| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১০. দসমৰগ্গো
10. Dasamavaggo
(৯৮) ৪. পঞ্চৰিঞ্ঞাণা কুসলাপি অকুসলাপীতিকথা
(98) 4. Pañcaviññāṇā kusalāpi akusalāpītikathā
৫৮০. পঞ্চৰিঞ্ঞাণা কুসলাপি অকুসলাপীতি? আমন্তা। ননু পঞ্চৰিঞ্ঞাণা উপ্পন্নৰত্থুকা উপ্পন্নারম্মণাতি? আমন্তা। হঞ্চি পঞ্চৰিঞ্ঞাণা উপ্পন্নৰত্থুকা উপ্পন্নারম্মণা, নো চ ৰত রে ৰত্তব্বে – ‘‘পঞ্চৰিঞ্ঞাণা কুসলাপি অকুসলাপী’’তি। ননু পঞ্চৰিঞ্ঞাণা পুরেজাতৰত্থুকা পুরেজাতারম্মণা অজ্ঝত্তিকৰত্থুকা বাহিরারম্মণা অসম্ভিন্নৰত্থুকা অসম্ভিন্নারম্মণা নানাৰত্থুকা নানারম্মণা ন অঞ্ঞমঞ্ঞস্স গোচরৰিসযং পচ্চনুভোন্তি, ন অসমন্নাহারা উপ্পজ্জন্তি, ন অমনসিকারা উপ্পজ্জন্তি, ন অব্বোকিণ্ণা উপ্পজ্জন্তি, ন অপুব্বং অচরিমং উপ্পজ্জন্তি, ন অঞ্ঞমঞ্ঞস্স সমনন্তরা উপ্পজ্জন্তি, ননু পঞ্চৰিঞ্ঞাণা অনাভোগাতি? আমন্তা। হঞ্চি পঞ্চৰিঞ্ঞাণা অনাভোগা, নো চ ৰত রে ৰত্তব্বে – ‘‘পঞ্চৰিঞ্ঞাণা কুসলাপি অকুসলাপী’’তি।
580. Pañcaviññāṇā kusalāpi akusalāpīti? Āmantā. Nanu pañcaviññāṇā uppannavatthukā uppannārammaṇāti? Āmantā. Hañci pañcaviññāṇā uppannavatthukā uppannārammaṇā, no ca vata re vattabbe – ‘‘pañcaviññāṇā kusalāpi akusalāpī’’ti. Nanu pañcaviññāṇā purejātavatthukā purejātārammaṇā ajjhattikavatthukā bāhirārammaṇā asambhinnavatthukā asambhinnārammaṇā nānāvatthukā nānārammaṇā na aññamaññassa gocaravisayaṃ paccanubhonti, na asamannāhārā uppajjanti, na amanasikārā uppajjanti, na abbokiṇṇā uppajjanti, na apubbaṃ acarimaṃ uppajjanti, na aññamaññassa samanantarā uppajjanti, nanu pañcaviññāṇā anābhogāti? Āmantā. Hañci pañcaviññāṇā anābhogā, no ca vata re vattabbe – ‘‘pañcaviññāṇā kusalāpi akusalāpī’’ti.
৫৮১. চক্খুৰিঞ্ঞাণং কুসলন্তি? আমন্তা। চক্খুৰিঞ্ঞাণং সুঞ্ঞতং আরব্ভ উপ্পজ্জতীতি? ন হেৰং ৰত্তব্বে…পে॰… চক্খুৰিঞ্ঞাণং সুঞ্ঞতং আরব্ভ উপ্পজ্জতীতি? আমন্তা। চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণন্তি? ন হেৰং ৰত্তব্বে। চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণন্তি? আমন্তা। চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? নত্থি। ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? আমন্তা । হঞ্চি ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তো, নো চ ৰত রে ৰত্তব্বে – ‘‘চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণ’’ন্তি।
581. Cakkhuviññāṇaṃ kusalanti? Āmantā. Cakkhuviññāṇaṃ suññataṃ ārabbha uppajjatīti? Na hevaṃ vattabbe…pe… cakkhuviññāṇaṃ suññataṃ ārabbha uppajjatīti? Āmantā. Cakkhuñca paṭicca suññatañca uppajjati cakkhuviññāṇanti? Na hevaṃ vattabbe. Cakkhuñca paṭicca suññatañca uppajjati cakkhuviññāṇanti? Āmantā. Cakkhuñca paṭicca suññatañca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā . Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca suññatañca uppajjati cakkhuviññāṇa’’nti.
৫৮২. চক্খুৰিঞ্ঞাণং কুসলম্পি অকুসলম্পীতি? আমন্তা। চক্খুৰিঞ্ঞাণং অতীতানাগতং আরব্ভ উপ্পজ্জতীতি? ন হেৰং ৰত্তব্বে…পে॰…। চক্খুৰিঞ্ঞাণং কুসলম্পি অকুসলম্পীতি? আমন্তা। চক্খুৰিঞ্ঞাণং ফস্সং আরব্ভ…পে॰… চিত্তং আরব্ভ… চক্খুং আরব্ভ…পে॰… কাযং আরব্ভ… সদ্দং আরব্ভ…পে॰… ফোট্ঠব্বং আরব্ভ উপ্পজ্জতীতি? ন হেৰং ৰত্তব্বে…পে॰…।
582. Cakkhuviññāṇaṃ kusalampi akusalampīti? Āmantā. Cakkhuviññāṇaṃ atītānāgataṃ ārabbha uppajjatīti? Na hevaṃ vattabbe…pe…. Cakkhuviññāṇaṃ kusalampi akusalampīti? Āmantā. Cakkhuviññāṇaṃ phassaṃ ārabbha…pe… cittaṃ ārabbha… cakkhuṃ ārabbha…pe… kāyaṃ ārabbha… saddaṃ ārabbha…pe… phoṭṭhabbaṃ ārabbha uppajjatīti? Na hevaṃ vattabbe…pe….
