| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பஞ்சவீஸதிஅவஹாரகதா²வண்ணனா
Pañcavīsatiavahārakathāvaṇṇanā
கத்த²சீதி ஏகிஸ்ஸா அட்ட²கதா²யங். ஏகங் பஞ்சகங் த³ஸ்ஸிதந்தி ‘‘பரபரிக்³க³ஹிதஞ்ச ஹோதி, பரபரிக்³க³ஹிதஸஞ்ஞீ ச, க³ருகோ ச ஹோதி பரிக்கா²ரோ பஞ்சமாஸகோ வா அதிரேகபஞ்சமாஸகோ வா, தெ²ய்யசித்தஞ்ச பச்சுபட்டி²தங் ஹோதி, டா²னா சாவேதீ’’தி (பாரா॰ 122) வுத்தபஞ்சஅவஹாரங்கா³னி ஏகங் பஞ்சகந்தி த³ஸ்ஸிதங். த்³வே பஞ்சகானி த³ஸ்ஸிதானீதி ‘‘ச²ஹி ஆகாரேஹி அதி³ன்னங் ஆதி³யந்தஸ்ஸ ஆபத்தி பாராஜிகஸ்ஸ. ந ச ஸகஸஞ்ஞீ, ந ச விஸ்ஸாஸக்³கா³ஹீ, ந ச தாவகாலிகங், க³ருகோ ச ஹோதி பரிக்கா²ரோ பஞ்சமாஸகோ வா அதிரேகபஞ்சமாஸகோ வா, தெ²ய்யசித்தஞ்ச பச்சுபட்டி²தங் ஹோதி, டா²னா சாவேதி, ஆபத்தி பாராஜிகஸ்ஸா’’தி (பாரா॰ 125) ஏவங் வுத்தேஸு ச²ஸு பதே³ஸு ஏகங் அபனெத்வா ஸேஸானி பஞ்ச பதா³னி ஏகங் பஞ்சகங் கத்வா ஹெட்டா² வுத்தபஞ்சகஞ்ச க³ஹெத்வா த்³வே பஞ்சகானி த³ஸ்ஸிதானி. எத்த² பனாதி பஞ்சஹாகாரேஹீதிஆதீ³ஸு. ஸப்³பே³ஹிபி பதே³ஹீதி பரபரிக்³க³ஹிதஞ்ச ஹோதீதிஆதீ³ஹி ஸப்³பே³ஹி பஞ்சஹி பதே³ஹி.
Katthacīti ekissā aṭṭhakathāyaṃ. Ekaṃ pañcakaṃ dassitanti ‘‘parapariggahitañca hoti, parapariggahitasaññī ca, garuko ca hoti parikkhāro pañcamāsako vā atirekapañcamāsako vā, theyyacittañca paccupaṭṭhitaṃ hoti, ṭhānā cāvetī’’ti (pārā. 122) vuttapañcaavahāraṅgāni ekaṃ pañcakanti dassitaṃ. Dve pañcakāni dassitānīti ‘‘chahi ākārehi adinnaṃ ādiyantassa āpatti pārājikassa. Na ca sakasaññī, na ca vissāsaggāhī, na ca tāvakālikaṃ, garuko ca hoti parikkhāro pañcamāsako vā atirekapañcamāsako vā, theyyacittañca paccupaṭṭhitaṃ hoti, ṭhānā cāveti, āpatti pārājikassā’’ti (pārā. 125) evaṃ vuttesu chasu padesu ekaṃ apanetvā sesāni pañca padāni ekaṃ pañcakaṃ katvā heṭṭhā vuttapañcakañca gahetvā dve pañcakāni dassitāni. Ettha panāti pañcahākārehītiādīsu. Sabbehipi padehīti parapariggahitañca hotītiādīhi sabbehi pañcahi padehi.
