। ਗਾਰਯ੍ਹਤਾ ਚਸ੍ਸ ਏਕਨ੍ਤਨਿਹੀਨਤਾਯਾਤਿ ਆਹ ‘‘ਏਕਨ੍ਤਨਿਨ੍ਦਿਤੋ ਲਾਮਕਾਚਾਰੋ’’ਤਿ ਅਸਦ੍ਧਮ੍ਮਾਧਿਪ੍ਪਾਯੇਨਾਤਿ ਅਸਦ੍ਧਮ੍ਮਸੇવਨਾਧਿਪ੍ਪਾਯੇਨ। ਗੋਤ੍ਤਰਕ੍ਖਿਤਾਤਿ ਸਗੋਤ੍ਤੇਹਿ ਰਕ੍ਖਿਤਾ। ਧਮ੍ਮਰਕ੍ਖਿਤਾਤਿ ਸਹਧਮ੍ਮੇਹਿ ਰਕ੍ਖਿਤਾ। ਸਸ੍ਸਾਮਿਕਾ ਨਾਮ ਸਾਰਕ੍ਖਾ। ਯਸ੍ਸਾ ਗਮਨੇ ਦਣ੍ਡੋ ਠਪਿਤੋ, ਸਾ ਸਪਰਿਦਣ੍ਡਾ। ਭਰਿਯਭਾવਾਯ ਧਨੇਨ ਕੀਤਾ ਧਨਕ੍ਕੀਤਾ। ਛਨ੍ਦੇਨ વਸਤੀਤਿ ਛਨ੍ਦવਾਸਿਨੀ। ਭੋਗਤ੍ਥਂ વਸਤੀਤਿ ਭੋਗવਾਸਿਨੀ। ਪਟਤ੍ਥਂ વਸਤੀਤਿ ਪਟવਾਸਿਨੀ। ਉਦਕਪਤ੍ਤਂ ਆਮਸਿਤ੍વਾ ਗਹਿਤਾ ਓਦਪਤ੍ਤਕਿਨੀ। ਚੁਮ੍ਬਟਂ ਅਪਨੇਤ੍વਾ ਗਹਿਤਾ ਓਭਟਚੁਮ੍ਬਟਾ। ਕਰਮਰਾਨੀਤਾ ਧਜਾਹਟਾ। ਤਙ੍ਖਣਿਕਂ ਗਹਿਤਾ ਮੁਹੁਤ੍ਤਿਕਾ। ਅਭਿਭવਿਤ੍વਾ વੀਤਿਕ੍ਕਮੋ ਮਿਚ੍ਛਾਚਾਰੋ ਮਹਾਸਾવਜ੍ਜੋ, ਨ ਤਥਾ ਦ੍વਿਨ੍ਨਂ ਸਮਾਨਚ੍ਛਨ੍ਦਤਾਯ। ਅਭਿਭવਿਤ੍વਾ વੀਤਿਕ੍ਕਮਨੇ ਸਤਿਪਿ ਮਗ੍ਗੇਨਮਗ੍ਗਪਟਿਪਤ੍ਤਿਅਧਿવਾਸਨੇ ਪੁਰਿਮੁਪ੍ਪਨ੍ਨਸੇવਨਾਭਿਸਨ੍ਧਿਪਯੋਗਾਭਾવਤੋ ਮਿਚ੍ਛਾਚਾਰੋ ਨ ਹੋਤਿ ਅਭਿਭੁਯ੍ਯਮਾਨਸ੍ਸਾਤਿ વਦਨ੍ਤਿ। ਸੇવਨਾਚਿਤ੍ਤੇ ਸਤਿ ਪਯੋਗਾਭਾવੋ ਅਪ੍ਪਮਾਣਂ ਯੇਭੁਯ੍ਯੇਨ ਇਤ੍ਥਿਯਾ ਸੇવਨਾਪਯੋਗਸ੍ਸ ਅਭਾવਤੋ। ਤਥਾ ਸਤਿ ਪੁਰੇਤਰਂ ਸੇવਨਾਚਿਤ੍ਤਸ੍ਸ ਉਪਟ੍ਠਾਨੇਪਿ ਤਸ੍ਸਾ ਮਿਚ੍ਛਾਚਾਰੋ ਨ ਸਿਯਾ, ਤਥਾ ਪੁਰਿਸਸ੍ਸਪਿ ਸੇવਨਾਪਯੋਗਾਭਾવੇ। ਤਸ੍ਮਾ ਅਤ੍ਤਨੋ ਰੁਚਿਯਾ ਪવਤ੍ਤਿਤਸ੍ਸ વਸੇਨ ਤਯੋ, ਬਲਕ੍ਕਾਰੇਨ ਪવਤ੍ਤਿਤਸ੍ਸ વਸੇਨ ਤਯੋਤਿ ਸਬ੍ਬੇਪਿ ਅਗ੍ਗਹਿਤਗ੍ਗਹਣੇਨ ‘‘ਚਤ੍ਤਾਰੋ ਸਮ੍ਭਾਰਾ’’ਤਿ વੁਤ੍ਤਂ।
Methunasamācāresūti sadāraparadāragamanavasena duvidhesu methunasamācāresu. Tepi hīnādhimuttikehi kattabbato kāmā nāma. Micchācāroti gārayhācāro. Gārayhatā cassa ekantanihīnatāyāti āha ‘‘ekantanindito lāmakācāro’’ti asaddhammādhippāyenāti asaddhammasevanādhippāyena. Gottarakkhitāti sagottehi rakkhitā. Dhammarakkhitāti sahadhammehi rakkhitā. Sassāmikā nāma sārakkhā. Yassā gamane daṇḍo ṭhapito, sā saparidaṇḍā. Bhariyabhāvāya dhanena kītā dhanakkītā. Chandena vasatīti chandavāsinī. Bhogatthaṃ vasatīti bhogavāsinī. Paṭatthaṃ vasatīti paṭavāsinī. Udakapattaṃ āmasitvā gahitā odapattakinī. Cumbaṭaṃ apanetvā gahitā obhaṭacumbaṭā. Karamarānītā dhajāhaṭā. Taṅkhaṇikaṃ gahitā