| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
4. бан̃жасийласамаад̣̇аанияад̇т̇зраабад̣̇аанаван̣н̣анаа
4. Pañcasīlasamādāniyattheraapadānavaṇṇanā
наг̇арз жанд̣̇авад̇ияаад̇иаад̣̇игам̣ ааяасмад̇о бан̃жасийласамаад̣̇аанияад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о аномад̣̇ассисса бхаг̇авад̇о гаалз згасмим̣ гулз ниб̣б̣ад̇д̇о буримабхавз гад̇аагусалагаммаануруубзна д̣̇алид̣̇д̣̇о худ̇ваа аббаннабаанабхож̇ано барзсам̣ бхад̇им̣ гад̇ваа ж̇ийванд̇о сам̣саарз аад̣̇ийнавам̣ н̃ад̇ваа баб̣б̣аж̇ид̇угаамоби баб̣б̣аж̇ж̇ам̣ алабхамаано аномад̣̇ассисса бхаг̇авад̇о саавагасса нисабхад̇т̇зрасса санд̇игз бан̃жа сигкаабад̣̇аани самаад̣̇ияи. д̣̇ийгхааяугагаалз уббаннад̇д̇аа вассасад̇асахассаани сийлам̣ барибаалзси. д̇зна гаммзна со д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з взсаалияам̣ махаабхог̇агулз ниб̣б̣ад̇д̇о. маад̇аабид̇аро сийлам̣ самаад̣̇ияанд̇з д̣̇исваа ад̇д̇ано сийлам̣ сарид̇ваа вибассанам̣ вад̣дхзд̇ваа арахад̇д̇ам̣ бад̇ваа баб̣б̣аж̇и.
Nagare candavatiyātiādikaṃ āyasmato pañcasīlasamādāniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle ekasmiṃ kule nibbatto purimabhave katākusalakammānurūpena daliddo hutvā appannapānabhojano paresaṃ bhatiṃ katvā jīvanto saṃsāre ādīnavaṃ ñatvā pabbajitukāmopi pabbajjaṃ alabhamāno anomadassissa bhagavato sāvakassa nisabhattherassa santike pañca sikkhāpadāni samādiyi. Dīghāyukakāle uppannattā vassasatasahassāni sīlaṃ paripālesi. Tena kammena so devamanussesu saṃsaranto imasmiṃ buddhuppāde vesāliyaṃ mahābhogakule nibbatto. Mātāpitaro sīlaṃ samādiyante disvā attano sīlaṃ saritvā vipassanaṃ vaḍḍhetvā arahattaṃ patvā pabbaji.
134. со ад̇д̇ано буб̣б̣агаммам̣ сарид̇ваа соманассаж̇аад̇о уд̣̇аанавасзна буб̣б̣ажарид̇аабад̣̇аанам̣ багаасзнд̇о наг̇арз жанд̣̇авад̇ияаад̇иаад̣̇имааха. бхад̇аго аасахам̣ д̇ад̣̇аад̇и д̇ад̣̇аа мама бун̃н̃агаран̣агаалз ахам̣ бхад̇аго бхад̇ияаа гаммагаараго аасим̣ ахосим̣. барагаммааяанз яуд̇д̇од̇и бхад̇ияаа барзсам̣ гаммагаран̣з ааяуд̇д̇о яож̇ид̇о огаасаабхаавзна сам̣саарад̇о мужжанад̇т̇ааяа ахам̣ баб̣б̣аж̇ж̇ам̣ на лабхаами.
134. So attano pubbakammaṃ saritvā somanassajāto udānavasena pubbacaritāpadānaṃ pakāsento nagare candavatiyātiādimāha. Bhatakoāsahaṃ tadāti tadā mama puññakaraṇakāle ahaṃ bhatako bhatiyā kammakārako āsiṃ ahosiṃ. Parakammāyane yuttoti bhatiyā paresaṃ kammakaraṇe āyutto yojito okāsābhāvena saṃsārato muccanatthāya ahaṃ pabbajjaṃ na labhāmi.
135. маханд̇хагаарабихид̇аад̇и маханд̇зхи гилзсанд̇хагаарзхи бихид̇аа сам̣вуд̇аа т̇агид̇аа. д̇ивид̇хаг̇г̇ийхи д̣аяхарзд̇и нарагаг̇г̇ибзд̇аг̇г̇исам̣саараг̇г̇исан̇каад̇зхи д̇ийхи аг̇г̇ийхи д̣аяханд̇и. ахам̣ бана гзна убааязна гзна гааран̣зна висам̣яуд̇д̇о бхавзяяанд̇и ад̇т̇о.
135.Mahandhakārapihitāti mahantehi kilesandhakārehi pihitā saṃvutā thakitā. Tividhaggīhi ḍayhareti narakaggipetaggisaṃsāraggisaṅkhātehi tīhi aggīhi ḍayhanti. Ahaṃ pana kena upāyena kena kāraṇena visaṃyutto bhaveyyanti attho.
136. д̣̇зяяад̇хаммо аннабаанаад̣̇ид̣̇аад̇аб̣б̣аяуд̇д̇агам̣ вад̇т̇у маяхам̣ над̇т̇и, д̇ассаабхаавзна ахам̣ варааго д̣̇угкид̇о бхад̇аго бхад̇ияаа ж̇ийванаго яам̣нуунаахам̣ бан̃жасийлам̣ рагкзяяам̣ барибуураяанд̇и бан̃жасийлам̣ самаад̣̇ияид̇ваа барибуурзнд̇о яам̣нууна рагкзяяам̣ саад̇хугам̣ бхад̣̇д̣̇агам̣ сунд̣̇арам̣ гад̇ваа барибаалзяяанд̇и ад̇т̇о.
136.Deyyadhammo annapānādidātabbayuttakaṃ vatthu mayhaṃ natthi, tassābhāvena ahaṃ varāko dukkhito bhatako bhatiyā jīvanako yaṃnūnāhaṃ pañcasīlaṃ rakkheyyaṃ paripūrayanti pañcasīlaṃ samādiyitvā paripūrento yaṃnūna rakkheyyaṃ sādhukaṃ bhaddakaṃ sundaraṃ katvā paripāleyyanti attho.
148. сваахам̣ яасаманубхавинд̇и со ахам̣ д̣̇звамануссзсу маханд̇ам̣ яасам̣ анубхавим̣ д̇зсам̣ сийлаанам̣ ваахасаа аанубхаавзнаад̇и ад̇т̇о. габбагодимби д̇зсам̣ сийлаанам̣ палам̣ гид̇д̇знд̇о згагодтаасамзва гид̇д̇аяз баагадам̣ гарзяяанд̇и ад̇т̇о. сзсам̣ сувин̃н̃зяяамзваад̇и.
148.Svāhaṃ yasamanubhavinti so ahaṃ devamanussesu mahantaṃ yasaṃ anubhaviṃ tesaṃ sīlānaṃ vāhasā ānubhāvenāti attho. Kappakoṭimpi tesaṃ sīlānaṃ phalaṃ kittento ekakoṭṭhāsameva kittaye pākaṭaṃ kareyyanti attho. Sesaṃ suviññeyyamevāti.
бан̃жасийласамаад̣̇аанияад̇т̇зраабад̣̇аанаван̣н̣анаа самад̇д̇аа.
Pañcasīlasamādāniyattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 4. бан̃жасийласамаад̣̇аанияад̇т̇зраабад̣̇аанам̣ • 4. Pañcasīlasamādāniyattheraapadānaṃ
