| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ಪಞ್ಚವಗ್ಗಿಯಕಥಾವಣ್ಣನಾ
Pañcavaggiyakathāvaṇṇanā
೧೦. ಆಳಾರೋತಿ ನಾಮಂ। ಕಾಲಾಮೋತಿ ಗೋತ್ತಂ। ಭಗವತೋಪಿ ಖೋ ಞಾಣಂ ಉದಪಾದೀತಿ ಕಿಂ ಇದಾನೇವ ಉದಪಾದಿ, ನನು ಬೋಧಿಮೂಲೇ ತೇಕಾಲಿಕಾ, ಕಾಲವಿನಿಮುತ್ತಾ ಚ ಸಬ್ಬೇ ಧಮ್ಮಾ ಸಬ್ಬಾಕಾರತೋ ದಿಟ್ಠಾತಿ? ಸಚ್ಚಂ ದಿಟ್ಠಾ, ತಥಾಪಿ ನಾಮಾದಿವಸೇನ ಅವಿಕಪ್ಪಿತಾ ಏಕಚಿತ್ತಕ್ಖಣಿಕತ್ತಾ ಸಬ್ಬಞ್ಞುತಞ್ಞಾಣಸ್ಸ। ನ ಹಿ ಏಕೇನ ಚಿತ್ತೇನ ಸಬ್ಬಧಮ್ಮಾನಂ ನಾಮಜಾತಿಆದಿಕಂ ಪಚ್ಚೇಕಂ ಅನನ್ತಂ ವಿಭಾಗಂ ವಿಕಪ್ಪೇತುಂ ಸಕ್ಕಾ ವಿಕಪ್ಪಾನಂ ವಿರುದ್ಧಾನಂ ಸಹಾನುಪ್ಪತ್ತಿತೋ, ಸಬ್ಬವಿಕಪ್ಪಾರಹಧಮ್ಮದಸ್ಸನಮೇವ ಪನಾನೇನ ಸಕ್ಕಾ ಕಾತುಂ। ಯಥಾ ದಿಟ್ಠೇಸು ಪನ ಯಥಿಚ್ಛಿತಾಕಾರಂ ಆರಬ್ಭ ವಿಕಪ್ಪೋ ಉಪ್ಪಜ್ಜತಿ ಚಕ್ಖುವಿಞ್ಞಾಣೇನ ದಿಟ್ಠೇ ಚಿತ್ತಪಟೇ ವಿಯ। ಇಧಾಪಿ ಆಳಾರಂ ನಿಸ್ಸಾಯ ಆವಜ್ಜನಾನನ್ತರಮೇವ ಸಬ್ಬಾಕಾರಞಾಣಂ ಉದಪಾದಿ। ನ ಕೇವಲಞ್ಚ ತಂ, ಅಥ ಖೋ ಪಞ್ಚವಗ್ಗಿಯಾ ಏವ ಪಠಮಂ ಧಮ್ಮಂ ಜಾನಿಸ್ಸನ್ತಿ, ತಪ್ಪಮುಖಾ ಚ ದೇವತಾ, ಆಳಾರೋ ಕಾಲಂ ಕತ್ವಾ ಆಕಿಞ್ಚಞ್ಞಾಯತನೇ, ಉದಕೋ ಚ ನೇವಸಞ್ಞಾನಾಸಞ್ಞಾಯತನೇ ನಿಬ್ಬತ್ತೋತಿ ಏವಮಾದಿಕಂ ಸಬ್ಬಮ್ಪಿ ನಿಸ್ಸಾಯ ಞಾಣಂ ಉಪ್ಪಜ್ಜತಿ ಏವ। ತಂ ಪನ ಖಣಸಮ್ಪತ್ತಿಯಾ ದುಲ್ಲಭಭಾವಂ ದಸ್ಸೇತುಂ ಕಮೇನ ಓಲೋಕೇತ್ವಾ ದೇವತಾಯ ವುತ್ತೇ ಞಾಣಂ ವಿಯ ಕತ್ವಾ ವುತ್ತಂ। ಸದ್ದಗತಿಯಾ ಹಿ ಬನ್ಧತ್ತಾ ಏಕೇನ ಞಾಣೇನ ಞಾತಮ್ಪಿ ವುಚ್ಚಮಾನಂ ಕಮೇನ ಞಾತಂ ವಿಯ ಪಟಿಭಾತಿ, ದೇವತಾಪಿ ಚ ಭಗವತಾ ಞಾತಮೇವತ್ಥಂ ಆರೋಚೇಸಿ। ತೇನೇವ ‘‘ಭಗವತೋಪಿ ಖೋ ಞಾಣಂ ಉದಪಾದೀ’’ತಿ ವುತ್ತನ್ತಿ ದಟ್ಠಬ್ಬಂ। ಏವಮಞ್ಞತ್ಥಾಪಿ ಈದಿಸೇಸು ‘‘ಲೋಕಂ ವೋಲೋಕೇನ್ತೋ ಅಸುಕಂ ಅದ್ದಸ, ತತ್ಥ ಮಯಿ ಗತೇ ಕಿಂ ಭವಿಸ್ಸತೀ’’ತಿ ಏವಮಾದಿನಾ ಸತ್ಥು ಹಿತೇಸಿತಾಸನ್ದಸ್ಸನವಸಪ್ಪವತ್ತೇಸು। ಸಬ್ಬತ್ಥ ವಚನಗತಿಯಂ ಕಮವುತ್ತಿತೇ ಪಞ್ಞಾಯಮಾನೇಪಿ ಏಕೇನೇವ ಞಾಣೇನ ಸಕಲಾವಬೋಧೋ ವೇದಿತಬ್ಬೋ। ಬಹುಕಾರಾ ಖೋ ಮೇ ಪಞ್ಚವಗ್ಗಿಯಾತಿ ಉಪಕಾರಸ್ಸಾಪಿ ವಿಜ್ಜಮಾನತಂ ಸನ್ಧಾಯ ವುತ್ತಂ, ನ ಪನ ಧಮ್ಮದೇಸನಾಯ ಕಾರಣತ್ತೇನ ಅನುಪಕಾರಾನಮ್ಪಿ ದೇಸನತೋ।
10.Āḷāroti nāmaṃ. Kālāmoti gottaṃ. Bhagavatopi kho ñāṇaṃ udapādīti kiṃ idāneva udapādi, nanu bodhimūle tekālikā, kālavinimuttā ca sabbe dhammā sabbākārato diṭṭhāti? Saccaṃ diṭṭhā, tathāpi nāmādivasena avikappitā ekacittakkhaṇikattā sabbaññutaññāṇassa. Na hi ekena cittena sabbadhammānaṃ nāmajātiādikaṃ paccekaṃ anantaṃ vibhāgaṃ vikappetuṃ sakkā vikappānaṃ viruddhānaṃ sahānuppattito, sabbavikappārahadhammadassanameva panānena sakkā kātuṃ. Yathā diṭṭhesu pana yathicchitākāraṃ ārabbha vikappo uppajjati cakkhuviññāṇena diṭṭhe cittapaṭe viya. Idhāpi āḷāraṃ nissāya āvajjanānantarameva sabbākārañāṇaṃ udapādi. Na kevalañca taṃ, atha kho pañcavaggiyā eva paṭhamaṃ dhammaṃ jānissanti, tappamukhā ca devatā, āḷāro kālaṃ katvā ākiñcaññāyatane, udako ca nevasaññānāsaññāyatane