| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൩. പഞ്ചായതനകമ്മനിബ്ബത്തപഞ്ഹോ
3. Pañcāyatanakammanibbattapañho
൩. രാജാ ആഹ ‘‘ഭന്തേ നാഗസേന, യാനിമാനി പഞ്ചായതനാനി, കിം നു താനി നാനാകമ്മേഹി നിബ്ബത്താനി, ഉദാഹു ഏകേന കമ്മേനാ’’തി? ‘‘നാനാകമ്മേഹി, മഹാരാജ, നിബ്ബത്താനി, ന ഏകേന കമ്മേനാ’’തി.
3. Rājā āha ‘‘bhante nāgasena, yānimāni pañcāyatanāni, kiṃ nu tāni nānākammehi nibbattāni, udāhu ekena kammenā’’ti? ‘‘Nānākammehi, mahārāja, nibbattāni, na ekena kammenā’’ti.
‘‘ഓപമ്മം കരോഹീ’’തി. ‘‘തം കിം മഞ്ഞസി, മഹാരാജ, ഏകസ്മിം ഖേത്തേ നാനാബീജാനി വപ്പേയ്യും , തേസം നാനാബീജാനം നാനാഫലാനി നിബ്ബത്തേയ്യു’’ന്തി? ‘‘ആമ, ഭന്തേ, നിബ്ബത്തേയ്യു’’ന്തി. ‘‘ഏവമേവ ഖോ, മഹാരാജ, യാനി യാനി പഞ്ചായതനാനി, താനി താനി നാനാകമ്മേഹി നിബ്ബത്താനി, ന ഏകേന കമ്മേനാ’’തി.
‘‘Opammaṃ karohī’’ti. ‘‘Taṃ kiṃ maññasi, mahārāja, ekasmiṃ khette nānābījāni vappeyyuṃ , tesaṃ nānābījānaṃ nānāphalāni nibbatteyyu’’nti? ‘‘Āma, bhante, nibbatteyyu’’nti. ‘‘Evameva kho, mahārāja, yāni yāni pañcāyatanāni, tāni tāni nānākammehi nibbattāni, na ekena kammenā’’ti.
‘‘കല്ലോസി, ഭന്തേ നാഗസേനാ’’തി.
‘‘Kallosi, bhante nāgasenā’’ti.
പഞ്ചായതനകമ്മനിബ്ബത്തപഞ്ഹോ തതിയോ.
Pañcāyatanakammanibbattapañho tatiyo.
