| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๓. ปญฺจายตนกมฺมนิพฺพตฺตปโญฺห
3. Pañcāyatanakammanibbattapañho
๓. ราชา อาห ‘‘ภเนฺต นาคเสน, ยานิมานิ ปญฺจายตนานิ, กิํ นุ ตานิ นานากเมฺมหิ นิพฺพตฺตานิ, อุทาหุ เอเกน กเมฺมนา’’ติ? ‘‘นานากเมฺมหิ, มหาราช, นิพฺพตฺตานิ, น เอเกน กเมฺมนา’’ติฯ
3. Rājā āha ‘‘bhante nāgasena, yānimāni pañcāyatanāni, kiṃ nu tāni nānākammehi nibbattāni, udāhu ekena kammenā’’ti? ‘‘Nānākammehi, mahārāja, nibbattāni, na ekena kammenā’’ti.
‘‘โอปมฺมํ กโรหี’’ติฯ ‘‘ตํ กิํ มญฺญสิ, มหาราช, เอกสฺมิํ เขเตฺต นานาพีชานิ วเปฺปยฺยุํ , เตสํ นานาพีชานํ นานาผลานิ นิพฺพเตฺตยฺยุ’’นฺติ? ‘‘อาม, ภเนฺต, นิพฺพเตฺตยฺยุ’’นฺติฯ ‘‘เอวเมว โข, มหาราช, ยานิ ยานิ ปญฺจายตนานิ, ตานิ ตานิ นานากเมฺมหิ นิพฺพตฺตานิ, น เอเกน กเมฺมนา’’ติฯ
‘‘Opammaṃ karohī’’ti. ‘‘Taṃ kiṃ maññasi, mahārāja, ekasmiṃ khette nānābījāni vappeyyuṃ , tesaṃ nānābījānaṃ nānāphalāni nibbatteyyu’’nti? ‘‘Āma, bhante, nibbatteyyu’’nti. ‘‘Evameva kho, mahārāja, yāni yāni pañcāyatanāni, tāni tāni nānākammehi nibbattāni, na ekena kammenā’’ti.
‘‘กโลฺลสิ, ภเนฺต นาคเสนา’’ติฯ
‘‘Kallosi, bhante nāgasenā’’ti.
ปญฺจายตนกมฺมนิพฺพตฺตปโญฺห ตติโยฯ
Pañcāyatanakammanibbattapañho tatiyo.