nibbattoti evamādikaṃ sabbampi nissāya ñāṇaṃ uppajjati eva. Taṃ pana khaṇasampattiyā dullabhabhāvaṃ dassetuṃ kamena oloketvā devatāya vutte ñāṇaṃ viya katvā vuttaṃ. Saddagatiyā hi bandhattā ekena ñāṇena ñātampi vuccamānaṃ kamena ñātaṃ viya paṭibhāti, devatāpi ca bhagavatā ñātamevatthaṃ ārocesi. Teneva ‘‘bhagavatopi kho ñāṇaṃ udapādī’’ti vuttanti daṭṭhabbaṃ. Evamaññatthāpi īdisesu ‘‘lokaṃ volokento asukaṃ addasa, tattha mayi gate kiṃ bhavissatī’’ti evamādinā satthu hitesitāsandassanavasappavattesu. Sabbattha vacanagatiyaṃ kamavuttite paññāyamānepi ekeneva ñāṇena sakalāvabodho veditabbo. Bahukārā kho me pañcavaggiyāti upakārassāpi vijjamānataṃ sandhāya vuttaṃ, na pana dhammadesanāya kāraṇattena anupakārānampi desanato.
೧೧. ಅನ್ತರಾ ಚ ಗಯಂ ಅನ್ತರಾ ಚ ಬೋಧಿನ್ತಿ ಗಯಾಯ, ಬೋಧಿಸ್ಸ ಚ ಅನ್ತರೇ ತಿಗಾವುತೇ ಠಾನೇ।
11.Antarā ca gayaṃ antarā ca bodhinti gayāya, bodhissa ca antare tigāvute ṭhāne.
ಸಬ್ಬಾಭಿಭೂತಿ ಸಬ್ಬಂ ತೇಭೂಮಕಧಮ್ಮಂ ಅಭಿಭವಿತ್ವಾ ಠಿತೋ। ಅನೂಪಲಿತ್ತೋತಿ ಕಿಲೇಸಲೇಪೇನ ಅಲಿತ್ತೋ। ತತೋ ಏವ ಸಬ್ಬಞ್ಜಹೋ। ತಣ್ಹಕ್ಖಯೇ ವಿಮುತ್ತೋತಿ ತಣ್ಹಕ್ಖಯೇ ನಿಬ್ಬಾನೇ ಆರಮ್ಮಣಕರಣವಸಏನ ವಿಮುತ್ತೋ। ಏವಂ ಸಯಂ ಸಬ್ಬಧಮ್ಮೇ ಅತ್ತನಾವ ಜಾನಿತ್ವಾ। ಕಮುದ್ದಿಸೇಯ್ಯನ್ತಿ ಕಂ ಅಞ್ಞಂ ‘‘ಅಯಂ ಮೇ ಆಚರಿಯೋ’’ತಿ ಉದ್ದಿಸೇಯ್ಯಂ।
Sabbābhibhūti sabbaṃ tebhūmakadhammaṃ abhibhavitvā ṭhito. Anūpalittoti kilesalepena alitto. Tato eva sabbañjaho. Taṇhakkhaye vimuttoti taṇhakkhaye nibbāne ārammaṇakaraṇavasaena vimutto. Evaṃ sayaṃ sabbadhamme attanāva jānitvā. Kamuddiseyyanti kaṃ aññaṃ ‘‘ayaṃ me ācariyo’’ti uddiseyyaṃ.
ಕಾಸಿನಂ ಪುರನ್ತಿ ಬಾರಾಣಸಿಂ। ಆಹಞ್ಛನ್ತಿ ಆಹನಿಸ್ಸಾಮಿ। ಅಮತಾಧಿಗಮಾಯ ಉಗ್ಘೋಸನತೋ ಅಮತದುನ್ದುಭಿನ್ತಿ ಸತ್ಥು ಧಮ್ಮದೇಸನಾ ವುತ್ತಾ, ‘‘ಅಮತಭೇರಿಂ ಪಹರಿಸ್ಸಾಮೀ’’ತಿ ಗಚ್ಛಾಮೀತಿ ಅತ್ಥೋ।
Kāsinaṃ puranti bārāṇasiṃ. Āhañchanti āhanissāmi. Amatādhigamāya ugghosanato amatadundubhinti satthu dhammadesanā vuttā, ‘‘amatabheriṃ paharissāmī’’ti gacchāmīti attho.
ಅರಹಸಿ ಅನನ್ತಜಿನೋತಿ ಅನನ್ತಜಿನೋಪಿ ಭವಿತುಂ ಯುತ್ತೋತಿ ಅತ್ಥೋ। ಅನನ್ತಞಾಣತಾಯ ಅನನ್ತೋ ಜಿನೋ ಚ, ಅನನ್ತೇನ ವಾ ಞಾಣೇನ, ಅನನ್ತಂ ವಾ ದೋಸಂ ಜಿತವಾ, ಉಪ್ಪಾದವಯನ್ತರಹಿತತಾಯ ವಾ ಅನನ್ತಂ ನಿಬ್ಬಾನಂ ಅಜಿನಿ ಕಿಲೇಸಾರಯೋ ಮದ್ದಿತ್ವಾ ಗಣ್ಹೀತಿಪಿ ಅನನ್ತಜಿನೋ।
Arahasi anantajinoti anantajinopi bhavituṃ yuttoti attho. Anantañāṇatāya ananto jino ca, anantena vā ñāṇena, anantaṃ vā dosaṃ jitavā, uppādavayantarahitatāya vā anantaṃ nibbānaṃ ajini kilesārayo madditvā gaṇhītipi anantajino.
