| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பஞ்சவத்து²யாசனகதா²வண்ணனா
Pañcavatthuyācanakathāvaṇṇanā
343. திகபோ⁴ஜனந்தி தீஹி பு⁴ஞ்ஜிதப்³ப³போ⁴ஜனங், திண்ணங் ஏகதோ படிக்³க³ஹெத்வா பு⁴ஞ்ஜிதுங் பஞ்ஞபெஸ்ஸாமீதி அத்தோ². கோகாலிகோதிஆதீ³னி சதுன்னங் தே³வத³த்தபக்கி²யானங் க³ணபாமொக்கா²னங் நாமானி. ஆயுகப்பந்தி ஏகங் மஹாகப்பங் அஸீதிபா⁴க³ங் கத்வா ததோ ஏகபா⁴க³மத்தங் காலங் அந்தரகப்பஸஞ்ஞிதங் காலங்.
343.Tikabhojananti tīhi bhuñjitabbabhojanaṃ, tiṇṇaṃ ekato paṭiggahetvā bhuñjituṃ paññapessāmīti attho. Kokālikotiādīni catunnaṃ devadattapakkhiyānaṃ gaṇapāmokkhānaṃ nāmāni. Āyukappanti ekaṃ mahākappaṃ asītibhāgaṃ katvā tato ekabhāgamattaṃ kālaṃ antarakappasaññitaṃ kālaṃ.
ஆயஸ்மந்தங் ஆனந்த³ங் ஏதத³வோசாதி (உதா³॰ அட்ட²॰ 48) தே³வத³த்தோ ஸப்³ப³ங் ஸங்க⁴பே⁴த³ஸ்ஸ புப்³ப³பா⁴க³ங் நிப்பா²தெ³த்வா ‘‘ஏகங்ஸேனேவ அஜ்ஜ ஆவேணிகங் உபோஸத²ங் ஸங்க⁴கம்மஞ்ச கரிஸ்ஸாமீ’’தி சிந்தெத்வா ஏதங் ‘‘அஜ்ஜதக்³கே³’’திஆதி³வசனங் அவோச. தத்த² அஞ்ஞத்ரேவ ப⁴க³வதாதி வினா ஏவ ப⁴க³வந்தங், தங் ஸத்தா²ரங் அகத்வாதி அத்தோ². அஞ்ஞத்ர பி⁴க்கு²ஸங்கா⁴ உபோஸத²ங் கரிஸ்ஸாமி ஸங்க⁴கம்மானி சாதி ப⁴க³வதோ ஓவாத³காரகங் பி⁴க்கு²ஸங்க⁴ங் வினா மங் அனுவத்தந்தேஹி பி⁴க்கூ²ஹி ஸத்³தி⁴ங் ஆவேணிகங் உபோஸத²ங் ஸங்க⁴கம்மானி ச கரிஸ்ஸாமி. அஜ்ஜதக்³கே³, ப⁴ந்தே, தே³வத³த்தோ ஸங்க⁴ங் பி⁴ந்தி³ஸ்ஸதீதி பே⁴த³காரகானங் ஸப்³பே³ஸங் தே³வத³த்தேன ஸஜ்ஜிதத்தா ‘‘ஏகங்ஸேனேவ தே³வத³த்தோ அஜ்ஜ ஸங்க⁴ங் பி⁴ந்தி³ஸ்ஸதீ’’தி மஞ்ஞமானோ ஏவமாஹ. பி⁴ந்தி³ஸ்ஸதீதி த்³விதா⁴ கரிஸ்ஸதி.
Āyasmantaṃ ānandaṃ etadavocāti (udā. aṭṭha. 48) devadatto sabbaṃ saṅghabhedassa pubbabhāgaṃ nipphādetvā ‘‘ekaṃseneva ajja āveṇikaṃ uposathaṃ saṅghakammañca karissāmī’’ti cintetvā etaṃ ‘‘ajjatagge’’tiādivacanaṃ avoca. Tattha aññatreva bhagavatāti vinā eva bhagavantaṃ, taṃ satthāraṃ akatvāti attho. Aññatra bhikkhusaṅghā uposathaṃ karissāmi saṅghakammāni cāti bhagavato ovādakārakaṃ bhikkhusaṅghaṃ vinā maṃ anuvattantehi bhikkhūhi saddhiṃ āveṇikaṃ uposathaṃ saṅghakammāni ca karissāmi. Ajjatagge, bhante, devadatto saṅghaṃ bhindissatīti bhedakārakānaṃ sabbesaṃ devadattena sajjitattā ‘‘ekaṃseneva devadatto ajja saṅghaṃ bhindissatī’’ti maññamāno evamāha. Bhindissatīti dvidhā karissati.
