| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৪. পঞ্চসীলসমাদানিযত্থেরঅপদানৰণ্ণনা
4. Pañcasīlasamādāniyattheraapadānavaṇṇanā
নগরে চন্দৰতিযাতিআদিকং আযস্মতো পঞ্চসীলসমাদানিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অনোমদস্সিস্স ভগৰতো কালে একস্মিং কুলে নিব্বত্তো পুরিমভৰে কতাকুসলকম্মানুরূপেন দলিদ্দো হুত্ৰা অপ্পন্নপানভোজনো পরেসং ভতিং কত্ৰা জীৰন্তো সংসারে আদীনৰং ঞত্ৰা পব্বজিতুকামোপি পব্বজ্জং অলভমানো অনোমদস্সিস্স ভগৰতো সাৰকস্স নিসভত্থেরস্স সন্তিকে পঞ্চ সিক্খাপদানি সমাদিযি। দীঘাযুককালে উপ্পন্নত্তা ৰস্সসতসহস্সানি সীলং পরিপালেসি। তেন কম্মেন সো দেৰমনুস্সেসু সংসরন্তো ইমস্মিং বুদ্ধুপ্পাদে ৰেসালিযং মহাভোগকুলে নিব্বত্তো। মাতাপিতরো সীলং সমাদিযন্তে দিস্ৰা অত্তনো সীলং সরিত্ৰা ৰিপস্সনং ৰড্ঢেত্ৰা অরহত্তং পত্ৰা পব্বজি।
Nagare candavatiyātiādikaṃ āyasmato pañcasīlasamādāniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle ekasmiṃ kule nibbatto purimabhave katākusalakammānurūpena daliddo hutvā appannapānabhojano paresaṃ bhatiṃ katvā jīvanto saṃsāre ādīnavaṃ ñatvā pabbajitukāmopi pabbajjaṃ alabhamāno anomadassissa bhagavato sāvakassa nisabhattherassa santike pañca sikkhāpadāni samādiyi. Dīghāyukakāle uppannattā vassasatasahassāni sīlaṃ paripālesi. Tena kammena so devamanussesu saṃsaranto imasmiṃ buddhuppāde vesāliyaṃ mahābhogakule nibbatto. Mātāpitaro sīlaṃ samādiyante disvā attano sīlaṃ saritvā vipassanaṃ vaḍḍhetvā arahattaṃ patvā pabbaji.
১৩৪. সো অত্তনো পুব্বকম্মং সরিত্ৰা সোমনস্সজাতো উদানৰসেন পুব্বচরিতাপদানং পকাসেন্তো নগরে চন্দৰতিযাতিআদিমাহ। ভতকো আসহং তদাতি তদা মম পুঞ্ঞকরণকালে অহং ভতকো ভতিযা কম্মকারকো আসিং অহোসিং। পরকম্মাযনে যুত্তোতি ভতিযা পরেসং কম্মকরণে আযুত্তো যোজিতো ওকাসাভাৰেন সংসারতো মুচ্চনত্থায অহং পব্বজ্জং ন লভামি।
134. So attano pubbakammaṃ saritvā somanassajāto udānavasena pubbacaritāpadānaṃ pakāsento nagare candavatiyātiādimāha. Bhatakoāsahaṃ tadāti tadā mama puññakaraṇakāle ahaṃ bhatako bhatiyā kammakārako āsiṃ ahosiṃ. Parakammāyane yuttoti bhatiyā paresaṃ kammakaraṇe āyutto yojito okāsābhāvena saṃsārato muccanatthāya ahaṃ pabbajjaṃ na labhāmi.
১৩৫. মহন্ধকারপিহিতাতি মহন্তেহি কিলেসন্ধকারেহি পিহিতা সংৰুতা থকিতা। তিৰিধগ্গীহি ডয্হরেতি নরকগ্গিপেতগ্গিসংসারগ্গিসঙ্খাতেহি তীহি অগ্গীহি ডয্হন্তি। অহং পন কেন উপাযেন কেন কারণেন ৰিসংযুত্তো ভৰেয্যন্তি অত্থো।
135.Mahandhakārapihitāti mahantehi kilesandhakārehi pihitā saṃvutā thakitā. Tividhaggīhi ḍayhareti narakaggipetaggisaṃsāraggisaṅkhātehi tīhi aggīhi ḍayhanti. Ahaṃ pana kena upāyena kena kāraṇena visaṃyutto bhaveyyanti attho.
১৩৬. দেয্যধম্মো অন্নপানাদিদাতব্বযুত্তকং ৰত্থু ময্হং নত্থি, তস্সাভাৰেন অহং ৰরাকো দুক্খিতো ভতকো ভতিযা জীৰনকো যংনূনাহং পঞ্চসীলং রক্খেয্যং পরিপূরযন্তি পঞ্চসীলং সমাদিযিত্ৰা পরিপূরেন্তো যংনূন রক্খেয্যং সাধুকং ভদ্দকং সুন্দরং কত্ৰা পরিপালেয্যন্তি অত্থো।
136.Deyyadhammo annapānādidātabbayuttakaṃ vatthu mayhaṃ natthi, tassābhāvena ahaṃ varāko dukkhito bhatako bhatiyā jīvanako yaṃnūnāhaṃ pañcasīlaṃ rakkheyyaṃ paripūrayanti pañcasīlaṃ samādiyitvā paripūrento yaṃnūna rakkheyyaṃ sādhukaṃ bhaddakaṃ sundaraṃ katvā paripāleyyanti attho.
১৪৮. স্ৰাহং যসমনুভৰিন্তি সো অহং দেৰমনুস্সেসু মহন্তং যসং অনুভৰিং তেসং সীলানং ৰাহসা আনুভাৰেনাতি অত্থো। কপ্পকোটিম্পি তেসং সীলানং ফলং কিত্তেন্তো এককোট্ঠাসমেৰ কিত্তযে পাকটং করেয্যন্তি অত্থো। সেসং সুৰিঞ্ঞেয্যমেৰাতি।
148.Svāhaṃ yasamanubhavinti so ahaṃ devamanussesu mahantaṃ yasaṃ anubhaviṃ tesaṃ sīlānaṃ vāhasā ānubhāvenāti attho. Kappakoṭimpi tesaṃ sīlānaṃ phalaṃ kittento ekakoṭṭhāsameva kittaye pākaṭaṃ kareyyanti attho. Sesaṃ suviññeyyamevāti.
পঞ্চসীলসমাদানিযত্থেরঅপদানৰণ্ণনা সমত্তা।
Pañcasīlasamādāniyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৪. পঞ্চসীলসমাদানিযত্থেরঅপদানং • 4. Pañcasīlasamādāniyattheraapadānaṃ