ಹುಪೇಯ್ಯಾಪೀತಿ ಏವಮ್ಪಿ ಭವೇಯ್ಯ, ಏವಂವಿಧೇ ರೂಪಕಾಯರತನೇ ಈದಿಸೇನ ಞಾಣೇನ ಭವಿತಬ್ಬನ್ತಿ ಅಧಿಪ್ಪಾಯೋ। ಏವಂ ನಾಮ ಕಥನಞ್ಹಿಸ್ಸ ಉಪನಿಸ್ಸಯಸಮ್ಪನ್ನಸ್ಸ ಅಪರಕಾಲೇ ದುಕ್ಖಪ್ಪತ್ತಸ್ಸ ಭಗವನ್ತಂ ಉಪಗಮ್ಮ ಪಬ್ಬಜಿತ್ವಾ ಮಗ್ಗಫಲಪಟಿವೇಧಾಯ ಪಚ್ಚಯೋ ಜಾತೋ। ತಥಾಹೇಸ ಭಗವಾ ತೇನ ಸಮಾಗಮತ್ಥಂ ಪದಸಾವ ಮಗ್ಗಂ ಪಟಿಪಜ್ಜಿ।
Hupeyyāpīti evampi bhaveyya, evaṃvidhe rūpakāyaratane īdisena ñāṇena bhavitabbanti adhippāyo. Evaṃ nāma kathanañhissa upanissayasampannassa aparakāle dukkhappattassa bhagavantaṃ upagamma pabbajitvā maggaphalapaṭivedhāya paccayo jāto. Tathāhesa bhagavā tena samāgamatthaṃ padasāva maggaṃ paṭipajji.
೧೨. ಬಾಹುಲ್ಲಿಕೋತಿ ಪಚ್ಚಯಬಾಹುಲ್ಲಿಕೋ। ಪಧಾನವಿಬ್ಭನ್ತೋತಿ ಪಧಾನತೋ ದುಕ್ಕರಚರಣತೋ ಪರಿಹೀನೋ। ನತ್ಥಿ ಏತ್ಥ ಅಗಾರಿಯಂ, ಅಗಾರಸ್ಸ ಹಿತಂ ಕಸಿಗೋರಕ್ಖಾದಿಕಮ್ಮನ್ತಿ ಅನಗಾರಿಯಾ, ಪಬ್ಬಜ್ಜಾ, ತಂ ಅನಗಾರಿಯಂ। ಪಬ್ಬಜನ್ತೀತಿ ಉಪಗಚ್ಛನ್ತಿ। ತದನುತ್ತರನ್ತಿ ತಂ ಅನುತ್ತರಂ। ಬ್ರಹ್ಮಚರಿಯಪರಿಯೋಸಾನನ್ತಿ ಮಗ್ಗಬ್ರಹ್ಮಚರಿಯಸ್ಸ ಪರಿಯೋಸಾನಂ, ಅರಹತ್ತಫಲನ್ತಿ ಅತ್ಥೋ। ತಸ್ಸ ಹಿ ಅತ್ಥಾಯ ಕುಲಪುತ್ತಾ ಪಬ್ಬಜನ್ತಿ। ದಿಟ್ಠೇವ ಧಮ್ಮೇತಿ ಇಮಸ್ಮಿಂ ಪಚ್ಚಕ್ಖೇ ಅತ್ತಭಾವೇ। ಸಯನ್ತಿ ಅಪರಪ್ಪಚ್ಚಯಾ । ಅಭಿಞ್ಞಾ ಸಚ್ಛಿಕತ್ವಾತಿ ಅತ್ತನೋವ ಞಾಣೇನ ಪಚ್ಚಕ್ಖಂ ಕತ್ವಾ। ಉಪಸಮ್ಪಜ್ಜಾತಿ ಪಾಪುಣಿತ್ವಾ।
12.Bāhullikoti paccayabāhulliko. Padhānavibbhantoti padhānato dukkaracaraṇato parihīno. Natthi ettha agāriyaṃ, agārassa hitaṃ kasigorakkhādikammanti anagāriyā, pabbajjā, taṃ anagāriyaṃ. Pabbajantīti upagacchanti. Tadanuttaranti taṃ anuttaraṃ. Brahmacariyapariyosānanti maggabrahmacariyassa pariyosānaṃ, arahattaphalanti attho. Tassa hi atthāya kulaputtā pabbajanti. Diṭṭheva dhammeti imasmiṃ paccakkhe attabhāve. Sayanti aparappaccayā . Abhiññā sacchikatvāti attanova ñāṇena paccakkhaṃ katvā. Upasampajjāti pāpuṇitvā.