பஞ்சன்னங் அவஹாரானங் ஸமூஹோ பஞ்சகங். ஸகோ ஹத்தோ² ஸஹத்தோ², தேன நிப்³ப³த்தோ, தஸ்ஸ வா ஸம்ப³ந்தீ⁴தி ஸாஹத்தி²கோ, அவஹாரோ. ஸாஹத்தி²காதி³ பஞ்சகங் ஸாஹத்தி²கபஞ்சகந்திஆதி³பத³வஸேன நாமலாபோ⁴ த³ட்ட²ப்³போ³. ஏவங் ஸேஸேஸுபி. ததியபஞ்சமேஸு பஞ்சகேஸூதி ஸாஹத்தி²கபஞ்சகதெ²ய்யாவஹாரபஞ்சகேஸு. லப்³ப⁴மானபத³வஸேனாதி ஸாஹத்தி²கபஞ்சகே லப்³ப⁴மானஸ்ஸ நிஸ்ஸக்³கி³யாவஹாரபத³ஸ்ஸ வஸேன, தெ²ய்யாவஹாரபஞ்சகே லப்³ப⁴மானஸ்ஸ பரிகப்பாவஹாரபத³ஸ்ஸ ச வஸேன யோஜேதப்³ப³ந்தி அத்தோ².
Pañcannaṃ avahārānaṃ samūho pañcakaṃ. Sako hattho sahattho, tena nibbatto, tassa vā sambandhīti sāhatthiko, avahāro. Sāhatthikādi pañcakaṃ sāhatthikapañcakantiādipadavasena nāmalābho daṭṭhabbo. Evaṃ sesesupi. Tatiyapañcamesu pañcakesūti sāhatthikapañcakatheyyāvahārapañcakesu. Labbhamānapadavasenāti sāhatthikapañcake labbhamānassa nissaggiyāvahārapadassa vasena, theyyāvahārapañcake labbhamānassa parikappāvahārapadassa ca vasena yojetabbanti attho.
நிஸ்ஸக்³கி³யோ நாம…பே॰… பாராஜிகஸ்ஸாதி இமினா ப³ஹிஸுங்ககா⁴தபாதனங் நிஸ்ஸக்³கி³யபயோகோ³தி த³ஸ்ஸேதி. ‘‘ஹத்தே² பா⁴ரங் தெ²ய்யசித்தோ பூ⁴மியங் நிக்கி²பதி, ஆபத்தி பாராஜிகஸ்ஸா’’தி (பாரா॰ 101) வுத்தத்தா பன ஸுத்³த⁴சித்தேன க³ஹிதபரப⁴ண்ட³ஸ்ஸ தெ²ய்யசித்தேன கு³ம்பா³தி³படிச்ச²ன்னட்டா²னே கி²பனம்பி இமஸ்மிங் நிஸ்ஸக்³கி³யபயோகே³ ஸங்க³ய்ஹதீதி த³ட்ட²ப்³ப³ங். கிரியாஸித்³தி⁴தோ புரேதரமேவ பாராஜிகாபத்திஸங்கா²தங் அத்த²ங் ஸாதே⁴தீதி அத்த²ஸாத⁴கோ. அத² வா அத்தனோ வத்தமானக்க²ணே அவிஜ்ஜமானம்பி கிரியாஸித்³தி⁴ஸங்கா²தங் அத்த²ங் அவஸ்ஸங் ஆபத்திங் ஸாதே⁴தீதிபி அத்த²ஸாத⁴கோ. அஸுகங் நாம ப⁴ண்ட³ங் யதா³ ஸக்கோஸீதி இத³ங் நித³ஸ்ஸனமத்தங் பரஸ்ஸ தேலகும்பி⁴யா உபாஹனாதீ³னங் நிக்கே²பபயோக³ஸ்ஸாபி அத்த²ஸாத⁴கத்தா. ததா² ஹி வுத்தங் மாதிகாட்ட²கதா²யங் –
Nissaggiyo nāma…pe… pārājikassāti iminā bahisuṅkaghātapātanaṃ nissaggiyapayogoti dasseti. ‘‘Hatthe bhāraṃ theyyacitto bhūmiyaṃ nikkhipati, āpatti pārājikassā’’ti (pārā. 101) vuttattā pana suddhacittena gahitaparabhaṇḍassa theyyacittena gumbādipaṭicchannaṭṭhāne khipanampi imasmiṃ nissaggiyapayoge saṅgayhatīti daṭṭhabbaṃ. Kiriyāsiddhito puretarameva pārājikāpattisaṅkhātaṃ atthaṃ sādhetīti atthasādhako. Atha vā attano vattamānakkhaṇe avijjamānampi kiriyāsiddhisaṅkhātaṃ atthaṃ avassaṃ āpattiṃ sādhetītipi atthasādhako. Asukaṃ nāma bhaṇḍaṃ yadā sakkosīti idaṃ nidassanamattaṃ parassa telakumbhiyā upāhanādīnaṃ nikkhepapayogassāpi atthasādhakattā. Tathā hi vuttaṃ mātikāṭṭhakathāyaṃ –
‘‘அத்த²ஸாத⁴கோ நாம ‘அஸுகஸ்ஸ ப⁴ண்ட³ங் யதா³ ஸக்கோதி, ததா³ தங் அவஹரா’தி அஞ்ஞங் ஆணாபேதி. தத்த² ஸசே பரோ அனந்தராயிகோ ஹுத்வா தங் அவஹரதி, ஆணாபகஸ்ஸ ஆணத்திக்க²ணேயேவ பாராஜிகங். பரஸ்ஸ வா பன தேலகும்பி⁴யா பாத³க்³க⁴னகதேலங் அவஸ்ஸங் பிவனகானி உபாஹனாதீ³னி பக்கி²பதி, ஹத்த²தோ முத்தமத்தேயேவ பாராஜிக’’ந்தி (கங்கா²॰ அட்ட²॰ து³தியபாராஜிகவண்ணனா).
