| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
3. பஞ்ஹாபுச்ச²கவண்ணனா
3. Pañhāpucchakavaṇṇanā
150. இதா³னி பஞ்ஹாபுச்ச²கங் ஹோதி. தத்த² பஞ்ஹாபுச்ச²னே பஞ்சன்னங் க²ந்தா⁴னங் ‘‘கதிகுஸலா? கதிஅகுஸலா? கதிஅப்³யாகதா’’திஆதி³னா நயேன யங் லப்³ப⁴தி, யஞ்ச ந லப்³ப⁴தி, தங் ஸப்³ப³ங் புச்சி²த்வா விஸ்ஸஜ்ஜனே ‘‘ரூபக்க²ந்தோ⁴ அப்³யாகதோ’’திஆதி³னா நயேன யங் லப்³ப⁴தி ததே³வ உத்³த⁴டந்தி வேதி³தப்³ப³ங். யத்த² யத்த² ச ‘ஏகோ க²ந்தோ⁴’தி வா ‘த்³வே க²ந்தா⁴’தி வா பரிச்சே²த³ங் அகத்வா ‘‘ஸியா உப்பன்னா, ஸியா அனுப்பன்னா’’திஆதி³னா நயேன தந்தி ட²பிதா, தத்த² தத்த² பஞ்சன்னம்பி க²ந்தா⁴னங் க³ஹணங் வேதி³தப்³ப³ங். ஸேஸோ தேஸங் தேஸங் க²ந்தா⁴னங் குஸலாதி³விபா⁴கோ³ ஹெட்டா² த⁴ம்மஸங்க³ஹட்ட²கதா²யங் (த⁴॰ ஸ॰ அட்ட²॰ 985) வுத்தோயேவ.
150. Idāni pañhāpucchakaṃ hoti. Tattha pañhāpucchane pañcannaṃ khandhānaṃ ‘‘katikusalā? Katiakusalā? Katiabyākatā’’tiādinā nayena yaṃ labbhati, yañca na labbhati, taṃ sabbaṃ pucchitvā vissajjane ‘‘rūpakkhandho abyākato’’tiādinā nayena yaṃ labbhati tadeva uddhaṭanti veditabbaṃ. Yattha yattha ca ‘eko khandho’ti vā ‘dve khandhā’ti vā paricchedaṃ akatvā ‘‘siyā uppannā, siyā anuppannā’’tiādinā nayena tanti ṭhapitā, tattha tattha pañcannampi khandhānaṃ gahaṇaṃ veditabbaṃ. Seso tesaṃ tesaṃ khandhānaṃ kusalādivibhāgo heṭṭhā dhammasaṅgahaṭṭhakathāyaṃ (dha. sa. aṭṭha. 985) vuttoyeva.
ஆரம்மணத்திகேஸு பன சத்தாரோ க²ந்தா⁴ பஞ்சபண்ணாஸ காமாவசரத⁴ம்மே ஆரப்³ப⁴ ரஜ்ஜந்தஸ்ஸ து³ஸ்ஸந்தஸ்ஸ முய்ஹந்தஸ்ஸ ஸங்வரந்தஸ்ஸ ஸம்மஸந்தஸ்ஸ பச்சவெக்க²ந்தஸ்ஸ ச பரித்தாரம்மணா ஹொந்தி, ஸத்தவீஸதி ரூபாரூபாவசரத⁴ம்மே ஆரப்³ப⁴ ரஜ்ஜந்தஸ்ஸ து³ஸ்ஸந்தஸ்ஸ முய்ஹந்தஸ்ஸ ஸங்வரந்தஸ்ஸ பரிக்³க³ஹங் பட்ட²பெந்தஸ்ஸ மஹக்³க³தாரம்மணா, மக்³க³ப²லனிப்³பா³னானி பச்சவெக்க²ந்தஸ்ஸ அப்பமாணாரம்மணா, பஞ்ஞத்திங் பச்சவெக்க²ணகாலே நவத்தப்³பா³ரம்மணாதி.
Ārammaṇattikesu pana cattāro khandhā pañcapaṇṇāsa kāmāvacaradhamme ārabbha rajjantassa dussantassa muyhantassa saṃvarantassa sammasantassa paccavekkhantassa ca parittārammaṇā honti, sattavīsati rūpārūpāvacaradhamme ārabbha rajjantassa dussantassa muyhantassa saṃvarantassa pariggahaṃ paṭṭhapentassa mahaggatārammaṇā, maggaphalanibbānāni paccavekkhantassa appamāṇārammaṇā, paññattiṃ paccavekkhaṇakāle navattabbārammaṇāti.
தேயேவ ஸெக்கா²ஸெக்கா²னங் மக்³க³பச்சவெக்க²ணகாலே மக்³கா³ரம்மணா ஹொந்தி, மக்³க³காலே ஸஹஜாதஹேதுனா மக்³க³ஹேதுகா, மக்³க³ங் க³ருங் கத்வா பச்சவெக்க²ணகாலே ஆரம்மணாதி⁴பதினா மக்³கா³தி⁴பதினோ , வீரியஜெட்ட²கங் வா வீமங்ஸஜெட்ட²கங் வா மக்³க³ங் பா⁴வெந்தஸ்ஸ ஸஹஜாதாதி⁴பதினா மக்³கா³தி⁴பதினோ, ச²ந்த³ஜெட்ட²கங் பன சித்தஜெட்ட²கங் வா பா⁴வெந்தஸ்ஸ நவத்தப்³பா³ரம்மணா நாம ஹொந்தி.
