| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
பண்ட³கவத்து²கதா²
Paṇḍakavatthukathā
109. த³ஹரே த³ஹரேதி தருணே தருணே. மோளிக³ல்லேதி தூ²லஸரீரே. ஹத்தி²ப⁴ண்டே³ அஸ்ஸப⁴ண்டே³தி ஹத்தி²கோ³பகே ச அஸ்ஸகோ³பகே ச.
109.Dahare dahareti taruṇe taruṇe. Moḷigalleti thūlasarīre. Hatthibhaṇḍe assabhaṇḍeti hatthigopake ca assagopake ca.
பண்ட³கோ பி⁴க்க²வேதி எத்த² ஆஸித்தபண்ட³கோ உஸூயபண்ட³கோ ஓபக்கமிகபண்ட³கோ பக்க²பண்ட³கோ நபுங்ஸகபண்ட³கோதி பஞ்ச பண்ட³கா. தத்த² யஸ்ஸ பரேஸங் அங்க³ஜாதங் முகே²ன க³ஹெத்வா அஸுசினா ஆஸித்தஸ்ஸ பரிளாஹோ வூபஸம்மதி, அயங் ஆஸித்தபண்ட³கோ. யஸ்ஸ பரேஸங் அஜ்ஜா²சாரங் பஸ்ஸதோ உஸூயாய உப்பன்னாய பரிளாஹோ வூபஸம்மதி, அயங் உஸூயபண்ட³கோ. யஸ்ஸ உபக்கமேன பீ³ஜானி அபனீதானி, அயங் ஓபக்கமிகபண்ட³கோ. ஏகச்சோ பன அகுஸலவிபாகானுபா⁴வேன காளபக்கே² பண்ட³கோ ஹோதி, ஜுண்ஹபக்கே² பனஸ்ஸ பரிளாஹோ வூபஸம்மதி, அயங் பக்க²பண்ட³கோ. யோ பன படிஸந்தி⁴யங்யேவ அபா⁴வகோ உப்பன்னோ, அயங் நபுங்ஸகபண்ட³கோதி. தேஸு ஆஸித்தபண்ட³கஸ்ஸ ச உஸூயபண்ட³கஸ்ஸ ச பப்³ப³ஜ்ஜா ந வாரிதா, இதரேஸங் திண்ணங் வாரிதா. தேஸுபி பக்க²பண்ட³கஸ்ஸ யஸ்மிங் பக்கே² பண்ட³கோ ஹோதி, தஸ்மிங்யேவஸ்ஸ பக்கே² பப்³ப³ஜ்ஜா வாரிதாதி குருந்தி³யங் வுத்தங். யஸ்ஸ செத்த² பப்³ப³ஜ்ஜா வாரிதா, தங் ஸந்தா⁴ய இத³ங் வுத்தங் – ‘‘அனுபஸம்பன்னோ ந உபஸம்பாதே³தப்³போ³ உபஸம்பன்னோ நாஸேதப்³போ³’’தி. ஸோபி லிங்க³னாஸனேனேவ நாஸேதப்³போ³. இதோ பரங் ‘‘நாஸேதப்³போ³’’தி வுத்தேஸுபி ஏஸேவ நயோ.
Paṇḍakobhikkhaveti ettha āsittapaṇḍako usūyapaṇḍako opakkamikapaṇḍako pakkhapaṇḍako napuṃsakapaṇḍakoti pañca paṇḍakā. Tattha yassa paresaṃ aṅgajātaṃ mukhena gahetvā asucinā āsittassa pariḷāho vūpasammati, ayaṃ āsittapaṇḍako. Yassa paresaṃ ajjhācāraṃ passato usūyāya uppannāya pariḷāho vūpasammati, ayaṃ usūyapaṇḍako. Yassa upakkamena bījāni apanītāni, ayaṃ opakkamikapaṇḍako. Ekacco pana akusalavipākānubhāvena kāḷapakkhe paṇḍako hoti, juṇhapakkhe panassa pariḷāho vūpasammati, ayaṃ pakkhapaṇḍako. Yo pana paṭisandhiyaṃyeva abhāvako uppanno, ayaṃ napuṃsakapaṇḍakoti. Tesu āsittapaṇḍakassa ca usūyapaṇḍakassa ca pabbajjā na vāritā, itaresaṃ tiṇṇaṃ vāritā. Tesupi pakkhapaṇḍakassa yasmiṃ pakkhe paṇḍako hoti, tasmiṃyevassa pakkhe pabbajjā vāritāti kurundiyaṃ vuttaṃ. Yassa cettha pabbajjā vāritā, taṃ sandhāya idaṃ vuttaṃ – ‘‘anupasampanno na upasampādetabbo upasampanno nāsetabbo’’ti. Sopi liṅganāsaneneva nāsetabbo. Ito paraṃ ‘‘nāsetabbo’’ti vuttesupi eseva nayo.
பண்ட³வத்து²கதா² நிட்டி²தா.
Paṇḍavatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 47. பண்ட³கவத்து² • 47. Paṇḍakavatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பண்ட³கவத்து²கதா²வண்ணனா • Paṇḍakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பண்ட³கவத்து²கதா²வண்ணனா • Paṇḍakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பண்ட³கவத்து²கதா²வண்ணனா • Paṇḍakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 47. பண்ட³கவத்து²கதா² • 47. Paṇḍakavatthukathā
