| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பஞ்சவக்³கி³யகதா²வண்ணனா
Pañcavaggiyakathāvaṇṇanā
10. ஆளாரோதி நாமங். காலாமோதி கொ³த்தங். ப⁴க³வதோபி கோ² ஞாணங் உத³பாதீ³தி கிங் இதா³னேவ உத³பாதி³, நனு போ³தி⁴மூலே தேகாலிகா, காலவினிமுத்தா ச ஸப்³பே³ த⁴ம்மா ஸப்³பா³காரதோ தி³ட்டா²தி? ஸச்சங் தி³ட்டா², ததா²பி நாமாதி³வஸேன அவிகப்பிதா ஏகசித்தக்க²ணிகத்தா ஸப்³ப³ஞ்ஞுதஞ்ஞாணஸ்ஸ. ந ஹி ஏகேன சித்தேன ஸப்³ப³த⁴ம்மானங் நாமஜாதிஆதி³கங் பச்சேகங் அனந்தங் விபா⁴க³ங் விகப்பேதுங் ஸக்கா விகப்பானங் விருத்³தா⁴னங் ஸஹானுப்பத்திதோ, ஸப்³ப³விகப்பாரஹத⁴ம்மத³ஸ்ஸனமேவ பனானேன ஸக்கா காதுங். யதா² தி³ட்டே²ஸு பன யதி²ச்சி²தாகாரங் ஆரப்³ப⁴ விகப்போ உப்பஜ்ஜதி சக்கு²விஞ்ஞாணேன தி³ட்டே² சித்தபடே விய. இதா⁴பி ஆளாரங் நிஸ்ஸாய ஆவஜ்ஜனானந்தரமேவ ஸப்³பா³காரஞாணங் உத³பாதி³. ந கேவலஞ்ச தங், அத² கோ² பஞ்சவக்³கி³யா ஏவ பட²மங் த⁴ம்மங் ஜானிஸ்ஸந்தி, தப்பமுகா² ச தே³வதா, ஆளாரோ காலங் கத்வா ஆகிஞ்சஞ்ஞாயதனே, உத³கோ ச நேவஸஞ்ஞானாஸஞ்ஞாயதனே நிப்³ப³த்தோதி ஏவமாதி³கங் ஸப்³ப³ம்பி நிஸ்ஸாய ஞாணங் உப்பஜ்ஜதி ஏவ. தங் பன க²ணஸம்பத்தியா து³ல்லப⁴பா⁴வங் த³ஸ்ஸேதுங் கமேன ஓலோகெத்வா தே³வதாய வுத்தே ஞாணங் விய கத்வா வுத்தங். ஸத்³த³க³தியா ஹி ப³ந்த⁴த்தா ஏகேன ஞாணேன ஞாதம்பி வுச்சமானங் கமேன ஞாதங் விய படிபா⁴தி, தே³வதாபி ச ப⁴க³வதா ஞாதமேவத்த²ங் ஆரோசேஸி. தேனேவ ‘‘ப⁴க³வதோபி கோ² ஞாணங் உத³பாதீ³’’தி வுத்தந்தி த³ட்ட²ப்³ப³ங். ஏவமஞ்ஞத்தா²பி ஈதி³ஸேஸு ‘‘லோகங் வோலோகெந்தோ அஸுகங் அத்³த³ஸ, தத்த² மயி க³தே கிங் ப⁴விஸ்ஸதீ’’தி ஏவமாதி³னா ஸத்து² ஹிதேஸிதாஸந்த³ஸ்ஸனவஸப்பவத்தேஸு. ஸப்³ப³த்த² வசனக³தியங் கமவுத்திதே பஞ்ஞாயமானேபி ஏகேனேவ ஞாணேன ஸகலாவபோ³தோ⁴ வேதி³தப்³போ³. ப³ஹுகாரா கோ² மே பஞ்சவக்³கி³யாதி உபகாரஸ்ஸாபி விஜ்ஜமானதங் ஸந்தா⁴ய வுத்தங், ந பன த⁴ம்மதே³ஸனாய காரணத்தேன அனுபகாரானம்பி தே³ஸனதோ.