ಇರಿಯಾಯಾತಿ ದುಕ್ಕರಇರಿಯಾಯ। ಉತ್ತರಿಮನುಸ್ಸಧಮ್ಮಾತಿಆದೀಸು ಮನುಸ್ಸಧಮ್ಮತೋ ಲೋಕಿಯಞಾಣತೋ ಉಪರಿ ಅರಿಯಂ ಕಾತುಂ ಅಲಂ ಸಮತ್ಥೋ ಅಲಮರಿಯೋ। ಞಾಣದಸ್ಸನವಿಸೇಸೋತಿ ಸಬ್ಬಞ್ಞುತಞ್ಞಾಣಸ್ಸ ಪುಬ್ಬಭಾಗಂ ಅಧಿಪ್ಪೇತಂ। ನೋತಿ ನು। ಭಾಸಿತಮೇತನ್ತಿ ಏವರೂಪಮೇತಂ ವಾಕ್ಯಭೇದನ್ತಿ ಅತ್ಥೋ। ತೇ ಚ ‘‘ಯದಿ ಏಸ ಪಧಾನಕಾಲೇ ‘ಅಹಂ ಅರಹಾ’ತಿ ವದೇಯ್ಯ, ಮಯಞ್ಚ ಸದ್ದಹಾಮ, ನ ಚಾನೇನ ತದಾ ವುತ್ತಂ। ಇದಾನಿ ಪನ ವಿಜ್ಜಮಾನಮೇವ ಗುಣಂ ವದತೀ’’ತಿ ಏಕಪದೇನ ಸತಿಂ ಲಭಿತ್ವಾ ‘‘ಬುದ್ಧೋ ಜಾತೋ’’ತಿ ಉಪ್ಪನ್ನಗಾರವಾ ಆವುಸೋವಾದಂ ಪಹಾಯ ‘‘ನೋ ಹೇತಂ, ಭನ್ತೇ’’ತಿ ಆಹಂಸು। ಅಞ್ಞಾ ಚಿತ್ತನ್ತಿ ಅಞ್ಞಾಯ ಅರಹತ್ತಪ್ಪತ್ತಿಯಾ ಚಿತ್ತಂ।
Iriyāyāti dukkarairiyāya. Uttarimanussadhammātiādīsu manussadhammato lokiyañāṇato upari ariyaṃ kātuṃ alaṃ samattho alamariyo. Ñāṇadassanavisesoti sabbaññutaññāṇassa pubbabhāgaṃ adhippetaṃ. Noti nu. Bhāsitametanti evarūpametaṃ vākyabhedanti attho. Te ca ‘‘yadi esa padhānakāle ‘ahaṃ arahā’ti vadeyya, mayañca saddahāma, na cānena tadā vuttaṃ. Idāni pana vijjamānameva guṇaṃ vadatī’’ti ekapadena satiṃ labhitvā ‘‘buddho jāto’’ti uppannagāravā āvusovādaṃ pahāya ‘‘no hetaṃ, bhante’’ti āhaṃsu. Aññā cittanti aññāya arahattappattiyā cittaṃ.
೧೩. ಅನ್ತಾತಿ ಕೋಟ್ಠಾಸಾ ದ್ವೇ ಭಾಗಾ। ಕಾಮೇಸು ಕಾಮಸುಖಲ್ಲಿಕಾನುಯೋಗೋತಿ ವತ್ಥುಕಾಮೇಸು ಕಿಲೇಸಕಾಮಸುಖಸ್ಸ ಅನುಭವೋ। ಕಿಲೇಸಕಾಮಾ ಏವ ವಾ ಆಮಿಸಸುಖೇನ ಅಲ್ಲೀಯನತೋ ಕಾಮಸುಖಲ್ಲಿಕಾತಿ ವುತ್ತಾತಿ ದಟ್ಠಬ್ಬಾ। ಗಮ್ಮೋತಿ ಗಾಮವಾಸೀನಂ ಸನ್ತಕೋ। ಅತ್ತಕಿಲಮಥಾನುಯೋಗೋತಿ ಅತ್ತನೋ ಕಿಲಮಥಸ್ಸ ಕಣ್ಟಕಸೇಯ್ಯಾದಿದುಕ್ಖಸ್ಸ ಅನುಯೋಗೋ। ಉಭೋ ಅನ್ತೇತಿ ಯಥಾವುತ್ತೇ ಲೋಭೋ ವಾ ಸಸ್ಸತೋ ವಾ ಏಕೋ ಅನ್ತೋ, ದೋಸೋ ವಾ ಉಚ್ಛೇದೋ ವಾ ಏಕೋತಿ ವೇದಿತಬ್ಬೋ।
13.Antāti koṭṭhāsā dve bhāgā. Kāmesu kāmasukhallikānuyogoti vatthukāmesu kilesakāmasukhassa anubhavo. Kilesakāmā eva vā āmisasukhena allīyanato kāmasukhallikāti vuttāti daṭṭhabbā. Gammoti gāmavāsīnaṃ santako. Attakilamathānuyogoti attano kilamathassa kaṇṭakaseyyādidukkhassa anuyogo. Ubho anteti yathāvutte lobho vā sassato vā eko anto, doso vā ucchedo vā ekoti veditabbo.
ಚಕ್ಖುಕರಣೀತಿಆದೀಸು ಅತ್ತನಾ ಸಮ್ಪಯುತ್ತಞಾಣಚಕ್ಖುಂ ಕರೋತೀತಿ ಚಕ್ಖುಕರಣೀ। ದುತಿಯಂ ತಸ್ಸೇವ ವೇವಚನಂ। ಉಪಸಮೋತಿ ಕಿಲೇಸುಪಸಮೋ। ಅಭಿಞ್ಞಾ, ಸಮ್ಬೋಧೋ ಚ ಚತುಸಚ್ಚಪಟಿವೇಧೋವ। ನಿಬ್ಬಾನಂ ಅಸಙ್ಖತಧಾತು। ಏತೇಸಮ್ಪಿ ಅತ್ಥಾಯ ಸಂವತ್ತತೀತಿ ಪಟಿಪದಂ ಥೋಮೇತಿ। ಸಮ್ಮಾದಿಟ್ಠೀತಿ ಞಾಣಂ। ಸಮ್ಮಾಸಙ್ಕಪ್ಪೋತಿ ವಿತಕ್ಕೋ। ಸೇಸಂ ಧಮ್ಮತೋ ಸುವಿಞ್ಞೇಯ್ಯಮೇವ।
Cakkhukaraṇītiādīsu attanā sampayuttañāṇacakkhuṃ karotīti cakkhukaraṇī. Dutiyaṃ tasseva vevacanaṃ. Upasamoti kilesupasamo. Abhiññā, sambodho ca catusaccapaṭivedhova. Nibbānaṃ asaṅkhatadhātu. Etesampi atthāya saṃvattatīti paṭipadaṃ thometi. Sammādiṭṭhīti ñāṇaṃ. Sammāsaṅkappoti vitakko. Sesaṃ dhammato suviññeyyameva.