muhuttikā. Abhibhavitvā vītikkamo micchācāro mahāsāvajjo, na tathā dvinnaṃ samānacchandatāya. Abhibhavitvā vītikkamane satipi maggenamaggapaṭipattiadhivāsane purimuppannasevanābhisandhipayogābhāvato micchācāro na hoti abhibhuyyamānassāti vadanti. Sevanācitte sati payogābhāvo appamāṇaṃ yebhuyyena itthiyā sevanāpayogassa abhāvato. Tathā sati puretaraṃ sevanācittassa upaṭṭhānepi tassā micchācāro na siyā, tathā purisassapi sevanāpayogābhāve. Tasmā attano ruciyā pavattitassa vasena tayo, balakkārena pavattitassa vasena tayoti sabbepi aggahitaggahaṇena ‘‘cattāro sambhārā’’ti vuttaṃ.
ਆਸੇવਨਮਨ੍ਦਤਾਯਾਤਿ ਯਾਯ ਅਕੁਸਲਚੇਤਨਾਯ ਸਮ੍ਫਂ ਪਲਪਤਿ, ਤਸ੍ਸਾ ਇਤ੍ਤਰਕਾਲਤਾਯ ਪવਤ੍ਤਿਯਾ ਅਨਾਸੇવਨਾਤਿ ਪਰਿਦੁਬ੍ਬਲਾ ਹੋਤਿ ਚੇਤਨਾ।
Āsevanamandatāyāti yāya akusalacetanāya samphaṃ palapati, tassā ittarakālatāya pavattiyā anāsevanāti paridubbalā hoti cetanā.
ਉਪਸਗ੍ਗવਸੇਨ ਅਤ੍ਥવਿਸੇਸવਾਚਿਨੋ ਧਾਤੁਸਦ੍ਦਾਤਿ ਅਭਿਜ੍ਝਾਯਤੀਤਿ ਪਦਸ੍ਸ ਪਰਭਣ੍ਡਾਭਿਮੁਖੀਤਿਆਦਿਅਤ੍ਥੋ વੁਤ੍ਤੋ। ਤਨ੍ਨਿਨ੍ਨਤਾਯਾਤਿ ਤਸ੍ਮਿਂ ਪਰਭਣ੍ਡੇ ਲੁਬ੍ਭਨવਸੇਨ ਨਿਨ੍ਨਤਾਯ। ਅਭਿਪੁਬ੍ਬੋ ਝੇ-ਸਦ੍ਦੋ ਲੁਬ੍ਭਨੇ ਨਿਰੁਲ਼੍ਹੋਤਿ ਦਟ੍ਠਬ੍ਬੋ। ਯਸ੍ਸ ਭਣ੍ਡਂ ਅਭਿਜ੍ਝਾਯਤਿ, ਤਸ੍ਸ ਅਪ੍ਪਗੁਣਤਾਯ ਅਪ੍ਪਸਾવਜ੍ਜਾ, ਮਹਾਗੁਣਤਾਯ ਮਹਾਸਾવਜ੍ਜਾਤਿਆਦਿਨਾ ਨਯੇਨ ਤਤ੍ਥ ਅਪ੍ਪਸਾવਜ੍ਜਮਹਾਸਾવਜ੍ਜવਿਭਾਗੋ વੇਦਿਤਬ੍ਬੋ। ਤੇਨਾਹ ‘‘ਅਦਿਨ੍ਨਾਦਾਨਂ વਿਯਾ’’ਤਿਆਦਿ। ਅਤ੍ਤਨੋ ਪਰਿਣਾਮਨਂ ਚਿਤ੍ਤੇਨੇવਾਤਿ ਦਟ੍ਠਬ੍ਬਂ।
Upasaggavasena atthavisesavācino dhātusaddāti abhijjhāyatīti padassa parabhaṇḍābhimukhītiādiattho vutto. Tanninnatāyāti tasmiṃ parabhaṇḍe lubbhanavasena ninnatāya. Abhipubbo jhe-saddo lubbhane niruḷhoti daṭṭhabbo. Yassa bhaṇḍaṃ abhijjhāyati, tassa appaguṇatāya appasāvajjā, mahāguṇatāya mahāsāvajjātiādinā nayena tattha appasāvajjamahāsāvajjavibhāgo veditabbo. Tenāha ‘‘adinnādānaṃ viyā’’tiādi. Attano pariṇāmanaṃ cittenevāti daṭṭhabbaṃ.