ஏதமத்த²ங் விதி³த்வாதி ஏதங் அவீசிமஹானிரயுப்பத்திஸங்வத்தனியங் கப்பட்டி²யங் அதேகிச்ச²ங் தே³வத³த்தேன நிப்³ப³த்தியமானங் ஸங்க⁴பே⁴த³கம்மங் ஸப்³பா³காரதோ விதி³த்வா. இமங் உதா³னந்தி குஸலாகுஸலேஸு யதா²க்கமங் ஸப்புரிஸாஸப்புரிஸானங் ஸுகரா படிபத்தி, ந பன நேஸங் அகுஸலகுஸலேஸூதி இத³மத்த²விபா⁴வனங் உதா³னங் உதா³னேஸி.
Etamatthaṃviditvāti etaṃ avīcimahānirayuppattisaṃvattaniyaṃ kappaṭṭhiyaṃ atekicchaṃ devadattena nibbattiyamānaṃ saṅghabhedakammaṃ sabbākārato viditvā. Imaṃ udānanti kusalākusalesu yathākkamaṃ sappurisāsappurisānaṃ sukarā paṭipatti, na pana nesaṃ akusalakusalesūti idamatthavibhāvanaṃ udānaṃ udānesi.
தத்த² ஸுகரங் ஸாது⁴னா ஸாதூ⁴தி அத்தனோ பரேஸஞ்ச ஹிதங் ஸாதே⁴தீதி ஸாது⁴, ஸம்மாபடிபன்னோ. தேன ஸாது⁴னா ஸாரிபுத்தாதி³னா ஸாவகேன பச்சேகஸம்பு³த்³தே⁴ன ஸம்மாஸம்பு³த்³தே⁴ன அஞ்ஞேன வா லோகியஸாது⁴னா ஸாது⁴ ஸுந்த³ரங் ப⁴த்³த³கங் அத்தனோ பரேஸஞ்ச ஹிதஸுகா²வஹங் ஸுகரங் ஸுகே²ன காதுங் ஸக்கா. ஸாது⁴ பாபேன து³க்கரந்தி ததே³வ பன வுத்தலக்க²ணங் ஸாது⁴ பாபேன தே³வத³த்தாதி³னா பாபபுக்³க³லேன து³க்கரங் காதுங் ந ஸக்கா, ந ஸோ தங் காதுங் ஸக்கோதீதி அத்தோ². பாபங் பாபேன ஸுகரந்தி பாபங் அஸுந்த³ரங் அத்தனோ பரேஸஞ்ச அனத்தா²வஹங் பாபேன யதா²வுத்தபாபபுக்³க³லேன ஸுகரங் ஸுகே²ன காதுங் ஸக்குணெய்யங். பாபமரியேஹி து³க்கரந்தி அரியேஹி பன பு³த்³தா⁴தீ³ஹி தங் பாபங் து³க்கரங் து³ரபி⁴ஸம்ப⁴வங். ஸேதுகா⁴தோயேவ ஹி தேஸங் தத்தா²தி தீ³பேதி.
Tattha sukaraṃ sādhunā sādhūti attano paresañca hitaṃ sādhetīti sādhu, sammāpaṭipanno. Tena sādhunā sāriputtādinā sāvakena paccekasambuddhena sammāsambuddhena aññena vā lokiyasādhunā sādhu sundaraṃ bhaddakaṃ attano paresañca hitasukhāvahaṃ sukaraṃ sukhena kātuṃ sakkā. Sādhu pāpena dukkaranti tadeva pana vuttalakkhaṇaṃ sādhu pāpena devadattādinā pāpapuggalena dukkaraṃ kātuṃ na sakkā, na so taṃ kātuṃ sakkotīti attho. Pāpaṃ pāpena sukaranti pāpaṃ asundaraṃ attano paresañca anatthāvahaṃ pāpena yathāvuttapāpapuggalena sukaraṃ sukhena kātuṃ sakkuṇeyyaṃ. Pāpamariyehi dukkaranti ariyehi pana buddhādīhi taṃ pāpaṃ dukkaraṃ durabhisambhavaṃ. Setughātoyeva hi tesaṃ tatthāti dīpeti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / பஞ்சவத்து²யாசனகதா² • Pañcavatthuyācanakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பகாஸனீயகம்மாதி³கதா² • Pakāsanīyakammādikathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ச²ஸக்யபப்³ப³ஜ்ஜாகதா²வண்ணனா • Chasakyapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ச²ஸக்யபப்³ப³ஜ்ஜாகதா²தி³வண்ணனா • Chasakyapabbajjākathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / பகாஸனீயகம்மாதி³கதா² • Pakāsanīyakammādikathā