೧೪. ಏವಂ ಚತ್ತಾರೋಪಿ ಮಗ್ಗೇ ಏಕತೋ ದಸ್ಸೇತ್ವಾ ಇದಾನಿ ತೇಹಿ ಮಗ್ಗೇಹಿ ಪಟಿವಿಜ್ಝಿತಬ್ಬಾನಿ ಚತ್ತಾರಿ ಅರಿಯಸಚ್ಚಾನಿ ದಸ್ಸೇತುಂ ‘‘ಇದಂ ಖೋ ಪನ, ಭಿಕ್ಖವೇ’’ತಿಆದಿಮಾಹ। ಜಾತಿಪಿ ದುಕ್ಖಾತಿಆದೀಸು ತತ್ಥ ತತ್ಥ ಭವೇ ನಿಬ್ಬತ್ತಮಾನಾನಂ ಸತ್ತಾನಂ ಸಬ್ಬಪಠಮಂ ರೂಪಾರೂಪಧಮ್ಮಪ್ಪವತ್ತಿ ಇಧ ಜಾತಿ ನಾಮ, ಸಾ ಚ ತತ್ಥ ತತ್ಥ ಭವೇಸು ಉಪಲಬ್ಭಮಾನಾನಂ ದುಕ್ಖಾದೀನಂ ವತ್ಥುಭಾವತೋ ದುಕ್ಖಾ, ಏವಂ ಜರಾದೀಸು ದುಕ್ಖವತ್ಥುಕತಾಯ ದುಕ್ಖತಾ ವೇದಿತಬ್ಬಾ। ಪಞ್ಚುಪಾದಾನಕ್ಖನ್ಧಾ ಪನ ದುಕ್ಖದುಕ್ಖವಿಪರಿಣಾಮದುಕ್ಖಸಙ್ಖಾರದುಕ್ಖವಸೇನ ದುಕ್ಖಾ ಏವ। ಪೋನೋಭವಿಕಾತಿ ಪುನಬ್ಭವಕರಣಂ ಪುನಬ್ಭವೋ ಉತ್ತರಪದಲೋಪೇನ, ಪುನಬ್ಭವೋ ಸೀಲಮೇತಿಸ್ಸಾತಿ ಪೋನೋಭವಿಕಾ। ನನ್ದಿರಾಗಸಹಗತಾತಿ ಏತ್ಥ ರೂಪಾದೀಸು ನನ್ದತಿ ಪಿಯಾಯತೀತಿ ನನ್ದೀ, ಸಾ ಏವ ರಾಗೋತಿ ನನ್ದಿರಾಗೋತಿ ಭಾವಪ್ಪಧಾನೋಯಂ ನಿದ್ದೇಸೋ, ನನ್ದಿರಾಗತ್ತನ್ತಿ ಅತ್ಥೋ। ತೇನ ಸಹಗತಾನಿ ನನ್ದಿರಾಗಸಹಗತಾ। ತತ್ರ ತತ್ರಾತಿ ತಸ್ಮಿಂ ತಸ್ಮಿಂ ಭವೇ। ರೂಪಾದೀಸು ಛಸು ಆರಮ್ಮಣೇಸು ಕಾಮಸ್ಸಾದನವಸೇನ ಪವತ್ತಾ ಕಾಮತಣ್ಹಾ ನಾಮ। ಸಸ್ಸತದಿಟ್ಠಿಯಾ ಸಹ ಪವತ್ತಾ ಭವತಣ್ಹಾ। ಉಚ್ಛೇದದಿಟ್ಠಿಯಾ ಸಹ ಪವತ್ತಾ ವಿಭವತಣ್ಹಾ। ಅಸೇಸವಿರಾಗನಿರೋಧೋತಿಆದಿನಾ ನಿಬ್ಬಾನಮೇವ ವುಚ್ಚತಿ। ತತ್ಥ ವಿರಜ್ಜನಂ ವಿಗಮನಂ ವಿರಾಗೋ। ನಿರುಜ್ಝನಂ ನಿರೋಧೋ। ಉಭಯೇನಾಪಿ ಸುಟ್ಠು ವಿಗಮೋವ ವುಚ್ಚತಿ। ಅಸೇಸಾಯಪಿ ತಣ್ಹಾಯ ವಿರಾಗೋ, ನಿರೋಧೋ ಚ ಯೇನ ಹೋತಿ, ಸೋ ಅಸೇಸವಿರಾಗನಿರೋಧೋ, ನಿಬ್ಬಾನಮೇವ। ಯಸ್ಮಾ ಚ ತಂ ಆಗಮ್ಮ ತಣ್ಹಂ, ವಟ್ಟಞ್ಚ ಚಜನ್ತಿ ಪಟಿನಿಸ್ಸಜ್ಜನ್ತಿ ವಿಮುಚ್ಚನ್ತಿ ನ ಅಲ್ಲೀಯನ್ತಿ, ತಸ್ಮಾ ಚಾಗೋ ಪಟಿನಿಸ್ಸಗ್ಗೋ ಮುತ್ತಿ ಅನಾಲಯೋತಿ ವುಚ್ಚತಿ।
14. Evaṃ cattāropi magge ekato dassetvā idāni tehi maggehi paṭivijjhitabbāni cattāri ariyasaccāni dassetuṃ ‘‘idaṃ kho pana, bhikkhave’’tiādimāha. Jātipi dukkhātiādīsu tattha tattha bhave nibbattamānānaṃ sattānaṃ sabbapaṭhamaṃ rūpārūpadhammappavatti idha jāti nāma, sā ca tattha tattha bhavesu upalabbhamānānaṃ dukkhādīnaṃ vatthubhāvato dukkhā, evaṃ jarādīsu dukkhavatthukatāya dukkhatā veditabbā. Pañcupādānakkhandhā pana dukkhadukkhavipariṇāmadukkhasaṅkhāradukkhavasena dukkhā eva. Ponobhavikāti punabbhavakaraṇaṃ punabbhavo uttarapadalopena, punabbhavo sīlametissāti ponobhavikā. Nandirāgasahagatāti ettha rūpādīsu nandati piyāyatīti nandī, sā eva rāgoti nandirāgoti bhāvappadhānoyaṃ niddeso, nandirāgattanti attho. Tena sahagatāni nandirāgasahagatā. Tatra tatrāti tasmiṃ tasmiṃ bhave. Rūpādīsu chasu ārammaṇesu kāmassādanavasena pavattā kāmataṇhā nāma. Sassatadiṭṭhiyā saha pavattā bhavataṇhā. Ucchedadiṭṭhiyā saha pavattā vibhavataṇhā. Asesavirāganirodhotiādinā nibbānameva vuccati. Tattha virajjanaṃ vigamanaṃ virāgo. Nirujjhanaṃ nirodho. Ubhayenāpi suṭṭhu vigamova vuccati. Asesāyapi taṇhāya virāgo, nirodho ca yena hoti, so asesavirāganirodho, nibbānameva. Yasmā ca taṃ āgamma taṇhaṃ, vaṭṭañca cajanti paṭinissajjanti vimuccanti na allīyanti, tasmā cāgo paṭinissaggo mutti anālayoti vuccati.
