| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பண்ட³கவத்து²கதா²வண்ணனா
Paṇḍakavatthukathāvaṇṇanā
109. பண்ட³கவத்து²ஸ்மிங் ஆஸித்தஉஸூயபக்க²பண்ட³கா தயோபி புரிஸபா⁴வலிங்கா³தி³யுத்தா அஹேதுகபடிஸந்தி⁴கா, தே ச கிலேஸபரியுட்டா²னஸ்ஸ ப³லவதாய நபுங்ஸகபண்ட³கஸதி³ஸத்தா ‘‘பண்ட³கா’’தி வுத்தா. தேஸு ஆஸித்தஉஸூயபண்ட³கானங் த்³வின்னங் கிலேஸபரியுட்டா²னங் யோனிஸோமனஸிகாராதீ³ஹி வீதிக்கமதோ நிவாரேதும்பி ஸக்கா, தேன தே பப்³பா³ஜேதப்³பா³ வுத்தா. பக்க²பண்ட³கஸ்ஸ பன காளபக்கே²ஸு உம்மாதோ³ விய கிலேஸபரிளாஹோ அவத்த²ரந்தோ ஆக³ச்ச²தி, வீதிக்கமங் பத்வா ஏவ ச நிவத்ததி. தஸ்மா ஸோ தஸ்மிங் பக்கே² ந பப்³பா³ஜேதப்³போ³தி வுத்தோ. ததே³தங் விபா⁴க³ங் த³ஸ்ஸேதுங் ‘‘யஸ்ஸ பரேஸ’’ந்திஆதி³ வுத்தங். தத்த² ஆஸித்தஸ்ஸாதி முகே² ஆஸித்தஸ்ஸ அத்தனோபி அஸுசிமுச்சனேன பரிளாஹோ வூபஸம்மதி. உஸூயாய உப்பன்னாயாதி உஸூயாய வஸேன அத்தனோ ஸேவேதுகாமதாராகே³ உப்பன்னே அஸுசிமுத்தியா பரிளாஹோ வூபஸம்மதி.
109. Paṇḍakavatthusmiṃ āsittausūyapakkhapaṇḍakā tayopi purisabhāvaliṅgādiyuttā ahetukapaṭisandhikā, te ca kilesapariyuṭṭhānassa balavatāya napuṃsakapaṇḍakasadisattā ‘‘paṇḍakā’’ti vuttā. Tesu āsittausūyapaṇḍakānaṃ dvinnaṃ kilesapariyuṭṭhānaṃ yonisomanasikārādīhi vītikkamato nivāretumpi sakkā, tena te pabbājetabbā vuttā. Pakkhapaṇḍakassa pana kāḷapakkhesu ummādo viya kilesapariḷāho avattharanto āgacchati, vītikkamaṃ patvā eva ca nivattati. Tasmā so tasmiṃ pakkhe na pabbājetabboti vutto. Tadetaṃ vibhāgaṃ dassetuṃ ‘‘yassa paresa’’ntiādi vuttaṃ. Tattha āsittassāti mukhe āsittassa attanopi asucimuccanena pariḷāho vūpasammati. Usūyāya uppannāyāti usūyāya vasena attano sevetukāmatārāge uppanne asucimuttiyā pariḷāho vūpasammati.
‘‘பீ³ஜானி அபனீதானீ’’தி வுத்தத்தா பீ³ஜேஸு டி²தேஸு நிமித்தமத்தே அபனீதே பண்ட³கோ ந ஹோதி. பி⁴க்கு²னோபி அனாபா³த⁴பச்சயா தத³பனயனே து²ல்லச்சயமேவ, ந பன பண்ட³கத்தங், பீ³ஜேஸு பன அபனீதேஸு அங்க³ஜாதம்பி ராகே³ன கம்மனியங் ந ஹோதி, புமபா⁴வோ விக³ச்ச²தி, மஸ்ஸுஆதி³புரிஸலிங்க³ம்பி உபஸம்பதா³பி விக³ச்ச²தி, கிலேஸபரிளாஹோபி து³ன்னிவாரவீதிக்கமோ ஹோதி நபுங்ஸகபண்ட³கஸ்ஸ விய. தஸ்மா ஈதி³ஸோ உபஸம்பன்னோபி நாஸேதப்³போ³தி வத³ந்தி. யதி³ ஏவங் கஸ்மா பீ³ஜுத்³த⁴ரணே பாராஜிகங் ந பஞ்ஞத்தந்தி? எத்த² தாவ கேசி வத³ந்தி ‘‘பஞ்ஞத்தமேவேதங் ப⁴க³வதா ‘பண்ட³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’தி வுத்தத்தா’’தி. கேசி பன ‘‘யஸ்மா பீ³ஜுத்³த⁴ரணக்க²ணே பண்ட³கோ ந ஹோதி, தஸ்மா தஸ்மிங் க²ணே பாராஜிகங் ந பஞ்ஞத்தங். யஸ்மா பன ஸோ உத்³த⁴டபீ³ஜோ பி⁴க்கு² அபரேன ஸமயேன வுத்தனயேன பண்ட³கத்தங் ஆபஜ்ஜதி, அபா⁴வகோ ஹோதி, உபஸம்பதா³ய அவத்து², ததோ ஏவ சஸ்ஸ உபஸம்பதா³ விக³ச்ச²தி, தஸ்மா ஏஸ பண்ட³கத்துபக³மனகாலதோ பட்டா²ய ஜாதியா நபுங்ஸகபண்ட³கேன ஸத்³தி⁴ங் யோஜெத்வா ‘உபஸம்பன்னோ நாஸேதப்³போ³’தி அப⁴ப்³போ³தி வுத்தோ, ந ததோ புப்³பே³. அயஞ்ச கிஞ்சாபி ஸஹேதுகோ, பா⁴வக்க²யேன பனஸ்ஸ அஹேதுகஸதி³ஸதாய மக்³கோ³பி ந உப்பஜ்ஜதீ’’தி வத³ந்தி. அபரே பன ‘‘பப்³ப³ஜ்ஜதோ புப்³பே³ உபக்கமேன பண்ட³கபா⁴வமாபன்னங் ஸந்தா⁴ய ‘உபஸம்பன்னோ நாஸேதப்³போ³’தி வுத்தங், உபஸம்பன்னஸ்ஸ பன பச்சா² உபக்கமேன உபஸம்பதா³பி ந விக³ச்ச²தீ’’தி, தங் ந யுத்தங். யத³க்³கே³ன ஹி பப்³ப³ஜ்ஜதோ புப்³பே³ உபக்கமேன அப⁴ப்³போ³ ஹோதி, தத³க்³கே³ன பச்சா²பி ஹோதீதி வீமங்ஸித்வா க³ஹேதப்³ப³ங்.
