| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. பண்டி³தஸுத்தவண்ணனா
5. Paṇḍitasuttavaṇṇanā
45. பஞ்சமே பண்டி³தபஞ்ஞத்தானீதி பண்டி³தேஹி பட²மங் பஞ்ஞத்தானி. கதி²தானீதி ஸெய்யஸோ கதி²தானி. மஹாபுரிஸேஹீதி பு³த்³த⁴போ³தி⁴ஸத்தேஹி. கருணாதி கருணாசேதோவிமுத்தி வுத்தா. புப்³ப³பா⁴கோ³தி தஸ்ஸ உபசாரோ. த³மோதி இந்த்³ரியஸங்வரோ ‘‘மனச்ச²ட்டா²னங் இந்த்³ரியானங் த³மன’’ந்தி கத்வா. அத்தத³மனந்தி சித்தத³மனங். புண்ணோவாதே³ (ம॰ நி॰ 3.396) ‘‘ஸக்கி²ஸ்ஸஸி கோ², த்வங் புண்ண, இமினா த³மூபஸமேனா’’தி ஆக³தத்தா த³மோதி வுத்தா க²ந்திபி. ஆளவகே ஆளவகஸுத்தே (ஸங்॰ நி॰ 1.246; ஸு॰ நி॰ 190) ‘‘ஸச்சா த³மா சாகா³’’தி ஏவங் வுத்தா பஞ்ஞாபி இமஸ்மிங் ஸுத்தே ‘‘த³மோ’’தி வத்துங் வட்டதி. ரக்க²னங் கோ³பனங் படிஜக்³க³னந்தி மாதாபிதூனங் மனுஸ்ஸாமனுஸ்ஸகதூபத்³த³வதோ ரக்க²னங், ப்³யாதி⁴ஆதி³அனத்த²தோ கோ³பனங், கா⁴ஸச்சா²த³னாதீ³ஹி வெய்யாவச்சகரணேன படிஜக்³க³னங். ஸந்தோ நாம ஸப்³ப³கிலேஸத³ரத²பரிளாஹூபஸமேன உபஸந்தகாயவசீஸமாசாரதாய ச. உத்தமட்டே²ன ஸந்தானந்தி மத்தெய்யதாதீ³ஹி ஸெட்ட²ட்டே²ன ஸந்தானங்.
45. Pañcame paṇḍitapaññattānīti paṇḍitehi paṭhamaṃ paññattāni. Kathitānīti seyyaso kathitāni. Mahāpurisehīti buddhabodhisattehi. Karuṇāti karuṇācetovimutti vuttā. Pubbabhāgoti tassa upacāro. Damoti indriyasaṃvaro ‘‘manacchaṭṭhānaṃ indriyānaṃ damana’’nti katvā. Attadamananti cittadamanaṃ. Puṇṇovāde (ma. ni. 3.396) ‘‘sakkhissasi kho, tvaṃ puṇṇa, iminā damūpasamenā’’ti āgatattā damoti vuttā khantipi. Āḷavake āḷavakasutte (saṃ. ni. 1.246; su. ni. 190) ‘‘saccā damā cāgā’’ti evaṃ vuttā paññāpi imasmiṃ sutte ‘‘damo’’ti vattuṃ vaṭṭati. Rakkhanaṃ gopanaṃ paṭijaggananti mātāpitūnaṃ manussāmanussakatūpaddavato rakkhanaṃ, byādhiādianatthato gopanaṃ, ghāsacchādanādīhi veyyāvaccakaraṇena paṭijagganaṃ. Santo nāma sabbakilesadarathapariḷāhūpasamena upasantakāyavacīsamācāratāya ca. Uttamaṭṭhena santānanti matteyyatādīhi seṭṭhaṭṭhena santānaṃ.
இத⁴ இமேஸங்யேவ திண்ணங் டா²னானங் கரணேனாதி இமஸ்மிங் ஸுத்தே ஆக³தானங் திண்ணங் டா²னானங் கரணேன நிப்³ப³த்தனேன. ஏதானி…பே॰… காரணானீதி மாதுபட்டா²னங் பிதுபட்டா²னந்தி ஏதானி த்³வே உத்தமபுரிஸானங் காரணானி. உத்தமகிச்சகரணேன ஹி மாதாபிதுஉபட்டா²கா ‘‘உத்தமபுரிஸா’’தி வுத்தா. தேனாஹ ‘‘மாதாபிது…பே॰… வுத்தோ’’தி. அனுபத்³த³வபா⁴வேன கே²மங்.
Idha imesaṃyeva tiṇṇaṃ ṭhānānaṃ karaṇenāti imasmiṃ sutte āgatānaṃ tiṇṇaṃ ṭhānānaṃ karaṇena nibbattanena. Etāni…pe… kāraṇānīti mātupaṭṭhānaṃ pitupaṭṭhānanti etāni dve uttamapurisānaṃ kāraṇāni. Uttamakiccakaraṇena hi mātāpituupaṭṭhākā ‘‘uttamapurisā’’ti vuttā. Tenāha ‘‘mātāpitu…pe… vutto’’ti. Anupaddavabhāvena khemaṃ.
பண்டி³தஸுத்தவண்ணனா நிட்டி²தா.
Paṇḍitasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. பண்டி³தஸுத்தங் • 5. Paṇḍitasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. பண்டி³தஸுத்தவண்ணனா • 5. Paṇḍitasuttavaṇṇanā