10.Āḷāroti nāmaṃ. Kālāmoti gottaṃ. Bhagavatopi kho ñāṇaṃ udapādīti kiṃ idāneva udapādi, nanu bodhimūle tekālikā, kālavinimuttā ca sabbe dhammā sabbākārato diṭṭhāti? Saccaṃ diṭṭhā, tathāpi nāmādivasena avikappitā ekacittakkhaṇikattā sabbaññutaññāṇassa. Na hi ekena cittena sabbadhammānaṃ nāmajātiādikaṃ paccekaṃ anantaṃ vibhāgaṃ vikappetuṃ sakkā vikappānaṃ viruddhānaṃ sahānuppattito, sabbavikappārahadhammadassanameva panānena sakkā kātuṃ. Yathā diṭṭhesu pana yathicchitākāraṃ ārabbha vikappo uppajjati cakkhuviññāṇena diṭṭhe cittapaṭe viya. Idhāpi āḷāraṃ nissāya āvajjanānantarameva sabbākārañāṇaṃ udapādi. Na kevalañca taṃ, atha kho pañcavaggiyā eva paṭhamaṃ dhammaṃ jānissanti, tappamukhā ca devatā, āḷāro kālaṃ katvā ākiñcaññāyatane, udako ca nevasaññānāsaññāyatane nibbattoti evamādikaṃ sabbampi nissāya ñāṇaṃ uppajjati eva. Taṃ pana khaṇasampattiyā dullabhabhāvaṃ dassetuṃ kamena oloketvā devatāya vutte ñāṇaṃ viya katvā vuttaṃ. Saddagatiyā hi bandhattā ekena ñāṇena ñātampi vuccamānaṃ kamena ñātaṃ viya paṭibhāti, devatāpi ca bhagavatā ñātamevatthaṃ ārocesi. Teneva ‘‘bhagavatopi kho ñāṇaṃ udapādī’’ti vuttanti daṭṭhabbaṃ. Evamaññatthāpi īdisesu ‘‘lokaṃ volokento asukaṃ addasa, tattha mayi gate kiṃ bhavissatī’’ti evamādinā satthu hitesitāsandassanavasappavattesu. Sabbattha vacanagatiyaṃ kamavuttite paññāyamānepi ekeneva ñāṇena sakalāvabodho veditabbo. Bahukārā kho me pañcavaggiyāti upakārassāpi vijjamānataṃ sandhāya vuttaṃ, na pana dhammadesanāya kāraṇattena anupakārānampi desanato.
11. அந்தரா ச க³யங் அந்தரா ச போ³தி⁴ந்தி க³யாய, போ³தி⁴ஸ்ஸ ச அந்தரே திகா³வுதே டா²னே.
11.Antarā ca gayaṃ antarā ca bodhinti gayāya, bodhissa ca antare tigāvute ṭhāne.
ஸப்³பா³பி⁴பூ⁴தி ஸப்³ப³ங் தேபூ⁴மகத⁴ம்மங் அபி⁴ப⁴வித்வா டி²தோ. அனூபலித்தோதி கிலேஸலேபேன அலித்தோ. ததோ ஏவ ஸப்³ப³ஞ்ஜஹோ. தண்ஹக்க²யே விமுத்தோதி தண்ஹக்க²யே நிப்³பா³னே ஆரம்மணகரணவஸஏன விமுத்தோ. ஏவங் ஸயங் ஸப்³ப³த⁴ம்மே அத்தனாவ ஜானித்வா. கமுத்³தி³ஸெய்யந்தி கங் அஞ்ஞங் ‘‘அயங் மே ஆசரியோ’’தி உத்³தி³ஸெய்யங்.
Sabbābhibhūti sabbaṃ tebhūmakadhammaṃ abhibhavitvā ṭhito. Anūpalittoti kilesalepena alitto. Tato eva sabbañjaho. Taṇhakkhaye vimuttoti taṇhakkhaye nibbāne ārammaṇakaraṇavasaena vimutto. Evaṃ sayaṃ sabbadhamme attanāva jānitvā. Kamuddiseyyanti kaṃ aññaṃ ‘‘ayaṃ me ācariyo’’ti uddiseyyaṃ.
காஸினங் புரந்தி பா³ராணஸிங். ஆஹஞ்ச²ந்தி ஆஹனிஸ்ஸாமி. அமதாதி⁴க³மாய உக்³கோ⁴ஸனதோ அமதது³ந்து³பி⁴ந்தி ஸத்து² த⁴ம்மதே³ஸனா வுத்தா, ‘‘அமதபே⁴ரிங் பஹரிஸ்ஸாமீ’’தி க³ச்சா²மீதி அத்தோ².
Kāsinaṃ puranti bārāṇasiṃ. Āhañchanti āhanissāmi. Amatādhigamāya ugghosanato amatadundubhinti satthu dhammadesanā vuttā, ‘‘amatabheriṃ paharissāmī’’ti gacchāmīti attho.
அரஹஸி அனந்தஜினோதி அனந்தஜினோபி ப⁴விதுங் யுத்தோதி அத்தோ². அனந்தஞாணதாய அனந்தோ ஜினோ ச, அனந்தேன வா ஞாணேன, அனந்தங் வா தோ³ஸங் ஜிதவா, உப்பாத³வயந்தரஹிததாய வா அனந்தங் நிப்³பா³னங் அஜினி கிலேஸாரயோ மத்³தி³த்வா க³ண்ஹீதிபி அனந்தஜினோ.
