| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
10. த³ஸமவக்³கோ³
10. Dasamavaggo
(98) 4. பஞ்சவிஞ்ஞாணா குஸலாபி அகுஸலாபீதிகதா²
(98) 4. Pañcaviññāṇā kusalāpi akusalāpītikathā
580. பஞ்சவிஞ்ஞாணா குஸலாபி அகுஸலாபீதி? ஆமந்தா. நனு பஞ்சவிஞ்ஞாணா உப்பன்னவத்து²கா உப்பன்னாரம்மணாதி? ஆமந்தா. ஹஞ்சி பஞ்சவிஞ்ஞாணா உப்பன்னவத்து²கா உப்பன்னாரம்மணா, நோ ச வத ரே வத்தப்³பே³ – ‘‘பஞ்சவிஞ்ஞாணா குஸலாபி அகுஸலாபீ’’தி. நனு பஞ்சவிஞ்ஞாணா புரேஜாதவத்து²கா புரேஜாதாரம்மணா அஜ்ஜ²த்திகவத்து²கா பா³ஹிராரம்மணா அஸம்பி⁴ன்னவத்து²கா அஸம்பி⁴ன்னாரம்மணா நானாவத்து²கா நானாரம்மணா ந அஞ்ஞமஞ்ஞஸ்ஸ கோ³சரவிஸயங் பச்சனுபொ⁴ந்தி, ந அஸமன்னாஹாரா உப்பஜ்ஜந்தி, ந அமனஸிகாரா உப்பஜ்ஜந்தி, ந அப்³போ³கிண்ணா உப்பஜ்ஜந்தி, ந அபுப்³ப³ங் அசரிமங் உப்பஜ்ஜந்தி, ந அஞ்ஞமஞ்ஞஸ்ஸ ஸமனந்தரா உப்பஜ்ஜந்தி, நனு பஞ்சவிஞ்ஞாணா அனாபோ⁴கா³தி? ஆமந்தா. ஹஞ்சி பஞ்சவிஞ்ஞாணா அனாபோ⁴கா³, நோ ச வத ரே வத்தப்³பே³ – ‘‘பஞ்சவிஞ்ஞாணா குஸலாபி அகுஸலாபீ’’தி.
580. Pañcaviññāṇā kusalāpi akusalāpīti? Āmantā. Nanu pañcaviññāṇā uppannavatthukā uppannārammaṇāti? Āmantā. Hañci pañcaviññāṇā uppannavatthukā uppannārammaṇā, no ca vata re vattabbe – ‘‘pañcaviññāṇā kusalāpi akusalāpī’’ti. Nanu pañcaviññāṇā purejātavatthukā purejātārammaṇā ajjhattikavatthukā bāhirārammaṇā asambhinnavatthukā asambhinnārammaṇā nānāvatthukā nānārammaṇā na aññamaññassa gocaravisayaṃ paccanubhonti, na asamannāhārā uppajjanti, na amanasikārā uppajjanti, na abbokiṇṇā uppajjanti, na apubbaṃ acarimaṃ uppajjanti, na aññamaññassa samanantarā uppajjanti, nanu pañcaviññāṇā anābhogāti? Āmantā. Hañci pañcaviññāṇā anābhogā, no ca vata re vattabbe – ‘‘pañcaviññāṇā kusalāpi akusalāpī’’ti.
581. சக்கு²விஞ்ஞாணங் குஸலந்தி? ஆமந்தா. சக்கு²விஞ்ஞாணங் ஸுஞ்ஞதங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰… சக்கு²விஞ்ஞாணங் ஸுஞ்ஞதங் ஆரப்³ப⁴ உப்பஜ்ஜதீதி? ஆமந்தா. சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ந ஹேவங் வத்தப்³பே³. சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ஆமந்தா. சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? நத்தி². ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? ஆமந்தா . ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி.
581. Cakkhuviññāṇaṃ kusalanti? Āmantā. Cakkhuviññāṇaṃ suññataṃ ārabbha uppajjatīti? Na hevaṃ vattabbe…pe… cakkhuviññāṇaṃ suññataṃ ārabbha uppajjatīti? Āmantā. Cakkhuñca paṭicca suññatañca uppajjati cakkhuviññāṇanti? Na hevaṃ vattabbe. Cakkhuñca paṭicca suññatañca uppajjati cakkhuviññāṇanti? Āmantā. Cakkhuñca paṭicca suññatañca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā . Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca suññatañca uppajjati cakkhuviññāṇa’’nti.
582. சக்கு²விஞ்ஞாணங் குஸலம்பி அகுஸலம்பீதி? ஆமந்தா. சக்கு²விஞ்ஞாணங் அதீதானாக³தங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰…. சக்கு²விஞ்ஞாணங் குஸலம்பி அகுஸலம்பீதி? ஆமந்தா. சக்கு²விஞ்ஞாணங் ப²ஸ்ஸங் ஆரப்³ப⁴…பே॰… சித்தங் ஆரப்³ப⁴… சக்கு²ங் ஆரப்³ப⁴…பே॰… காயங் ஆரப்³ப⁴… ஸத்³த³ங் ஆரப்³ப⁴…பே॰… பொ²ட்ட²ப்³ப³ங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰….
