| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. গহপতিৰগ্গো
5. Gahapativaggo
১. পঞ্চৰেরভযসুত্তৰণ্ণনা
1. Pañcaverabhayasuttavaṇṇanā
৪১. গহপতিৰগ্গস্স পঠমে যতোতি যদা। ভযানি ৰেরানীতি ভযৰেরচেতনাযো। সোতাপত্তিযঙ্গেহীতি দুৰিধং সোতাপত্তিযা অঙ্গং, (সোতাপত্তিযা চ অঙ্গং,) যং পুব্বভাগে সোতাপত্তিপটিলাভায সংৰত্ততি, ‘‘সপ্পুরিসসংসেৰো সদ্ধম্মস্সৰনং যোনিসোমনসিকারো ধম্মানুধম্মপ্পটিপত্তী’’তি (দী॰ নি॰ ৩.৩১১) এৰং আগতং, পটিলদ্ধগুণস্স চ সোতাপত্তিং পত্ৰা ঠিতস্স অঙ্গং, যং সোতাপন্নস্স অঙ্গন্তিপি ৰুচ্চতি, বুদ্ধে অৰেচ্চপ্পসাদাদীনং এতং অধিৰচনং। ইদমিধ অধিপ্পেতং। অরিযোতি নিদ্দোসো নিরুপারম্ভো। ঞাযোতি পটিচ্চসমুপ্পন্নং ঞত্ৰা ঠিতঞাণম্পি পটিচ্চসমুপ্পাদোপি। যথাহ – ‘‘ঞাযো ৰুচ্চতি পটিচ্চসমুপ্পাদো, অরিযোপি অট্ঠঙ্গিকো মগ্গো ঞাযো’’তি। পঞ্ঞাযাতি অপরাপরং উপ্পন্নায ৰিপস্সনাপঞ্ঞায। সুদিট্ঠো হোতীতি অপরাপরং উপ্পজ্জিত্ৰা দস্সনৰসেন সুট্ঠু দিট্ঠো।
41. Gahapativaggassa paṭhame yatoti yadā. Bhayāni verānīti bhayaveracetanāyo. Sotāpattiyaṅgehīti duvidhaṃ sotāpattiyā aṅgaṃ, (sotāpattiyā ca aṅgaṃ,) yaṃ pubbabhāge sotāpattipaṭilābhāya saṃvattati, ‘‘sappurisasaṃsevo saddhammassavanaṃ yonisomanasikāro dhammānudhammappaṭipattī’’ti (dī. ni. 3.311) evaṃ āgataṃ, paṭiladdhaguṇassa ca sotāpattiṃ patvā ṭhitassa aṅgaṃ, yaṃ sotāpannassa aṅgantipi vuccati, buddhe aveccappasādādīnaṃ etaṃ adhivacanaṃ. Idamidha adhippetaṃ. Ariyoti niddoso nirupārambho. Ñāyoti paṭiccasamuppannaṃ ñatvā ṭhitañāṇampi paṭiccasamuppādopi. Yathāha – ‘‘ñāyo vuccati paṭiccasamuppādo, ariyopi aṭṭhaṅgiko maggo ñāyo’’ti. Paññāyāti aparāparaṃ uppannāya vipassanāpaññāya. Sudiṭṭho hotīti aparāparaṃ uppajjitvā dassanavasena suṭṭhu diṭṭho.
খীণনিরযোতিআদীসু আযতিং তত্থ অনুপ্পজ্জনতায খীণো নিরযো ময্হন্তি সো অহং খীণনিরযো। এস নযো সব্বত্থ। সোতাপন্নোতি মগ্গসোতং আপন্নো। অৰিনিপাতধম্মোতি ন ৰিনিপাতসভাৰো । নিযতোতি পঠমমগ্গসঙ্খাতেন সম্মত্তনিযামেন নিযতো। সম্বোধিপরাযনোতি উত্তরিমগ্গত্তযসঙ্খাতো সম্বোধি পরং অযনং ময্হন্তি সোহং সম্বোধিপরাযনো, তং সম্বোধিং অৰস্সং অভিসম্বুজ্ঝনকোতি অত্থো।
Khīṇanirayotiādīsu āyatiṃ tattha anuppajjanatāya khīṇo nirayo mayhanti so ahaṃ khīṇanirayo. Esa nayo sabbattha. Sotāpannoti maggasotaṃ āpanno. Avinipātadhammoti na vinipātasabhāvo . Niyatoti paṭhamamaggasaṅkhātena sammattaniyāmena niyato. Sambodhiparāyanoti uttarimaggattayasaṅkhāto sambodhi paraṃ ayanaṃ mayhanti sohaṃ sambodhiparāyano, taṃ sambodhiṃ avassaṃ abhisambujjhanakoti attho.