Arahasi anantajinoti anantajinopi bhavituṃ yuttoti attho. Anantañāṇatāya ananto jino ca, anantena vā ñāṇena, anantaṃ vā dosaṃ jitavā, uppādavayantarahitatāya vā anantaṃ nibbānaṃ ajini kilesārayo madditvā gaṇhītipi anantajino.
ஹுபெய்யாபீதி ஏவம்பி ப⁴வெய்ய, ஏவங்விதே⁴ ரூபகாயரதனே ஈதி³ஸேன ஞாணேன ப⁴விதப்³ப³ந்தி அதி⁴ப்பாயோ. ஏவங் நாம கத²னஞ்ஹிஸ்ஸ உபனிஸ்ஸயஸம்பன்னஸ்ஸ அபரகாலே து³க்க²ப்பத்தஸ்ஸ ப⁴க³வந்தங் உபக³ம்ம பப்³ப³ஜித்வா மக்³க³ப²லபடிவேதா⁴ய பச்சயோ ஜாதோ. ததா²ஹேஸ ப⁴க³வா தேன ஸமாக³மத்த²ங் பத³ஸாவ மக்³க³ங் படிபஜ்ஜி.
Hupeyyāpīti evampi bhaveyya, evaṃvidhe rūpakāyaratane īdisena ñāṇena bhavitabbanti adhippāyo. Evaṃ nāma kathanañhissa upanissayasampannassa aparakāle dukkhappattassa bhagavantaṃ upagamma pabbajitvā maggaphalapaṭivedhāya paccayo jāto. Tathāhesa bhagavā tena samāgamatthaṃ padasāva maggaṃ paṭipajji.
12. பா³ஹுல்லிகோதி பச்சயபா³ஹுல்லிகோ. பதா⁴னவிப்³ப⁴ந்தோதி பதா⁴னதோ து³க்கரசரணதோ பரிஹீனோ. நத்தி² எத்த² அகா³ரியங், அகா³ரஸ்ஸ ஹிதங் கஸிகோ³ரக்கா²தி³கம்மந்தி அனகா³ரியா, பப்³ப³ஜ்ஜா, தங் அனகா³ரியங். பப்³ப³ஜந்தீதி உபக³ச்ச²ந்தி. தத³னுத்தரந்தி தங் அனுத்தரங். ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானங், அரஹத்தப²லந்தி அத்தோ². தஸ்ஸ ஹி அத்தா²ய குலபுத்தா பப்³ப³ஜந்தி. தி³ட்டே²வ த⁴ம்மேதி இமஸ்மிங் பச்சக்கே² அத்தபா⁴வே. ஸயந்தி அபரப்பச்சயா . அபி⁴ஞ்ஞா ஸச்சி²கத்வாதி அத்தனோவ ஞாணேன பச்சக்க²ங் கத்வா. உபஸம்பஜ்ஜாதி பாபுணித்வா.
12.Bāhullikoti paccayabāhulliko. Padhānavibbhantoti padhānato dukkaracaraṇato parihīno. Natthi ettha agāriyaṃ, agārassa hitaṃ kasigorakkhādikammanti anagāriyā, pabbajjā, taṃ anagāriyaṃ. Pabbajantīti upagacchanti. Tadanuttaranti taṃ anuttaraṃ. Brahmacariyapariyosānanti maggabrahmacariyassa pariyosānaṃ, arahattaphalanti attho. Tassa hi atthāya kulaputtā pabbajanti. Diṭṭheva dhammeti imasmiṃ paccakkhe attabhāve. Sayanti aparappaccayā . Abhiññā sacchikatvāti attanova ñāṇena paccakkhaṃ katvā. Upasampajjāti pāpuṇitvā.
இரியாயாதி து³க்கரஇரியாய. உத்தரிமனுஸ்ஸத⁴ம்மாதிஆதீ³ஸு மனுஸ்ஸத⁴ம்மதோ லோகியஞாணதோ உபரி அரியங் காதுங் அலங் ஸமத்தோ² அலமரியோ. ஞாணத³ஸ்ஸனவிஸேஸோதி ஸப்³ப³ஞ்ஞுதஞ்ஞாணஸ்ஸ புப்³ப³பா⁴க³ங் அதி⁴ப்பேதங். நோதி நு. பா⁴ஸிதமேதந்தி ஏவரூபமேதங் வாக்யபே⁴த³ந்தி அத்தோ². தே ச ‘‘யதி³ ஏஸ பதா⁴னகாலே ‘அஹங் அரஹா’தி வதெ³ய்ய, மயஞ்ச ஸத்³த³ஹாம, ந சானேன ததா³ வுத்தங். இதா³னி பன விஜ்ஜமானமேவ கு³ணங் வத³தீ’’தி ஏகபதே³ன ஸதிங் லபி⁴த்வா ‘‘பு³த்³தோ⁴ ஜாதோ’’தி உப்பன்னகா³ரவா ஆவுஸோவாத³ங் பஹாய ‘‘நோ ஹேதங், ப⁴ந்தே’’தி ஆஹங்ஸு. அஞ்ஞா சித்தந்தி அஞ்ஞாய அரஹத்தப்பத்தியா சித்தங்.