ਹਿਤਸੁਖਂ ਬ੍ਯਾਪਾਦਯਤੀਤਿ ਯੋ ਨਂ ਉਪ੍ਪਾਦੇਤਿ, ਯਸ੍ਸ ਉਪ੍ਪਾਦੇਤਿ, ਤਸ੍ਸ ਸਤਿ ਸਮવਾਯੇ ਹਿਤਸੁਖਂ વਿਨਾਸੇਤਿ। ਅਹੋ વਤਾਤਿ ਇਮਿਨਾ ਯਥਾ ਅਭਿਜ੍ਝਾਨੇ વਤ੍ਥੁਨੋ ਏਕਨ੍ਤਤੋ ਅਤ੍ਤਨੋ ਪਰਿਣਾਮਨਂ ਦਸ੍ਸਿਤਂ , ਏવਮਿਧਾਪਿ વਤ੍ਥੁਨੋ ‘‘ਅਹੋ વਤਾ’’ਤਿ ਇਮਿਨਾ ਪਰਸ੍ਸ વਿਨਾਸਚਿਨ੍ਤਾਯ ਏਕਨ੍ਤਤੋ ਨਿਯਮਿਤਭਾવਂ ਦਸ੍ਸੇਤਿ। ਏવਞ੍ਹਿ ਨੇਸਂ ਦਾਰੁਣਪ੍ਪવਤ੍ਤਿਯਾ ਕਮ੍ਮਪਥਪ੍ਪવਤ੍ਤਿ।
Hitasukhaṃ byāpādayatīti yo naṃ uppādeti, yassa uppādeti, tassa sati samavāye hitasukhaṃ vināseti. Aho vatāti iminā yathā abhijjhāne vatthuno ekantato attano pariṇāmanaṃ dassitaṃ , evamidhāpi vatthuno ‘‘aho vatā’’ti iminā parassa vināsacintāya ekantato niyamitabhāvaṃ dasseti. Evañhi nesaṃ dāruṇappavattiyā kammapathappavatti.
ਯਥਾਭੁਚ੍ਚਗਹਣਾਭਾવੇਨਾਤਿ ਯਥਾਤਚ੍ਛਗਹਣਸ੍ਸ ਅਭਾવੇਨ ਅਨਿਚ੍ਚਾਦਿਸਭਾવਸ੍ਸ ਨਿਚ੍ਚਾਦਿਤੋ ਗਹਣੇਨ। ਮਿਚ੍ਛਾ ਪਸ੍ਸਤੀਤਿ વਿਤਥਂ ਪਸ੍ਸਤਿ। ਸਮ੍ਫਪ੍ਪਲਾਪੋ વਿਯਾਤਿ ਇਮਿਨਾ ਆਸੇવਨਸ੍ਸ ਅਪ੍ਪਮਹਨ੍ਤਤਾਹਿ ਮਿਚ੍ਛਾਦਿਟ੍ਠਿਯਾ ਅਪ੍ਪਸਾવਜ੍ਜਮਹਾਸਾવਜ੍ਜਤਾ। વਤ੍ਥੁਨੋਤਿ ਗਹਿਤવਤ੍ਥੁਨੋ। ਗਹਿਤਾਕਾਰવਿਪਰੀਤਤਾਤਿ ਮਿਚ੍ਛਾਦਿਟ੍ਠਿਯਾ ਗਹਿਤਾਕਾਰਸ੍ਸ વਿਪਰੀਤਤਾ। ਤਥਾਭਾવੇਨਾਤਿ ਅਤ੍ਤਨੋ ਗਹਿਤਾਕਾਰੇਨੇવ ਤਸ੍ਸਾ ਦਿਟ੍ਠਿਯਾ, ਗਹਿਤਸ੍ਸ વਾ વਤ੍ਥੁਨੋ ਉਪਟ੍ਠਾਨਂ ‘‘ਏવਮੇਤਂ, ਨ ਇਤੋ ਅਞ੍ਞਥਾ’’ਤਿ।
Yathābhuccagahaṇābhāvenāti yathātacchagahaṇassa abhāvena aniccādisabhāvassa niccādito gahaṇena. Micchā passatīti vitathaṃ passati. Samphappalāpo viyāti iminā āsevanassa appamahantatāhi micchādiṭṭhiyā appasāvajjamahāsāvajjatā. Vatthunoti gahitavatthuno. Gahitākāraviparītatāti micchādiṭṭhiyā gahitākārassa viparītatā. Tathābhāvenāti attano gahitākāreneva tassā diṭṭhiyā, gahitassa vā vatthuno upaṭṭhānaṃ ‘‘evametaṃ, na ito aññathā’’ti.
