| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
পঞ্চৰগ্গিযকথা
Pañcavaggiyakathā
১০. পণ্ডিতোতি পণ্ডিচ্চেন সমন্নাগতো। ব্যত্তোতি ৰেয্যত্তিযেন সমন্নাগতো। মেধাৰীতি ঠানুপ্পত্তিযা পঞ্ঞায সমন্নাগতো। অপ্পরজক্খজাতিকোতি সমাপত্তিযা ৰিক্খম্ভিতত্তা নিক্কিলেসজাতিকো ৰিসুদ্ধসত্তো। আজানিস্সতীতি সল্লক্খেস্সতি পটিৰিজ্ঝিস্সতি। ভগৰতোপি খো ঞাণং উদপাদীতি সব্বঞ্ঞুতঞ্ঞাণং উপ্পজ্জি ‘‘ইতো সত্তমদিৰসমত্থকে কালংকত্ৰা আকিঞ্চঞ্ঞাযতনে নিব্বত্তো’’তি। মহাজানিযোতি সত্তদিৰসব্ভন্তরে পত্তব্বমগ্গফলতো পরিহীনত্তা মহতী জানি অস্সাতি মহাজানিযো অক্খণে নিব্বত্তত্তা। অভিদোসকালংকতোতি হিয্যো কালংকতো, সোপি নেৰসঞ্ঞানাসঞ্ঞাযতনে নিব্বত্তোতি অদ্দস। বহূকারাতি বহূপকারা। পধানপহিতত্তং উপট্ঠহিংসূতি পধানত্থায পেসিতত্তভাৰং মুখোদকদানাদিনা উপট্ঠহিংসু।
10.Paṇḍitoti paṇḍiccena samannāgato. Byattoti veyyattiyena samannāgato. Medhāvīti ṭhānuppattiyā paññāya samannāgato. Apparajakkhajātikoti samāpattiyā vikkhambhitattā nikkilesajātiko visuddhasatto. Ājānissatīti sallakkhessati paṭivijjhissati. Bhagavatopi kho ñāṇaṃ udapādīti sabbaññutaññāṇaṃ uppajji ‘‘ito sattamadivasamatthake kālaṃkatvā ākiñcaññāyatane nibbatto’’ti. Mahājāniyoti sattadivasabbhantare pattabbamaggaphalato parihīnattā mahatī jāni assāti mahājāniyo akkhaṇe nibbattattā. Abhidosakālaṃkatoti hiyyo kālaṃkato, sopi nevasaññānāsaññāyatane nibbattoti addasa. Bahūkārāti bahūpakārā. Padhānapahitattaṃ upaṭṭhahiṃsūti padhānatthāya pesitattabhāvaṃ mukhodakadānādinā upaṭṭhahiṃsu.
১১. অন্তরা চ গযং অন্তরা চ বোধিন্তি উপকো বোধিমণ্ডস্স চ গযায চ অন্তরে ভগৰন্তং অদ্দস। অদ্ধানমগ্গপ্পটিপন্নন্তি অদ্ধানমগ্গং পটিপন্নং।
11.Antarā ca gayaṃ antarā ca bodhinti upako bodhimaṇḍassa ca gayāya ca antare bhagavantaṃ addasa. Addhānamaggappaṭipannanti addhānamaggaṃ paṭipannaṃ.
সব্বাভিভূতি সব্বং তেভূমকধম্মং অভিভৰিত্ৰা ঠিতো। সব্বৰিদূতি সব্বং চতুভূমকধম্মং অৰেদিং অঞ্ঞাসিং। সব্বেসু ধম্মেসু অনূপলিত্তোতি সব্বেসু তেভূমকধম্মেসু কিলেসলেপেন অলিত্তো। সব্বঞ্জহোতি সব্বং তেভূমকধম্মং জহিত্ৰা ঠিতো। তণ্হক্খযে ৰিমুত্তোতি তণ্হক্খযে নিব্বানে আরম্মণতো ৰিমুত্তো। সযং অভিঞ্ঞাযাতি সব্বং চতুভূমকধম্মং অত্তনাৰ জানিত্ৰা। কমুদ্দিসেয্যন্তি কং অঞ্ঞং ‘‘অযং মে আচরিযো’’তি উদ্দিসেয্যং।
Sabbābhibhūti sabbaṃ tebhūmakadhammaṃ abhibhavitvā ṭhito. Sabbavidūti sabbaṃ catubhūmakadhammaṃ avediṃ aññāsiṃ. Sabbesu dhammesu anūpalittoti sabbesu tebhūmakadhammesu kilesalepena alitto. Sabbañjahoti sabbaṃ tebhūmakadhammaṃ jahitvā ṭhito. Taṇhakkhaye vimuttoti taṇhakkhaye nibbāne ārammaṇato vimutto. Sayaṃ abhiññāyāti sabbaṃ catubhūmakadhammaṃ attanāva jānitvā. Kamuddiseyyanti kaṃ aññaṃ ‘‘ayaṃ me ācariyo’’ti uddiseyyaṃ.