‘‘Atthasādhako nāma ‘asukassa bhaṇḍaṃ yadā sakkoti, tadā taṃ avaharā’ti aññaṃ āṇāpeti. Tattha sace paro anantarāyiko hutvā taṃ avaharati, āṇāpakassa āṇattikkhaṇeyeva pārājikaṃ. Parassa vā pana telakumbhiyā pādagghanakatelaṃ avassaṃ pivanakāni upāhanādīni pakkhipati, hatthato muttamatteyeva pārājika’’nti (kaṅkhā. aṭṭha. dutiyapārājikavaṇṇanā).
இமஸ்ஸ அத்த²ஸாத⁴கஸ்ஸ ஆணத்தியா ச கோ விஸேஸோதி? தங்க²ணஞ்ஞேவ க³ஹணே நியுஞ்ஜனங் ஆணத்திகபயோகோ³, காலந்தரேன க³ஹணத்த²ங் நியோகோ³ அத்த²ஸாத⁴கோதி அயங் நேஸங் விஸேஸோ. தேனேவாஹ ‘‘அஸுகங் நாம ப⁴ண்ட³ங் யதா³ ஸக்கோஸீ’’திஆதி³. து⁴ரனிக்கே²போ பன உபனிக்கி²த்தப⁴ண்ட³வஸேன வேதி³தப்³போ³தி இத³ங் நித³ஸ்ஸனமத்தங், ஆராமாபி⁴யுஞ்ஜனாதீ³ஸுபி தாவகாலிகப⁴ண்ட³தெ³ய்யானங் அதா³னேபி ஏஸேவ நயோ. ப⁴ண்ட³க்³க³ஹணப்பயோக³தோ ஆணத்தியா புப்³ப³த்தா ஆஹ ‘‘ஆணத்திவஸேன புப்³ப³பயோகோ³ வேதி³தப்³போ³’’தி. பயோகே³ன ஸஹ வத்தமானோ அவஹாரோ ஸஹபயோகோ³தி ஆஹ ‘‘டா²னாசாவனவஸேனா’’தி, இத³ஞ்ச நித³ஸ்ஸனமத்தங் கீ²லஸங்கமனாதீ³ஸுபி அஸதி டா²னாசாவனே ஸஹபயோக³த்தா. வுத்தஞ்ஹி மாதிகாட்ட²கதா²யங் ‘‘டா²னாசாவனவஸேன கீ²லாதீ³னி ஸங்காமெத்வா கெ²த்தாதி³க்³க³ஹணவஸேன ச ஸஹபயோகோ³ வேதி³தப்³போ³’’தி (கங்கா²॰ அட்ட²॰ து³தியபாராஜிகவண்ணனா).