Iriyāyāti dukkarairiyāya. Uttarimanussadhammātiādīsu manussadhammato lokiyañāṇato upari ariyaṃ kātuṃ alaṃ samattho alamariyo. Ñāṇadassanavisesoti sabbaññutaññāṇassa pubbabhāgaṃ adhippetaṃ. Noti nu. Bhāsitametanti evarūpametaṃ vākyabhedanti attho. Te ca ‘‘yadi esa padhānakāle ‘ahaṃ arahā’ti vadeyya, mayañca saddahāma, na cānena tadā vuttaṃ. Idāni pana vijjamānameva guṇaṃ vadatī’’ti ekapadena satiṃ labhitvā ‘‘buddho jāto’’ti uppannagāravā āvusovādaṃ pahāya ‘‘no hetaṃ, bhante’’ti āhaṃsu. Aññā cittanti aññāya arahattappattiyā cittaṃ.
13. அந்தாதி கொட்டா²ஸா த்³வே பா⁴கா³. காமேஸு காமஸுக²ல்லிகானுயோகோ³தி வத்து²காமேஸு கிலேஸகாமஸுக²ஸ்ஸ அனுப⁴வோ. கிலேஸகாமா ஏவ வா ஆமிஸஸுகே²ன அல்லீயனதோ காமஸுக²ல்லிகாதி வுத்தாதி த³ட்ட²ப்³பா³. க³ம்மோதி கா³மவாஸீனங் ஸந்தகோ. அத்தகிலமதா²னுயோகோ³தி அத்தனோ கிலமத²ஸ்ஸ கண்டகஸெய்யாதி³து³க்க²ஸ்ஸ அனுயோகோ³. உபோ⁴ அந்தேதி யதா²வுத்தே லோபோ⁴ வா ஸஸ்ஸதோ வா ஏகோ அந்தோ, தோ³ஸோ வா உச்சே²தோ³ வா ஏகோதி வேதி³தப்³போ³.
13.Antāti koṭṭhāsā dve bhāgā. Kāmesu kāmasukhallikānuyogoti vatthukāmesu kilesakāmasukhassa anubhavo. Kilesakāmā eva vā āmisasukhena allīyanato kāmasukhallikāti vuttāti daṭṭhabbā. Gammoti gāmavāsīnaṃ santako. Attakilamathānuyogoti attano kilamathassa kaṇṭakaseyyādidukkhassa anuyogo. Ubho anteti yathāvutte lobho vā sassato vā eko anto, doso vā ucchedo vā ekoti veditabbo.
சக்கு²கரணீதிஆதீ³ஸு அத்தனா ஸம்பயுத்தஞாணசக்கு²ங் கரோதீதி சக்கு²கரணீ. து³தியங் தஸ்ஸேவ வேவசனங். உபஸமோதி கிலேஸுபஸமோ. அபி⁴ஞ்ஞா, ஸம்போ³தோ⁴ ச சதுஸச்சபடிவேதோ⁴வ. நிப்³பா³னங் அஸங்க²ததா⁴து. ஏதேஸம்பி அத்தா²ய ஸங்வத்ததீதி படிபத³ங் தோ²மேதி. ஸம்மாதி³ட்டீ²தி ஞாணங். ஸம்மாஸங்கப்போதி விதக்கோ. ஸேஸங் த⁴ம்மதோ ஸுவிஞ்ஞெய்யமேவ.
Cakkhukaraṇītiādīsu attanā sampayuttañāṇacakkhuṃ karotīti cakkhukaraṇī. Dutiyaṃ tasseva vevacanaṃ. Upasamoti kilesupasamo. Abhiññā, sambodho ca catusaccapaṭivedhova. Nibbānaṃ asaṅkhatadhātu. Etesampi atthāya saṃvattatīti paṭipadaṃ thometi. Sammādiṭṭhīti ñāṇaṃ. Sammāsaṅkappoti vitakko. Sesaṃ dhammato suviññeyyameva.