೧೫. ಚಕ್ಖುನ್ತಿಆದೀನಿ ಞಾಣವೇವಚನಾನೇವ।
15.Cakkhuntiādīni ñāṇavevacanāneva.
೧೬. ಯಾವಕೀವಞ್ಚಾತಿ ಯತ್ತಕಂ ಕಾಲಂ। ತಿಪರಿವಟ್ಟನ್ತಿ ಸಚ್ಚಞಾಣ, ಕಿಚ್ಚಞಾಣ, ಕತಞಾಣಸಙ್ಖಾತಾನಂ ತಿಣ್ಣಂ ಪರಿವಟ್ಟಾನಂ ವಸೇನ ತಿಪರಿವಟ್ಟಂ ಞಾಣದಸ್ಸನಂ। ಏತ್ಥ ಚ ‘‘ಇದಂ ದುಕ್ಖಂ ಅರಿಯಸಚ್ಚಂ, ಇದಂ ದುಕ್ಖಸಮುದಯ’’ನ್ತಿ ಏವಂ ಚತೂಸು ಸಚ್ಚೇಸು ಯಥಾಭೂತಞಾಣಂ ಸಚ್ಚಞಾಣಂ ನಾಮ। ತೇಸು ಏವ ‘‘ಪರಿಞ್ಞೇಯ್ಯಂ ಪಹಾತಬ್ಬಂ ಸಚ್ಛಿಕಾತಬ್ಬಂ ಭಾವೇತಬ್ಬ’’ನ್ತಿ ಏವಂ ಕತ್ತಬ್ಬಕಿಚ್ಚಜಾನನಞಾಣಂ ಕಿಚ್ಚಞಾಣಂ ನಾಮ। ‘‘ಪರಿಞ್ಞಾತಂ ಪಹೀನಂ ಸಚ್ಛಿಕತಂ ಭಾವಿತ’’ನ್ತಿ ತಸ್ಸ ಕಿಚ್ಚಸ್ಸ ಕತಭಾವಜಾನನಞಾಣಂ ಕತಞಾಣಂ ನಾಮ। ದ್ವಾದಸಾಕಾರನ್ತಿ ತೇಸಮೇವ ಏಕೇಕಸ್ಮಿಂ ಸಚ್ಚೇ ತಿಣ್ಣಂ ತಿಣ್ಣಂ ಆಕಾರಾನಂ ವಸೇನ ದ್ವಾದಸಾಕಾರಂ।
16.Yāvakīvañcāti yattakaṃ kālaṃ. Tiparivaṭṭanti saccañāṇa, kiccañāṇa, katañāṇasaṅkhātānaṃ tiṇṇaṃ parivaṭṭānaṃ vasena tiparivaṭṭaṃ ñāṇadassanaṃ. Ettha ca ‘‘idaṃ dukkhaṃ ariyasaccaṃ, idaṃ dukkhasamudaya’’nti evaṃ catūsu saccesu yathābhūtañāṇaṃ saccañāṇaṃ nāma. Tesu eva ‘‘pariññeyyaṃ pahātabbaṃ sacchikātabbaṃ bhāvetabba’’nti evaṃ kattabbakiccajānanañāṇaṃ kiccañāṇaṃ nāma. ‘‘Pariññātaṃ pahīnaṃ sacchikataṃ bhāvita’’nti tassa kiccassa katabhāvajānanañāṇaṃ katañāṇaṃ nāma. Dvādasākāranti tesameva ekekasmiṃ sacce tiṇṇaṃ tiṇṇaṃ ākārānaṃ vasena dvādasākāraṃ.
ಅಭಿಸಮ್ಬುದ್ಧೋತಿ ಪಚ್ಚಞ್ಞಾಸಿನ್ತಿ ಅಭಿಸಮ್ಬುದ್ಧೋ ಅರಹತ್ತಂ ಪತ್ತೋತಿ ಏವಂ ನ ಪಟಿಜಾನಿಂ। ಯತೋ ಚ ಖೋತಿ ಯತೋ ಬೋಧಿಮೂಲೇ ನಿಸಿನ್ನಕಾಲತೋ ಪಟ್ಠಾಯ । ಅಥಾಹನ್ತಿ ತತೋ ಪರಂ ಅಹಂ। ಞಾಣಞ್ಚ ಪನ ಮೇತಿ ಪಚ್ಚವೇಕ್ಖಣಞಾಣಂ ಸನ್ಧಾಯ ವದತಿ। ಅಕುಪ್ಪಾ ಮೇತಿಆದಿ ತಸ್ಸ ಪವತ್ತಿಆಕಾರದಸ್ಸನಂ। ತತ್ಥ ಅಕುಪ್ಪಾ ಮೇ ವಿಮುತ್ತೀತಿ ಅರಹತ್ತಫಲಂ ತಸ್ಸ ಮಗ್ಗಸಙ್ಖಾತಕಾರಣತೋ ಚ ಆರಮ್ಮಣತೋ ಚ ಅಕುಪ್ಪತಾ ವೇದಿತಬ್ಬಾ।
Abhisambuddhoti paccaññāsinti abhisambuddho arahattaṃ pattoti evaṃ na paṭijāniṃ. Yato ca khoti yato bodhimūle nisinnakālato paṭṭhāya . Athāhanti tato paraṃ ahaṃ. Ñāṇañca pana meti paccavekkhaṇañāṇaṃ sandhāya vadati. Akuppā metiādi tassa pavattiākāradassanaṃ. Tattha akuppā me vimuttīti arahattaphalaṃ tassa maggasaṅkhātakāraṇato ca ārammaṇato ca akuppatā veditabbā.
