| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৫. পণ্ডিতসুত্তৰণ্ণনা
5. Paṇḍitasuttavaṇṇanā
৪৫. পঞ্চমে পণ্ডিতপঞ্ঞত্তানীতি পণ্ডিতেহি পঞ্ঞত্তানি কথিতানি পসত্থানি। সপ্পুরিসপঞ্ঞত্তানীতি সপ্পুরিসেহি মহাপুরিসেহি পঞ্ঞত্তানি কথিতানি পসত্থানি। অহিংসাতি করুণা চেৰ করুণাপুব্বভাগো চ। সংযমোতি সীলসংযমো। দমোতি ইন্দ্রিযসংৰরো, উপোসথৰসেন ৰা অত্তদমনং, পুণ্ণোৰাদে (ম॰ নি॰ ৩.৩৯৫ আদযো; সং॰ নি॰ ৪.৮৮ আদযো) দমোতি ৰুত্তা খন্তিপি আল়ৰকে (সং॰ নি॰ ১.২৪৬; সু॰ নি॰ ১৮৩ আদযো) ৰুত্তা পঞ্ঞাপি ইমস্মিং সুত্তে ৰট্টতিযেৰ। মাতাপিতু উপট্ঠানন্তি মাতাপিতূনং রক্খনং গোপনং পটিজগ্গনং। সন্তানন্তি অঞ্ঞত্থ বুদ্ধপচ্চেকবুদ্ধঅরিযসাৰকা সন্তো নাম, ইধ পন মাতাপিতুউপট্ঠাকা অধিপ্পেতা। তস্মা উত্তমট্ঠেন সন্তানং , সেট্ঠচরিযট্ঠেন ব্রহ্মচারীনং। ইদং মাতাপিতুউপট্ঠানং সব্ভি উপঞ্ঞাতন্তি এৰমেত্থ অত্থো দট্ঠব্বো। সতং এতানি ঠানানীতি সন্তানং উত্তমপুরিসানং এতানি ঠানানি কারণানি। অরিযো দস্সনসম্পন্নোতি ইধ ইমেসংযেৰ তিণ্ণং ঠানানং কারণেন অরিযো চেৰ দস্সনসম্পন্নো চ ৰেদিতব্বো, ন বুদ্ধাদযো ন সোতাপন্না। অথ ৰা সতং এতানি ঠানানীতি মাতুপট্ঠানং পিতুপট্ঠানন্তি এতানি ঠানানি সন্তানং উত্তমপুরিসানং কারণানীতি এৰং মাতাপিতুউপট্ঠাকৰসেন ইমিস্সা গাথায অত্থো ৰেদিতব্বো। মাতাপিতুউপট্ঠাকোযেৰ হি ইধ ‘‘অরিযো দস্সনসম্পন্নো’’তি ৰুত্তো। স লোকং ভজতে সিৰন্তি সো খেমং দেৰলোকং গচ্ছতীতি।
45. Pañcame paṇḍitapaññattānīti paṇḍitehi paññattāni kathitāni pasatthāni. Sappurisapaññattānīti sappurisehi mahāpurisehi paññattāni kathitāni pasatthāni. Ahiṃsāti karuṇā ceva karuṇāpubbabhāgo ca. Saṃyamoti sīlasaṃyamo. Damoti indriyasaṃvaro, uposathavasena vā attadamanaṃ, puṇṇovāde (ma. ni. 3.395 ādayo; saṃ. ni. 4.88 ādayo) damoti vuttā khantipi āḷavake (saṃ. ni. 1.246; su. ni. 183 ādayo) vuttā paññāpi imasmiṃ sutte vaṭṭatiyeva. Mātāpitu upaṭṭhānanti mātāpitūnaṃ rakkhanaṃ gopanaṃ paṭijagganaṃ. Santānanti aññattha buddhapaccekabuddhaariyasāvakā santo nāma, idha pana mātāpituupaṭṭhākā adhippetā. Tasmā uttamaṭṭhena santānaṃ , seṭṭhacariyaṭṭhena brahmacārīnaṃ. Idaṃ mātāpituupaṭṭhānaṃ sabbhi upaññātanti evamettha attho daṭṭhabbo. Sataṃ etāni ṭhānānīti santānaṃ uttamapurisānaṃ etāni ṭhānāni kāraṇāni. Ariyo dassanasampannoti idha imesaṃyeva tiṇṇaṃ ṭhānānaṃ kāraṇena ariyo ceva dassanasampanno ca veditabbo, na buddhādayo na sotāpannā. Atha vā sataṃ etāni ṭhānānīti mātupaṭṭhānaṃ pitupaṭṭhānanti etāni ṭhānāni santānaṃ uttamapurisānaṃ kāraṇānīti evaṃ mātāpituupaṭṭhākavasena imissā gāthāya attho veditabbo. Mātāpituupaṭṭhākoyeva hi idha ‘‘ariyo dassanasampanno’’ti vutto. Sa lokaṃ bhajate sivanti so khemaṃ devalokaṃ gacchatīti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৫. পণ্ডিতসুত্তং • 5. Paṇḍitasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৫. পণ্ডিতসুত্তৰণ্ণনা • 5. Paṇḍitasuttavaṇṇanā
