| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
பஞ்சவக்³கி³யகதா²
Pañcavaggiyakathā
10. பண்டி³தோதி பண்டி³ச்சேன ஸமன்னாக³தோ. ப்³யத்தோதி வெய்யத்தியேன ஸமன்னாக³தோ. மேதா⁴வீதி டா²னுப்பத்தியா பஞ்ஞாய ஸமன்னாக³தோ. அப்பரஜக்க²ஜாதிகோதி ஸமாபத்தியா விக்க²ம்பி⁴தத்தா நிக்கிலேஸஜாதிகோ விஸுத்³த⁴ஸத்தோ. ஆஜானிஸ்ஸதீதி ஸல்லக்கெ²ஸ்ஸதி படிவிஜ்ஜி²ஸ்ஸதி. ப⁴க³வதோபி கோ² ஞாணங் உத³பாதீ³தி ஸப்³ப³ஞ்ஞுதஞ்ஞாணங் உப்பஜ்ஜி ‘‘இதோ ஸத்தமதி³வஸமத்த²கே காலங்கத்வா ஆகிஞ்சஞ்ஞாயதனே நிப்³ப³த்தோ’’தி. மஹாஜானியோதி ஸத்ததி³வஸப்³ப⁴ந்தரே பத்தப்³ப³மக்³க³ப²லதோ பரிஹீனத்தா மஹதீ ஜானி அஸ்ஸாதி மஹாஜானியோ அக்க²ணே நிப்³ப³த்தத்தா. அபி⁴தோ³ஸகாலங்கதோதி ஹிய்யோ காலங்கதோ, ஸோபி நேவஸஞ்ஞானாஸஞ்ஞாயதனே நிப்³ப³த்தோதி அத்³த³ஸ. ப³ஹூகாராதி ப³ஹூபகாரா. பதா⁴னபஹிதத்தங் உபட்ட²ஹிங்ஸூதி பதா⁴னத்தா²ய பேஸிதத்தபா⁴வங் முகோ²த³கதா³னாதி³னா உபட்ட²ஹிங்ஸு.
10.Paṇḍitoti paṇḍiccena samannāgato. Byattoti veyyattiyena samannāgato. Medhāvīti ṭhānuppattiyā paññāya samannāgato. Apparajakkhajātikoti samāpattiyā vikkhambhitattā nikkilesajātiko visuddhasatto. Ājānissatīti sallakkhessati paṭivijjhissati. Bhagavatopi kho ñāṇaṃ udapādīti sabbaññutaññāṇaṃ uppajji ‘‘ito sattamadivasamatthake kālaṃkatvā ākiñcaññāyatane nibbatto’’ti. Mahājāniyoti sattadivasabbhantare pattabbamaggaphalato parihīnattā mahatī jāni assāti mahājāniyo akkhaṇe nibbattattā. Abhidosakālaṃkatoti hiyyo kālaṃkato, sopi nevasaññānāsaññāyatane nibbattoti addasa. Bahūkārāti bahūpakārā. Padhānapahitattaṃ upaṭṭhahiṃsūti padhānatthāya pesitattabhāvaṃ mukhodakadānādinā upaṭṭhahiṃsu.
11. அந்தரா ச க³யங் அந்தரா ச போ³தி⁴ந்தி உபகோ போ³தி⁴மண்ட³ஸ்ஸ ச க³யாய ச அந்தரே ப⁴க³வந்தங் அத்³த³ஸ. அத்³தா⁴னமக்³க³ப்படிபன்னந்தி அத்³தா⁴னமக்³க³ங் படிபன்னங்.
11.Antarā ca gayaṃ antarā ca bodhinti upako bodhimaṇḍassa ca gayāya ca antare bhagavantaṃ addasa. Addhānamaggappaṭipannanti addhānamaggaṃ paṭipannaṃ.