ন মে আচরিযো অত্থীতি লোকুত্তরধম্মে ময্হং আচরিযো নাম নত্থি। নত্থি মে পটিপুগ্গলোতি ময্হং পটিভাগপুগ্গলো নাম নত্থি। সীতিভূতোতি সব্বকিলেসগ্গিনিব্বাপনেন সীতিভূতো। কিলেসানংযেৰ নিব্বুতত্তা নিব্বুতো।
Na me ācariyo atthīti lokuttaradhamme mayhaṃ ācariyo nāma natthi. Natthi me paṭipuggaloti mayhaṃ paṭibhāgapuggalo nāma natthi. Sītibhūtoti sabbakilesagginibbāpanena sītibhūto. Kilesānaṃyeva nibbutattā nibbuto.
কাসীনং পুরন্তি কাসিরট্ঠে নগরং। আহঞ্ছং অমতদুন্দুভিন্তি ধম্মচক্কপ্পটিলাভায অমতভেরিং পহরিস্সামীতি গচ্ছামি।
Kāsīnaṃpuranti kāsiraṭṭhe nagaraṃ. Āhañchaṃ amatadundubhinti dhammacakkappaṭilābhāya amatabheriṃ paharissāmīti gacchāmi.
অরহসি অনন্তজিনোতি অনন্তজিনো ভৰিতুং যুত্তো। হুপেয্যপাৰুসোতি আৰুসো এৰম্পি নাম ভৰেয্য। সীসং ওকম্পেত্ৰাতি সীসং চালেত্ৰা।
Arahasi anantajinoti anantajino bhavituṃ yutto. Hupeyyapāvusoti āvuso evampi nāma bhaveyya. Sīsaṃ okampetvāti sīsaṃ cāletvā.
১২. সণ্ঠপেসুন্তি কতিকং অকংসু। বাহুল্লিকোতি চীৰরবাহুল্লাদীনং অত্থায পটিপন্নো। পধানৰিব্ভন্তোতি পধানতো ৰিব্ভন্তো ভট্ঠো পরিহীনো। আৰত্তো বাহুল্লাযাতি চীৰরাদিবহুলভাৰত্থায আৰত্তো। ওদহথ ভিক্খৰে সোতন্তি উপনেথ ভিক্খৰে সোতং; সোতিন্দ্রিযং ধম্মসৰনত্থং অভিমুখং করোথাতি অত্থো। অমতমধিগতন্তি অমতং নিব্বানং মযা অধিগতন্তি দস্সেতি। ইরিযাযাতি দুক্করইরিযায। পটিপদাযাতি দুক্করপটিপদায। অভিজানাথ মে নোতি অভিজানাথ নু মে সমনুপস্সথ। এৰরূপং ভাসিতমেতন্তি এতং এৰরূপং ৰাক্যং ভাসিতন্তি অত্থো। অসক্খি খো ভগৰা পঞ্চৰগ্গিযে ভিক্খূ সঞ্ঞাপেতুন্তি ‘‘অহং বুদ্ধো’’তি জানাপেতুং অসক্খি।
12.Saṇṭhapesunti katikaṃ akaṃsu. Bāhullikoti cīvarabāhullādīnaṃ atthāya paṭipanno. Padhānavibbhantoti padhānato vibbhanto bhaṭṭho parihīno. Āvatto bāhullāyāti cīvarādibahulabhāvatthāya āvatto. Odahatha bhikkhave sotanti upanetha bhikkhave sotaṃ; sotindriyaṃ dhammasavanatthaṃ abhimukhaṃ karothāti attho. Amatamadhigatanti amataṃ nibbānaṃ mayā adhigatanti dasseti. Iriyāyāti dukkarairiyāya. Paṭipadāyāti dukkarapaṭipadāya. Abhijānātha me noti abhijānātha nu me samanupassatha. Evarūpaṃ bhāsitametanti etaṃ evarūpaṃ vākyaṃ bhāsitanti attho. Asakkhi kho bhagavā pañcavaggiye bhikkhū saññāpetunti ‘‘ahaṃ buddho’’ti jānāpetuṃ asakkhi.
