| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১০. দসমৰগ্গো
10. Dasamavaggo
(৯৭) ৩. পঞ্চৰিঞ্ঞাণসমঙ্গিস্স মগ্গকথা
(97) 3. Pañcaviññāṇasamaṅgissa maggakathā
৫৭৬. পঞ্চৰিঞ্ঞাণসমঙ্গিস্স অত্থি মগ্গভাৰনাতি? আমন্তা। ননু পঞ্চৰিঞ্ঞাণা উপ্পন্নৰত্থুকা উপ্পন্নারম্মণাতি? আমন্তা। হঞ্চি পঞ্চৰিঞ্ঞাণা উপ্পন্নৰত্থুকা উপ্পন্নারম্মণা, নো চ ৰত রে ৰত্তব্বে – ‘‘পঞ্চৰিঞ্ঞাণসমঙ্গিস্স অত্থি মগ্গভাৰনা’’তি।
576. Pañcaviññāṇasamaṅgissa atthi maggabhāvanāti? Āmantā. Nanu pañcaviññāṇā uppannavatthukā uppannārammaṇāti? Āmantā. Hañci pañcaviññāṇā uppannavatthukā uppannārammaṇā, no ca vata re vattabbe – ‘‘pañcaviññāṇasamaṅgissa atthi maggabhāvanā’’ti.
ননু পঞ্চৰিঞ্ঞাণা পুরেজাতৰত্থুকা পুরেজাতারম্মণা অজ্ঝত্তিকৰত্থুকা বাহিরারম্মণা অসম্ভিন্নৰত্থুকা অসম্ভিন্নারম্মণা নানাৰত্থুকা নানারম্মণা ন অঞ্ঞমঞ্ঞস্স গোচরৰিসযং পচ্চনুভোন্তি, ন অসমন্নাহারা উপ্পজ্জন্তি, ন অমনসিকারা উপ্পজ্জন্তি, ন অব্বোকিণ্ণা উপ্পজ্জন্তি, ন অপুব্বং অচরিমং উপ্পজ্জন্তি, ন অঞ্ঞমঞ্ঞস্স সমনন্তরা উপ্পজ্জন্তি, ননু পঞ্চৰিঞ্ঞাণা অনাভোগাতি? আমন্তা। হঞ্চি পঞ্চৰিঞ্ঞাণা অনাভোগা, নো চ ৰত রে ৰত্তব্বে – ‘‘পঞ্চৰিঞ্ঞাণসমঙ্গিস্স অত্থি মগ্গভাৰনা’’তি।
Nanu pañcaviññāṇā purejātavatthukā purejātārammaṇā ajjhattikavatthukā bāhirārammaṇā asambhinnavatthukā asambhinnārammaṇā nānāvatthukā nānārammaṇā na aññamaññassa gocaravisayaṃ paccanubhonti, na asamannāhārā uppajjanti, na amanasikārā uppajjanti, na abbokiṇṇā uppajjanti, na apubbaṃ acarimaṃ uppajjanti, na aññamaññassa samanantarā uppajjanti, nanu pañcaviññāṇā anābhogāti? Āmantā. Hañci pañcaviññāṇā anābhogā, no ca vata re vattabbe – ‘‘pañcaviññāṇasamaṅgissa atthi maggabhāvanā’’ti.
