| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
10. த³ஸமவக்³கோ³
10. Dasamavaggo
(97) 3. பஞ்சவிஞ்ஞாணஸமங்கி³ஸ்ஸ மக்³க³கதா²
(97) 3. Pañcaviññāṇasamaṅgissa maggakathā
576. பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனாதி? ஆமந்தா. நனு பஞ்சவிஞ்ஞாணா உப்பன்னவத்து²கா உப்பன்னாரம்மணாதி? ஆமந்தா. ஹஞ்சி பஞ்சவிஞ்ஞாணா உப்பன்னவத்து²கா உப்பன்னாரம்மணா, நோ ச வத ரே வத்தப்³பே³ – ‘‘பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனா’’தி.
576. Pañcaviññāṇasamaṅgissa atthi maggabhāvanāti? Āmantā. Nanu pañcaviññāṇā uppannavatthukā uppannārammaṇāti? Āmantā. Hañci pañcaviññāṇā uppannavatthukā uppannārammaṇā, no ca vata re vattabbe – ‘‘pañcaviññāṇasamaṅgissa atthi maggabhāvanā’’ti.
நனு பஞ்சவிஞ்ஞாணா புரேஜாதவத்து²கா புரேஜாதாரம்மணா அஜ்ஜ²த்திகவத்து²கா பா³ஹிராரம்மணா அஸம்பி⁴ன்னவத்து²கா அஸம்பி⁴ன்னாரம்மணா நானாவத்து²கா நானாரம்மணா ந அஞ்ஞமஞ்ஞஸ்ஸ கோ³சரவிஸயங் பச்சனுபொ⁴ந்தி, ந அஸமன்னாஹாரா உப்பஜ்ஜந்தி, ந அமனஸிகாரா உப்பஜ்ஜந்தி, ந அப்³போ³கிண்ணா உப்பஜ்ஜந்தி, ந அபுப்³ப³ங் அசரிமங் உப்பஜ்ஜந்தி, ந அஞ்ஞமஞ்ஞஸ்ஸ ஸமனந்தரா உப்பஜ்ஜந்தி, நனு பஞ்சவிஞ்ஞாணா அனாபோ⁴கா³தி? ஆமந்தா. ஹஞ்சி பஞ்சவிஞ்ஞாணா அனாபோ⁴கா³, நோ ச வத ரே வத்தப்³பே³ – ‘‘பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனா’’தி.
Nanu pañcaviññāṇā purejātavatthukā purejātārammaṇā ajjhattikavatthukā bāhirārammaṇā asambhinnavatthukā asambhinnārammaṇā nānāvatthukā nānārammaṇā na aññamaññassa gocaravisayaṃ paccanubhonti, na asamannāhārā uppajjanti, na amanasikārā uppajjanti, na abbokiṇṇā uppajjanti, na apubbaṃ acarimaṃ uppajjanti, na aññamaññassa samanantarā uppajjanti, nanu pañcaviññāṇā anābhogāti? Āmantā. Hañci pañcaviññāṇā anābhogā, no ca vata re vattabbe – ‘‘pañcaviññāṇasamaṅgissa atthi maggabhāvanā’’ti.
577. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனாதி? ஆமந்தா. சக்கு²விஞ்ஞாணங் ஸுஞ்ஞதங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰… சக்கு²விஞ்ஞாணங் ஸுஞ்ஞதங் ஆரப்³ப⁴ உப்பஜ்ஜதீதி? ஆமந்தா. சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ந ஹேவங் வத்தப்³பே³…பே॰… சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ஆமந்தா. ‘‘சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? நத்தி². ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? ஆமந்தா. ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி.
577. Cakkhuviññāṇasamaṅgissa atthi maggabhāvanāti? Āmantā. Cakkhuviññāṇaṃ suññataṃ ārabbha uppajjatīti? Na hevaṃ vattabbe…pe… cakkhuviññāṇaṃ suññataṃ ārabbha uppajjatīti? Āmantā. Cakkhuñca paṭicca suññatañca uppajjati cakkhuviññāṇanti? Na hevaṃ vattabbe…pe… cakkhuñca paṭicca suññatañca uppajjati cakkhuviññāṇanti? Āmantā. ‘‘Cakkhuñca paṭicca suññatañca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca suññatañca uppajjati cakkhuviññāṇa’’nti.
578. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனாதி? ஆமந்தா. சக்கு²விஞ்ஞாணங் அதீதானாக³தங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰… சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனாதி? ஆமந்தா. சக்கு²விஞ்ஞாணங் ப²ஸ்ஸங் ஆரப்³ப⁴…பே॰… வேத³னங் ஆரப்³ப⁴… ஸஞ்ஞங் ஆரப்³ப⁴ … சேதனங் ஆரப்³ப⁴… சித்தங் ஆரப்³ப⁴… சக்கு²ங் ஆரப்³ப⁴… காயங் ஆரப்³ப⁴…பே॰… ஸத்³த³ங் ஆரப்³ப⁴…பே॰… பொ²ட்ட²ப்³ப³ங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰….
