| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
३. पञ्चायतनकम्मनिब्बत्तपञ्हो
3. Pañcāyatanakammanibbattapañho
३. राजा आह ‘‘भन्ते नागसेन, यानिमानि पञ्चायतनानि, किं नु तानि नानाकम्मेहि निब्बत्तानि, उदाहु एकेन कम्मेना’’ति? ‘‘नानाकम्मेहि, महाराज, निब्बत्तानि, न एकेन कम्मेना’’ति।
3. Rājā āha ‘‘bhante nāgasena, yānimāni pañcāyatanāni, kiṃ nu tāni nānākammehi nibbattāni, udāhu ekena kammenā’’ti? ‘‘Nānākammehi, mahārāja, nibbattāni, na ekena kammenā’’ti.
‘‘ओपम्मं करोही’’ति। ‘‘तं किं मञ्ञसि, महाराज, एकस्मिं खेत्ते नानाबीजानि वप्पेय्युं , तेसं नानाबीजानं नानाफलानि निब्बत्तेय्यु’’न्ति? ‘‘आम, भन्ते, निब्बत्तेय्यु’’न्ति। ‘‘एवमेव खो, महाराज, यानि यानि पञ्चायतनानि, तानि तानि नानाकम्मेहि निब्बत्तानि, न एकेन कम्मेना’’ति।
‘‘Opammaṃ karohī’’ti. ‘‘Taṃ kiṃ maññasi, mahārāja, ekasmiṃ khette nānābījāni vappeyyuṃ , tesaṃ nānābījānaṃ nānāphalāni nibbatteyyu’’nti? ‘‘Āma, bhante, nibbatteyyu’’nti. ‘‘Evameva kho, mahārāja, yāni yāni pañcāyatanāni, tāni tāni nānākammehi nibbattāni, na ekena kammenā’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
पञ्चायतनकम्मनिब्बत्तपञ्हो ततियो।
Pañcāyatanakammanibbattapañho tatiyo.
