| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
পণ্ডকৰত্থুকথাৰণ্ণনা
Paṇḍakavatthukathāvaṇṇanā
১০৯. পণ্ডকৰত্থুস্মিং আসিত্তউসূযপক্খপণ্ডকা তযোপি পুরিসভাৰলিঙ্গাদিযুত্তা অহেতুকপটিসন্ধিকা, তে চ কিলেসপরিযুট্ঠানস্স বলৰতায নপুংসকপণ্ডকসদিসত্তা ‘‘পণ্ডকা’’তি ৰুত্তা। তেসু আসিত্তউসূযপণ্ডকানং দ্ৰিন্নং কিলেসপরিযুট্ঠানং যোনিসোমনসিকারাদীহি ৰীতিক্কমতো নিৰারেতুম্পি সক্কা, তেন তে পব্বাজেতব্বা ৰুত্তা। পক্খপণ্ডকস্স পন কাল়পক্খেসু উম্মাদো ৰিয কিলেসপরিল়াহো অৰত্থরন্তো আগচ্ছতি, ৰীতিক্কমং পত্ৰা এৰ চ নিৰত্ততি। তস্মা সো তস্মিং পক্খে ন পব্বাজেতব্বোতি ৰুত্তো। তদেতং ৰিভাগং দস্সেতুং ‘‘যস্স পরেস’’ন্তিআদি ৰুত্তং। তত্থ আসিত্তস্সাতি মুখে আসিত্তস্স অত্তনোপি অসুচিমুচ্চনেন পরিল়াহো ৰূপসম্মতি। উসূযায উপ্পন্নাযাতি উসূযায ৰসেন অত্তনো সেৰেতুকামতারাগে উপ্পন্নে অসুচিমুত্তিযা পরিল়াহো ৰূপসম্মতি।
109. Paṇḍakavatthusmiṃ āsittausūyapakkhapaṇḍakā tayopi purisabhāvaliṅgādiyuttā ahetukapaṭisandhikā, te ca kilesapariyuṭṭhānassa balavatāya napuṃsakapaṇḍakasadisattā ‘‘paṇḍakā’’ti vuttā. Tesu āsittausūyapaṇḍakānaṃ dvinnaṃ kilesapariyuṭṭhānaṃ yonisomanasikārādīhi vītikkamato nivāretumpi sakkā, tena te pabbājetabbā vuttā. Pakkhapaṇḍakassa pana kāḷapakkhesu ummādo viya kilesapariḷāho avattharanto āgacchati, vītikkamaṃ patvā eva ca nivattati. Tasmā so tasmiṃ pakkhe na pabbājetabboti vutto. Tadetaṃ vibhāgaṃ dassetuṃ ‘‘yassa paresa’’ntiādi vuttaṃ. Tattha āsittassāti mukhe āsittassa attanopi asucimuccanena pariḷāho vūpasammati. Usūyāya uppannāyāti usūyāya vasena attano sevetukāmatārāge uppanne asucimuttiyā pariḷāho vūpasammati.
‘‘বীজানি অপনীতানী’’তি ৰুত্তত্তা বীজেসু ঠিতেসু নিমিত্তমত্তে অপনীতে পণ্ডকো ন হোতি। ভিক্খুনোপি অনাবাধপচ্চযা তদপনযনে থুল্লচ্চযমেৰ, ন পন পণ্ডকত্তং, বীজেসু পন অপনীতেসু অঙ্গজাতম্পি রাগেন কম্মনিযং ন হোতি, পুমভাৰো ৰিগচ্ছতি, মস্সুআদিপুরিসলিঙ্গম্পি উপসম্পদাপি ৰিগচ্ছতি, কিলেসপরিল়াহোপি দুন্নিৰারৰীতিক্কমো হোতি নপুংসকপণ্ডকস্স ৰিয। তস্মা ঈদিসো উপসম্পন্নোপি নাসেতব্বোতি ৰদন্তি। যদি এৰং কস্মা বীজুদ্ধরণে পারাজিকং ন পঞ্ঞত্তন্তি? এত্থ তাৰ কেচি ৰদন্তি ‘‘পঞ্ঞত্তমেৰেতং ভগৰতা ‘পণ্ডকো, ভিক্খৰে, অনুপসম্পন্নো ন উপসম্পাদেতব্বো, উপসম্পন্নো নাসেতব্বো’তি ৰুত্তত্তা’’তি। কেচি পন ‘‘যস্মা বীজুদ্ধরণক্খণে পণ্ডকো ন হোতি, তস্মা তস্মিং খণে পারাজিকং ন পঞ্ঞত্তং। যস্মা পন সো উদ্ধটবীজো ভিক্খু অপরেন সমযেন ৰুত্তনযেন পণ্ডকত্তং আপজ্জতি, অভাৰকো হোতি, উপসম্পদায অৰত্থু, ততো এৰ চস্স উপসম্পদা ৰিগচ্ছতি, তস্মা এস পণ্ডকত্তুপগমনকালতো পট্ঠায জাতিযা নপুংসকপণ্ডকেন সদ্ধিং যোজেত্ৰা ‘উপসম্পন্নো নাসেতব্বো’তি অভব্বোতি ৰুত্তো, ন ততো পুব্বে। অযঞ্চ কিঞ্চাপি সহেতুকো, ভাৰক্খযেন পনস্স অহেতুকসদিসতায মগ্গোপি ন উপ্পজ্জতী’’তি ৰদন্তি। অপরে পন ‘‘পব্বজ্জতো পুব্বে উপক্কমেন পণ্ডকভাৰমাপন্নং সন্ধায ‘উপসম্পন্নো নাসেতব্বো’তি ৰুত্তং, উপসম্পন্নস্স পন পচ্ছা উপক্কমেন উপসম্পদাপি ন ৰিগচ্ছতী’’তি, তং ন যুত্তং। যদগ্গেন হি পব্বজ্জতো পুব্বে উপক্কমেন অভব্বো হোতি, তদগ্গেন পচ্ছাপি হোতীতি ৰীমংসিত্ৰা গহেতব্বং।