578. Cakkhuviññāṇasamaṅgissa atthi maggabhāvanāti? Āmantā. Cakkhuviññāṇaṃ atītānāgataṃ ārabbha uppajjatīti? Na hevaṃ vattabbe…pe… cakkhuviññāṇasamaṅgissa atthi maggabhāvanāti? Āmantā. Cakkhuviññāṇaṃ phassaṃ ārabbha…pe… vedanaṃ ārabbha… saññaṃ ārabbha … cetanaṃ ārabbha… cittaṃ ārabbha… cakkhuṃ ārabbha… kāyaṃ ārabbha…pe… saddaṃ ārabbha…pe… phoṭṭhabbaṃ ārabbha uppajjatīti? Na hevaṃ vattabbe…pe….
மனோவிஞ்ஞாணஸமங்கி³ஸ்ஸ அத்தி² மக்³க³பா⁴வனா, மனோவிஞ்ஞாணங் ஸுஞ்ஞதங் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனா, சக்கு²விஞ்ஞாணங் ஸுஞ்ஞதங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰… மனோவிஞ்ஞாணஸமங்கி³ஸ்ஸ அத்தி² மக்³க³பா⁴வனா, மனோவிஞ்ஞாணங் அதீதானாக³தங் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனா, சக்கு²விஞ்ஞாணங் அதீதானாக³தங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰… மனோவிஞ்ஞாணஸமங்கி³ஸ்ஸ அத்தி² மக்³க³பா⁴வனா, மனோவிஞ்ஞாணங் ப²ஸ்ஸங் ஆரப்³ப⁴… வேத³னங் ஆரப்³ப⁴…பே॰… பொ²ட்ட²ப்³ப³ங் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனா, சக்கு²விஞ்ஞாணங் ப²ஸ்ஸங் ஆரப்³ப⁴… வேத³னங் ஆரப்³ப⁴…பே॰… பொ²ட்ட²ப்³ப³ங் ஆரப்³ப⁴ உப்பஜ்ஜதீதி? ந ஹேவங் வத்தப்³பே³…பே॰….
Manoviññāṇasamaṅgissa atthi maggabhāvanā, manoviññāṇaṃ suññataṃ ārabbha uppajjatīti? Āmantā. Cakkhuviññāṇasamaṅgissa atthi maggabhāvanā, cakkhuviññāṇaṃ suññataṃ ārabbha uppajjatīti? Na hevaṃ vattabbe…pe… manoviññāṇasamaṅgissa atthi maggabhāvanā, manoviññāṇaṃ atītānāgataṃ ārabbha uppajjatīti? Āmantā. Cakkhuviññāṇasamaṅgissa atthi maggabhāvanā, cakkhuviññāṇaṃ atītānāgataṃ ārabbha uppajjatīti? Na hevaṃ vattabbe…pe… manoviññāṇasamaṅgissa atthi maggabhāvanā, manoviññāṇaṃ phassaṃ ārabbha… vedanaṃ ārabbha…pe… phoṭṭhabbaṃ ārabbha uppajjatīti? Āmantā. Cakkhuviññāṇasamaṅgissa atthi maggabhāvanā, cakkhuviññāṇaṃ phassaṃ ārabbha… vedanaṃ ārabbha…pe… phoṭṭhabbaṃ ārabbha uppajjatīti? Na hevaṃ vattabbe…pe….
579. ந வத்தப்³ப³ங் – ‘‘பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனா’’தி? ஆமந்தா. நனு வுத்தங் ப⁴க³வதா – ‘‘இத⁴, பி⁴க்க²வே, பி⁴க்கு² சக்கு²னா ரூபங் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ…பே॰… ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ’’தி! 1 அத்தே²வ ஸுத்தந்தோதி? ஆமந்தா . தேன ஹி பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனாதி.
579. Na vattabbaṃ – ‘‘pañcaviññāṇasamaṅgissa atthi maggabhāvanā’’ti? Āmantā. Nanu vuttaṃ bhagavatā – ‘‘idha, bhikkhave, bhikkhu cakkhunā rūpaṃ disvā na nimittaggāhī hoti nānubyañjanaggāhī…pe… sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā na nimittaggāhī hoti nānubyañjanaggāhī’’ti! 2 Attheva suttantoti? Āmantā . Tena hi pañcaviññāṇasamaṅgissa atthi maggabhāvanāti.
பஞ்சவிஞ்ஞாணஸமங்கி³ஸ்ஸ மக்³க³கதா² நிட்டி²தா.
Pañcaviññāṇasamaṅgissa maggakathā niṭṭhitā.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 3. பஞ்சவிஞ்ஞாணஸமங்கி³ஸ்ஸ மக்³க³கதா²வண்ணனா • 3. Pañcaviññāṇasamaṅgissa maggakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 3. பஞ்சவிஞ்ஞாணஸமங்கி³ஸ்ஸமக்³க³கதா²வண்ணனா • 3. Pañcaviññāṇasamaṅgissamaggakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 3. பஞ்சவிஞ்ஞாணஸமங்கி³ஸ்ஸமக்³க³கதா²வண்ணனா • 3. Pañcaviññāṇasamaṅgissamaggakathāvaṇṇanā
