| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. பஞ்சஸீலஸமாதா³னியத்தே²ரஅபதா³னவண்ணனா
4. Pañcasīlasamādāniyattheraapadānavaṇṇanā
நக³ரே சந்த³வதியாதிஆதி³கங் ஆயஸ்மதோ பஞ்சஸீலஸமாதா³னியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அனோமத³ஸ்ஸிஸ்ஸ ப⁴க³வதோ காலே ஏகஸ்மிங் குலே நிப்³ப³த்தோ புரிமப⁴வே கதாகுஸலகம்மானுரூபேன த³லித்³தோ³ ஹுத்வா அப்பன்னபானபோ⁴ஜனோ பரேஸங் ப⁴திங் கத்வா ஜீவந்தோ ஸங்ஸாரே ஆதீ³னவங் ஞத்வா பப்³ப³ஜிதுகாமோபி பப்³ப³ஜ்ஜங் அலப⁴மானோ அனோமத³ஸ்ஸிஸ்ஸ ப⁴க³வதோ ஸாவகஸ்ஸ நிஸப⁴த்தே²ரஸ்ஸ ஸந்திகே பஞ்ச ஸிக்கா²பதா³னி ஸமாதி³யி. தீ³கா⁴யுககாலே உப்பன்னத்தா வஸ்ஸஸதஸஹஸ்ஸானி ஸீலங் பரிபாலேஸி. தேன கம்மேன ஸோ தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ வேஸாலியங் மஹாபோ⁴க³குலே நிப்³ப³த்தோ. மாதாபிதரோ ஸீலங் ஸமாதி³யந்தே தி³ஸ்வா அத்தனோ ஸீலங் ஸரித்வா விபஸ்ஸனங் வட்³டெ⁴த்வா அரஹத்தங் பத்வா பப்³ப³ஜி.
Nagare candavatiyātiādikaṃ āyasmato pañcasīlasamādāniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle ekasmiṃ kule nibbatto purimabhave katākusalakammānurūpena daliddo hutvā appannapānabhojano paresaṃ bhatiṃ katvā jīvanto saṃsāre ādīnavaṃ ñatvā pabbajitukāmopi pabbajjaṃ alabhamāno anomadassissa bhagavato sāvakassa nisabhattherassa santike pañca sikkhāpadāni samādiyi. Dīghāyukakāle uppannattā vassasatasahassāni sīlaṃ paripālesi. Tena kammena so devamanussesu saṃsaranto imasmiṃ buddhuppāde vesāliyaṃ mahābhogakule nibbatto. Mātāpitaro sīlaṃ samādiyante disvā attano sīlaṃ saritvā vipassanaṃ vaḍḍhetvā arahattaṃ patvā pabbaji.
134. ஸோ அத்தனோ புப்³ப³கம்மங் ஸரித்வா ஸோமனஸ்ஸஜாதோ உதா³னவஸேன புப்³ப³சரிதாபதா³னங் பகாஸெந்தோ நக³ரே சந்த³வதியாதிஆதி³மாஹ. ப⁴தகோ ஆஸஹங் ததா³தி ததா³ மம புஞ்ஞகரணகாலே அஹங் ப⁴தகோ ப⁴தியா கம்மகாரகோ ஆஸிங் அஹோஸிங். பரகம்மாயனே யுத்தோதி ப⁴தியா பரேஸங் கம்மகரணே ஆயுத்தோ யோஜிதோ ஓகாஸாபா⁴வேன ஸங்ஸாரதோ முச்சனத்தா²ய அஹங் பப்³ப³ஜ்ஜங் ந லபா⁴மி.
134. So attano pubbakammaṃ saritvā somanassajāto udānavasena pubbacaritāpadānaṃ pakāsento nagare candavatiyātiādimāha. Bhatakoāsahaṃ tadāti tadā mama puññakaraṇakāle ahaṃ bhatako bhatiyā kammakārako āsiṃ ahosiṃ. Parakammāyane yuttoti bhatiyā paresaṃ kammakaraṇe āyutto yojito okāsābhāvena saṃsārato muccanatthāya ahaṃ pabbajjaṃ na labhāmi.
135. மஹந்த⁴காரபிஹிதாதி மஹந்தேஹி கிலேஸந்த⁴காரேஹி பிஹிதா ஸங்வுதா த²கிதா. திவித⁴க்³கீ³ஹி ட³ய்ஹரேதி நரகக்³கி³பேதக்³கி³ஸங்ஸாரக்³கி³ஸங்கா²தேஹி தீஹி அக்³கீ³ஹி ட³ய்ஹந்தி. அஹங் பன கேன உபாயேன கேன காரணேன விஸங்யுத்தோ ப⁴வெய்யந்தி அத்தோ².
135.Mahandhakārapihitāti mahantehi kilesandhakārehi pihitā saṃvutā thakitā. Tividhaggīhi ḍayhareti narakaggipetaggisaṃsāraggisaṅkhātehi tīhi aggīhi ḍayhanti. Ahaṃ pana kena upāyena kena kāraṇena visaṃyutto bhaveyyanti attho.
136. தெ³ய்யத⁴ம்மோ அன்னபானாதி³தா³தப்³ப³யுத்தகங் வத்து² மய்ஹங் நத்தி², தஸ்ஸாபா⁴வேன அஹங் வராகோ து³க்கி²தோ ப⁴தகோ ப⁴தியா ஜீவனகோ யங்னூனாஹங் பஞ்சஸீலங் ரக்கெ²ய்யங் பரிபூரயந்தி பஞ்சஸீலங் ஸமாதி³யித்வா பரிபூரெந்தோ யங்னூன ரக்கெ²ய்யங் ஸாது⁴கங் ப⁴த்³த³கங் ஸுந்த³ரங் கத்வா பரிபாலெய்யந்தி அத்தோ².
136.Deyyadhammo annapānādidātabbayuttakaṃ vatthu mayhaṃ natthi, tassābhāvena ahaṃ varāko dukkhito bhatako bhatiyā jīvanako yaṃnūnāhaṃ pañcasīlaṃ rakkheyyaṃ paripūrayanti pañcasīlaṃ samādiyitvā paripūrento yaṃnūna rakkheyyaṃ sādhukaṃ bhaddakaṃ sundaraṃ katvā paripāleyyanti attho.
148. ஸ்வாஹங் யஸமனுப⁴விந்தி ஸோ அஹங் தே³வமனுஸ்ஸேஸு மஹந்தங் யஸங் அனுப⁴விங் தேஸங் ஸீலானங் வாஹஸா ஆனுபா⁴வேனாதி அத்தோ². கப்பகோடிம்பி தேஸங் ஸீலானங் ப²லங் கித்தெந்தோ ஏககொட்டா²ஸமேவ கித்தயே பாகடங் கரெய்யந்தி அத்தோ². ஸேஸங் ஸுவிஞ்ஞெய்யமேவாதி.
148.Svāhaṃ yasamanubhavinti so ahaṃ devamanussesu mahantaṃ yasaṃ anubhaviṃ tesaṃ sīlānaṃ vāhasā ānubhāvenāti attho. Kappakoṭimpi tesaṃ sīlānaṃ phalaṃ kittento ekakoṭṭhāsameva kittaye pākaṭaṃ kareyyanti attho. Sesaṃ suviññeyyamevāti.
பஞ்சஸீலஸமாதா³னியத்தே²ரஅபதா³னவண்ணனா ஸமத்தா.
Pañcasīlasamādāniyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. பஞ்சஸீலஸமாதா³னியத்தே²ரஅபதா³னங் • 4. Pañcasīlasamādāniyattheraapadānaṃ