14. ஏவங் சத்தாரோபி மக்³கே³ ஏகதோ த³ஸ்ஸெத்வா இதா³னி தேஹி மக்³கே³ஹி படிவிஜ்ஜி²தப்³பா³னி சத்தாரி அரியஸச்சானி த³ஸ்ஸேதுங் ‘‘இத³ங் கோ² பன, பி⁴க்க²வே’’திஆதி³மாஹ. ஜாதிபி து³க்கா²திஆதீ³ஸு தத்த² தத்த² ப⁴வே நிப்³ப³த்தமானானங் ஸத்தானங் ஸப்³ப³பட²மங் ரூபாரூபத⁴ம்மப்பவத்தி இத⁴ ஜாதி நாம, ஸா ச தத்த² தத்த² ப⁴வேஸு உபலப்³ப⁴மானானங் து³க்கா²தீ³னங் வத்து²பா⁴வதோ து³க்கா², ஏவங் ஜராதீ³ஸு து³க்க²வத்து²கதாய து³க்க²தா வேதி³தப்³பா³. பஞ்சுபாதா³னக்க²ந்தா⁴ பன து³க்க²து³க்க²விபரிணாமது³க்க²ஸங்கா²ரது³க்க²வஸேன து³க்கா² ஏவ. போனோப⁴விகாதி புனப்³ப⁴வகரணங் புனப்³ப⁴வோ உத்தரபத³லோபேன, புனப்³ப⁴வோ ஸீலமேதிஸ்ஸாதி போனோப⁴விகா. நந்தி³ராக³ஸஹக³தாதி எத்த² ரூபாதீ³ஸு நந்த³தி பியாயதீதி நந்தீ³, ஸா ஏவ ராகோ³தி நந்தி³ராகோ³தி பா⁴வப்பதா⁴னோயங் நித்³தே³ஸோ, நந்தி³ராக³த்தந்தி அத்தோ². தேன ஸஹக³தானி நந்தி³ராக³ஸஹக³தா. தத்ர தத்ராதி தஸ்மிங் தஸ்மிங் ப⁴வே. ரூபாதீ³ஸு ச²ஸு ஆரம்மணேஸு காமஸ்ஸாத³னவஸேன பவத்தா காமதண்ஹா நாம. ஸஸ்ஸததி³ட்டி²யா ஸஹ பவத்தா ப⁴வதண்ஹா. உச்சே²த³தி³ட்டி²யா ஸஹ பவத்தா விப⁴வதண்ஹா. அஸேஸவிராக³னிரோதோ⁴திஆதி³னா நிப்³பா³னமேவ வுச்சதி. தத்த² விரஜ்ஜனங் விக³மனங் விராகோ³. நிருஜ்ஜ²னங் நிரோதோ⁴. உப⁴யேனாபி ஸுட்டு² விக³மோவ வுச்சதி. அஸேஸாயபி தண்ஹாய விராகோ³, நிரோதோ⁴ ச யேன ஹோதி, ஸோ அஸேஸவிராக³னிரோதோ⁴, நிப்³பா³னமேவ. யஸ்மா ச தங் ஆக³ம்ம தண்ஹங், வட்டஞ்ச சஜந்தி படினிஸ்ஸஜ்ஜந்தி விமுச்சந்தி ந அல்லீயந்தி, தஸ்மா சாகோ³ படினிஸ்ஸக்³கோ³ முத்தி அனாலயோதி வுச்சதி.
14. Evaṃ cattāropi magge ekato dassetvā idāni tehi maggehi paṭivijjhitabbāni cattāri ariyasaccāni dassetuṃ ‘‘idaṃ kho pana, bhikkhave’’tiādimāha. Jātipi dukkhātiādīsu tattha tattha bhave nibbattamānānaṃ sattānaṃ sabbapaṭhamaṃ rūpārūpadhammappavatti idha jāti nāma, sā ca tattha tattha bhavesu upalabbhamānānaṃ dukkhādīnaṃ vatthubhāvato dukkhā, evaṃ jarādīsu dukkhavatthukatāya dukkhatā veditabbā. Pañcupādānakkhandhā pana dukkhadukkhavipariṇāmadukkhasaṅkhāradukkhavasena dukkhā eva. Ponobhavikāti punabbhavakaraṇaṃ punabbhavo uttarapadalopena, punabbhavo sīlametissāti ponobhavikā. Nandirāgasahagatāti ettha rūpādīsu nandati piyāyatīti nandī, sā eva rāgoti nandirāgoti bhāvappadhānoyaṃ niddeso, nandirāgattanti attho. Tena sahagatāni nandirāgasahagatā. Tatra tatrāti tasmiṃ tasmiṃ bhave. Rūpādīsu chasu ārammaṇesu kāmassādanavasena pavattā kāmataṇhā nāma. Sassatadiṭṭhiyā saha pavattā bhavataṇhā. Ucchedadiṭṭhiyā saha pavattā vibhavataṇhā. Asesavirāganirodhotiādinā nibbānameva vuccati. Tattha virajjanaṃ vigamanaṃ virāgo. Nirujjhanaṃ nirodho. Ubhayenāpi suṭṭhu vigamova vuccati. Asesāyapi taṇhāya virāgo, nirodho ca yena hoti, so asesavirāganirodho, nibbānameva. Yasmā ca taṃ āgamma taṇhaṃ, vaṭṭañca cajanti paṭinissajjanti vimuccanti na allīyanti, tasmā cāgo paṭinissaggo mutti anālayoti vuccati.
15. சக்கு²ந்திஆதீ³னி ஞாணவேவசனானேவ.
