| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. பண்டி³தஸுத்தவண்ணனா
5. Paṇḍitasuttavaṇṇanā
45. பஞ்சமே பண்டி³தபஞ்ஞத்தானீதி பண்டி³தேஹி பஞ்ஞத்தானி கதி²தானி பஸத்தா²னி. ஸப்புரிஸபஞ்ஞத்தானீதி ஸப்புரிஸேஹி மஹாபுரிஸேஹி பஞ்ஞத்தானி கதி²தானி பஸத்தா²னி. அஹிங்ஸாதி கருணா சேவ கருணாபுப்³ப³பா⁴கோ³ ச. ஸங்யமோதி ஸீலஸங்யமோ. த³மோதி இந்த்³ரியஸங்வரோ, உபோஸத²வஸேன வா அத்தத³மனங், புண்ணோவாதே³ (ம॰ நி॰ 3.395 ஆத³யோ; ஸங்॰ நி॰ 4.88 ஆத³யோ) த³மோதி வுத்தா க²ந்திபி ஆளவகே (ஸங்॰ நி॰ 1.246; ஸு॰ நி॰ 183 ஆத³யோ) வுத்தா பஞ்ஞாபி இமஸ்மிங் ஸுத்தே வட்டதியேவ. மாதாபிது உபட்டா²னந்தி மாதாபிதூனங் ரக்க²னங் கோ³பனங் படிஜக்³க³னங். ஸந்தானந்தி அஞ்ஞத்த² பு³த்³த⁴பச்சேகபு³த்³த⁴அரியஸாவகா ஸந்தோ நாம, இத⁴ பன மாதாபிதுஉபட்டா²கா அதி⁴ப்பேதா. தஸ்மா உத்தமட்டே²ன ஸந்தானங் , ஸெட்ட²சரியட்டே²ன ப்³ரஹ்மசாரீனங். இத³ங் மாதாபிதுஉபட்டா²னங் ஸப்³பி⁴ உபஞ்ஞாதந்தி ஏவமெத்த² அத்தோ² த³ட்ட²ப்³போ³. ஸதங் ஏதானி டா²னானீதி ஸந்தானங் உத்தமபுரிஸானங் ஏதானி டா²னானி காரணானி. அரியோ த³ஸ்ஸனஸம்பன்னோதி இத⁴ இமேஸங்யேவ திண்ணங் டா²னானங் காரணேன அரியோ சேவ த³ஸ்ஸனஸம்பன்னோ ச வேதி³தப்³போ³, ந பு³த்³தா⁴த³யோ ந ஸோதாபன்னா. அத² வா ஸதங் ஏதானி டா²னானீதி மாதுபட்டா²னங் பிதுபட்டா²னந்தி ஏதானி டா²னானி ஸந்தானங் உத்தமபுரிஸானங் காரணானீதி ஏவங் மாதாபிதுஉபட்டா²கவஸேன இமிஸ்ஸா கா³தா²ய அத்தோ² வேதி³தப்³போ³. மாதாபிதுஉபட்டா²கோயேவ ஹி இத⁴ ‘‘அரியோ த³ஸ்ஸனஸம்பன்னோ’’தி வுத்தோ. ஸ லோகங் ப⁴ஜதே ஸிவந்தி ஸோ கே²மங் தே³வலோகங் க³ச்ச²தீதி.
45. Pañcame paṇḍitapaññattānīti paṇḍitehi paññattāni kathitāni pasatthāni. Sappurisapaññattānīti sappurisehi mahāpurisehi paññattāni kathitāni pasatthāni. Ahiṃsāti karuṇā ceva karuṇāpubbabhāgo ca. Saṃyamoti sīlasaṃyamo. Damoti indriyasaṃvaro, uposathavasena vā attadamanaṃ, puṇṇovāde (ma. ni. 3.395 ādayo; saṃ. ni. 4.88 ādayo) damoti vuttā khantipi āḷavake (saṃ. ni. 1.246; su. ni. 183 ādayo) vuttā paññāpi imasmiṃ sutte vaṭṭatiyeva. Mātāpitu upaṭṭhānanti mātāpitūnaṃ rakkhanaṃ gopanaṃ paṭijagganaṃ. Santānanti aññattha buddhapaccekabuddhaariyasāvakā santo nāma, idha pana mātāpituupaṭṭhākā adhippetā. Tasmā uttamaṭṭhena santānaṃ , seṭṭhacariyaṭṭhena brahmacārīnaṃ. Idaṃ mātāpituupaṭṭhānaṃ sabbhi upaññātanti evamettha attho daṭṭhabbo. Sataṃ etāni ṭhānānīti santānaṃ uttamapurisānaṃ etāni ṭhānāni kāraṇāni. Ariyo dassanasampannoti idha imesaṃyeva tiṇṇaṃ ṭhānānaṃ kāraṇena ariyo ceva dassanasampanno ca veditabbo, na buddhādayo na sotāpannā. Atha vā sataṃ etāni ṭhānānīti mātupaṭṭhānaṃ pitupaṭṭhānanti etāni ṭhānāni santānaṃ uttamapurisānaṃ kāraṇānīti evaṃ mātāpituupaṭṭhākavasena imissā gāthāya attho veditabbo. Mātāpituupaṭṭhākoyeva hi idha ‘‘ariyo dassanasampanno’’ti vutto. Sa lokaṃ bhajate sivanti so khemaṃ devalokaṃ gacchatīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. பண்டி³தஸுத்தங் • 5. Paṇḍitasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. பண்டி³தஸுத்தவண்ணனா • 5. Paṇḍitasuttavaṇṇanā