ਧਮ੍ਮਤੋਤਿ ਸਭਾવਤੋ। ਕੋਟ੍ਠਾਸਤੋਤਿ ਚਿਤ੍ਤਙ੍ਗਕੋਟ੍ਠਾਸਤੋ, ਯਂਕੋਟ੍ਠਾਸਾ ਹੋਨ੍ਤਿ, ਤਤੋਤਿ ਅਤ੍ਥੋ। ਚੇਤਨਾਧਮ੍ਮਾવਾਤਿ ਚੇਤਨਾਸਭਾવਾ ਏવ। ਪਟਿਪਾਟਿਯਾ ਸਤ੍ਤਾਤਿ ਏਤ੍ਥ ਨਨੁ ਚੇਤਨਾ ਅਭਿਧਮ੍ਮੇ ਕਮ੍ਮਪਥੇਸੁ ਨ વੁਤ੍ਤਾਤਿ ਪਟਿਪਾਟਿਯਾ ਸਤ੍ਤਨ੍ਨਂ ਕਮ੍ਮਪਥਭਾવੋ ਨ ਯੁਤ੍ਤੋਤਿ? ਨ, ਅવਚਨਸ੍ਸ ਅਞ੍ਞਹੇਤੁਕਤ੍ਤਾ। ਨ ਹਿ ਤਤ੍ਥ ਚੇਤਨਾਯ ਅਕਮ੍ਮਪਥਤ੍ਤਾ ਕਮ੍ਮਪਥਰਾਸਿਮ੍ਹਿ ਅવਚਨਂ, ਕਦਾਚਿ ਪਨ ਕਮ੍ਮਪਥੋ ਹੋਤਿ, ਨ ਸਬ੍ਬਦਾਤਿ ਕਮ੍ਮਪਥਭਾવਸ੍ਸ ਅਨਿਯਤਤ੍ਤਾ ਅવਚਨਂ। ਯਦਾ, ਪਨਸ੍ਸ ਕਮ੍ਮਪਥਭਾવੋ ਹੋਤਿ, ਤਦਾ ਕਮ੍ਮਪਥਰਾਸਿਸਙ੍ਗਹੋ ਨ ਨਿવਾਰਿਤੋ। ਏਤ੍ਥਾਹ – ਯਦਿ ਚੇਤਨਾਯ ਸਬ੍ਬਦਾ ਕਮ੍ਮਪਥਭਾવਾਭਾવਤੋ ਅਨਿਯਤੋ ਕਮ੍ਮਪਥਭਾવੋਤਿ ਕਮ੍ਮਪਥਰਾਸਿਮ੍ਹਿ ਅવਚਨਂ, ਨਨੁ ਅਭਿਜ੍ਝਾਦੀਨਮ੍ਪਿ ਕਮ੍ਮਪਥਭਾવਂ ਅਪ੍ਪਤ੍ਤਾਨਂ ਅਤ੍ਥਿਤਾਯ ਅਨਿਯਤੋ ਕਮ੍ਮਪਥਭਾવੋਤਿ ਤੇਸਮ੍ਪਿ ਕਮ੍ਮਪਥਰਾਸਿਮ੍ਹਿ ਅવਚਨਂ ਆਪਜ੍ਜਤੀਤਿ? ਨਾਪਜ੍ਜਤਿ, ਕਮ੍ਮਪਥਤਾਤਂਸਭਾਗਤਾਹਿ ਤੇਸਂ ਤਤ੍ਥ વੁਤ੍ਤਤ੍ਤਾ। ਯਦਿ ਏવਂ ਚੇਤਨਾਪਿ ਤਤ੍ਥ વਤ੍ਤਬ੍ਬਾ ਸਿਯਾ? ਸਚ੍ਚਮੇਤਂ। ਸਾ ਪਨ ਪਾਣਾਤਿਪਾਤਾਦਿਕਾਤਿ ਪਾਕਟੋ ਤਸ੍ਸਾ ਕਮ੍ਮਪਥਭਾવੋਤਿ ਨ વੁਤ੍ਤਾ ਸਿਯਾ। ਚੇਤਨਾਯ ਹਿ ‘‘ਚੇਤਨਾਹਂ, ਭਿਕ੍ਖવੇ, ਕਮ੍ਮਂ વਦਾਮਿ (ਅ॰ ਨਿ॰ ੬.੬੩; ਕਥਾ॰ ੫੩੯) ਤਿવਿਧਾ, ਭਿਕ੍ਖવੇ, ਕਾਯਸਞ੍ਚੇਤਨਾ ਅਕੁਸਲਂ ਕਾਯਕਮ੍ਮ’’ਨ੍ਤਿਆਦਿવਚਨਤੋ (ਕਥਾ॰ ੫੩੯) ਕਮ੍ਮਭਾવੋ ਪਾਕਟੋ। ਕਮ੍ਮਂਯੇવ ਚ ਸੁਗਤਿਦੁਗ੍ਗਤੀਨਂ ਤਤ੍ਥੁਪ੍ਪਜ੍ਜਨਕਸੁਖਦੁਕ੍ਖਾਨਞ੍ਚ ਪਥਭਾવੇਨ ਪવਤ੍ਤਂ ਕਮ੍ਮਪਥੋਤਿ વੁਚ੍ਚਤੀਤਿ ਪਾਕਟੋ, ਤਸ੍ਸਾ ਕਮ੍ਮਪਥਭਾવੋ। ਅਭਿਜ੍ਝਾਦੀਨਂ ਪਨ ਚੇਤਨਾਸਮੀਹਨਭਾવੇਨ ਸੁਚਰਿਤਦੁਚ੍ਚਰਿਤਭਾવੋ, ਚੇਤਨਾਜਨਿਤਪਿਟ੍ਠਿવਟ੍ਟਕਭਾવੇਨ ਸੁਗਤਿਦੁਗ੍ਗਤਿਤਦੁਪ੍ਪਜ੍ਜਨਕਸੁਖਦੁਕ੍ਖਾਨਂ ਪਥਭਾવੋ ਚਾਤਿ, ਨ ਤਥਾ ਪਾਕਟੋ ਕਮ੍ਮਪਥਭਾવੋਤਿ, ਤੇ ਏવ ਤੇਨ ਸਭਾવੇਨ ਦਸ੍ਸੇਤੁਂ ਅਭਿਧਮ੍ਮੇ ਕਮ੍ਮਪਥਰਾਸਿਭਾવੇਨ વੁਤ੍ਤਾ। ਅਤਥਾਜਾਤਿਯਕਤ੍ਤਾ વਾ ਚੇਤਨਾ ਤੇਹਿ ਸਦ੍ਧਿਂ ਨ વੁਤ੍ਤਾਤਿ ਦਟ੍ਠਬ੍ਬਂ। ਮੂਲਂ ਪਤ੍વਾਤਿ ਮੂਲਦੇਸਨਂ ਪਤ੍વਾ, ਮੂਲਸਭਾવੇਸੁ ਧਮ੍ਮੇਸੁ ਦੇਸਿਯਮਾਨੇਸੂਤਿ ਅਤ੍ਥੋ।
Dhammatoti sabhāvato. Koṭṭhāsatoti cittaṅgakoṭṭhāsato, yaṃkoṭṭhāsā honti, tatoti attho. Cetanādhammāvāti cetanāsabhāvā eva. Paṭipāṭiyā sattāti ettha nanu cetanā abhidhamme kammapathesu na vuttāti paṭipāṭiyā sattannaṃ kammapathabhāvo na yuttoti? Na, avacanassa aññahetukattā. Na hi tattha cetanāya akammapathattā kammapatharāsimhi avacanaṃ, kadāci