| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
3. பஞ்ஹாபுச்ச²கவண்ணனா
3. Pañhāpucchakavaṇṇanā
215. பஞ்ஹாபுச்ச²கே சதுன்னம்பி ஸச்சானங் க²ந்த⁴விப⁴ங்கே³ வுத்தனயானுஸாரேனேவ குஸலாதி³பா⁴வோ வேதி³தப்³போ³. ஆரம்மணத்திகேஸு பன ஸமுத³யஸச்சங் காமாவசரத⁴ம்மே அஸ்ஸாதெ³ந்தஸ்ஸ பரித்தாரம்மணங் ஹோதி, மஹக்³க³தத⁴ம்மே அஸ்ஸாதெ³ந்தஸ்ஸ மஹக்³க³தாரம்மணங், பஞ்ஞத்திங் அஸ்ஸாதெ³ந்தஸ்ஸ நவத்தப்³பா³ரம்மணங். து³க்க²ஸச்சங் காமாவசரத⁴ம்மே ஆரப்³ப⁴ உப்பன்னங் பரித்தாரம்மணங், ரூபாரூபாவசரத⁴ம்மே ஆரப்³ப⁴ உப்பத்திகாலே மஹக்³க³தாரம்மணங், நவ லோகுத்தரத⁴ம்மே பச்சவெக்க²ணகாலே அப்பமாணாரம்மணங், பண்ணத்திங் பச்சவெக்க²ணகாலே நவத்தப்³பா³ரம்மணங். மக்³க³ஸச்சங் ஸஹஜாதஹேதுவஸேன ஸப்³ப³தா³பி மக்³க³ஹேதுகங் வீரியங் வா வீமங்ஸங் வா ஜெட்ட²கங் கத்வா மக்³க³பா⁴வனாகாலே மக்³கா³தி⁴பதி, ச²ந்த³சித்தேஸு அஞ்ஞதராதி⁴பதிகாலே நவத்தப்³ப³ங் நாம ஹோதி. து³க்க²ஸச்சங் அரியானங் மக்³க³பச்சவெக்க²ணகாலே மக்³கா³ரம்மணங், தேஸங்யேவ மக்³க³ங் க³ருங் கத்வா பச்சவெக்க²ணகாலே மக்³கா³தி⁴பதி, ஸேஸத⁴ம்மபச்சவெக்க²ணகாலே நவத்தப்³ப³ங் ஹோதி.
215. Pañhāpucchake catunnampi saccānaṃ khandhavibhaṅge vuttanayānusāreneva kusalādibhāvo veditabbo. Ārammaṇattikesu pana samudayasaccaṃ kāmāvacaradhamme assādentassa parittārammaṇaṃ hoti, mahaggatadhamme assādentassa mahaggatārammaṇaṃ, paññattiṃ assādentassa navattabbārammaṇaṃ. Dukkhasaccaṃ kāmāvacaradhamme ārabbha uppannaṃ parittārammaṇaṃ, rūpārūpāvacaradhamme ārabbha uppattikāle mahaggatārammaṇaṃ, nava lokuttaradhamme paccavekkhaṇakāle appamāṇārammaṇaṃ, paṇṇattiṃ paccavekkhaṇakāle navattabbārammaṇaṃ. Maggasaccaṃ sahajātahetuvasena sabbadāpi maggahetukaṃ vīriyaṃ vā vīmaṃsaṃ vā jeṭṭhakaṃ katvā maggabhāvanākāle maggādhipati, chandacittesu aññatarādhipatikāle navattabbaṃ nāma hoti. Dukkhasaccaṃ ariyānaṃ maggapaccavekkhaṇakāle maggārammaṇaṃ, tesaṃyeva maggaṃ garuṃ katvā paccavekkhaṇakāle maggādhipati, sesadhammapaccavekkhaṇakāle navattabbaṃ hoti.
த்³வே ஸச்சானீதி து³க்க²ஸமுத³யஸச்சானி. ஏதானி ஹி அதீதாதி³பே⁴தே³ த⁴ம்மே ஆரப்³ப⁴ உப்பத்திகாலே அதீதாதி³ஆரம்மணானி ஹொந்தி. ஸமுத³யஸச்சங் அஜ்ஜ²த்தாதி³பே⁴தே³ த⁴ம்மே அஸ்ஸாதெ³ந்தஸ்ஸ அஜ்ஜ²த்தாதி³ஆரம்மணங் ஹோதி, து³க்க²ஸச்சங் ஆகிஞ்சஞ்ஞாயதனகாலே நவத்தப்³பா³ரம்மணம்பீதி வேதி³தப்³ப³ங். இதி இமஸ்மிங் பஞ்ஹாபுச்ச²கே த்³வே ஸச்சானி லோகியானி ஹொந்தி, த்³வே லோகுத்தரானி. யதா² ச இமஸ்மிங், ஏவங் புரிமேஸுபி த்³வீஸு. ஸம்மாஸம்பு³த்³தே⁴ன ஹி தீஸுபி ஸுத்தந்தபா⁴ஜனீயாதீ³ஸு லோகியலோகுத்தரானேவ ஸச்சானி கதி²தானி. ஏவமயங் ஸச்சவிப⁴ங்கோ³பி தேபரிவட்டங் நீஹரித்வாவ பா⁴ஜெத்வா த³ஸ்ஸிதோதி.
Dve saccānīti dukkhasamudayasaccāni. Etāni hi atītādibhede dhamme ārabbha uppattikāle atītādiārammaṇāni honti. Samudayasaccaṃ ajjhattādibhede dhamme assādentassa ajjhattādiārammaṇaṃ hoti, dukkhasaccaṃ ākiñcaññāyatanakāle navattabbārammaṇampīti veditabbaṃ. Iti imasmiṃ pañhāpucchake dve saccāni lokiyāni honti, dve lokuttarāni. Yathā ca imasmiṃ, evaṃ purimesupi dvīsu. Sammāsambuddhena hi tīsupi suttantabhājanīyādīsu lokiyalokuttarāneva saccāni kathitāni. Evamayaṃ saccavibhaṅgopi teparivaṭṭaṃ nīharitvāva bhājetvā dassitoti.
ஸம்மோஹவினோத³னீயா விப⁴ங்க³ட்ட²கதா²ய
Sammohavinodanīyā vibhaṅgaṭṭhakathāya
ஸச்சவிப⁴ங்க³வண்ணனா நிட்டி²தா.
Saccavibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 4. ஸச்சவிப⁴ங்கோ³ • 4. Saccavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 4. ஸச்சவிப⁴ங்கோ³ • 4. Saccavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 4. ஸச்சவிப⁴ங்கோ³ • 4. Saccavibhaṅgo