‘‘Bījāni apanītānī’’ti vuttattā bījesu ṭhitesu nimittamatte apanīte paṇḍako na hoti. Bhikkhunopi anābādhapaccayā tadapanayane thullaccayameva, na pana paṇḍakattaṃ, bījesu pana apanītesu aṅgajātampi rāgena kammaniyaṃ na hoti, pumabhāvo vigacchati, massuādipurisaliṅgampi upasampadāpi vigacchati, kilesapariḷāhopi dunnivāravītikkamo hoti napuṃsakapaṇḍakassa viya. Tasmā īdiso upasampannopi nāsetabboti vadanti. Yadi evaṃ kasmā bījuddharaṇe pārājikaṃ na paññattanti? Ettha tāva keci vadanti ‘‘paññattamevetaṃ bhagavatā ‘paṇḍako, bhikkhave, anupasampanno na upasampādetabbo, upasampanno nāsetabbo’ti vuttattā’’ti. Keci pana ‘‘yasmā bījuddharaṇakkhaṇe paṇḍako na hoti, tasmā tasmiṃ khaṇe pārājikaṃ na paññattaṃ. Yasmā pana so uddhaṭabījo bhikkhu aparena samayena vuttanayena paṇḍakattaṃ āpajjati, abhāvako hoti, upasampadāya avatthu, tato eva cassa upasampadā vigacchati, tasmā esa paṇḍakattupagamanakālato paṭṭhāya jātiyā napuṃsakapaṇḍakena saddhiṃ yojetvā ‘upasampanno nāsetabbo’ti abhabboti vutto, na tato pubbe. Ayañca kiñcāpi sahetuko, bhāvakkhayena panassa ahetukasadisatāya maggopi na uppajjatī’’ti vadanti. Apare pana ‘‘pabbajjato pubbe upakkamena paṇḍakabhāvamāpannaṃ sandhāya ‘upasampanno nāsetabbo’ti vuttaṃ, upasampannassa pana pacchā upakkamena upasampadāpi na vigacchatī’’ti, taṃ na yuttaṃ. Yadaggena hi pabbajjato pubbe upakkamena abhabbo hoti, tadaggena pacchāpi hotīti vīmaṃsitvā gahetabbaṃ.
இத்த²த்தாதி³ பா⁴வோ நத்தி² ஏதஸ்ஸாதி அபா⁴வகோ. பப்³ப³ஜ்ஜா ந வாரிதாதி எத்த² பப்³ப³ஜ்ஜாக³ஹணேனேவ உபஸம்பதா³பி க³ஹிதா. தேனாஹ ‘‘யஸ்ஸ செத்த² பப்³ப³ஜ்ஜா வாரிதா’’திஆதி³. தஸ்மிங்யேவஸ்ஸ பக்கே² பப்³ப³ஜ்ஜா வாரிதாதி எத்த² பன அபண்ட³கபக்கே²பி பப்³ப³ஜ்ஜாமத்தமேவ லப⁴தி, உபஸம்பதா³ பன ததா³பி ந வட்டதி, பண்ட³கபக்கே² பன ஆக³தே லிங்க³னாஸனாய நாஸேதப்³போ³தி வேதி³தப்³ப³ங்.
Itthattādi bhāvo natthi etassāti abhāvako. Pabbajjā na vāritāti ettha pabbajjāgahaṇeneva upasampadāpi gahitā. Tenāha ‘‘yassa cettha pabbajjā vāritā’’tiādi. Tasmiṃyevassa pakkhe pabbajjā vāritāti ettha pana apaṇḍakapakkhepi pabbajjāmattameva labhati, upasampadā pana tadāpi na vaṭṭati, paṇḍakapakkhe pana āgate liṅganāsanāya nāsetabboti veditabbaṃ.
பண்ட³கவத்து²கதா²வண்ணனா நிட்டி²தா.
Paṇḍakavatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 47. பண்ட³கவத்து² • 47. Paṇḍakavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பண்ட³கவத்து²கதா² • Paṇḍakavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பண்ட³கவத்து²கதா²வண்ணனா • Paṇḍakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பண்ட³கவத்து²கதா²வண்ணனா • Paṇḍakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 47. பண்ட³கவத்து²கதா² • 47. Paṇḍakavatthukathā