15.Cakkhuntiādīni ñāṇavevacanāneva.
16. யாவகீவஞ்சாதி யத்தகங் காலங். திபரிவட்டந்தி ஸச்சஞாண, கிச்சஞாண, கதஞாணஸங்கா²தானங் திண்ணங் பரிவட்டானங் வஸேன திபரிவட்டங் ஞாணத³ஸ்ஸனங். எத்த² ச ‘‘இத³ங் து³க்க²ங் அரியஸச்சங், இத³ங் து³க்க²ஸமுத³ய’’ந்தி ஏவங் சதூஸு ஸச்சேஸு யதா²பூ⁴தஞாணங் ஸச்சஞாணங் நாம. தேஸு ஏவ ‘‘பரிஞ்ஞெய்யங் பஹாதப்³ப³ங் ஸச்சி²காதப்³ப³ங் பா⁴வேதப்³ப³’’ந்தி ஏவங் கத்தப்³ப³கிச்சஜானநஞாணங் கிச்சஞாணங் நாம. ‘‘பரிஞ்ஞாதங் பஹீனங் ஸச்சி²கதங் பா⁴வித’’ந்தி தஸ்ஸ கிச்சஸ்ஸ கதபா⁴வஜானநஞாணங் கதஞாணங் நாம. த்³வாத³ஸாகாரந்தி தேஸமேவ ஏகேகஸ்மிங் ஸச்சே திண்ணங் திண்ணங் ஆகாரானங் வஸேன த்³வாத³ஸாகாரங்.
16.Yāvakīvañcāti yattakaṃ kālaṃ. Tiparivaṭṭanti saccañāṇa, kiccañāṇa, katañāṇasaṅkhātānaṃ tiṇṇaṃ parivaṭṭānaṃ vasena tiparivaṭṭaṃ ñāṇadassanaṃ. Ettha ca ‘‘idaṃ dukkhaṃ ariyasaccaṃ, idaṃ dukkhasamudaya’’nti evaṃ catūsu saccesu yathābhūtañāṇaṃ saccañāṇaṃ nāma. Tesu eva ‘‘pariññeyyaṃ pahātabbaṃ sacchikātabbaṃ bhāvetabba’’nti evaṃ kattabbakiccajānanañāṇaṃ kiccañāṇaṃ nāma. ‘‘Pariññātaṃ pahīnaṃ sacchikataṃ bhāvita’’nti tassa kiccassa katabhāvajānanañāṇaṃ katañāṇaṃ nāma. Dvādasākāranti tesameva ekekasmiṃ sacce tiṇṇaṃ tiṇṇaṃ ākārānaṃ vasena dvādasākāraṃ.
அபி⁴ஸம்பு³த்³தோ⁴தி பச்சஞ்ஞாஸிந்தி அபி⁴ஸம்பு³த்³தோ⁴ அரஹத்தங் பத்தோதி ஏவங் ந படிஜானிங். யதோ ச கோ²தி யதோ போ³தி⁴மூலே நிஸின்னகாலதோ பட்டா²ய . அதா²ஹந்தி ததோ பரங் அஹங். ஞாணஞ்ச பன மேதி பச்சவெக்க²ணஞாணங் ஸந்தா⁴ய வத³தி. அகுப்பா மேதிஆதி³ தஸ்ஸ பவத்திஆகாரத³ஸ்ஸனங். தத்த² அகுப்பா மே விமுத்தீதி அரஹத்தப²லங் தஸ்ஸ மக்³க³ஸங்கா²தகாரணதோ ச ஆரம்மணதோ ச அகுப்பதா வேதி³தப்³பா³.
Abhisambuddhoti paccaññāsinti abhisambuddho arahattaṃ pattoti evaṃ na paṭijāniṃ. Yato ca khoti yato bodhimūle nisinnakālato paṭṭhāya . Athāhanti tato paraṃ ahaṃ. Ñāṇañca pana meti paccavekkhaṇañāṇaṃ sandhāya vadati. Akuppā metiādi tassa pavattiākāradassanaṃ. Tattha akuppā me vimuttīti arahattaphalaṃ tassa maggasaṅkhātakāraṇato ca ārammaṇato ca akuppatā veditabbā.
இமஸ்மிங் பன வெய்யாகரணஸ்மிந்தி நிக்³கா³த²ஸுத்தே. ப⁴ஞ்ஞமானேதி ப⁴ணியமானே. த⁴ம்மசக்கு²ந்தி இத⁴ சதுஸச்சத⁴ம்மேஸு சக்கு²கிச்சகரணதோ ஸோதாபத்திமக்³கோ³ அதி⁴ப்பேதோ. யங் கிஞ்சீதிஆதி³ நிப்³பா³னாரம்மணத்தேபி கிச்சவஸேன அஸம்மோஹதோ பவத்தித³ஸ்ஸனத்த²ங் வுத்தங்.