ಇಮಸ್ಮಿಂ ಪನ ವೇಯ್ಯಾಕರಣಸ್ಮಿನ್ತಿ ನಿಗ್ಗಾಥಸುತ್ತೇ। ಭಞ್ಞಮಾನೇತಿ ಭಣಿಯಮಾನೇ। ಧಮ್ಮಚಕ್ಖುನ್ತಿ ಇಧ ಚತುಸಚ್ಚಧಮ್ಮೇಸು ಚಕ್ಖುಕಿಚ್ಚಕರಣತೋ ಸೋತಾಪತ್ತಿಮಗ್ಗೋ ಅಧಿಪ್ಪೇತೋ। ಯಂ ಕಿಞ್ಚೀತಿಆದಿ ನಿಬ್ಬಾನಾರಮ್ಮಣತ್ತೇಪಿ ಕಿಚ್ಚವಸೇನ ಅಸಮ್ಮೋಹತೋ ಪವತ್ತಿದಸ್ಸನತ್ಥಂ ವುತ್ತಂ।
Imasmiṃ pana veyyākaraṇasminti niggāthasutte. Bhaññamāneti bhaṇiyamāne. Dhammacakkhunti idha catusaccadhammesu cakkhukiccakaraṇato sotāpattimaggo adhippeto. Yaṃ kiñcītiādi nibbānārammaṇattepi kiccavasena asammohato pavattidassanatthaṃ vuttaṃ.
೧೭. ಧಮ್ಮಚಕ್ಕನ್ತಿ ಪಟಿವೇಧಞಾಣಧಮ್ಮಞ್ಚೇವ ದೇಸನಾಞಾಣಧಮ್ಮಞ್ಚ ಪವತ್ತನಟ್ಠೇನ ಚಕ್ಕನ್ತಿ ಧಮ್ಮಚಕ್ಕಂ । ಓಭಾಸೋತಿ ಸಬ್ಬಞ್ಞುತಞ್ಞಾಣಾನುಭಾವೇನ ಪವತ್ತೋ ಚಿತ್ತಪಚ್ಚಯಉತುಸಮುಟ್ಠಾನೋ ದಸಸಹಸ್ಸಿಲೋಕಧಾತುಂ ಫರಿತ್ವಾ ಠಿತೋ ಓಭಾಸೋ।
17.Dhammacakkanti paṭivedhañāṇadhammañceva desanāñāṇadhammañca pavattanaṭṭhena cakkanti dhammacakkaṃ . Obhāsoti sabbaññutaññāṇānubhāvena pavatto cittapaccayautusamuṭṭhāno dasasahassilokadhātuṃ pharitvā ṭhito obhāso.
೧೮. ದಿಟ್ಠೋ ಅರಿಯಸಚ್ಚಧಮ್ಮೋ ಏತೇನಾತಿ ದಿಟ್ಠಧಮ್ಮೋ। ಏಸ ನಯೋ ಸೇಸೇಸುಪಿ। ಅತ್ತನೋ ಪಚ್ಚಕ್ಖತೋ ಅಧಿಗತತ್ತಾ ನ ಪರಂ ಪಚ್ಚೇತಿ, ಪರಸ್ಸ ಸದ್ಧಾಯ ಏತ್ಥ ನ ಪವತ್ತತೀತಿ ಅಪರಪ್ಪಚ್ಚಯೋ। ಏಹಿ ಭಿಕ್ಖೂತಿ ಏತ್ತಕೇ ವುತ್ತಮತ್ತೇ ಪಬ್ಬಜ್ಜಾ, ಉಪಸಮ್ಪದಾ ಚ ಸಿಜ್ಝತಿ, ತೇನೇವ ತತ್ಥ ಇತಿ-ಸದ್ದೇನ ಪರಿಚ್ಛೇದೋ ದಸ್ಸಿತೋತಿ ವದನ್ತಿ। ಕೇಚಿ ಪನ ‘‘ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾತಿ ವಚನಪರಿಯೋಸಾನೇ ಏವ ಉಪಸಮ್ಪದಾ ಸಿಜ್ಝತಿ, ಅಟ್ಠಕಥಾಯಂ ಪನ ‘ಏಹಿ ಭಿಕ್ಖೂತಿ ಭಗವತೋ ವಚನೇನಾ’ತಿ ಇದಂ ಏಹಿಭಿಕ್ಖುಸದ್ದೋಪಲಕ್ಖಿತವಚನಂ ಏಹಿಭಿಕ್ಖುವಚನನ್ತಿಆದಿಪದವಸೇನ ವುತ್ತಂ ಮುಸಾವಾದವಗ್ಗೋತಿಆದೀಸು ವಿಯಾ’’ತಿ ವದನ್ತಿ, ತದೇತಂ ಪಠಮಪಾರಾಜಿಕಟ್ಠಕಥಾಯಂ ‘‘ಭಗವಾ ಹಿ…ಪೇ॰… ಏಹಿ ಭಿಕ್ಖು, ಚರ ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾ’’ತಿ (ಪಾರಾ॰ ಅಟ್ಠ॰ ೧.೪೫ ಭಿಕ್ಖೂಪದಭಾಜನೀಯವಣ್ಣನಾ) ಇಮಿನಾ ವಚನೇನ ಸಮೇತಿ। ಯತ್ತಕಞ್ಹಿ ಭಗವತಾ ನಿಯಮೇನ ವುಚ್ಚತಿ, ತತ್ತಕಂ ಸಬ್ಬಮ್ಪಿ ಅಙ್ಗಮೇವ। ಸೇಕ್ಖಪುಥುಜ್ಜನಾನಞ್ಹಿ ಏತಂ ಪರಿಪುಣ್ಣಂ ವುಚ್ಚತಿ, ಅಸೇಕ್ಖಾನಂ ಪನ ‘‘ಚರ ಬ್ರಹ್ಮಚರಿಯ’’ನ್ತಿ ಪರಿಯೋಸಾನನ್ತಿ ದಟ್ಠಬ್ಬಂ ಸಿಕ್ಖತ್ತಯಸಮಿದ್ಧಿತೋ। ಲೋಕಿಯಸಮ್ಪದಾಹಿ ಉಪರಿಭೂತಾ ಸೇಟ್ಠಭೂತಾ ಸಮ್ಪದಾತಿ ಉಪಸಮ್ಪದಾ।
18. Diṭṭho ariyasaccadhammo etenāti diṭṭhadhammo. Esa nayo sesesupi. Attano paccakkhato adhigatattā na paraṃ pacceti, parassa saddhāya ettha na pavattatīti aparappaccayo. Ehi bhikkhūti ettake vuttamatte pabbajjā, upasampadā ca sijjhati, teneva tattha iti-saddena paricchedo dassitoti vadanti. Keci pana ‘‘sammā dukkhassa antakiriyāyāti vacanapariyosāne eva upasampadā sijjhati, aṭṭhakathāyaṃ pana ‘ehi bhikkhūti bhagavato vacanenā’ti idaṃ ehibhikkhusaddopalakkhitavacanaṃ ehibhikkhuvacanantiādipadavasena vuttaṃ musāvādavaggotiādīsu viyā’’ti vadanti, tadetaṃ paṭhamapārājikaṭṭhakathāyaṃ ‘‘bhagavā hi…pe… ehi bhikkhu, cara brahmacariyaṃ sammā dukkhassa antakiriyāyā’’ti (pārā. aṭṭha. 1.45 bhikkhūpadabhājanīyavaṇṇanā) iminā vacanena sameti. Yattakañhi bhagavatā niyamena vuccati, tattakaṃ sabbampi aṅgameva. Sekkhaputhujjanānañhi etaṃ paripuṇṇaṃ vuccati, asekkhānaṃ pana ‘‘cara brahmacariya’’nti pariyosānanti daṭṭhabbaṃ sikkhattayasamiddhito. Lokiyasampadāhi uparibhūtā seṭṭhabhūtā sampadāti upasampadā.