‘‘Bījāni apanītānī’’ti vuttattā bījesu ṭhitesu nimittamatte apanīte paṇḍako na hoti. Bhikkhunopi anābādhapaccayā tadapanayane thullaccayameva, na pana paṇḍakattaṃ, bījesu pana apanītesu aṅgajātampi rāgena kammaniyaṃ na hoti, pumabhāvo vigacchati, massuādipurisaliṅgampi upasampadāpi vigacchati, kilesapariḷāhopi dunnivāravītikkamo hoti napuṃsakapaṇḍakassa viya. Tasmā īdiso upasampannopi nāsetabboti vadanti. Yadi evaṃ kasmā bījuddharaṇe pārājikaṃ na paññattanti? Ettha tāva keci vadanti ‘‘paññattamevetaṃ bhagavatā ‘paṇḍako, bhikkhave, anupasampanno na upasampādetabbo, upasampanno nāsetabbo’ti vuttattā’’ti. Keci pana ‘‘yasmā bījuddharaṇakkhaṇe paṇḍako na hoti, tasmā tasmiṃ khaṇe pārājikaṃ na paññattaṃ. Yasmā pana so uddhaṭabījo bhikkhu aparena samayena vuttanayena paṇḍakattaṃ āpajjati, abhāvako hoti, upasampadāya avatthu, tato eva cassa upasampadā vigacchati, tasmā esa paṇḍakattupagamanakālato paṭṭhāya jātiyā napuṃsakapaṇḍakena saddhiṃ yojetvā ‘upasampanno nāsetabbo’ti abhabboti vutto, na tato pubbe. Ayañca kiñcāpi sahetuko, bhāvakkhayena panassa ahetukasadisatāya maggopi na uppajjatī’’ti vadanti. Apare pana ‘‘pabbajjato pubbe upakkamena paṇḍakabhāvamāpannaṃ sandhāya ‘upasampanno nāsetabbo’ti vuttaṃ, upasampannassa pana pacchā upakkamena upasampadāpi na vigacchatī’’ti, taṃ na yuttaṃ. Yadaggena hi pabbajjato pubbe upakkamena abhabbo hoti, tadaggena pacchāpi hotīti vīmaṃsitvā gahetabbaṃ.
ইত্থত্তাদি ভাৰো নত্থি এতস্সাতি অভাৰকো। পব্বজ্জা ন ৰারিতাতি এত্থ পব্বজ্জাগহণেনেৰ উপসম্পদাপি গহিতা। তেনাহ ‘‘যস্স চেত্থ পব্বজ্জা ৰারিতা’’তিআদি। তস্মিংযেৰস্স পক্খে পব্বজ্জা ৰারিতাতি এত্থ পন অপণ্ডকপক্খেপি পব্বজ্জামত্তমেৰ লভতি, উপসম্পদা পন তদাপি ন ৰট্টতি, পণ্ডকপক্খে পন আগতে লিঙ্গনাসনায নাসেতব্বোতি ৰেদিতব্বং।
Itthattādi bhāvo natthi etassāti abhāvako. Pabbajjā na vāritāti ettha pabbajjāgahaṇeneva upasampadāpi gahitā. Tenāha ‘‘yassa cettha pabbajjā vāritā’’tiādi. Tasmiṃyevassa pakkhe pabbajjā vāritāti ettha pana apaṇḍakapakkhepi pabbajjāmattameva labhati, upasampadā pana tadāpi na vaṭṭati, paṇḍakapakkhe pana āgate liṅganāsanāya nāsetabboti veditabbaṃ.
পণ্ডকৰত্থুকথাৰণ্ণনা নিট্ঠিতা।
Paṇḍakavatthukathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৪৭. পণ্ডকৰত্থু • 47. Paṇḍakavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পণ্ডকৰত্থুকথা • Paṇḍakavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পণ্ডকৰত্থুকথাৰণ্ণনা • Paṇḍakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পণ্ডকৰত্থুকথাৰণ্ণনা • Paṇḍakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪৭. পণ্ডকৰত্থুকথা • 47. Paṇḍakavatthukathā
