| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၃. ပဉ္စာယတနကမ္မနိဗ္ဗတ္တပဉ္ဟော
3. Pañcāyatanakammanibbattapañho
၃. ရာဇာ အာဟ ‘‘ဘန္တေ နာဂသေန, ယာနိမာနိ ပဉ္စာယတနာနိ, ကိံ နု တာနိ နာနာကမ္မေဟိ နိဗ္ဗတ္တာနိ, ဥဒာဟု ဧကေန ကမ္မေနာ’’တိ? ‘‘နာနာကမ္မေဟိ, မဟာရာဇ, နိဗ္ဗတ္တာနိ, န ဧကေန ကမ္မေနာ’’တိ။
3. Rājā āha ‘‘bhante nāgasena, yānimāni pañcāyatanāni, kiṃ nu tāni nānākammehi nibbattāni, udāhu ekena kammenā’’ti? ‘‘Nānākammehi, mahārāja, nibbattāni, na ekena kammenā’’ti.
‘‘ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ဧကသ္မိံ ခေတ္တေ နာနာဗီဇာနိ ဝပ္ပေယ္ယုံ , တေသံ နာနာဗီဇာနံ နာနာဖလာနိ နိဗ္ဗတ္တေယ္ယု’’န္တိ? ‘‘အာမ, ဘန္တေ, နိဗ္ဗတ္တေယ္ယု’’န္တိ။ ‘‘ဧဝမေဝ ခော, မဟာရာဇ, ယာနိ ယာနိ ပဉ္စာယတနာနိ, တာနိ တာနိ နာနာကမ္မေဟိ နိဗ္ဗတ္တာနိ, န ဧကေန ကမ္မေနာ’’တိ။
‘‘Opammaṃ karohī’’ti. ‘‘Taṃ kiṃ maññasi, mahārāja, ekasmiṃ khette nānābījāni vappeyyuṃ , tesaṃ nānābījānaṃ nānāphalāni nibbatteyyu’’nti? ‘‘Āma, bhante, nibbatteyyu’’nti. ‘‘Evameva kho, mahārāja, yāni yāni pañcāyatanāni, tāni tāni nānākammehi nibbattāni, na ekena kammenā’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ပဉ္စာယတနကမ္မနိဗ္ဗတ္တပဉ္ဟော တတိယော။
Pañcāyatanakammanibbattapañho tatiyo.
