| Library / Tipiṭaka / তিপিটক • Tipiṭaka / ধম্মপদপাল়ি • Dhammapadapāḷi |
৬. পণ্ডিতৰগ্গো
6. Paṇḍitavaggo
৭৬.
76.
নিধীনংৰ পৰত্তারং, যং পস্সে ৰজ্জদস্সিনং।
Nidhīnaṃva pavattāraṃ, yaṃ passe vajjadassinaṃ;
নিগ্গয্হৰাদিং মেধাৰিং, তাদিসং পণ্ডিতং ভজে।
Niggayhavādiṃ medhāviṃ, tādisaṃ paṇḍitaṃ bhaje;
তাদিসং ভজমানস্স, সেয্যো হোতি ন পাপিযো॥
Tādisaṃ bhajamānassa, seyyo hoti na pāpiyo.
৭৭.
77.
ওৰদেয্যানুসাসেয্য, অসব্ভা চ নিৰারযে।
Ovadeyyānusāseyya, asabbhā ca nivāraye;
সতঞ্হি সো পিযো হোতি, অসতং হোতি অপ্পিযো॥
Satañhi so piyo hoti, asataṃ hoti appiyo.
৭৮.
78.
ন ভজে পাপকে মিত্তে, ন ভজে পুরিসাধমে।
Na bhaje pāpake mitte, na bhaje purisādhame;
ভজেথ মিত্তে কল্যাণে, ভজেথ পুরিসুত্তমে॥
Bhajetha mitte kalyāṇe, bhajetha purisuttame.
৭৯.
79.
ধম্মপীতি সুখং সেতি, ৰিপ্পসন্নেন চেতসা।
Dhammapīti sukhaṃ seti, vippasannena cetasā;
অরিযপ্পৰেদিতে ধম্মে, সদা রমতি পণ্ডিতো॥
Ariyappavedite dhamme, sadā ramati paṇḍito.
৮০.
80.
উদকঞ্হি নযন্তি নেত্তিকা, উসুকারা নমযন্তি 1 তেজনং।
Udakañhi nayanti nettikā, usukārā namayanti 2 tejanaṃ;
দারুং নমযন্তি তচ্ছকা, অত্তানং দমযন্তি পণ্ডিতা॥
Dāruṃ namayanti tacchakā, attānaṃ damayanti paṇḍitā.
৮১.
81.
এৰং নিন্দাপসংসাসু, ন সমিঞ্জন্তি পণ্ডিতা॥
Evaṃ nindāpasaṃsāsu, na samiñjanti paṇḍitā.
৮২.
82.
যথাপি রহদো গম্ভীরো, ৰিপ্পসন্নো অনাৰিলো।
Yathāpi rahado gambhīro, vippasanno anāvilo;
এৰং ধম্মানি সুত্ৰান, ৰিপ্পসীদন্তি পণ্ডিতা॥
Evaṃ dhammāni sutvāna, vippasīdanti paṇḍitā.
৮৩.
83.
সব্বত্থ ৰে সপ্পুরিসা চজন্তি, ন কামকামা লপযন্তি সন্তো।
Sabbattha ve sappurisā cajanti, na kāmakāmā lapayanti santo;
সুখেন ফুট্ঠা অথ ৰা দুখেন, ন উচ্চাৰচং 5 পণ্ডিতা দস্সযন্তি॥
Sukhena phuṭṭhā atha vā dukhena, na uccāvacaṃ 6 paṇḍitā dassayanti.
৮৪.
84.
ন অত্তহেতু ন পরস্স হেতু, ন পুত্তমিচ্ছে ন ধনং ন রট্ঠং।
Na attahetu na parassa hetu, na puttamicche na dhanaṃ na raṭṭhaṃ;
ন ইচ্ছেয্য 7 অধম্মেন সমিদ্ধিমত্তনো, স সীলৰা পঞ্ঞৰা ধম্মিকো সিযা॥
Na iccheyya 8 adhammena samiddhimattano, sa sīlavā paññavā dhammiko siyā.
৮৫.
85.
অপ্পকা তে মনুস্সেসু, যে জনা পারগামিনো।
Appakā te manussesu, ye janā pāragāmino;
অথাযং ইতরা পজা, তীরমেৰানুধাৰতি॥
Athāyaṃ itarā pajā, tīramevānudhāvati.
৮৬.
86.
যে চ খো সম্মদক্খাতে, ধম্মে ধম্মানুৰত্তিনো।
Ye ca kho sammadakkhāte, dhamme dhammānuvattino;
তে জনা পারমেস্সন্তি, মচ্চুধেয্যং সুদুত্তরং॥
Te janā pāramessanti, maccudheyyaṃ suduttaraṃ.
৮৭.
87.
কণ্হং ধম্মং ৰিপ্পহায, সুক্কং ভাৰেথ পণ্ডিতো।
Kaṇhaṃ dhammaṃ vippahāya, sukkaṃ bhāvetha paṇḍito;
ওকা অনোকমাগম্ম, ৰিৰেকে যত্থ দূরমং॥
Okā anokamāgamma, viveke yattha dūramaṃ.
৮৮.
88.
তত্রাভিরতিমিচ্ছেয্য, হিত্ৰা কামে অকিঞ্চনো।
Tatrābhiratimiccheyya, hitvā kāme akiñcano;
৮৯.
89.
যেসং সম্বোধিযঙ্গেসু, সম্মা চিত্তং সুভাৰিতং।
Yesaṃ sambodhiyaṅgesu, sammā cittaṃ subhāvitaṃ;
আদানপটিনিস্সগ্গে, অনুপাদায যে রতা।
Ādānapaṭinissagge, anupādāya ye ratā;
খীণাসৰা জুতিমন্তো, তে লোকে পরিনিব্বুতা॥
Khīṇāsavā jutimanto, te loke parinibbutā.
পণ্ডিতৰগ্গো ছট্ঠো নিট্ঠিতো।
Paṇḍitavaggo chaṭṭho niṭṭhito.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ধম্মপদ-অট্ঠকথা • Dhammapada-aṭṭhakathā / ৬. পণ্ডিতৰগ্গো • 6. Paṇḍitavaggo