pana kammapatho hoti, na sabbadāti kammapathabhāvassa aniyatattā avacanaṃ. Yadā, panassa kammapathabhāvo hoti, tadā kammapatharāsisaṅgaho na nivārito. Etthāha – yadi cetanāya sabbadā kammapathabhāvābhāvato aniyato kammapathabhāvoti kammapatharāsimhi avacanaṃ, nanu abhijjhādīnampi kammapathabhāvaṃ appattānaṃ atthitāya aniyato kammapathabhāvoti tesampi kammapatharāsimhi avacanaṃ āpajjatīti? Nāpajjati, kammapathatātaṃsabhāgatāhi tesaṃ tattha vuttattā. Yadi evaṃ cetanāpi tattha vattabbā siyā? Saccametaṃ. Sā pana pāṇātipātādikāti pākaṭo tassā kammapathabhāvoti na vuttā siyā. Cetanāya hi ‘‘cetanāhaṃ, bhikkhave, kammaṃ vadāmi (a. ni. 6.63; kathā. 539) tividhā, bhikkhave, kāyasañcetanā akusalaṃ kāyakamma’’ntiādivacanato (kathā. 539) kammabhāvo pākaṭo. Kammaṃyeva ca sugatiduggatīnaṃ tatthuppajjanakasukhadukkhānañca pathabhāvena pavattaṃ kammapathoti vuccatīti pākaṭo, tassā kammapathabhāvo. Abhijjhādīnaṃ pana cetanāsamīhanabhāvena sucaritaduccaritabhāvo, cetanājanitapiṭṭhivaṭṭakabhāvena sugatiduggatitaduppajjanakasukhadukkhānaṃ pathabhāvo cāti, na tathā pākaṭo kammapathabhāvoti, te eva tena sabhāvena dassetuṃ abhidhamme kammapatharāsibhāvena vuttā. Atathājātiyakattā vā cetanā tehi saddhiṃ na vuttāti daṭṭhabbaṃ. Mūlaṃ patvāti mūladesanaṃ patvā, mūlasabhāvesu dhammesu desiyamānesūti attho.
ਅਦਿਨ੍ਨਾਦਾਨਂ ਸਤ੍ਤਾਰਮ੍ਮਣਨ੍ਤਿ ਇਦਂ ‘‘ਪਞ੍ਚ ਸਿਕ੍ਖਾਪਦਾ ਪਰਿਤ੍ਤਾਰਮ੍ਮਣਾ ਏવਾ’’ਤਿ ਇਮਾਯ ਪਾਲ਼ਿਯਾ વਿਰੁਜ੍ਝਤਿ। ਯਞ੍ਹਿ ਪਾਣਾਤਿਪਾਤਾਦਿਦੁਸ੍ਸੀਲ੍ਯਸ੍ਸ ਆਰਮ੍ਮਣਂ, ਤਦੇવ ਤਂ વੇਰਮਣਿਯਾ ਆਰਮ੍ਮਣਂ। વੀਤਿਕ੍ਕਮਿਤਬ੍ਬવਤ੍ਥੁਤੋ ਏવ ਹਿ વਿਰਤੀਤਿ। ‘‘ਸਤ੍ਤਾਰਮ੍ਮਣ’’ਨ੍ਤਿ વਾ ਸਤ੍ਤਸਙ੍ਖਾਤਂ ਸਙ੍ਖਾਰਾਰਮ੍ਮਣਮੇવ ਉਪਾਦਾਯ વੁਤ੍ਤਤ੍ਤਾ ਨ ਕੋਚਿ વਿਰੋਧੋ। ਤਥਾ ਹਿ વੁਤ੍ਤਂ ਸਮ੍ਮੋਹવਿਨੋਦਨਿਯਂ (વਿਭ॰ ਅਟ੍ਠ॰ ੭੧੪) ‘‘ਯਾਨਿ ਸਿਕ੍ਖਾਪਦਾਨਿ ਏਤ੍ਥ ‘ਸਤ੍ਤਾਰਮ੍ਮਣਾਨੀ’ਤਿ વੁਤ੍ਤਾਨਿ, ਤਾਨਿ ਯਸ੍ਮਾ ‘ਸਤ੍ਤੋਤਿ’ਤਿ ਸਙ੍ਖਂ ਗਤੇ ਸਙ੍ਖਾਰੇਯੇવ ਆਰਮ੍ਮਣਂ ਕਰੋਨ੍ਤੀ’’ਤਿ। ਇਤੋ ਪਰੇਸੁਪਿ ਏਸੇવ ਨਯੋ। વਿਸਭਾਗવਤ੍ਥੁਨੋ ‘‘ਇਤ੍ਥਿਪੁਰਿਸਾ’’ਤਿ ਗਹੇਤਬ੍ਬਤੋ ਸਤ੍ਤਾਰਮ੍ਮਣੋਤਿਪਿ ਏਕੇ। ‘‘ਏਕੋ ਦਿਟ੍ਠੋ, ਦ੍વੇ ਸੁਤਾ’’ਤਿਆਦਿਨਾ ਸਮ੍ਫਪ੍ਪਲਪਨੇ ਦਿਟ੍ਠਸੁਤਮੁਤવਿਞ੍ਞਾਤવਸੇਨ। ਤਥਾ ਅਭਿਜ੍ਝਾਤਿ ਏਤ੍ਥ ਤਥਾ-ਸਦ੍ਦੋ ‘‘ਦਿਟ੍ਠਸੁਤਮੁਤવਿਞ੍ਞਾਤવਸੇਨਾ’’ਤਿ ਇਦਮ੍ਪਿ ਉਪਸਂਹਰਤਿ, ਨ ਸਤ੍ਤਸਙ੍ਖਾਰਾਰਮ੍ਮਣਤਂ ਏવ ਦਸ੍ਸਨਾਦਿવਸੇਨ ਅਭਿਜ੍ਝਾਯਨਤੋ। ‘‘ਨਤ੍ਥਿ ਸਤ੍ਤਾ ਓਪਪਾਤਿਕਾ’’ਤਿ ਪવਤ੍ਤਮਾਨਾਪਿ ਮਿਚ੍ਛਾਦਿਟ੍ਠਿ ਤੇਭੂਮਕਧਮ੍ਮਾਰਮ੍ਮਣਾ ਏવਾਤਿ ਅਧਿਪ੍ਪਾਯੇਨ ਤਸ੍ਸਾ ਸਙ੍ਖਾਰਾਰਮ੍ਮਣਤਾ વੁਤ੍ਤਾ। ਕਥਂ ਪਨ ਮਿਚ੍ਛਾਦਿਟ੍ਠਿਯਾ ਮਹਗ੍ਗਤਪ੍ਪਤ੍ਤਾ ਧਮ੍ਮਾ ਆਰਮ੍ਮਣਂ ਹੋਨ੍ਤੀਤਿ? ਸਾਧਾਰਣਤੋ। ਨਤ੍ਥਿ ਸੁਕਟਦੁਕ੍ਕਟਾਨਂ ਕਮ੍ਮਾਨਂ ਫਲਂ વਿਪਾਕੋਤਿ ਹਿ ਪવਤ੍ਤਮਾਨਾਯ ਅਤ੍ਥਤੋ ਰੂਪਾਰੂਪਾવਚਰਧਮ੍ਮਾਪਿ ਗਹਿਤਾવ ਹੋਨ੍ਤੀਤਿ।
Adinnādānaṃ sattārammaṇanti idaṃ ‘‘pañca sikkhāpadā parittārammaṇā evā’’ti imāya pāḷiyā virujjhati. Yañhi pāṇātipātādidussīlyassa ārammaṇaṃ, tadeva taṃ veramaṇiyā ārammaṇaṃ. Vītikkamitabbavatthuto eva hi viratīti. ‘‘Sattārammaṇa’’nti vā sattasaṅkhātaṃ saṅkhārārammaṇameva upādāya vuttattā na koci virodho. Tathā hi vuttaṃ sammohavinodaniyaṃ (vibha. aṭṭha. 714) ‘‘yāni sikkhāpadāni ettha ‘sattārammaṇānī’ti vuttāni, tāni yasmā ‘sattoti’ti saṅkhaṃ gate saṅkhāreyeva ārammaṇaṃ karontī’’ti. Ito paresupi eseva nayo. Visabhāgavatthuno ‘‘itthipurisā’’ti gahetabbato sattārammaṇotipi eke. ‘‘Eko diṭṭho, dve sutā’’tiādinā samphappalapane diṭṭhasutamutaviññātavasena. Tathā abhijjhāti ettha tathā-saddo ‘‘diṭṭhasutamutaviññātavasenā’’ti idampi upasaṃharati, na sattasaṅkhārārammaṇataṃ eva dassanādivasena abhijjhāyanato. ‘‘Natthi sattā opapātikā’’ti pavattamānāpi micchādiṭṭhi tebhūmakadhammārammaṇā evāti adhippāyena tassā saṅkhārārammaṇatā vuttā. Kathaṃ pana micchādiṭṭhiyā mahaggatappattā dhammā ārammaṇaṃ hontīti? Sādhāraṇato. Natthi sukaṭadukkaṭānaṃ kammānaṃ phalaṃ vipākoti hi pavattamānāya atthato rūpārūpāvacaradhammāpi gahitāva hontīti.
