| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೪. ಪಞ್ಚಸೀಲಸಮಾದಾನಿಯತ್ಥೇರಅಪದಾನವಣ್ಣನಾ
4. Pañcasīlasamādāniyattheraapadānavaṇṇanā
ನಗರೇ ಚನ್ದವತಿಯಾತಿಆದಿಕಂ ಆಯಸ್ಮತೋ ಪಞ್ಚಸೀಲಸಮಾದಾನಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಅನೋಮದಸ್ಸಿಸ್ಸ ಭಗವತೋ ಕಾಲೇ ಏಕಸ್ಮಿಂ ಕುಲೇ ನಿಬ್ಬತ್ತೋ ಪುರಿಮಭವೇ ಕತಾಕುಸಲಕಮ್ಮಾನುರೂಪೇನ ದಲಿದ್ದೋ ಹುತ್ವಾ ಅಪ್ಪನ್ನಪಾನಭೋಜನೋ ಪರೇಸಂ ಭತಿಂ ಕತ್ವಾ ಜೀವನ್ತೋ ಸಂಸಾರೇ ಆದೀನವಂ ಞತ್ವಾ ಪಬ್ಬಜಿತುಕಾಮೋಪಿ ಪಬ್ಬಜ್ಜಂ ಅಲಭಮಾನೋ ಅನೋಮದಸ್ಸಿಸ್ಸ ಭಗವತೋ ಸಾವಕಸ್ಸ ನಿಸಭತ್ಥೇರಸ್ಸ ಸನ್ತಿಕೇ ಪಞ್ಚ ಸಿಕ್ಖಾಪದಾನಿ ಸಮಾದಿಯಿ। ದೀಘಾಯುಕಕಾಲೇ ಉಪ್ಪನ್ನತ್ತಾ ವಸ್ಸಸತಸಹಸ್ಸಾನಿ ಸೀಲಂ ಪರಿಪಾಲೇಸಿ। ತೇನ ಕಮ್ಮೇನ ಸೋ ದೇವಮನುಸ್ಸೇಸು ಸಂಸರನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ವೇಸಾಲಿಯಂ ಮಹಾಭೋಗಕುಲೇ ನಿಬ್ಬತ್ತೋ। ಮಾತಾಪಿತರೋ ಸೀಲಂ ಸಮಾದಿಯನ್ತೇ ದಿಸ್ವಾ ಅತ್ತನೋ ಸೀಲಂ ಸರಿತ್ವಾ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪತ್ವಾ ಪಬ್ಬಜಿ।
Nagare candavatiyātiādikaṃ āyasmato pañcasīlasamādāniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle ekasmiṃ kule nibbatto purimabhave katākusalakammānurūpena daliddo hutvā appannapānabhojano paresaṃ bhatiṃ katvā jīvanto saṃsāre ādīnavaṃ ñatvā pabbajitukāmopi pabbajjaṃ alabhamāno anomadassissa bhagavato sāvakassa nisabhattherassa santike pañca sikkhāpadāni samādiyi. Dīghāyukakāle uppannattā vassasatasahassāni sīlaṃ paripālesi. Tena kammena so devamanussesu saṃsaranto imasmiṃ buddhuppāde vesāliyaṃ mahābhogakule nibbatto. Mātāpitaro sīlaṃ samādiyante disvā attano sīlaṃ saritvā vipassanaṃ vaḍḍhetvā arahattaṃ patvā pabbaji.
೧೩೪. ಸೋ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಉದಾನವಸೇನ ಪುಬ್ಬಚರಿತಾಪದಾನಂ ಪಕಾಸೇನ್ತೋ ನಗರೇ ಚನ್ದವತಿಯಾತಿಆದಿಮಾಹ। ಭತಕೋ ಆಸಹಂ ತದಾತಿ ತದಾ ಮಮ ಪುಞ್ಞಕರಣಕಾಲೇ ಅಹಂ ಭತಕೋ ಭತಿಯಾ ಕಮ್ಮಕಾರಕೋ ಆಸಿಂ ಅಹೋಸಿಂ। ಪರಕಮ್ಮಾಯನೇ ಯುತ್ತೋತಿ ಭತಿಯಾ ಪರೇಸಂ ಕಮ್ಮಕರಣೇ ಆಯುತ್ತೋ ಯೋಜಿತೋ ಓಕಾಸಾಭಾವೇನ ಸಂಸಾರತೋ ಮುಚ್ಚನತ್ಥಾಯ ಅಹಂ ಪಬ್ಬಜ್ಜಂ ನ ಲಭಾಮಿ।
134. So attano pubbakammaṃ saritvā somanassajāto udānavasena pubbacaritāpadānaṃ pakāsento nagare candavatiyātiādimāha. Bhatakoāsahaṃ tadāti tadā mama puññakaraṇakāle ahaṃ bhatako bhatiyā kammakārako āsiṃ ahosiṃ. Parakammāyane yuttoti bhatiyā paresaṃ kammakaraṇe āyutto yojito okāsābhāvena saṃsārato muccanatthāya ahaṃ pabbajjaṃ na labhāmi.