ஸப்³பா³பி⁴பூ⁴தி ஸப்³ப³ங் தேபூ⁴மகத⁴ம்மங் அபி⁴ப⁴வித்வா டி²தோ. ஸப்³ப³விதூ³தி ஸப்³ப³ங் சதுபூ⁴மகத⁴ம்மங் அவேதி³ங் அஞ்ஞாஸிங். ஸப்³பே³ஸு த⁴ம்மேஸு அனூபலித்தோதி ஸப்³பே³ஸு தேபூ⁴மகத⁴ம்மேஸு கிலேஸலேபேன அலித்தோ. ஸப்³ப³ஞ்ஜஹோதி ஸப்³ப³ங் தேபூ⁴மகத⁴ம்மங் ஜஹித்வா டி²தோ. தண்ஹக்க²யே விமுத்தோதி தண்ஹக்க²யே நிப்³பா³னே ஆரம்மணதோ விமுத்தோ. ஸயங் அபி⁴ஞ்ஞாயாதி ஸப்³ப³ங் சதுபூ⁴மகத⁴ம்மங் அத்தனாவ ஜானித்வா. கமுத்³தி³ஸெய்யந்தி கங் அஞ்ஞங் ‘‘அயங் மே ஆசரியோ’’தி உத்³தி³ஸெய்யங்.
Sabbābhibhūti sabbaṃ tebhūmakadhammaṃ abhibhavitvā ṭhito. Sabbavidūti sabbaṃ catubhūmakadhammaṃ avediṃ aññāsiṃ. Sabbesu dhammesu anūpalittoti sabbesu tebhūmakadhammesu kilesalepena alitto. Sabbañjahoti sabbaṃ tebhūmakadhammaṃ jahitvā ṭhito. Taṇhakkhaye vimuttoti taṇhakkhaye nibbāne ārammaṇato vimutto. Sayaṃ abhiññāyāti sabbaṃ catubhūmakadhammaṃ attanāva jānitvā. Kamuddiseyyanti kaṃ aññaṃ ‘‘ayaṃ me ācariyo’’ti uddiseyyaṃ.
ந மே ஆசரியோ அத்தீ²தி லோகுத்தரத⁴ம்மே மய்ஹங் ஆசரியோ நாம நத்தி². நத்தி² மே படிபுக்³க³லோதி மய்ஹங் படிபா⁴க³புக்³க³லோ நாம நத்தி². ஸீதிபூ⁴தோதி ஸப்³ப³கிலேஸக்³கி³னிப்³பா³பனேன ஸீதிபூ⁴தோ. கிலேஸானங்யேவ நிப்³பு³தத்தா நிப்³பு³தோ.
Na me ācariyo atthīti lokuttaradhamme mayhaṃ ācariyo nāma natthi. Natthi me paṭipuggaloti mayhaṃ paṭibhāgapuggalo nāma natthi. Sītibhūtoti sabbakilesagginibbāpanena sītibhūto. Kilesānaṃyeva nibbutattā nibbuto.
காஸீனங் புரந்தி காஸிரட்டே² நக³ரங். ஆஹஞ்ச²ங் அமதது³ந்து³பி⁴ந்தி த⁴ம்மசக்கப்படிலாபா⁴ய அமதபே⁴ரிங் பஹரிஸ்ஸாமீதி க³ச்சா²மி.
Kāsīnaṃpuranti kāsiraṭṭhe nagaraṃ. Āhañchaṃ amatadundubhinti dhammacakkappaṭilābhāya amatabheriṃ paharissāmīti gacchāmi.
அரஹஸி அனந்தஜினோதி அனந்தஜினோ ப⁴விதுங் யுத்தோ. ஹுபெய்யபாவுஸோதி ஆவுஸோ ஏவம்பி நாம ப⁴வெய்ய. ஸீஸங் ஓகம்பெத்வாதி ஸீஸங் சாலெத்வா.
Arahasi anantajinoti anantajino bhavituṃ yutto. Hupeyyapāvusoti āvuso evampi nāma bhaveyya. Sīsaṃ okampetvāti sīsaṃ cāletvā.