Imasmiṃ pana veyyākaraṇasminti niggāthasutte. Bhaññamāneti bhaṇiyamāne. Dhammacakkhunti idha catusaccadhammesu cakkhukiccakaraṇato sotāpattimaggo adhippeto. Yaṃ kiñcītiādi nibbānārammaṇattepi kiccavasena asammohato pavattidassanatthaṃ vuttaṃ.
17. த⁴ம்மசக்கந்தி படிவேத⁴ஞாணத⁴ம்மஞ்சேவ தே³ஸனாஞாணத⁴ம்மஞ்ச பவத்தனட்டே²ன சக்கந்தி த⁴ம்மசக்கங் . ஓபா⁴ஸோதி ஸப்³ப³ஞ்ஞுதஞ்ஞாணானுபா⁴வேன பவத்தோ சித்தபச்சயஉதுஸமுட்டா²னோ த³ஸஸஹஸ்ஸிலோகதா⁴துங் ப²ரித்வா டி²தோ ஓபா⁴ஸோ.
17.Dhammacakkanti paṭivedhañāṇadhammañceva desanāñāṇadhammañca pavattanaṭṭhena cakkanti dhammacakkaṃ . Obhāsoti sabbaññutaññāṇānubhāvena pavatto cittapaccayautusamuṭṭhāno dasasahassilokadhātuṃ pharitvā ṭhito obhāso.
18. தி³ட்டோ² அரியஸச்சத⁴ம்மோ ஏதேனாதி தி³ட்ட²த⁴ம்மோ. ஏஸ நயோ ஸேஸேஸுபி. அத்தனோ பச்சக்க²தோ அதி⁴க³தத்தா ந பரங் பச்சேதி, பரஸ்ஸ ஸத்³தா⁴ய எத்த² ந பவத்ததீதி அபரப்பச்சயோ. ஏஹி பி⁴க்கூ²தி எத்தகே வுத்தமத்தே பப்³ப³ஜ்ஜா, உபஸம்பதா³ ச ஸிஜ்ஜ²தி, தேனேவ தத்த² இதி-ஸத்³தே³ன பரிச்சே²தோ³ த³ஸ்ஸிதோதி வத³ந்தி. கேசி பன ‘‘ஸம்மா து³க்க²ஸ்ஸ அந்தகிரியாயாதி வசனபரியோஸானே ஏவ உபஸம்பதா³ ஸிஜ்ஜ²தி, அட்ட²கதா²யங் பன ‘ஏஹி பி⁴க்கூ²தி ப⁴க³வதோ வசனேனா’தி இத³ங் ஏஹிபி⁴க்கு²ஸத்³தோ³பலக்கி²தவசனங் ஏஹிபி⁴க்கு²வசனந்திஆதி³பத³வஸேன வுத்தங் முஸாவாத³வக்³கோ³திஆதீ³ஸு வியா’’தி வத³ந்தி, ததே³தங் பட²மபாராஜிகட்ட²கதா²யங் ‘‘ப⁴க³வா ஹி…பே॰… ஏஹி பி⁴க்கு², சர ப்³ரஹ்மசரியங் ஸம்மா து³க்க²ஸ்ஸ அந்தகிரியாயா’’தி (பாரா॰ அட்ட²॰ 1.45 பி⁴க்கூ²பத³பா⁴ஜனீயவண்ணனா) இமினா வசனேன ஸமேதி. யத்தகஞ்ஹி ப⁴க³வதா நியமேன வுச்சதி, தத்தகங் ஸப்³ப³ம்பி அங்க³மேவ. ஸெக்க²புது²ஜ்ஜனானஞ்ஹி ஏதங் பரிபுண்ணங் வுச்சதி, அஸெக்கா²னங் பன ‘‘சர ப்³ரஹ்மசரிய’’ந்தி பரியோஸானந்தி த³ட்ட²ப்³ப³ங் ஸிக்க²த்தயஸமித்³தி⁴தோ. லோகியஸம்பதா³ஹி உபரிபூ⁴தா ஸெட்ட²பூ⁴தா ஸம்பதா³தி உபஸம்பதா³.
