| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๔. ปญฺจสีลสมาทานิยเตฺถรอปทานํ
4. Pañcasīlasamādāniyattheraapadānaṃ
๑๓๔.
134.
‘‘นคเร จนฺทวติยา, ภตโก อาสหํ ตทา;
‘‘Nagare candavatiyā, bhatako āsahaṃ tadā;
ปรกมฺมายเน ยุโตฺต, ปพฺพชฺชํ น ลภามหํฯ
Parakammāyane yutto, pabbajjaṃ na labhāmahaṃ.
๑๓๕.
135.
‘‘มหนฺธการปิหิตา , ติวิธคฺคีหิ ฑยฺหเร;
‘‘Mahandhakārapihitā , tividhaggīhi ḍayhare;
เกน นุ โข อุปาเยน, วิสํยุโตฺต ภเว อหํฯ
Kena nu kho upāyena, visaṃyutto bhave ahaṃ.
๑๓๖.
136.
‘‘เทยฺยธโมฺม จ เม นตฺถิ, วราโก ภตโก อหํ;
‘‘Deyyadhammo ca me natthi, varāko bhatako ahaṃ;
ยํนูนาหํ ปญฺจสีลํ, รเกฺขยฺยํ ปริปูรยํฯ
Yaṃnūnāhaṃ pañcasīlaṃ, rakkheyyaṃ paripūrayaṃ.
๑๓๗.
137.
‘‘อโนมทสฺสิสฺส มุนิโน, นิสโภ นาม สาวโก;
‘‘Anomadassissa munino, nisabho nāma sāvako;
ตมหํ อุปสงฺกมฺม, ปญฺจสิกฺขาปทคฺคหิํฯ
Tamahaṃ upasaṅkamma, pañcasikkhāpadaggahiṃ.
๑๓๘.
138.
‘‘วสฺสสตสหสฺสานิ, อายุ วิชฺชติ ตาวเท;
‘‘Vassasatasahassāni, āyu vijjati tāvade;
ตาวตา ปญฺจสีลานิ, ปริปุณฺณานิ โคปยิํฯ
Tāvatā pañcasīlāni, paripuṇṇāni gopayiṃ.
๑๓๙.
139.
‘‘มจฺจุกาเล จ สมฺปเตฺต, เทวา อสฺสาสยนฺติ มํ;
‘‘Maccukāle ca sampatte, devā assāsayanti maṃ;
๑๔๐.
140.
‘‘วตฺตเนฺต จริเม จิเตฺต, มม สีลํ อนุสฺสริํ;
‘‘Vattante carime citte, mama sīlaṃ anussariṃ;
เตน กเมฺมน สุกเตน, ตาวติํสํ อคจฺฉหํฯ
Tena kammena sukatena, tāvatiṃsaṃ agacchahaṃ.
๑๔๑.
141.
‘‘ติํสกฺขตฺตุญฺจ เทวิโนฺท, เทวรชฺชมการยิํ;
‘‘Tiṃsakkhattuñca devindo, devarajjamakārayiṃ;
๑๔๒.
142.
‘‘ปญฺจสตฺตติกฺขตฺตุญฺจ, จกฺกวตฺตี อโหสหํ;
‘‘Pañcasattatikkhattuñca, cakkavattī ahosahaṃ;
ปเทสรชฺชํ วิปุลํ, คณนาโต อสงฺขิยํฯ
Padesarajjaṃ vipulaṃ, gaṇanāto asaṅkhiyaṃ.
๑๔๓.
143.
‘‘เทวโลกา จวิตฺวาน, สุกฺกมูเลน โจทิโต;
‘‘Devalokā cavitvāna, sukkamūlena codito;
ปุเร เวสาลิยํ ชาโต, มหาสาเล สุอฑฺฒเกฯ
Pure vesāliyaṃ jāto, mahāsāle suaḍḍhake.
๑๔๔.
144.
มาตา จ เม ปิตา เจว, ปญฺจสิกฺขาปทคฺคหุํฯ
Mātā ca me pitā ceva, pañcasikkhāpadaggahuṃ.