12. ஸண்ட²பேஸுந்தி கதிகங் அகங்ஸு. பா³ஹுல்லிகோதி சீவரபா³ஹுல்லாதீ³னங் அத்தா²ய படிபன்னோ. பதா⁴னவிப்³ப⁴ந்தோதி பதா⁴னதோ விப்³ப⁴ந்தோ ப⁴ட்டோ² பரிஹீனோ. ஆவத்தோ பா³ஹுல்லாயாதி சீவராதி³ப³ஹுலபா⁴வத்தா²ய ஆவத்தோ. ஓத³ஹத² பி⁴க்க²வே ஸோதந்தி உபனேத² பி⁴க்க²வே ஸோதங்; ஸோதிந்த்³ரியங் த⁴ம்மஸவனத்த²ங் அபி⁴முக²ங் கரோதா²தி அத்தோ². அமதமதி⁴க³தந்தி அமதங் நிப்³பா³னங் மயா அதி⁴க³தந்தி த³ஸ்ஸேதி. இரியாயாதி து³க்கரஇரியாய. படிபதா³யாதி து³க்கரபடிபதா³ய. அபி⁴ஜானாத² மே நோதி அபி⁴ஜானாத² நு மே ஸமனுபஸ்ஸத². ஏவரூபங் பா⁴ஸிதமேதந்தி ஏதங் ஏவரூபங் வாக்யங் பா⁴ஸிதந்தி அத்தோ². அஸக்கி² கோ² ப⁴க³வா பஞ்சவக்³கி³யே பி⁴க்கூ² ஸஞ்ஞாபேதுந்தி ‘‘அஹங் பு³த்³தோ⁴’’தி ஜானாபேதுங் அஸக்கி².
12.Saṇṭhapesunti katikaṃ akaṃsu. Bāhullikoti cīvarabāhullādīnaṃ atthāya paṭipanno. Padhānavibbhantoti padhānato vibbhanto bhaṭṭho parihīno. Āvatto bāhullāyāti cīvarādibahulabhāvatthāya āvatto. Odahatha bhikkhave sotanti upanetha bhikkhave sotaṃ; sotindriyaṃ dhammasavanatthaṃ abhimukhaṃ karothāti attho. Amatamadhigatanti amataṃ nibbānaṃ mayā adhigatanti dasseti. Iriyāyāti dukkarairiyāya. Paṭipadāyāti dukkarapaṭipadāya. Abhijānātha me noti abhijānātha nu me samanupassatha. Evarūpaṃ bhāsitametanti etaṃ evarūpaṃ vākyaṃ bhāsitanti attho. Asakkhi kho bhagavā pañcavaggiye bhikkhū saññāpetunti ‘‘ahaṃ buddho’’ti jānāpetuṃ asakkhi.
13. சக்கு²கரணீதி பஞ்ஞாசக்கு²ங் ஸந்தா⁴யாஹ. இதோ பரங் ஸப்³ப³ங் பத³த்த²தோ உத்தானமேவ. அதி⁴ப்பாயானுஸந்தி⁴யோஜனாதி³பே⁴த³தோ பன பபஞ்சஸூத³னியா மஜ்ஜி²மட்ட²கதா²யங் வுத்தனயேன வேதி³தப்³ப³ங். இதோ பட்டா²ய ஹி அதிவித்தா²ரபீ⁴ருகஸ்ஸ மஹாஜனஸ்ஸ சித்தங் அனுரக்க²ந்தா ஸுத்தந்தகத²ங் அவண்ணயித்வா வினயகத²ங்யேவ வண்ணயிஸ்ஸாம.
13.Cakkhukaraṇīti paññācakkhuṃ sandhāyāha. Ito paraṃ sabbaṃ padatthato uttānameva. Adhippāyānusandhiyojanādibhedato pana papañcasūdaniyā majjhimaṭṭhakathāyaṃ vuttanayena veditabbaṃ. Ito paṭṭhāya hi ativitthārabhīrukassa mahājanassa cittaṃ anurakkhantā suttantakathaṃ avaṇṇayitvā vinayakathaṃyeva vaṇṇayissāma.