পাণাতিপাতপচ্চযাতি পাণাতিপাতকম্মকারণা। ভযং ৰেরন্তি অত্থতো একং। ৰেরঞ্চ নামেতং দুৰিধং হোতি বাহিরং অজ্ঝত্তিকন্তি। একেন হি একস্স পিতা মারিতো হোতি, সো চিন্তেসি ‘‘এতেন কির মে পিতা মারিতো, অহম্পি তংযেৰ মারেস্সামী’’তি নিসিতং সত্থং আদায চরতি। যা তস্স অব্ভন্তরে উপ্পন্নৰেরচেতনা, ইদং বাহিরং ৰেরং নাম। যা পন ইতরস্স ‘‘অযং কির মং মারেস্সামীতি চরতি, অহমেৰ নং পঠমতরং মারেস্সামী’’তি চেতনা উপ্পজ্জতি, ইদং অজ্ঝত্তিকং ৰেরং নাম। ইদং তাৰ উভযম্পি দিট্ঠধম্মিকমেৰ। যা পন তং নিরযে উপ্পন্নং দিস্ৰা ‘‘এতং পহরিস্সামী’’তি জলিতং অযমুগ্গরং গণ্হতো নিরযপালস্স চেতনা উপ্পজ্জতি, ইদমস্স সম্পরাযিকং বাহিরৰেরং। যা চস্স ‘‘অযং নিদ্দোসং মং পহরিস্সামীতি আগচ্ছতি, অহমেৰ নং পঠমতরং পহরিস্সামী’’তি চেতনা উপ্পজ্জতি, ইদমস্স সম্পরাযিকং অজ্ঝত্তৰেরং। যং পনেতং বাহিরৰেরং, তং অট্ঠকথাযং ‘‘পুগ্গলৰের’’ন্তি ৰুত্তং। দুক্খং দোমনস্সন্তি অত্থতো একমেৰ। যথা চেত্থ, এৰং সেসপদেসুপি ‘‘ইমিনা মম ভণ্ডং হটং , ময্হং দারেসু চারিত্তং আপন্নং, মুসা ৰত্ৰা অত্থো ভগ্গো, সুরামদমত্তেন ইদং নাম কত’’ন্তিআদিনা নযেন ৰেরুপ্পত্তি ৰেদিতব্বা। অৰেচ্চপ্পসাদেনাতি অধিগতেন অচলপ্পসাদেন। অরিযকন্তেহীতি পঞ্চহি সীলেহি। তানি হি অরিযানং কন্তানি পিযানি। ভৰন্তরগতাপি অরিযা তানি ন ৰিজহন্তি, তস্মা ‘‘অরিযকন্তানী’’তি ৰুচ্চন্তি। সেসমেত্থ যং ৰত্তব্বং সিযা, তং সব্বং ৰিসুদ্ধিমগ্গে অনুস্সতিনিদ্দেসে ৰুত্তমেৰ। পঠমং।
Pāṇātipātapaccayāti pāṇātipātakammakāraṇā. Bhayaṃ veranti atthato ekaṃ. Verañca nāmetaṃ duvidhaṃ hoti bāhiraṃ ajjhattikanti. Ekena hi ekassa pitā mārito hoti, so cintesi ‘‘etena kira me pitā mārito, ahampi taṃyeva māressāmī’’ti nisitaṃ satthaṃ ādāya carati. Yā tassa abbhantare uppannaveracetanā, idaṃ bāhiraṃ veraṃ nāma. Yā pana itarassa ‘‘ayaṃ kira maṃ māressāmīti carati, ahameva naṃ paṭhamataraṃ māressāmī’’ti cetanā uppajjati, idaṃ ajjhattikaṃ veraṃ nāma. Idaṃ tāva ubhayampi diṭṭhadhammikameva. Yā pana taṃ niraye uppannaṃ disvā ‘‘etaṃ paharissāmī’’ti jalitaṃ ayamuggaraṃ gaṇhato nirayapālassa cetanā uppajjati, idamassa samparāyikaṃ bāhiraveraṃ. Yā cassa ‘‘ayaṃ niddosaṃ maṃ paharissāmīti āgacchati, ahameva naṃ paṭhamataraṃ paharissāmī’’ti cetanā uppajjati, idamassa samparāyikaṃ ajjhattaveraṃ. Yaṃ panetaṃ bāhiraveraṃ, taṃ aṭṭhakathāyaṃ ‘‘puggalavera’’nti vuttaṃ. Dukkhaṃ domanassanti atthato ekameva. Yathā cettha, evaṃ sesapadesupi ‘‘iminā mama bhaṇḍaṃ haṭaṃ , mayhaṃ dāresu cārittaṃ āpannaṃ, musā vatvā attho bhaggo, surāmadamattena idaṃ nāma kata’’ntiādinā nayena veruppatti veditabbā. Aveccappasādenāti adhigatena acalappasādena. Ariyakantehīti pañcahi sīlehi. Tāni hi ariyānaṃ kantāni piyāni. Bhavantaragatāpi ariyā tāni na vijahanti, tasmā ‘‘ariyakantānī’’ti vuccanti. Sesamettha yaṃ vattabbaṃ siyā, taṃ sabbaṃ visuddhimagge anussatiniddese vuttameva. Paṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. পঞ্চৰেরভযসুত্তং • 1. Pañcaverabhayasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. পঞ্চৰেরভযসুত্তৰণ্ণনা • 1. Pañcaverabhayasuttavaṇṇanā
