| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
பஞ்சவீஸதிஅவஹாரகதா²வண்ணனா
Pañcavīsatiavahārakathāvaṇṇanā
பஞ்சவீஸதி அவஹாரா நாம வசனபே⁴தே³னேவ பி⁴ன்னா, அத்த²தோ பன அபி⁴ன்னா. ஆகுலா து³விஞ்ஞெய்யவினிச்ச²யாதி ஆசரியானங் முகே² ஸந்திகே ஸப்³பா³காரேன அக்³க³ஹிதவினிச்ச²யானங் து³விஞ்ஞெய்யா. து³கதிகபட்டா²னபாளி (பட்டா²॰ 5.1.1 ஆத³யோ, து³கதிகபட்டா²னபாளி) விய ஆகுலா து³விஞ்ஞெய்யவினிச்ச²யா, கேவலங் தங் ஆசரியா புப்³பா³பரவிரோத⁴மகத்வா ஸங்கீ³திதோ பட்டா²ய ஆக³தனயமவினாஸெத்வா வண்ணயந்தீதி ‘‘பட்டா²னபாளிமிவாதி அபரே வத³ந்தீ’’தி ச வுத்தா. போராணாதி ஸங்கீ³திஆசரியா. அயமெத்த² ஸாமீசி ஏவ, ஸசே ந தே³தி, ஆபத்தி நத்தி², பாராஜிகப⁴யா பன யதா² ஸிக்கா²காமோ தே³தி, ஏவங் தா³தப்³ப³மேவ. யானி பனெத்த² வத்தூ²னி, தானி ஸீஹளதீ³பே ஆசரியேஹி ஸங்கா⁴தீ³னமனுமதியா அட்ட²கதா²ஸு பக்கி²த்தானி, ‘‘அனாக³தே ப்³ரஹ்மசாரீனங் ஹிதத்தா²ய பொத்த²காருள்ஹகாலதோ பச்சா²பீ’’தி வுத்தங். ஆணத்திகங் ஆணத்திக்க²ணேபி க³ண்ஹாதி, காலந்தரேனாபி அத்த²ஸாத⁴கோ, காலந்தரங் ஸந்தா⁴யாதி இத³மேதேஸங் நானத்தங். ப⁴ட்டே²தி அபக³தே. அந்தரஸமுத்³தே³ அதுருமுஹுதே³. ப²ரதி ஸாதே⁴தி. நவதோ⁴தோதி நவகதோ. பாஸாணஸக்க²ரந்தி பாஸாணஞ்ச ஸக்க²ரஞ்ச.
Pañcavīsati avahārā nāma vacanabhedeneva bhinnā, atthato pana abhinnā. Ākulā duviññeyyavinicchayāti ācariyānaṃ mukhe santike sabbākārena aggahitavinicchayānaṃ duviññeyyā. Dukatikapaṭṭhānapāḷi (paṭṭhā. 5.1.1 ādayo, dukatikapaṭṭhānapāḷi) viya ākulā duviññeyyavinicchayā, kevalaṃ taṃ ācariyā pubbāparavirodhamakatvā saṅgītito paṭṭhāya āgatanayamavināsetvā vaṇṇayantīti ‘‘paṭṭhānapāḷimivāti apare vadantī’’ti ca vuttā. Porāṇāti saṅgītiācariyā. Ayamettha sāmīci eva, sace na deti, āpatti natthi, pārājikabhayā pana yathā sikkhākāmo deti, evaṃ dātabbameva. Yāni panettha vatthūni, tāni sīhaḷadīpe ācariyehi saṅghādīnamanumatiyā aṭṭhakathāsu pakkhittāni, ‘‘anāgate brahmacārīnaṃ hitatthāya potthakāruḷhakālato pacchāpī’’ti vuttaṃ. Āṇattikaṃ āṇattikkhaṇepi gaṇhāti, kālantarenāpi atthasādhako, kālantaraṃ sandhāyāti idametesaṃ nānattaṃ. Bhaṭṭheti apagate. Antarasamudde aturumuhude. Pharati sādheti. Navadhototi navakato. Pāsāṇasakkharanti pāsāṇañca sakkharañca.