ਸੁਖਬਹੁਲਤਾਯ ਰਾਜਾਨੋ ਹਸਮਾਨਾਪਿ ‘‘ਚੋਰਂ ਘਾਤੇਥਾ’’ਤਿ વਦਨ੍ਤਿ, ਹਾਸੋ ਪਨ ਤੇਸਂ ਅਞ੍ਞવਿਸਯੋਤਿ ਆਹ ‘‘ਸਨ੍ਨਿਟ੍ਠਾਪਕਚੇਤਨਾ ਪਨ ਨੇਸਂ ਦੁਕ੍ਖਸਮ੍ਪਯੁਤ੍ਤਾવ ਹੋਤੀ’’ਤਿ। ਮਜ੍ਝਤ੍ਤવੇਦਨੋ ਨ ਹੋਤਿ, ਸੁਖવੇਦਨੋવ। ਤਤ੍ਥ ‘‘ਕਾਮਾਨਂ ਸਮੁਦਯਾ’’ਤਿਆਦਿਨਾ વੇਦਨਾਭੇਦੋ વੇਦਿਤਬ੍ਬੋ। ਲੋਭਸਮੁਟ੍ਠਾਨੋ ਮੁਸਾવਾਦੋ ਸੁਖવੇਦਨੋ વਾ ਸਿਯਾ ਮਜ੍ਝਤ੍ਤવੇਦਨੋ વਾ, ਦੋਸਸਮੁਟ੍ਠਾਨੋ ਦੁਕ੍ਖવੇਦਨੋ વਾਤਿ ਮੁਸਾવਾਦੋ ਤਿવੇਦਨੋ ਸਿਯਾ। ਇਮਿਨਾ ਨਯੇਨ ਸੇਸੇਸੁਪਿ ਯਥਾਰਹਂ વੇਦਨਾਨਂ ‘‘ਲੋਭੋ ਨਿਦਾਨਂ ਕਮ੍ਮਾਨਂ ਸਮੁਦਯਾਯਾ’’ਤਿਆਦਿਨਾ ਭੇਦੋ વੇਦਿਤਬ੍ਬੋ।
Sukhabahulatāya rājāno hasamānāpi ‘‘coraṃ ghātethā’’ti vadanti, hāso pana tesaṃ aññavisayoti āha ‘‘sanniṭṭhāpakacetanā pana nesaṃ dukkhasampayuttāva hotī’’ti. Majjhattavedano na hoti, sukhavedanova. Tattha ‘‘kāmānaṃ samudayā’’tiādinā vedanābhedo veditabbo. Lobhasamuṭṭhāno musāvādo sukhavedano vā siyā majjhattavedano vā, dosasamuṭṭhāno dukkhavedano vāti musāvādo tivedano siyā. Iminā nayena sesesupi yathārahaṃ vedanānaṃ ‘‘lobho nidānaṃ kammānaṃ samudayāyā’’tiādinā bhedo veditabbo.
ਪਾਣਾਤਿਪਾਤੋ ਦੋਸਮੋਹવਸੇਨ ਦ੍વਿਮੂਲਕੋਤਿ ਸਮ੍ਪਯੁਤ੍ਤਮੂਲਮੇવ ਸਨ੍ਧਾਯ વੁਤ੍ਤਂ। ਤਸ੍ਸ ਹਿ ਮੂਲਟ੍ਠੇਨ ਉਪਕਾਰਭਾવੋ ਦੋਸવਿਸੇਸੋ, ਨਿਦਾਨਮੂਲੇ ਪਨ ਗਯ੍ਹਮਾਨੇ ਲੋਭਮੋਹવਸੇਨਪਿ વਟ੍ਟਤਿ। ਸਮ੍ਮੂਲ਼੍ਹੋ ਆਮਿਸਕਿਞ੍ਜਕ੍ਖਕਾਮੋਪਿ ਹਿ ਪਾਣਂ ਹਨਤਿ। ਤੇਨੇવਾਹ ‘‘ਲੋਭੋ ਨਿਦਾਨਂ ਕਮ੍ਮਾਨਂ ਸਮੁਦਯਾਯਾ’’ਤਿਆਦਿ (ਅ॰ ਨਿ॰ ੩.੩੪)। ਸੇਸੇਸੁਪਿ ਏਸੇવ ਨਯੋ।
Pāṇātipāto dosamohavasena dvimūlakoti sampayuttamūlameva sandhāya vuttaṃ. Tassa hi mūlaṭṭhena upakārabhāvo dosaviseso, nidānamūle pana gayhamāne lobhamohavasenapi vaṭṭati. Sammūḷho āmisakiñjakkhakāmopi hi pāṇaṃ hanati. Tenevāha ‘‘lobho nidānaṃ kammānaṃ samudayāyā’’tiādi (a. ni. 3.34). Sesesupi eseva nayo.