৫৭৭. চক্খুৰিঞ্ঞাণসমঙ্গিস্স অত্থি মগ্গভাৰনাতি? আমন্তা। চক্খুৰিঞ্ঞাণং সুঞ্ঞতং আরব্ভ উপ্পজ্জতীতি? ন হেৰং ৰত্তব্বে…পে॰… চক্খুৰিঞ্ঞাণং সুঞ্ঞতং আরব্ভ উপ্পজ্জতীতি? আমন্তা। চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণন্তি? ন হেৰং ৰত্তব্বে…পে॰… চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণন্তি? আমন্তা। ‘‘চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? নত্থি। ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? আমন্তা। হঞ্চি ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তো, নো চ ৰত রে ৰত্তব্বে – ‘‘চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণ’’ন্তি।
577. Cakkhuviññāṇasamaṅgissa atthi maggabhāvanāti? Āmantā. Cakkhuviññāṇaṃ suññataṃ ārabbha uppajjatīti? Na hevaṃ vattabbe…pe… cakkhuviññāṇaṃ suññataṃ ārabbha uppajjatīti? Āmantā. Cakkhuñca paṭicca suññatañca uppajjati cakkhuviññāṇanti? Na hevaṃ vattabbe…pe… cakkhuñca paṭicca suññatañca uppajjati cakkhuviññāṇanti? Āmantā. ‘‘Cakkhuñca paṭicca suññatañca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca suññatañca uppajjati cakkhuviññāṇa’’nti.
৫৭৮. চক্খুৰিঞ্ঞাণসমঙ্গিস্স অত্থি মগ্গভাৰনাতি? আমন্তা। চক্খুৰিঞ্ঞাণং অতীতানাগতং আরব্ভ উপ্পজ্জতীতি? ন হেৰং ৰত্তব্বে…পে॰… চক্খুৰিঞ্ঞাণসমঙ্গিস্স অত্থি মগ্গভাৰনাতি? আমন্তা। চক্খুৰিঞ্ঞাণং ফস্সং আরব্ভ…পে॰… ৰেদনং আরব্ভ… সঞ্ঞং আরব্ভ … চেতনং আরব্ভ… চিত্তং আরব্ভ… চক্খুং আরব্ভ… কাযং আরব্ভ…পে॰… সদ্দং আরব্ভ…পে॰… ফোট্ঠব্বং আরব্ভ উপ্পজ্জতীতি? ন হেৰং ৰত্তব্বে…পে॰…।
578. Cakkhuviññāṇasamaṅgissa atthi maggabhāvanāti? Āmantā. Cakkhuviññāṇaṃ atītānāgataṃ ārabbha uppajjatīti? Na hevaṃ vattabbe…pe… cakkhuviññāṇasamaṅgissa atthi maggabhāvanāti? Āmantā. Cakkhuviññāṇaṃ phassaṃ ārabbha…pe… vedanaṃ ārabbha… saññaṃ ārabbha … cetanaṃ ārabbha… cittaṃ ārabbha… cakkhuṃ ārabbha… kāyaṃ ārabbha…pe… saddaṃ ārabbha…pe… phoṭṭhabbaṃ ārabbha uppajjatīti? Na hevaṃ vattabbe…pe….
মনোৰিঞ্ঞাণসমঙ্গিস্স অত্থি মগ্গভাৰনা, মনোৰিঞ্ঞাণং সুঞ্ঞতং আরব্ভ উপ্পজ্জতীতি? আমন্তা। চক্খুৰিঞ্ঞাণসমঙ্গিস্স অত্থি মগ্গভাৰনা, চক্খুৰিঞ্ঞাণং সুঞ্ঞতং আরব্ভ উপ্পজ্জতীতি? ন হেৰং ৰত্তব্বে…পে॰… মনোৰিঞ্ঞাণসমঙ্গিস্স অত্থি মগ্গভাৰনা, মনোৰিঞ্ঞাণং অতীতানাগতং আরব্ভ উপ্পজ্জতীতি? আমন্তা। চক্খুৰিঞ্ঞাণসমঙ্গিস্স অত্থি মগ্গভাৰনা, চক্খুৰিঞ্ঞাণং অতীতানাগতং আরব্ভ উপ্পজ্জতীতি? ন হেৰং ৰত্তব্বে…পে॰… মনোৰিঞ্ঞাণসমঙ্গিস্স অত্থি মগ্গভাৰনা, মনোৰিঞ্ঞাণং ফস্সং আরব্ভ… ৰেদনং আরব্ভ…পে॰… ফোট্ঠব্বং আরব্ভ উপ্পজ্জতীতি? আমন্তা। চক্খুৰিঞ্ঞাণসমঙ্গিস্স অত্থি মগ্গভাৰনা, চক্খুৰিঞ্ঞাণং ফস্সং আরব্ভ… ৰেদনং আরব্ভ…পে॰… ফোট্ঠব্বং আরব্ভ উপ্পজ্জতীতি? ন হেৰং ৰত্তব্বে…পে॰…।