18. ஸாவ தஸ்ஸ ஆயஸ்மதோ உபஸம்பதா³ அஹோஸீதி ஆஸாள்ஹீபுண்ணமாய அட்டா²ரஸஹி தே³வதாகோடீஹி ஸத்³தி⁴ங் ஸோதாபத்திப²லே பதிட்டி²தஸ்ஸ ‘‘ஏஹி பி⁴க்கூ²’’தி ப⁴க³வதோ வசனேன அபி⁴னிப்ப²ன்னா ஸாவ தஸ்ஸ ஆயஸ்மதோ ஏஹிபி⁴க்கூ²பஸம்பதா³ அஹோஸி.
18.Sāva tassa āyasmato upasampadā ahosīti āsāḷhīpuṇṇamāya aṭṭhārasahi devatākoṭīhi saddhiṃ sotāpattiphale patiṭṭhitassa ‘‘ehi bhikkhū’’ti bhagavato vacanena abhinipphannā sāva tassa āyasmato ehibhikkhūpasampadā ahosi.
19. அத² கோ² ஆயஸ்மதோ ச வப்பஸ்ஸாதி ஆதி³ம்ஹி வப்பத்தே²ரஸ்ஸ பாடிபத³தி³வஸே த⁴ம்மசக்கு²ங் உத³பாதி³, ப⁴த்³தி³யத்தே²ரஸ்ஸ து³தியதி³வஸே, மஹானாமத்தே²ரஸ்ஸ ததியதி³வஸே, அஸ்ஸஜித்தே²ரஸ்ஸ சதுத்தி²யந்தி. இமேஸஞ்ச பன பி⁴க்கூ²னங் கம்மட்டா²னேஸு உப்பன்னமலவிஸோத⁴னத்த²ங் ப⁴க³வா அந்தோவிஹாரேயேவ அஹோஸி. உப்பன்னே உப்பன்னே கம்மட்டா²னமலே ஆகாஸேன க³ந்த்வா மலங் வினோதே³ஸி. பக்க²ஸ்ஸ பன பஞ்சமியங் ஸப்³பே³ தே ஏகதோ ஸன்னிபாதெத்வா அனத்தஸுத்தேன ஓவதி³. தேன வுத்தங் ‘‘அத² கோ² ப⁴க³வா பஞ்சவக்³கி³யே’’திஆதி³.
19.Atha kho āyasmato ca vappassāti ādimhi vappattherassa pāṭipadadivase dhammacakkhuṃ udapādi, bhaddiyattherassa dutiyadivase, mahānāmattherassa tatiyadivase, assajittherassa catutthiyanti. Imesañca pana bhikkhūnaṃ kammaṭṭhānesu uppannamalavisodhanatthaṃ bhagavā antovihāreyeva ahosi. Uppanne uppanne kammaṭṭhānamale ākāsena gantvā malaṃ vinodesi. Pakkhassa pana pañcamiyaṃ sabbe te ekato sannipātetvā anattasuttena ovadi. Tena vuttaṃ ‘‘atha kho bhagavā pañcavaggiye’’tiādi.
24. தேன கோ² பன ஸமயேன ச² லோகே அரஹந்தோ ஹொந்தீதி பஞ்சமியா பக்க²ஸ்ஸ லோகஸ்மிங் ச² மனுஸ்ஸா அரஹந்தோ ஹொந்தீதி அத்தோ².
24.Tenakho pana samayena cha loke arahanto hontīti pañcamiyā pakkhassa lokasmiṃ cha manussā arahanto hontīti attho.
பஞ்சவக்³கி³யகதா² நிட்டி²தா.
Pañcavaggiyakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 6. பஞ்சவக்³கி³யகதா² • 6. Pañcavaggiyakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
பஞ்சவக்³கி³யகதா²வண்ணனா • Pañcavaggiyakathāvaṇṇanā
த⁴ம்மசக்கப்பவத்தனஸுத்தவண்ணனா • Dhammacakkappavattanasuttavaṇṇanā
அனத்தலக்க²ணஸுத்தவண்ணனா • Anattalakkhaṇasuttavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பஞ்சவக்³கி³யகதா²வண்ணனா • Pañcavaggiyakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஞ்சவக்³கி³யகதா²வண்ணனா • Pañcavaggiyakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. பஞ்சவக்³கி³யகதா² • 6. Pañcavaggiyakathā