Teyeva sekkhāsekkhānaṃ maggapaccavekkhaṇakāle maggārammaṇā honti, maggakāle sahajātahetunā maggahetukā, maggaṃ garuṃ katvā paccavekkhaṇakāle ārammaṇādhipatinā maggādhipatino , vīriyajeṭṭhakaṃ vā vīmaṃsajeṭṭhakaṃ vā maggaṃ bhāventassa sahajātādhipatinā maggādhipatino, chandajeṭṭhakaṃ pana cittajeṭṭhakaṃ vā bhāventassa navattabbārammaṇā nāma honti.
அதீதானி பன க²ந்த⁴தா⁴துஆயதனானி ஆரப்³ப⁴ ரஜ்ஜந்தஸ்ஸ து³ஸ்ஸந்தஸ்ஸ முய்ஹந்தஸ்ஸ ஸங்வரந்தஸ்ஸ பரிக்³க³ஹங் பட்ட²பெந்தஸ்ஸ அதீதாரம்மணா ஹொந்தி, அனாக³தானி ஆரப்³ப⁴ அனாக³தாரம்மணா ஹொந்தி, பச்சுப்பன்னானி ஆரப்³ப⁴ பச்சுப்பன்னாரம்மணா ஹொந்தி, பஞ்ஞத்திங் வா நிப்³பா³னங் வா பச்சவெக்க²ந்தஸ்ஸ நவத்தப்³பா³ரம்மணா ஹொந்தி.
Atītāni pana khandhadhātuāyatanāni ārabbha rajjantassa dussantassa muyhantassa saṃvarantassa pariggahaṃ paṭṭhapentassa atītārammaṇā honti, anāgatāni ārabbha anāgatārammaṇā honti, paccuppannāni ārabbha paccuppannārammaṇā honti, paññattiṃ vā nibbānaṃ vā paccavekkhantassa navattabbārammaṇā honti.
ததா² அத்தனோ க²ந்த⁴தா⁴துஆயதனானி ஆரப்³ப⁴ ரஜ்ஜந்தஸ்ஸ து³ஸ்ஸந்தஸ்ஸ முய்ஹந்தஸ்ஸ ஸங்வரந்தஸ்ஸ பரிக்³க³ஹங் பட்ட²பெந்தஸ்ஸ அஜ்ஜ²த்தாரம்மணா ஹொந்தி, பரேஸங் க²ந்த⁴தா⁴துஆயதனானி ஆரப்³ப⁴ ஏவங் பவத்தெந்தஸ்ஸ ப³ஹித்³தா⁴ரம்மணா, பண்ணத்தினிப்³பா³னபச்சவெக்க²ணகாலேபி ப³ஹித்³தா⁴ரம்மணாயேவ, காலேன அஜ்ஜ²த்தங் காலேன ப³ஹித்³தா⁴ த⁴ம்மேஸு ஏவங் பவத்தெந்தஸ்ஸ அஜ்ஜ²த்தப³ஹித்³தா⁴ரம்மணா, ஆகிஞ்சஞ்ஞாயதனகாலே நவத்தப்³பா³ரம்மணாதி வேதி³தப்³பா³.
Tathā attano khandhadhātuāyatanāni ārabbha rajjantassa dussantassa muyhantassa saṃvarantassa pariggahaṃ paṭṭhapentassa ajjhattārammaṇā honti, paresaṃ khandhadhātuāyatanāni ārabbha evaṃ pavattentassa bahiddhārammaṇā, paṇṇattinibbānapaccavekkhaṇakālepi bahiddhārammaṇāyeva, kālena ajjhattaṃ kālena bahiddhā dhammesu evaṃ pavattentassa ajjhattabahiddhārammaṇā, ākiñcaññāyatanakāle navattabbārammaṇāti veditabbā.
இதி ப⁴க³வா இமங் க²ந்த⁴விப⁴ங்க³ங் ஸுத்தந்தபா⁴ஜனீயாதி³வஸேன தயோ பரிவட்டே நீஹரித்வா பா⁴ஜெந்தோ த³ஸ்ஸேஸி. தீஸுபி ஹி பரிவட்டேஸு ஏகோவ பரிச்சே²தோ³. ரூபக்க²ந்தோ⁴ ஹி ஸப்³ப³த்த² காமாவசரோயேவ. சத்தாரோ க²ந்தா⁴ சதுபூ⁴மகா லோகியலோகுத்தரமிஸ்ஸகா கதி²தாதி.
Iti bhagavā imaṃ khandhavibhaṅgaṃ suttantabhājanīyādivasena tayo parivaṭṭe nīharitvā bhājento dassesi. Tīsupi hi parivaṭṭesu ekova paricchedo. Rūpakkhandho hi sabbattha kāmāvacaroyeva. Cattāro khandhā catubhūmakā lokiyalokuttaramissakā kathitāti.
ஸம்மோஹவினோத³னியா விப⁴ங்க³ட்ட²கதா²ய
Sammohavinodaniyā vibhaṅgaṭṭhakathāya
க²ந்த⁴விப⁴ங்க³வண்ணனா நிட்டி²தா.
Khandhavibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 1. க²ந்த⁴விப⁴ங்கோ³ • 1. Khandhavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 1. க²ந்த⁴விப⁴ங்கோ³ • 1. Khandhavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 1. க²ந்த⁴விப⁴ங்கோ³ • 1. Khandhavibhaṅgo