೧೩೫. ಮಹನ್ಧಕಾರಪಿಹಿತಾತಿ ಮಹನ್ತೇಹಿ ಕಿಲೇಸನ್ಧಕಾರೇಹಿ ಪಿಹಿತಾ ಸಂವುತಾ ಥಕಿತಾ। ತಿವಿಧಗ್ಗೀಹಿ ಡಯ್ಹರೇತಿ ನರಕಗ್ಗಿಪೇತಗ್ಗಿಸಂಸಾರಗ್ಗಿಸಙ್ಖಾತೇಹಿ ತೀಹಿ ಅಗ್ಗೀಹಿ ಡಯ್ಹನ್ತಿ। ಅಹಂ ಪನ ಕೇನ ಉಪಾಯೇನ ಕೇನ ಕಾರಣೇನ ವಿಸಂಯುತ್ತೋ ಭವೇಯ್ಯನ್ತಿ ಅತ್ಥೋ।
135.Mahandhakārapihitāti mahantehi kilesandhakārehi pihitā saṃvutā thakitā. Tividhaggīhi ḍayhareti narakaggipetaggisaṃsāraggisaṅkhātehi tīhi aggīhi ḍayhanti. Ahaṃ pana kena upāyena kena kāraṇena visaṃyutto bhaveyyanti attho.
೧೩೬. ದೇಯ್ಯಧಮ್ಮೋ ಅನ್ನಪಾನಾದಿದಾತಬ್ಬಯುತ್ತಕಂ ವತ್ಥು ಮಯ್ಹಂ ನತ್ಥಿ, ತಸ್ಸಾಭಾವೇನ ಅಹಂ ವರಾಕೋ ದುಕ್ಖಿತೋ ಭತಕೋ ಭತಿಯಾ ಜೀವನಕೋ ಯಂನೂನಾಹಂ ಪಞ್ಚಸೀಲಂ ರಕ್ಖೇಯ್ಯಂ ಪರಿಪೂರಯನ್ತಿ ಪಞ್ಚಸೀಲಂ ಸಮಾದಿಯಿತ್ವಾ ಪರಿಪೂರೇನ್ತೋ ಯಂನೂನ ರಕ್ಖೇಯ್ಯಂ ಸಾಧುಕಂ ಭದ್ದಕಂ ಸುನ್ದರಂ ಕತ್ವಾ ಪರಿಪಾಲೇಯ್ಯನ್ತಿ ಅತ್ಥೋ।
136.Deyyadhammo annapānādidātabbayuttakaṃ vatthu mayhaṃ natthi, tassābhāvena ahaṃ varāko dukkhito bhatako bhatiyā jīvanako yaṃnūnāhaṃ pañcasīlaṃ rakkheyyaṃ paripūrayanti pañcasīlaṃ samādiyitvā paripūrento yaṃnūna rakkheyyaṃ sādhukaṃ bhaddakaṃ sundaraṃ katvā paripāleyyanti attho.
೧೪೮. ಸ್ವಾಹಂ ಯಸಮನುಭವಿನ್ತಿ ಸೋ ಅಹಂ ದೇವಮನುಸ್ಸೇಸು ಮಹನ್ತಂ ಯಸಂ ಅನುಭವಿಂ ತೇಸಂ ಸೀಲಾನಂ ವಾಹಸಾ ಆನುಭಾವೇನಾತಿ ಅತ್ಥೋ। ಕಪ್ಪಕೋಟಿಮ್ಪಿ ತೇಸಂ ಸೀಲಾನಂ ಫಲಂ ಕಿತ್ತೇನ್ತೋ ಏಕಕೋಟ್ಠಾಸಮೇವ ಕಿತ್ತಯೇ ಪಾಕಟಂ ಕರೇಯ್ಯನ್ತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
148.Svāhaṃ yasamanubhavinti so ahaṃ devamanussesu mahantaṃ yasaṃ anubhaviṃ tesaṃ sīlānaṃ vāhasā ānubhāvenāti attho. Kappakoṭimpi tesaṃ sīlānaṃ phalaṃ kittento ekakoṭṭhāsameva kittaye pākaṭaṃ kareyyanti attho. Sesaṃ suviññeyyamevāti.
ಪಞ್ಚಸೀಲಸಮಾದಾನಿಯತ್ಥೇರಅಪದಾನವಣ್ಣನಾ ಸಮತ್ತಾ।
Pañcasīlasamādāniyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೪. ಪಞ್ಚಸೀಲಸಮಾದಾನಿಯತ್ಥೇರಅಪದಾನಂ • 4. Pañcasīlasamādāniyattheraapadānaṃ