Imassa atthasādhakassa āṇattiyā ca ko visesoti? Taṅkhaṇaññeva gahaṇe niyuñjanaṃ āṇattikapayogo, kālantarena gahaṇatthaṃ niyogo atthasādhakoti ayaṃ nesaṃ viseso. Tenevāha ‘‘asukaṃ nāma bhaṇḍaṃ yadā sakkosī’’tiādi. Dhuranikkhepo pana upanikkhittabhaṇḍavasena veditabboti idaṃ nidassanamattaṃ, ārāmābhiyuñjanādīsupi tāvakālikabhaṇḍadeyyānaṃ adānepi eseva nayo. Bhaṇḍaggahaṇappayogato āṇattiyā pubbattā āha ‘‘āṇattivasena pubbapayogo veditabbo’’ti. Payogena saha vattamāno avahāro sahapayogoti āha ‘‘ṭhānācāvanavasenā’’ti, idañca nidassanamattaṃ khīlasaṅkamanādīsupi asati ṭhānācāvane sahapayogattā. Vuttañhi mātikāṭṭhakathāyaṃ ‘‘ṭhānācāvanavasena khīlādīni saṅkāmetvā khettādiggahaṇavasena ca sahapayogo veditabbo’’ti (kaṅkhā. aṭṭha. dutiyapārājikavaṇṇanā).
துலயித்வாதி உபபரிக்கி²த்வா. ஸாமீசீதி வத்தங். ஸகஸஞ்ஞாய அதெ³ந்தஸ்ஸ ஆபத்தி நத்தீ²தி வத³ந்தி. ஸம்மத்³தோ³தி நிவித்³த⁴தாஸங்கோ²போ⁴. ப⁴ட்டே² ஜனகாயேதி அபக³தே ஜனஸமூஹே. அத்தனோ ஸந்தகங் கத்வா ஏதஸ்ஸேவ பி⁴க்கு²னோ தே³ஹீதி இத³ங் உபி⁴ன்னம்பி குக்குச்சவினோத³னத்த²ங் வுத்தங். அவஹாரகஸ்ஸ ஹி ‘‘மயா ஸஹத்தே²ன ந தி³ன்னங், ப⁴ண்ட³தெ³ய்யங் ஏத’’ந்தி குக்குச்சங் உப்பஜ்ஜெய்ய, இதரஸ்ஸ ச ‘‘மயா பட²மங் து⁴ரனிக்கே²பங் கத்வா பச்சா² அதி³ன்னங் க³ஹித’’ந்தி குக்குச்சங் உப்பஜ்ஜெய்யாதி.
Tulayitvāti upaparikkhitvā. Sāmīcīti vattaṃ. Sakasaññāya adentassa āpatti natthīti vadanti. Sammaddoti nividdhatāsaṅkhobho. Bhaṭṭhe janakāyeti apagate janasamūhe. Attano santakaṃ katvā etasseva bhikkhuno dehīti idaṃ ubhinnampi kukkuccavinodanatthaṃ vuttaṃ. Avahārakassa hi ‘‘mayā sahatthena na dinnaṃ, bhaṇḍadeyyaṃ eta’’nti kukkuccaṃ uppajjeyya, itarassa ca ‘‘mayā paṭhamaṃ dhuranikkhepaṃ katvā pacchā adinnaṃ gahita’’nti kukkuccaṃ uppajjeyyāti.
ஸமக்³க⁴ந்தி அப்பக்³க⁴ங். தா³ருஅத்த²ங் ப²ரதீதி தா³ரூஹி கத்தப்³ப³கிச்சங் ஸாதே⁴தி. ஏகதி³வஸங் த³ந்தகட்ட²ச்சே²த³னாதி³னா யா அயங் அக்³க⁴ஹானி வுத்தா, ஸா ஸப்³பா³ ப⁴ண்ட³ஸாமினா கிணித்வா க³ஹிதமேவ ஸந்தா⁴ய வுத்தா. ஸப்³ப³ங் பனேதங் அட்ட²கதா²சரியப்பமாணேன வேதி³தப்³ப³ங். பாஸாணஞ்ச ஸக்க²ரஞ்ச பாஸாணஸக்க²ரங்.
Samagghanti appagghaṃ. Dāruatthaṃ pharatīti dārūhi kattabbakiccaṃ sādheti. Ekadivasaṃ dantakaṭṭhacchedanādinā yā ayaṃ agghahāni vuttā, sā sabbā bhaṇḍasāminā kiṇitvā gahitameva sandhāya vuttā. Sabbaṃ panetaṃ aṭṭhakathācariyappamāṇena veditabbaṃ. Pāsāṇañca sakkharañca pāsāṇasakkharaṃ.