Manoviññāṇasamaṅgissa atthi maggabhāvanā, manoviññāṇaṃ suññataṃ ārabbha uppajjatīti? Āmantā. Cakkhuviññāṇasamaṅgissa atthi maggabhāvanā, cakkhuviññāṇaṃ suññataṃ ārabbha uppajjatīti? Na hevaṃ vattabbe…pe… manoviññāṇasamaṅgissa atthi maggabhāvanā, manoviññāṇaṃ atītānāgataṃ ārabbha uppajjatīti? Āmantā. Cakkhuviññāṇasamaṅgissa atthi maggabhāvanā, cakkhuviññāṇaṃ atītānāgataṃ ārabbha uppajjatīti? Na hevaṃ vattabbe…pe… manoviññāṇasamaṅgissa atthi maggabhāvanā, manoviññāṇaṃ phassaṃ ārabbha… vedanaṃ ārabbha…pe… phoṭṭhabbaṃ ārabbha uppajjatīti? Āmantā. Cakkhuviññāṇasamaṅgissa atthi maggabhāvanā, cakkhuviññāṇaṃ phassaṃ ārabbha… vedanaṃ ārabbha…pe… phoṭṭhabbaṃ ārabbha uppajjatīti? Na hevaṃ vattabbe…pe….
৫৭৯. ন ৰত্তব্বং – ‘‘পঞ্চৰিঞ্ঞাণসমঙ্গিস্স অত্থি মগ্গভাৰনা’’তি? আমন্তা। ননু ৰুত্তং ভগৰতা – ‘‘ইধ, ভিক্খৰে, ভিক্খু চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী…পে॰… সোতেন সদ্দং সুত্ৰা…পে॰… ঘানেন গন্ধং ঘাযিত্ৰা…পে॰… জিৰ্হায রসং সাযিত্ৰা…পে॰… কাযেন ফোট্ঠব্বং ফুসিত্ৰা ন নিমিত্তগ্গাহী হোতি নানুব্যঞ্জনগ্গাহী’’তি! 1 অত্থেৰ সুত্তন্তোতি? আমন্তা । তেন হি পঞ্চৰিঞ্ঞাণসমঙ্গিস্স অত্থি মগ্গভাৰনাতি।
579. Na vattabbaṃ – ‘‘pañcaviññāṇasamaṅgissa atthi maggabhāvanā’’ti? Āmantā. Nanu vuttaṃ bhagavatā – ‘‘idha, bhikkhave, bhikkhu cakkhunā rūpaṃ disvā na nimittaggāhī hoti nānubyañjanaggāhī…pe… sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā na nimittaggāhī hoti nānubyañjanaggāhī’’ti! 2 Attheva suttantoti? Āmantā . Tena hi pañcaviññāṇasamaṅgissa atthi maggabhāvanāti.
পঞ্চৰিঞ্ঞাণসমঙ্গিস্স মগ্গকথা নিট্ঠিতা।
Pañcaviññāṇasamaṅgissa maggakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. পঞ্চৰিঞ্ঞাণসমঙ্গিস্স মগ্গকথাৰণ্ণনা • 3. Pañcaviññāṇasamaṅgissa maggakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. পঞ্চৰিঞ্ঞাণসমঙ্গিস্সমগ্গকথাৰণ্ণনা • 3. Pañcaviññāṇasamaṅgissamaggakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৩. পঞ্চৰিঞ্ঞাণসমঙ্গিস্সমগ্গকথাৰণ্ণনা • 3. Pañcaviññāṇasamaṅgissamaggakathāvaṇṇanā