೧೯-೨೧. ನೀಹಾರಭತ್ತೋತಿ ಭಿಕ್ಖೂಹಿ ಗಾಮತೋ ನೀಹರಿತ್ವಾ ದಿನ್ನಭತ್ತೋ। ಕಲ್ಲಂ ನೂತಿ ಯುತ್ತಂ ನು। ಏತಂ ಮಮಾತಿಆದಿ ಯಥಾಕ್ಕಮಂ ತಣ್ಹಾಮಾನದಿಟ್ಠಿಗಾಹಾನಂ ದಸ್ಸನಂ।
19-21.Nīhārabhattoti bhikkhūhi gāmato nīharitvā dinnabhatto. Kallaṃ nūti yuttaṃ nu. Etaṃ mamātiādi yathākkamaṃ taṇhāmānadiṭṭhigāhānaṃ dassanaṃ.
೨೨-೨೩. ತಸ್ಮಾ ತಿಹಾತಿ ಏತ್ಥ ತಿಹಾತಿ ನಿಪಾತಮತ್ತಂ, ತಸ್ಮಾತಿ ಅತ್ಥೋ। ನಿಬ್ಬಿನ್ದತೀತಿ ವುಟ್ಠಾನಗಾಮಿನಿವಿಪಸ್ಸನಾವಸೇನ ಉಕ್ಕಣ್ಠತಿ। ವಿರಜ್ಜತೀತಿ ಚತುನ್ನಂ ಮಗ್ಗಾನಂ ವಸೇನ ನ ರಜ್ಜತಿ। ವಿಮುಚ್ಚತೀತಿ ಫಲವಸೇನ ವಿಮುಚ್ಚತಿ। ವಿಮುತ್ತಸ್ಮಿನ್ತಿಆದಿ ಪಚ್ಚವೇಕ್ಖಣಞಾಣದಸ್ಸನಂ। ಬ್ರಹ್ಮಚರಿಯನ್ತಿ ಮಗ್ಗಬ್ರಹ್ಮಚರಿಯಂ। ಕರಣೀಯಂ ಚತೂಸು ಸಚ್ಚೇಸು ಚತೂಹಿ ಮಗ್ಗೇಹಿ ಪಚ್ಚೇಕಂ ಕತ್ತಬ್ಬಂ ಪರಿಞ್ಞಾದಿವಸೇನ ಸೋಳಸವಿಧಂ ಕಿಚ್ಚಂ। ನಾಪರಂ ಇತ್ಥತ್ತಾಯಾತಿ ಇತ್ಥಭಾವಾಯ ಸೋಳಸಕಿಚ್ಚಭಾವಾಯ, ಕಿಲೇಸಕ್ಖಯಾಯ ವಾ ಅಪರಂ ಪುನ ಮಗ್ಗಭಾವನಾಕಿಚ್ಚಂ ಮೇ ನತ್ಥೀತಿ ಪಜಾನಾತಿ। ಅಥ ವಾ ಇತ್ಥತ್ತಾಯಾತಿ ಇತ್ಥಭಾವತೋ ವತ್ತಮಾನಕ್ಖನ್ಧಸನ್ತಾನತೋ ಅಪರಂ ಖನ್ಧಸನ್ತಾನಂ ಮಯ್ಹಂ ನ ಭವಿಸ್ಸತೀತಿ ಅತ್ಥೋ।
22-23.Tasmātihāti ettha tihāti nipātamattaṃ, tasmāti attho. Nibbindatīti vuṭṭhānagāminivipassanāvasena ukkaṇṭhati. Virajjatīti catunnaṃ maggānaṃ vasena na rajjati. Vimuccatīti phalavasena vimuccati. Vimuttasmintiādi paccavekkhaṇañāṇadassanaṃ. Brahmacariyanti maggabrahmacariyaṃ. Karaṇīyaṃ catūsu saccesu catūhi maggehi paccekaṃ kattabbaṃ pariññādivasena soḷasavidhaṃ kiccaṃ. Nāparaṃ itthattāyāti itthabhāvāya soḷasakiccabhāvāya, kilesakkhayāya vā aparaṃ puna maggabhāvanākiccaṃ me natthīti pajānāti. Atha vā itthattāyāti itthabhāvato vattamānakkhandhasantānato aparaṃ khandhasantānaṃ mayhaṃ na bhavissatīti attho.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೬. ಪಞ್ಚವಗ್ಗಿಯಕಥಾ • 6. Pañcavaggiyakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಪಞ್ಚವಗ್ಗಿಯಕಥಾ • Pañcavaggiyakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā
ಪಞ್ಚವಗ್ಗಿಯಕಥಾವಣ್ಣನಾ • Pañcavaggiyakathāvaṇṇanā
ಧಮ್ಮಚಕ್ಕಪ್ಪವತ್ತನಸುತ್ತವಣ್ಣನಾ • Dhammacakkappavattanasuttavaṇṇanā
ಅನತ್ತಲಕ್ಖಣಸುತ್ತವಣ್ಣನಾ • Anattalakkhaṇasuttavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಞ್ಚವಗ್ಗಿಯಕಥಾವಣ್ಣನಾ • Pañcavaggiyakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೬. ಪಞ್ಚವಗ್ಗಿಯಕಥಾ • 6. Pañcavaggiyakathā