அக்க²த³ஸ்ஸாதி எத்த² அக்க²-ஸத்³தே³ன கிர வினிச்ச²யஸாலா வுச்சதி, தத்த² நிஸீதி³த்வா வஜ்ஜாவஜ்ஜங் நிரூபயந்தீதி ‘‘அக்க²த³ஸ்ஸா’’தி வுச்சந்தி த⁴ம்மவினிச்ச²னகா. ஹனநங் நாம ஹத்த²பாதா³தீ³ஹி போத²னஞ்சேவ ஹத்த²னாஸாதி³ச்சே²த³னஞ்ச ஹோதீதி ஆஹ ‘‘ஹனெய்யுந்தி போதெ²ய்யுஞ்சேவ சி²ந்தெ³ய்யுஞ்சா’’தி.
Akkhadassāti ettha akkha-saddena kira vinicchayasālā vuccati, tattha nisīditvā vajjāvajjaṃ nirūpayantīti ‘‘akkhadassā’’ti vuccanti dhammavinicchanakā. Hananaṃ nāma hatthapādādīhi pothanañceva hatthanāsādicchedanañca hotīti āha ‘‘haneyyunti potheyyuñceva chindeyyuñcā’’ti.
பத³பா⁴ஜனீயஞ்ச ‘‘ஹத்தே²ன வா பாதே³ன வா கஸாய வா வெத்தேன வா அட்³ட⁴த³ண்ட³கேன வா ச²ஜ்ஜாய வா ஹனெய்யு’’ந்தி (பாரா॰ 92) வுத்தங். தத்த² அட்³ட⁴த³ண்ட³கேனாதி த்³விஹத்த²ப்பமாணேன ரஸ்ஸமுக்³க³ரேன, வேளுபேஸிகாய வா. சே²ஜ்ஜாய வாதி ஹத்தா²தீ³னங் சே²த³னேன. சி²ந்த³ந்தி ஏதாய ஹத்த²பாதா³தீ³னீதி சே²ஜ்ஜா, ஸத்த²ங், தேன ஸத்தே²னாதிபி அத்தோ². நீஹரெய்யுந்தி ரட்ட²தோ நீஹரெய்யுங். ‘‘சோரோஸி…பே॰… தே²னோஸீ’’தி எத்த² பரிபா⁴ஸெய்யுந்தி பத³ங் அஜ்ஜா²ஹரித்வா அத்தோ² வேதி³தப்³போ³தி ஆஹ ‘‘சோரோஸி…பே॰… பரிபா⁴ஸெய்யு’’ந்தி. யங் தங் ப⁴ண்ட³ங் த³ஸ்ஸிதந்தி ஸம்ப³ந்தோ⁴.
Padabhājanīyañca ‘‘hatthena vā pādena vā kasāya vā vettena vā aḍḍhadaṇḍakena vā chajjāya vā haneyyu’’nti (pārā. 92) vuttaṃ. Tattha aḍḍhadaṇḍakenāti dvihatthappamāṇena rassamuggarena, veḷupesikāya vā. Chejjāya vāti hatthādīnaṃ chedanena. Chindanti etāya hatthapādādīnīti chejjā, satthaṃ, tena satthenātipi attho. Nīhareyyunti raṭṭhato nīhareyyuṃ. ‘‘Corosi…pe… thenosī’’ti ettha paribhāseyyunti padaṃ ajjhāharitvā attho veditabboti āha ‘‘corosi…pe… paribhāseyyu’’nti. Yaṃ taṃ bhaṇḍaṃ dassitanti sambandho.
93. யத்த² யத்த² டி²தந்தி பூ⁴மியாதீ³ஸு யத்த² யத்த² டி²தங். யதா² யதா² ஆதா³னங் க³ச்ச²தீதி யேன யேன ஆகாரேன க³ஹணங் உபக³ச்ச²தி.
93.Yattha yattha ṭhitanti bhūmiyādīsu yattha yattha ṭhitaṃ. Yathā yathā ādānaṃ gacchatīti yena yena ākārena gahaṇaṃ upagacchati.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஞ்சவீஸதிஅவஹாரகதா²வண்ணனா • Pañcavīsatiavahārakathāvaṇṇanā