মনোৰিঞ্ঞাণং কুসলম্পি অকুসলম্পি, মনোৰিঞ্ঞাণং সুঞ্ঞতং আরব্ভ উপ্পজ্জতীতি? আমন্তা। চক্খুৰিঞ্ঞাণং কুসলম্পি অকুসলম্পি, চক্খুৰিঞ্ঞাণং সুঞ্ঞতং আরব্ভ উপ্পজ্জতীতি? ন হেৰং ৰত্তব্বে…পে॰… মনোৰিঞ্ঞাণং কুসলম্পি অকুসলম্পি, মনোৰিঞ্ঞাণং অতীতানাগতং আরব্ভ উপ্পজ্জতীতি? আমন্তা। চক্খুৰিঞ্ঞাণং কুসলম্পি অকুসলম্পি, চক্খুৰিঞ্ঞাণং অতীতানাগতং আরব্ভ উপ্পজ্জতীতি? ন হেৰং ৰত্তব্বে…পে॰… মনোৰিঞ্ঞাণং কুসলম্পি অকুসলম্পি, মনোৰিঞ্ঞাণং ফস্সং আরব্ভ…পে॰… চিত্তং আরব্ভ…পে॰… কাযং আরব্ভ … সদ্দং আরব্ভ …পে॰… ফোট্ঠব্বং আরব্ভ উপ্পজ্জতীতি? আমন্তা। চক্খুৰিঞ্ঞাণং কুসলম্পি অকুসলম্পি, চক্খুৰিঞ্ঞাণং ফস্সং আরব্ভ…পে॰… ফোট্ঠব্বং আরব্ভ উপ্পজ্জতীতি? ন হেৰং ৰত্তব্বে…পে॰…।
Manoviññāṇaṃ kusalampi akusalampi, manoviññāṇaṃ suññataṃ ārabbha uppajjatīti? Āmantā. Cakkhuviññāṇaṃ kusalampi akusalampi, cakkhuviññāṇaṃ suññataṃ ārabbha uppajjatīti? Na hevaṃ vattabbe…pe… manoviññāṇaṃ kusalampi akusalampi, manoviññāṇaṃ atītānāgataṃ ārabbha uppajjatīti? Āmantā. Cakkhuviññāṇaṃ kusalampi akusalampi, cakkhuviññāṇaṃ atītānāgataṃ ārabbha uppajjatīti? Na hevaṃ vattabbe…pe… manoviññāṇaṃ kusalampi akusalampi, manoviññāṇaṃ phassaṃ ārabbha…pe… cittaṃ ārabbha…pe… kāyaṃ ārabbha … saddaṃ ārabbha …pe… phoṭṭhabbaṃ ārabbha uppajjatīti? Āmantā. Cakkhuviññāṇaṃ kusalampi akusalampi, cakkhuviññāṇaṃ phassaṃ ārabbha…pe… phoṭṭhabbaṃ ārabbha uppajjatīti? Na hevaṃ vattabbe…pe….
৫৮৩. ন ৰত্তব্বং – ‘‘পঞ্চৰিঞ্ঞাণা কুসলাপি অকুসলাপী’’তি? আমন্তা। ননু ৰুত্তং ভগৰতা – ‘‘ইধ, ভিক্খৰে, ভিক্খু চক্খুনা রূপং দিস্ৰা নিমিত্তগ্গাহী হোতি…পে॰… ন নিমিত্তগ্গাহী হোতি…পে॰… সোতেন সদ্দং সুত্ৰা…পে॰… কাযেন ফোট্ঠব্বং ফুসিত্ৰা নিমিত্তগ্গাহী হোতি…পে॰… ন নিমিত্তগ্গাহী হোতী’’তি! অত্থেৰ সুত্তন্তোতি? আমন্তা। তেন হি পঞ্চৰিঞ্ঞাণা কুসলাপি অকুসলাপীতি।
583. Na vattabbaṃ – ‘‘pañcaviññāṇā kusalāpi akusalāpī’’ti? Āmantā. Nanu vuttaṃ bhagavatā – ‘‘idha, bhikkhave, bhikkhu cakkhunā rūpaṃ disvā nimittaggāhī hoti…pe… na nimittaggāhī hoti…pe… sotena saddaṃ sutvā…pe… kāyena phoṭṭhabbaṃ phusitvā nimittaggāhī hoti…pe… na nimittaggāhī hotī’’ti! Attheva suttantoti? Āmantā. Tena hi pañcaviññāṇā kusalāpi akusalāpīti.
পঞ্চৰিঞ্ঞাণা কুসলাপি অকুসলাপীতিকথা নিট্ঠিতা।
Pañcaviññāṇā kusalāpi akusalāpītikathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৪. পঞ্চৰিঞ্ঞাণা কুসলাপীতিকথাৰণ্ণনা • 4. Pañcaviññāṇā kusalāpītikathāvaṇṇanā