ਅਸਮਾਦਿਨ੍ਨਸੀਲਸ੍ਸ ਸਮ੍ਪਤ੍ਤਤੋ ਯਥਾਉਪਟ੍ਠਿਤવੀਤਿਕ੍ਕਮਿਤਬ੍ਬવਤ੍ਥੁਤੋ વਿਰਤਿ ਸਮ੍ਪਤ੍ਤવਿਰਤਿ। ਸਮਾਦਾਨੇਨ ਉਪ੍ਪਨ੍ਨਾ વਿਰਤਿ ਸਮਾਦਾਨવਿਰਤਿ। ਕਿਲੇਸਾਨਂ ਸਮੁਚ੍ਛਿਨ੍ਦਨવਸੇਨ ਪવਤ੍ਤਾ ਮਗ੍ਗਸਮ੍ਪਯੁਤ੍ਤਾ વਿਰਤਿ ਸਮੁਚ੍ਛੇਦવਿਰਤਿ। ਕਾਮਞ੍ਚੇਤ੍ਥ ਪਾਲ਼ਿਯਂ વਿਰਤਿਯੋવ ਆਗਤਾ, ਸਿਕ੍ਖਾਪਦવਿਭਙ੍ਗੇ ਪਨ ਚੇਤਨਾਪਿ ਆਹਰਿਤ੍વਾ ਦਸ੍ਸਿਤਾਤਿ ਤਦੁਭਯਮ੍ਪਿ ਗਣ੍ਹਨ੍ਤੋ ‘‘ਚੇਤਨਾਪਿ વਟ੍ਟਨ੍ਤਿ વਿਰਤਿਯੋਪੀ’’ਤਿ ਆਹ।
Asamādinnasīlassa sampattato yathāupaṭṭhitavītikkamitabbavatthuto virati sampattavirati. Samādānena uppannā virati samādānavirati. Kilesānaṃ samucchindanavasena pavattā maggasampayuttā virati samucchedavirati. Kāmañcettha pāḷiyaṃ viratiyova āgatā, sikkhāpadavibhaṅge pana cetanāpi āharitvā dassitāti tadubhayampi gaṇhanto ‘‘cetanāpi vaṭṭanti viratiyopī’’ti āha.
ਅਦੁਸ੍ਸੀਲ੍ਯਾਰਮ੍ਮਣਾ ਜੀવਿਤਿਨ੍ਦ੍ਰਿਯਾਦਿਆਰਮ੍ਮਣਾ ਕਥਂ ਦੁਸ੍ਸੀਲ੍ਯਾਨਿ ਪਜਹਨ੍ਤੀਤਿ ਦਸ੍ਸੇਤੁਂ ‘‘ਯਥਾ ਪਨਾ’’ਤਿਆਦਿ વੁਤ੍ਤਂ। ਪਾਣਾਤਿਪਾਤਾਦੀਹਿ વਿਰਮਣવਸੇਨ ਪવਤ੍ਤਨਤੋ ਤਦਾਰਮ੍ਮਣਭਾવੇਨੇવ ਤਾਨਿ ਪਜਹਨ੍ਤਿ। ਨ ਹਿ ਤਦੇવ ਆਰਬ੍ਭ ਤਂ ਪਜਹਿਤੁਂ ਸਕ੍ਕਾ ਤਤੋ ਅਨਿਸ੍ਸਟਭਾવਤੋ।
Adussīlyārammaṇā jīvitindriyādiārammaṇā kathaṃ dussīlyāni pajahantīti dassetuṃ ‘‘yathā panā’’tiādi vuttaṃ. Pāṇātipātādīhi viramaṇavasena pavattanato tadārammaṇabhāveneva tāni pajahanti. Na hi tadeva ārabbha taṃ pajahituṃ sakkā tato anissaṭabhāvato.
ਅਨਭਿਜ੍ਝਾ…ਪੇ॰… વਿਰਮਨ੍ਤਸ੍ਸਾਤਿ ਅਭਿਜ੍ਝਂ ਪਜਹਨ੍ਤਸ੍ਸਾਤਿ ਅਤ੍ਥੋ। ਨ ਹਿ ਮਨੋਦੁਚ੍ਚਰਿਤਤੋ વਿਰਤਿ ਅਤ੍ਥਿ ਅਨਭਿਜ੍ਝਾਦੀਹੇવ ਤਪ੍ਪਹਾਨਸਿਦ੍ਧਿਤੋ।
Anabhijjhā…pe… viramantassāti abhijjhaṃ pajahantassāti attho. Na hi manoduccaritato virati atthi anabhijjhādīheva tappahānasiddhito.
ਪਞ੍ਚਸਿਕ੍ਖਾਪਦਸੁਤ੍ਤਾਦਿવਣ੍ਣਨਾ ਨਿਟ੍ਠਿਤਾ।
Pañcasikkhāpadasuttādivaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya
੩. ਪਞ੍ਚਸਿਕ੍ਖਾਪਦਸੁਤ੍ਤਂ • 3. Pañcasikkhāpadasuttaṃ
੪. ਸਤ੍ਤਕਮ੍ਮਪਥਸੁਤ੍ਤਂ • 4. Sattakammapathasuttaṃ
੫. ਦਸਕਮ੍ਮਪਥਸੁਤ੍ਤਂ • 5. Dasakammapathasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੩-੫. ਪਞ੍ਚਸਿਕ੍ਖਾਪਦਸੁਤ੍ਤਾਦਿવਣ੍ਣਨਾ • 3-5. Pañcasikkhāpadasuttādivaṇṇanā