582. Cakkhuviññāṇaṃ kusalampi akusalampīti? Āmantā. Cakkhuviññāṇaṃ atītānāgataṃ ārabbha uppajjatīti? Na hevaṃ vattabbe…pe…. Cakkhuviññāṇaṃ kusalampi akusalampīti? Āmantā. Cakkhuviññāṇaṃ phassaṃ ārabbha…pe… cittaṃ ārabbha… cakkhuṃ ārabbha…pe… kāyaṃ ārabbha… saddaṃ ārabbha…pe… phoṭṭhabbaṃ ārabbha uppajjatīti? Na hevaṃ vattabbe…pe….
மனோவிஞ்ஞாணங் குஸலம்பி அகுஸலம்பி, மனோவிஞ்ஞாணங் ஸுஞ்ஞதங் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணங் குஸலம்பி அகுஸலம்பி, சக்கு²விஞ்ஞாணங் ஸுஞ்ஞதங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰… மனோவிஞ்ஞாணங் குஸலம்பி அகுஸலம்பி, மனோவிஞ்ஞாணங் அதீதானாக³தங் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணங் குஸலம்பி அகுஸலம்பி, சக்கு²விஞ்ஞாணங் அதீதானாக³தங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰… மனோவிஞ்ஞாணங் குஸலம்பி அகுஸலம்பி, மனோவிஞ்ஞாணங் ப²ஸ்ஸங் ஆரப்³ப⁴…பே॰… சித்தங் ஆரப்³ப⁴…பே॰… காயங் ஆரப்³ப⁴ … ஸத்³த³ங் ஆரப்³ப⁴ …பே॰… பொ²ட்ட²ப்³ப³ங் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணங் குஸலம்பி அகுஸலம்பி, சக்கு²விஞ்ஞாணங் ப²ஸ்ஸங் ஆரப்³ப⁴…பே॰… பொ²ட்ட²ப்³ப³ங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰….
Manoviññāṇaṃ kusalampi akusalampi, manoviññāṇaṃ suññataṃ ārabbha uppajjatīti? Āmantā. Cakkhuviññāṇaṃ kusalampi akusalampi, cakkhuviññāṇaṃ suññataṃ ārabbha uppajjatīti? Na hevaṃ vattabbe…pe… manoviññāṇaṃ kusalampi akusalampi, manoviññāṇaṃ atītānāgataṃ ārabbha uppajjatīti? Āmantā. Cakkhuviññāṇaṃ kusalampi akusalampi, cakkhuviññāṇaṃ atītānāgataṃ ārabbha uppajjatīti? Na hevaṃ vattabbe…pe… manoviññāṇaṃ kusalampi akusalampi, manoviññāṇaṃ phassaṃ ārabbha…pe… cittaṃ ārabbha…pe… kāyaṃ ārabbha … saddaṃ ārabbha …pe… phoṭṭhabbaṃ ārabbha uppajjatīti? Āmantā. Cakkhuviññāṇaṃ kusalampi akusalampi, cakkhuviññāṇaṃ phassaṃ ārabbha…pe… phoṭṭhabbaṃ ārabbha uppajjatīti? Na hevaṃ vattabbe…pe….
583. ந வத்தப்³ப³ங் – ‘‘பஞ்சவிஞ்ஞாணா குஸலாபி அகுஸலாபீ’’தி? ஆமந்தா. நனு வுத்தங் ப⁴க³வதா – ‘‘இத⁴, பி⁴க்க²வே, பி⁴க்கு² சக்கு²னா ரூபங் தி³ஸ்வா நிமித்தக்³கா³ஹீ ஹோதி…பே॰… ந நிமித்தக்³கா³ஹீ ஹோதி…பே॰… ஸோதேன ஸத்³த³ங் ஸுத்வா…பே॰… காயேன பொ²ட்ட²ப்³ப³ங் பு²ஸித்வா நிமித்தக்³கா³ஹீ ஹோதி…பே॰… ந நிமித்தக்³கா³ஹீ ஹோதீ’’தி! அத்தே²வ ஸுத்தந்தோதி? ஆமந்தா. தேன ஹி பஞ்சவிஞ்ஞாணா குஸலாபி அகுஸலாபீதி.
583. Na vattabbaṃ – ‘‘pañcaviññāṇā kusalāpi akusalāpī’’ti? Āmantā. Nanu vuttaṃ bhagavatā – ‘‘idha, bhikkhave, bhikkhu cakkhunā rūpaṃ disvā nimittaggāhī hoti…pe… na nimittaggāhī hoti…pe… sotena saddaṃ sutvā…pe… kāyena phoṭṭhabbaṃ phusitvā nimittaggāhī hoti…pe… na nimittaggāhī hotī’’ti! Attheva suttantoti? Āmantā. Tena hi pañcaviññāṇā kusalāpi akusalāpīti.
பஞ்சவிஞ்ஞாணா குஸலாபி அகுஸலாபீதிகதா² நிட்டி²தா.
Pañcaviññāṇā kusalāpi akusalāpītikathā niṭṭhitā.
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 4. பஞ்சவிஞ்ஞாணா குஸலாபீதிகதா²வண்ணனா • 4. Pañcaviññāṇā kusalāpītikathāvaṇṇanā