๑๔๕.
145.
‘‘สห สุตฺวานหํ สีลํ, มม สีลํ อนุสฺสริํ;
‘‘Saha sutvānahaṃ sīlaṃ, mama sīlaṃ anussariṃ;
เอกาสเน นิสีทิตฺวา, อรหตฺตมปาปุณิํฯ
Ekāsane nisīditvā, arahattamapāpuṇiṃ.
๑๔๖.
146.
‘‘ชาติยา ปญฺจวเสฺสน, อรหตฺตมปาปุณิํ;
‘‘Jātiyā pañcavassena, arahattamapāpuṇiṃ;
อุปสมฺปาทยิ พุโทฺธ, คุณมญฺญาย จกฺขุมาฯ
Upasampādayi buddho, guṇamaññāya cakkhumā.
๑๔๗.
147.
‘‘ปริปุณฺณานิ โคเปตฺวา, ปญฺจสิกฺขาปทานหํ;
‘‘Paripuṇṇāni gopetvā, pañcasikkhāpadānahaṃ;
อปริเมเยฺย อิโต กเปฺป, วินิปาตํ น คจฺฉหํฯ
Aparimeyye ito kappe, vinipātaṃ na gacchahaṃ.
๑๔๘.
148.
‘‘สฺวาหํ ยสมนุภวิํ, เตสํ สีลาน วาหสา;
‘‘Svāhaṃ yasamanubhaviṃ, tesaṃ sīlāna vāhasā;
กปฺปโกฎิมฺปิ กิเตฺตโนฺต, กิตฺตเย เอกเทสกํฯ
Kappakoṭimpi kittento, kittaye ekadesakaṃ.
๑๔๙.
149.
‘‘ปญฺจสีลานิ โคเปตฺวา, ตโย เหตู ลภามหํ;
‘‘Pañcasīlāni gopetvā, tayo hetū labhāmahaṃ;
ทีฆายุโก มหาโภโค, ติกฺขปโญฺญ ภวามหํฯ
Dīghāyuko mahābhogo, tikkhapañño bhavāmahaṃ.
๑๕๐.
150.
ภวาภเว สํสริตฺวา, เอเต ฐาเน ลภามหํฯ
Bhavābhave saṃsaritvā, ete ṭhāne labhāmahaṃ.
๑๕๑.
151.
‘‘อปริเมยฺยสีเลสุ, วตฺตนฺตา ชินสาวกา;
‘‘Aparimeyyasīlesu, vattantā jinasāvakā;
ภเวสุ ยทิ รเชฺชยฺยุํ, วิปาโก กีทิโส ภเวฯ
Bhavesu yadi rajjeyyuṃ, vipāko kīdiso bhave.
๑๕๒.
152.
เตน สีเลนหํ อชฺช, โมจยิํ สพฺพพนฺธนาฯ
Tena sīlenahaṃ ajja, mocayiṃ sabbabandhanā.
๑๕๓.
153.
‘‘อปริเมเยฺย อิโต กเปฺป, ปญฺจสีลานิ โคปยิํ;
‘‘Aparimeyye ito kappe, pañcasīlāni gopayiṃ;
ทุคฺคติํ นาภิชานามิ, ปญฺจสีลานิทํ ผลํฯ
Duggatiṃ nābhijānāmi, pañcasīlānidaṃ phalaṃ.
๑๕๔.
154.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ อายสฺมา ปญฺจสีลสมาทานิโย เถโร อิมา คาถาโย อภาสิตฺถาติฯ
Itthaṃ sudaṃ āyasmā pañcasīlasamādāniyo thero imā gāthāyo abhāsitthāti.
ปญฺจสีลสมาทานิยเตฺถรสฺสาปทานํ จตุตฺถํฯ
Pañcasīlasamādāniyattherassāpadānaṃ catutthaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๔. ปญฺจสีลสมาทานิยเตฺถรอปทานวณฺณนา • 4. Pañcasīlasamādāniyattheraapadānavaṇṇanā