18. Diṭṭho ariyasaccadhammo etenāti diṭṭhadhammo. Esa nayo sesesupi. Attano paccakkhato adhigatattā na paraṃ pacceti, parassa saddhāya ettha na pavattatīti aparappaccayo. Ehi bhikkhūti ettake vuttamatte pabbajjā, upasampadā ca sijjhati, teneva tattha iti-saddena paricchedo dassitoti vadanti. Keci pana ‘‘sammā dukkhassa antakiriyāyāti vacanapariyosāne eva upasampadā sijjhati, aṭṭhakathāyaṃ pana ‘ehi bhikkhūti bhagavato vacanenā’ti idaṃ ehibhikkhusaddopalakkhitavacanaṃ ehibhikkhuvacanantiādipadavasena vuttaṃ musāvādavaggotiādīsu viyā’’ti vadanti, tadetaṃ paṭhamapārājikaṭṭhakathāyaṃ ‘‘bhagavā hi…pe… ehi bhikkhu, cara brahmacariyaṃ sammā dukkhassa antakiriyāyā’’ti (pārā. aṭṭha. 1.45 bhikkhūpadabhājanīyavaṇṇanā) iminā vacanena sameti. Yattakañhi bhagavatā niyamena vuccati, tattakaṃ sabbampi aṅgameva. Sekkhaputhujjanānañhi etaṃ paripuṇṇaṃ vuccati, asekkhānaṃ pana ‘‘cara brahmacariya’’nti pariyosānanti daṭṭhabbaṃ sikkhattayasamiddhito. Lokiyasampadāhi uparibhūtā seṭṭhabhūtā sampadāti upasampadā.
19-21. நீஹாரப⁴த்தோதி பி⁴க்கூ²ஹி கா³மதோ நீஹரித்வா தி³ன்னப⁴த்தோ. கல்லங் நூதி யுத்தங் நு. ஏதங் மமாதிஆதி³ யதா²க்கமங் தண்ஹாமானதி³ட்டி²கா³ஹானங் த³ஸ்ஸனங்.
19-21.Nīhārabhattoti bhikkhūhi gāmato nīharitvā dinnabhatto. Kallaṃ nūti yuttaṃ nu. Etaṃ mamātiādi yathākkamaṃ taṇhāmānadiṭṭhigāhānaṃ dassanaṃ.
22-23. தஸ்மா திஹாதி எத்த² திஹாதி நிபாதமத்தங், தஸ்மாதி அத்தோ². நிப்³பி³ந்த³தீதி வுட்டா²னகா³மினிவிபஸ்ஸனாவஸேன உக்கண்ட²தி. விரஜ்ஜதீதி சதுன்னங் மக்³கா³னங் வஸேன ந ரஜ்ஜதி. விமுச்சதீதி ப²லவஸேன விமுச்சதி. விமுத்தஸ்மிந்திஆதி³ பச்சவெக்க²ணஞாணத³ஸ்ஸனங். ப்³ரஹ்மசரியந்தி மக்³க³ப்³ரஹ்மசரியங். கரணீயங் சதூஸு ஸச்சேஸு சதூஹி மக்³கே³ஹி பச்சேகங் கத்தப்³ப³ங் பரிஞ்ஞாதி³வஸேன ஸோளஸவித⁴ங் கிச்சங். நாபரங் இத்த²த்தாயாதி இத்த²பா⁴வாய ஸோளஸகிச்சபா⁴வாய, கிலேஸக்க²யாய வா அபரங் புன மக்³க³பா⁴வனாகிச்சங் மே நத்தீ²தி பஜானாதி. அத² வா இத்த²த்தாயாதி இத்த²பா⁴வதோ வத்தமானக்க²ந்த⁴ஸந்தானதோ அபரங் க²ந்த⁴ஸந்தானங் மய்ஹங் ந ப⁴விஸ்ஸதீதி அத்தோ².
22-23.Tasmātihāti ettha tihāti nipātamattaṃ, tasmāti attho. Nibbindatīti vuṭṭhānagāminivipassanāvasena ukkaṇṭhati. Virajjatīti catunnaṃ maggānaṃ vasena na rajjati. Vimuccatīti phalavasena vimuccati. Vimuttasmintiādi paccavekkhaṇañāṇadassanaṃ. Brahmacariyanti maggabrahmacariyaṃ. Karaṇīyaṃ catūsu saccesu catūhi maggehi paccekaṃ kattabbaṃ pariññādivasena soḷasavidhaṃ kiccaṃ. Nāparaṃ itthattāyāti itthabhāvāya soḷasakiccabhāvāya, kilesakkhayāya vā aparaṃ puna maggabhāvanākiccaṃ me natthīti pajānāti. Atha vā itthattāyāti itthabhāvato vattamānakkhandhasantānato aparaṃ khandhasantānaṃ mayhaṃ na bhavissatīti attho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 6. பஞ்சவக்³கி³யகதா² • 6. Pañcavaggiyakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பஞ்சவக்³கி³யகதா² • Pañcavaggiyakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
பஞ்சவக்³கி³யகதா²வண்ணனா • Pañcavaggiyakathāvaṇṇanā
த⁴ம்மசக்கப்பவத்தனஸுத்தவண்ணனா • Dhammacakkappavattanasuttavaṇṇanā
அனத்தலக்க²ணஸுத்தவண்ணனா • Anattalakkhaṇasuttavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பஞ்சவக்³கி³யகதா²வண்ணனா • Pañcavaggiyakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. பஞ்சவக்³கி³யகதா² • 6. Pañcavaggiyakathā