১৩. চক্খুকরণীতি পঞ্ঞাচক্খুং সন্ধাযাহ। ইতো পরং সব্বং পদত্থতো উত্তানমেৰ। অধিপ্পাযানুসন্ধিযোজনাদিভেদতো পন পপঞ্চসূদনিযা মজ্ঝিমট্ঠকথাযং ৰুত্তনযেন ৰেদিতব্বং। ইতো পট্ঠায হি অতিৰিত্থারভীরুকস্স মহাজনস্স চিত্তং অনুরক্খন্তা সুত্তন্তকথং অৰণ্ণযিত্ৰা ৰিনযকথংযেৰ ৰণ্ণযিস্সাম।
13.Cakkhukaraṇīti paññācakkhuṃ sandhāyāha. Ito paraṃ sabbaṃ padatthato uttānameva. Adhippāyānusandhiyojanādibhedato pana papañcasūdaniyā majjhimaṭṭhakathāyaṃ vuttanayena veditabbaṃ. Ito paṭṭhāya hi ativitthārabhīrukassa mahājanassa cittaṃ anurakkhantā suttantakathaṃ avaṇṇayitvā vinayakathaṃyeva vaṇṇayissāma.
১৮. সাৰ তস্স আযস্মতো উপসম্পদা অহোসীতি আসাল়্হীপুণ্ণমায অট্ঠারসহি দেৰতাকোটীহি সদ্ধিং সোতাপত্তিফলে পতিট্ঠিতস্স ‘‘এহি ভিক্খূ’’তি ভগৰতো ৰচনেন অভিনিপ্ফন্না সাৰ তস্স আযস্মতো এহিভিক্খূপসম্পদা অহোসি।
18.Sāva tassa āyasmato upasampadā ahosīti āsāḷhīpuṇṇamāya aṭṭhārasahi devatākoṭīhi saddhiṃ sotāpattiphale patiṭṭhitassa ‘‘ehi bhikkhū’’ti bhagavato vacanena abhinipphannā sāva tassa āyasmato ehibhikkhūpasampadā ahosi.
১৯. অথ খো আযস্মতো চ ৰপ্পস্সাতি আদিম্হি ৰপ্পত্থেরস্স পাটিপদদিৰসে ধম্মচক্খুং উদপাদি, ভদ্দিযত্থেরস্স দুতিযদিৰসে, মহানামত্থেরস্স ততিযদিৰসে, অস্সজিত্থেরস্স চতুত্থিযন্তি। ইমেসঞ্চ পন ভিক্খূনং কম্মট্ঠানেসু উপ্পন্নমলৰিসোধনত্থং ভগৰা অন্তোৰিহারেযেৰ অহোসি। উপ্পন্নে উপ্পন্নে কম্মট্ঠানমলে আকাসেন গন্ত্ৰা মলং ৰিনোদেসি। পক্খস্স পন পঞ্চমিযং সব্বে তে একতো সন্নিপাতেত্ৰা অনত্তসুত্তেন ওৰদি। তেন ৰুত্তং ‘‘অথ খো ভগৰা পঞ্চৰগ্গিযে’’তিআদি।
19.Atha kho āyasmato ca vappassāti ādimhi vappattherassa pāṭipadadivase dhammacakkhuṃ udapādi, bhaddiyattherassa dutiyadivase, mahānāmattherassa tatiyadivase, assajittherassa catutthiyanti. Imesañca pana bhikkhūnaṃ kammaṭṭhānesu uppannamalavisodhanatthaṃ bhagavā antovihāreyeva ahosi. Uppanne uppanne kammaṭṭhānamale ākāsena gantvā malaṃ vinodesi. Pakkhassa pana pañcamiyaṃ sabbe te ekato sannipātetvā anattasuttena ovadi. Tena vuttaṃ ‘‘atha kho bhagavā pañcavaggiye’’tiādi.
২৪. তেন খো পন সমযেন ছ লোকে অরহন্তো হোন্তীতি পঞ্চমিযা পক্খস্স লোকস্মিং ছ মনুস্সা অরহন্তো হোন্তীতি অত্থো।
24.Tenakho pana samayena cha loke arahanto hontīti pañcamiyā pakkhassa lokasmiṃ cha manussā arahanto hontīti attho.
পঞ্চৰগ্গিযকথা নিট্ঠিতা।
Pañcavaggiyakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৬. পঞ্চৰগ্গিযকথা • 6. Pañcavaggiyakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
পঞ্চৰগ্গিযকথাৰণ্ণনা • Pañcavaggiyakathāvaṇṇanā
ধম্মচক্কপ্পৰত্তনসুত্তৰণ্ণনা • Dhammacakkappavattanasuttavaṇṇanā
অনত্তলক্খণসুত্তৰণ্ণনা • Anattalakkhaṇasuttavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পঞ্চৰগ্গিযকথাৰণ্ণনা • Pañcavaggiyakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পঞ্চৰগ্গিযকথাৰণ্ণনা • Pañcavaggiyakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৬. পঞ্চৰগ্গিযকথা • 6. Pañcavaggiyakathā
